Eehamba dotete
18 Mokweendela ko kwefimbo, modula onhinhatu, ondjovo yaJehova oye uya kuElia tai ti: “Inda kuAhab, nohandi ka lokifa odula kombada yedu.” 2 Onghee Elia okwa ya kuAhab, ofimbo muSamaria mwa li ondjala ya kwata moiti.
3 Ahab okwa ifana Obadja, oo a li ta pashukile eumbo laye. (Obadja okwa li ha tila neenghono Jehova, 4 naashi Isabel a li ta dipaa* ovaprofeti vaJehova, Obadja okwa kufa ovaprofeti 100, ndele te va holeke mekololo, ve li meengudu do 50, nokwa kala he va pe omungome nomeva.) 5 Ahab okwa tya kuObadja: “Endaenda medu u tale eefifiya adishe domeva nomalufilu aeshe, otashi dulika tu mone omwiidi wa wana okupalula eenghambe nomamwili, opo oimuna yetu aishe iha fye.” 6 Opo nee ove litukula kutya keshe umwe ota i nondjila ilipi. Ahab okwa ya nondjila imwe oye aeke, na Obadja okwa ya nondjila ikwao oye aeke.
7 Ofimbo Obadja a li mondjila, Elia okwa li e uya oku mu shakeneka. Diva eshi e mu dimbuluka, okwe linyongamena pedu, ndele ta ti: “Omwene wange Elia, oove ngoo?” 8 Okwe mu nyamukula, a ti: “Aame. Inda, ndele to lombwele omwene woye kutya: ‘Elia oye ou.’” 9 Ashike okwa tya kuye: “Onda nyona shike, opo u yandje omupiya woye kuAhab a ka dipae nge? 10 Ohandi ane kuJehova, