Ũngĩonania Ngatho Atĩa nĩ Ũndũ wa Ũkũũri?

1-2. Igongona rĩa Jesu rĩa ũkũũri rĩbatiĩ gũtũtindĩka gwĩka atĩa, na nĩkĩ? (2 Akorintho 5:​14, 15) (Ningĩ rora mbica.)

ŨNGĨKORŨO ũhatĩte mahiga-inĩ ma nyũmba ĩmomokete na mũndũ oke akũhonokie-rĩ, ũngĩigua atĩa kwerekera mũndũ ũcio? O na angĩkorũo nĩ harĩ andũ angĩ mahonokio, hatarĩ nganja no ũtigĩrĩre nĩ wera mũndũ ũcio ũrĩa wĩna ngatho nyingĩ na atĩ ndũkaariganĩrũo nĩ ũndũ ũcio agwĩkĩire.

² O ta ũrĩa gĩcunjĩ kĩrĩa kĩhĩtũku kĩonanĩtie, tũtingĩhota kwĩhonokia kuumana na mehia marĩa twagaire. No igongona rĩa Jesu rĩa ũkũũri no rĩtũhonokie na njĩra ya gũtũhotithia (1) kuoherũo mehia maitũ, (2) kũgĩa na kĩĩrĩgĩrĩro gĩa gũgaatuĩka akinyanĩru, na (3) kũiguithanio na Ngai. Nĩ ũndũ ũcio, tũrĩ na kĩĩrĩgĩrĩro gĩa gũgaatũũra tene na tene thĩinĩ wa thĩ njerũ. Kwoguo ũkũũri nĩ wonanagia atĩ Jesu nĩ endete andũ, na aamendete o na atanoka gũkũ thĩ. (Thim. 8:​30, 31) Mũtũmwo Paulo aaugire atĩ “wendo ũrĩa Kristo akoragwo naguo nĩ ũtũtindĩkaga.” (Thoma 2 Akorintho 5:​14, 15.) Ũguo nĩ kuuga atĩ wendo ũrĩa Jesu atuonetie nĩ ũbatiĩ gũtũtindĩka kuonania ngatho nĩ ũndũ wa igongona rĩake rĩa ũkũũri.

3. Njĩra cia kuonania ngatho nĩ ũndũ wa ũkũũri ingĩkorũo irĩ ngũrani nĩkĩ?

³ Ũkũũri ũgũgũtindĩka kuonania ngatho na njĩra ĩrĩkũ? Macokio maku no makorũo marĩ ngũrani na ma mũndũ ũngĩ. Nĩkĩ? Ta wĩcirie ngerekano ĩno: Ta tua atĩ harĩ na andũ atatũ marĩ taũni itiganĩte, no marathiĩ kũndũ kũmwe. Nĩguo makinye kũu, o mũndũ angĩbatara kũgera njĩra ngũrani na ya ũrĩa ũngĩ. Ũndũ ũmwe na ũcio, njĩra ĩrĩa ũngĩonania ngatho nayo nĩ ũndũ wa ũkũũri ĩraringana na ũrĩa ũrata waku hamwe na Jehova ũtariĩ ihinda-inĩ rĩrĩ. Nĩ ũndũ ũcio, thĩinĩ wa gĩcunjĩ gĩkĩ nĩ tũkwarĩrĩria ikundi ici ithatũ cia andũ: (1) arutwo a Bibilia, (2) Akristiano abatithie, na (3) arĩa matigĩte kũnyitanĩra na kĩũngano.

ARUTWO A BIBILIA

4. Jehova aiguaga atĩa kwerekera arutwo a Bibilia?

⁴ Angĩkorũo wĩ mũrutwo wa Bibilia, ririkana atĩ gũkorũo nĩ ũretĩkĩra kwĩruta ũhoro ũrĩa mwega kũronania ũrĩ ũmwe wa arĩa Jehova aragucĩrĩria nĩguo matuĩke arata ake. (Joh. 6:44; Atũm. 13:48) “Jehova nĩwe mũthuthuria wa ngoro.” Ũguo nĩ kuuga nĩ onaga ũkĩĩrutanĩria kwĩruta ũhoro wake, na nĩ akenaga kuona ũgĩka mogarũrũku nĩguo ũhote gũtũũra kũringana na ithimi ciake. (Thim. 17:3; 27:11) Ũkũũri nĩguo ũrakũhotithia kũgĩa na ũrata wa hakuhĩ hamwe na Jehova. (Rom. 5:​10, 11) Ndũkanariganĩrũo nĩ ũndũ ũcio.

5. Arutwo a Bibilia mangĩhũthĩra atĩa ũtaaro ũrĩa ũrĩ thĩinĩ wa Afilipi 3:16?

⁵ Inyuĩ arutwo a Bibilia, mũngĩonania ngatho atĩa nĩ ũndũ wa ũkũũri? Ũndũ ũmwe mũngĩka nĩ kũrũmĩrĩra ũtaaro ũyũ mũtũmwo Paulo aaheire Akristiano a Filipi: “Harĩa tũrĩkĩtie gũkinya-rĩ, nĩ tũthiĩi na mbere na mĩthiĩre ĩrĩa yagĩrĩire na njĩra o ĩyo.” (Afil. 3:16) Kwoguo mũtikareke ũndũ o na ũrĩkũ ũmũgirĩrĩrie gũthiĩ na mbere kũgerera njĩra-inĩ ya muoyo.—Mat. 7:14; Luk. 9:62.

6. Arutwo a Bibilia mangĩka atĩa mangĩritũhĩrũo gwĩtĩkia ũrutani mũna merutĩte kana gũtigana na mũtugo ũtarĩ mwega? (Gũcokerithia Maathani 30:​11-14) (Ningĩ rora mbica.)

⁶ Ĩ angĩkorũo nĩ ũraritũhĩrũo gwĩtĩkia ũrutani mũna wa Bibilia wĩrutĩte? No ũthuthurie ũrutani ũcio makĩria, na ũhoe Jehova agũteithie gũtaũkĩrũo wega nĩguo. (Thab. 86:11) Ũngĩona no ũraritũhĩrũo gũtaũkĩrũo nĩ ũrutani ũcio, no wambe ũtigane naguo, no ndũgatige kwĩruta Bibilia. Ĩ angĩkorũo nĩ ũraritũhĩrũo gũtigana na mũtugo ũkaananĩtio nĩ Bibilia? Ririkanaga atĩ Jehova ndangĩkwĩra wĩke ũndũ ũtangĩhota gwĩka. Kwoguo no ũhote gũtũũra kũringana na ithimi ciake. (Thoma Gũcokerithia Maathani 30:​11-14.) Ningĩ Jehova nĩ akwĩrĩire atĩ nĩ arĩgũteithagia. (Isa. 41:​10, 13; 1 Kor. 10:13) Kwoguo ndũgakue ngoro. Handũ ha gwĩciragia mũno ũhoro wa ũritũ ũrĩa ũracemania naguo, koragwo na ngatho nĩ ũndũ wa maũndũ marĩa mothe Jehova agwĩkĩire, na nĩ hamwe na kĩheo gĩa ũkũũri. O ũrĩa wendo waku harĩ Jehova ũgũthiĩ na mbere gũkũra, nĩ ũkuona atĩ “maathani make ti mũrigo.”—1 Joh. 5:3.a

7. Nĩ ũndũ ũrĩkũ andũ ethĩ arĩa mararererũo ũhoro-inĩ wa ma mangĩĩcũrania?

⁷ Ĩ inyuĩ andũ ethĩ arĩa mũrarererũo ũhoro-inĩ wa ma? O na inyuĩ mũrĩ arutwo a Bibilia. O na nĩ inyuĩ arutwo arĩa a bata mũno harĩ aciari anyu. Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.” (Jak. 4:8; 1 Maũ. 28:9) Ũngĩoya ikinya rĩa gũkuhĩrĩria Jehova, o nake nĩ egũgũkuhĩrĩria. Jehova ndaroraga andũ marĩ gĩkundi, no agucagĩrĩria mũndũ ũmwe ũmwe, nginya arĩa mararererũo ũhoro-inĩ wa ma. Ũkũũri nĩguo ũkũhotithĩtie kũgĩa na ũrata wa hakuhĩ hamwe na Jehova, na kwoguo ũbatiĩ kũwona ũrĩ kĩheo kĩa mwanya. (Rom. 5:​1, 2) Nĩ ũndũ ũcio, mbere ya gũthiĩ Kĩririkano kĩa mwaka ũyũ, nĩ wega wĩcũranie ũrĩa gĩkuũ kĩa Jesu gĩkũgunaga. Ũndũ ũcio ũrogũtindĩka gũkinyĩra muoroto wa kĩĩroho ũrĩa ũngĩkorũo wĩigĩire, nĩguo wonanie ngatho nĩ ũndũ wa ũkũũri ũrĩa Jehova aarutire kũgerera Mũrũwe.b

AKRISTIANO ABATITHIE

8. Akristiano arĩa abatithie monanĩtie ngatho atĩa nĩ ũndũ wa ũkũũri?

⁸ Angĩkorũo wĩ Mũkristiano mũbatithie, hatarĩ nganja nĩ wonanĩtie na njĩra itiganĩte atĩ wĩ na ngatho nĩ ũndũ wa ũkũũri. Kwa ngerekano, nĩ wekire mogarũrũku nĩguo ũkuhĩrĩrie Jehova na ũhote gũtũũra kũringana na ithimi ciake. Nĩ wathĩkĩire rĩathani rĩa Jesu rĩa gũtua andũ arutwo na njĩra ya kũhunjĩria andũ arĩa angĩ. Ningĩ nĩ weyamũrĩire Jehova na ũkĩbatithio. O na no gũkorũo wanokĩrĩrũo nĩ ũndũ wa wĩtĩkio waku. (2 Tim. 3:12) Gũkorũo atĩ no ũrathiĩ na mbere gũtũũria wĩhokeku waku, kũronania atĩ nĩ wendete Jehova na ũrĩ na ngatho nĩ ũndũ wa ũkũũri.—Ahib. 12:​2, 3.

9. Nĩ ũndũ ũrĩkũ Akristiano arĩa abatithie mabatiĩ kwĩmenyerera?

⁹ Akristiano arĩa abatithie nĩ marabatara kwĩmenyerera tondũ o ũrĩa mahinda marathiĩ no mekore makĩhũthia ũkũũri. Ũndũ ũcio ũngĩhaanĩka atĩa? Ta wĩcirie ũrĩa gwathiire harĩ Akristiano a Efeso. Jesu nĩ aamagathĩrĩirie nĩ ũndũ wa ũkirĩrĩria wao. O na kũrĩ ũguo, aamerire ũũ: “Ũndũ ũrĩa ngũgũcuukĩra nĩ ũyũ, atĩ nĩ ũtigĩte wendo ũrĩa warĩ naguo kĩambĩrĩria-inĩ.” (Kũg. 2:​3, 4) O ta ũrĩa ciugo icio cia Jesu ironania, Mũkristiano no ambĩrĩrie gwĩkaga maũndũ o ta mũtugo. No akorũo nĩ arahoya, agathiĩ mĩcemanio, akanyitanĩra ũtungata-inĩ, ĩndĩ ndareka ũguo agĩtindĩkwo nĩ wendo. Ũngĩka atĩa ũngĩona ta wendo waku harĩ Jehova ũnyihĩte?

10. Ũngĩhũthĩra atĩa ũtaaro ũrĩa Paulo aaheire Timotheo? (1 Timotheo 4:​13, 15)

¹⁰ Mũtũmwo Paulo eerire Timotheo ‘eeciragie igũrũ rĩgiĩ’ maũndũ ma kĩĩroho, na ‘arikĩre thĩinĩ wamo.’ (Thoma 1 Timotheo 4:​13, 15.) Ũkĩhũthĩra ũtaaro ũcio, geria gwĩciria nĩ na njĩra irĩkũ ũngĩagagĩria ũthathaiya waku nĩguo ũhote gũtũũria kĩyo maũndũ-inĩ ma kĩĩroho. (Rom. 12:11) Kwa ngerekano, ũngĩhũthagĩra mahinda kũhaarĩria mĩcemanio wega, ũndũ ũcio no ũgũteithie gũthikagĩrĩria na kinyi hĩndĩ ya mĩcemanio. Ningĩ rĩrĩa ũreka wĩruti waku kĩũmbe, no ũcaragie handũ hahooreru ũngĩhota gwĩcũrania maũndũ marĩa ũreruta, na ũndũ ũcio no ũgũteithie kũgunĩka makĩria na wĩruti ũcio. O ta ũrĩa mwaki wongagĩrĩrũo ngũ nĩguo ũthiĩ na mbere gwakana, no taguo ũrabatara gũthiĩ na mbere gwĩka maũndũ ta macio nĩguo ũtũũre ũrĩ na ngatho nĩ ũndũ wa ũkũũri, na maũndũ mangĩ marĩa Jehova agwĩkĩire. Ningĩ no ũhũthagĩre ciumia cigana ũna mbere ya Kĩririkano gwĩcũrania irathimo iria ũgĩte nacio nĩ ũndũ wa gũkorũo wĩ Mũira wa Jehova. Hatarĩ nganja maũndũ macio no magũteithie gũkorũo na ngatho makĩria nĩ ũndũ wa ũkũũri, ũrĩa ũkũhotithĩtie gũkorũo na ũrata wa hakuhĩ hamwe na Jehova.

11-12. Kĩyo gĩaku kĩngĩnyihanyiha-rĩ, hihi ũguo nĩ kuuga atĩ Jehova nĩ atigĩte gũkũhe roho wake? Taarĩria. (Ningĩ rora mbica.)

¹¹ Rĩrĩa kĩyo gĩaku maũndũ-inĩ ma kĩĩroho kĩanyihanyiha, ndũgakue ngoro kana wĩcirie atĩ Jehova nĩ atigĩte gũkũhe roho wake. Ririkana ciugo ici mũtũmwo Paulo aandĩkĩire Akorintho ciĩgiĩ ũtungata wake: “O na ingĩka ũguo iteyendeire, ndĩ o na wĩra wa ũramati ndĩhokeirũo.” (1 Kor. 9:17) Hihi eendaga kuuga atĩa?

¹² Rĩmwe Paulo nĩ aaiguaga atarĩ na wendi wa kũhunjia. No nĩ aatuĩte itua rĩa gũthiĩ na mbere gũkirĩrĩria ũtungata-inĩ wake o na akĩiguaga ũguo. O nawe no ũtue itua o ta rĩu. Wĩrutanagĩrie gwĩka ũndũ ũrĩa wagĩrĩire o na rĩrĩa ũraigua ũtarĩ na wendi. Hoyaga Jehova akũhe “wendi o na ũhoti wa gwĩka maũndũ.” (Afil. 2:13) Rũmagĩrĩra mũtaratara waku wa maũndũ ma kĩĩroho. Korũo na ma atĩ wathiĩ na mbere gwĩka ũguo, nĩ ũkũrurumũra kĩyo gĩaku o hamwe na wendo waku harĩ Jehova.

13. Tũngĩka atĩa nĩguo tũtigĩrĩre atĩ tũrĩ “thĩinĩ wa wĩtĩkio”?

¹³ Nĩ wega gwĩthuthuragia mahinda kwa mahinda o ta ũrĩa ũtaaro ũyũ wa 2 Akorintho 13:5 ugaga: “Ikaragai mũkĩĩgeragia kana mũrĩ thĩinĩ wa wĩtĩkio; ikaragai mũgĩĩthuthuragia ũrĩa mũtariĩ kũna.” Kwa ngerekano no wĩyũrie: ‘Hihi nĩ njigaga maũndũ ma Ũthamaki mbere ũtũũro-inĩ wakwa?’ (Mat. 6:33) ‘Hihi maũndũ marĩa thuuraga ma gwĩkenia nĩ monanagia atĩ nĩ thũire maũndũ marĩa moru?’ (Thab. 97:10) ‘Hihi nĩ ndĩrutanagĩria gũtũũria thayũ na ũrũmwe hamwe na aarĩ na ariũ a Ithe witũ?’ (Ef. 4:​2, 3) Tondũ hĩndĩ ya Kĩririkano nĩ twĩciragia mũno ũhoro wa kĩheo gĩa ũkũũri kĩrĩa Jehova aatũheire, rĩu nĩ ihinda rĩega rĩa gwĩthuthuria nĩguo tuone kana nĩ tũratũũra nĩ ũndũ wa Kristo no ti ũndũ witũ ene.

ARĨA MATIGĨTE KŨNYITANĨRA NA KĨŨNGANO

14. Nĩ kĩĩ gĩtũmĩte Akristiano amwe matige kũnyitanĩra na kĩũngano?

¹⁴ Akristiano amwe thutha wa gũtungatĩra Jehova kwa ihinda rĩa mĩeri mĩnini kana kwa ihinda rĩa mĩaka mĩingĩ, nĩ matigaga kũnyitanĩra na kĩũngano. Nĩkĩ? Amwe makoragwo maritũhĩirũo nĩ “mĩtangĩko ya ũtũũro.” (Luk. 21:34) Nao angĩ makoragwo mahĩngĩtwo nĩ ciugo kana ciĩko cia Mũkristiano ũngĩ. (Jak. 3:2) Angĩ nao meekire mehia maritũ na makĩaga kũhoya ũteithio. O ũrĩa kũngĩkorũo kũrĩ, ũngĩka atĩa angĩkorũo nĩ ũtigĩte kũnyitanĩra na kĩũngano? Hihi wendo ũrĩa Jehova akuonetie wa kũruta ũkũũri ũngĩgũtindĩka gwĩka atĩa?

15. Jehova onanagia atĩa atĩ nĩ arũmbũyagia arĩa matigĩte kũnyitanĩra na kĩũngano? (Ezekieli 34:​11, 12, 16)

¹⁵ Wĩcũranie ũrĩa Jehova aiguaga kwerekera arĩa matigĩte kũnyitanĩra na kĩũngano. Ndamatiganagĩria, ĩndĩ nĩ kũmacaria amacaragia ta ngʼondu yũrĩte. Nĩ amarũmbũyagia na akamateithia kũmũcokerera. (Thoma Ezekieli 34:​11, 12, 16.) O nawe Jehova no akorũo agĩgũteithia na njĩra ĩyo. Gũkorũo atĩ nĩ ũrathoma gĩcunjĩ gĩkĩ kũronania atĩ no ũrenda kũmũkenia. O ta ũrĩa Jehova oonire ngoro yaku na agĩkũgucĩrĩria ũhoro-inĩ wa ma, noguo angĩkorũo agĩkũgucĩrĩria nĩguo ũmũcokerere.

16. Nĩ kĩĩ kĩngĩteithia mũndũ gũcokerera Jehova? (Ningĩ rora mbica.)

¹⁶ Broshua ya Cokerera Jehova ĩkoragwo na ciugo ici cia kũũmĩrĩria: “Gĩa na ma atĩ Jehova nĩ egũkorũo hamwe nawe ũkĩoya makinya ma kũmũcokerera. Nĩ egũgũteithia kũhiũrania na mĩtangĩko, gũtooria marakara, na kũgĩa na thayũ wa ngoro na meciria ũrĩa uumanaga na gũkorũo na thamiri theru. Weka ũguo nĩ ũkũigua ũkĩenda rĩngĩ gũtungatĩra Jehova ũrĩ hamwe na ndungata ciake.” Ningĩ ririkana atĩ athuri a kĩũngano nĩ mehaarĩirie gũgũteithia. Matariĩ “ta handũ ha kwĩhitha rũhuho, handũ ha kwĩgitia mbura ya kĩhuhũkanio.” (Isa. 32:2) Nĩguo wonanie ngatho ciaku nĩ ũndũ wa ũkũũri, no wĩyũrie, ‘Nĩ makinya marĩkũ ingĩoya nĩguo “tũrũnge maũndũ” hamwe na Jehova?’ (Isa. 1:18; 1 Pet. 2:25) Kwa ngerekano, no ũthiĩ mũcemanio Nyũmba-inĩ ya Ũthamaki. Ningĩ no waranĩrie na mũthuri wa kĩũngano na ũmũmenyithie atĩ nĩ ũrenda gũcokerera Jehova. Kũngĩbatarania no abange mwĩrute Bibilia hamwe na Mũkristiano ũngĩ kwa ihinda. Korũo na ma atĩ Jehova nĩ ekũrathima kĩyo gĩaku gĩa kuonania ngatho nĩ ũndũ wa ũkũũri.

ŨKUONANIA NGATHO ATĨA?

17-18. Tũngĩhũthĩra mahinda atĩa mbere ya Kĩririkano kĩa mwaka ũyũ?

¹⁷ Jesu aaugire atĩ ũkũũri warutirũo “nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Joh. 3:16) Ũkũũri nĩyo njĩra ĩrĩa Jehova ahũthagĩra gũtũhonokia kuumana na mehia na gĩkuũ. Kwoguo nĩ tũbatiĩ kuonanagia ngatho nĩ ũndũ waguo. (Rom. 3:​23, 24; 2 Kor. 6:1) No tũhũthĩre thikũ iria irĩ mbere ya Kĩririkano gwĩcũrania ũhoro wĩgiĩ wendo ũrĩa Jehova na Jesu matuonetie, na wendo ũcio nĩ ũbatiĩ gũtũtindĩka kuonania ngatho.

¹⁸ Ũkũũri ũgũgũtindĩka kuonania ngatho atĩa? Macokio maku no makorũo marĩ ngũrani na ma mũndũ ũngĩ. Ĩndĩ no ũkorũo na ma atĩ Jehova nĩ ekũrathima kĩyo gĩaku na kĩa aarĩ na ariũ a Ithe witũ thĩinĩ wa thĩ, arĩa ‘matatũũraga nĩ ũndũ wao ene, no matũũraga nĩ ũndũ wa ũcio wakuire nĩ ũndũ wao.’—2 Kor. 5:15.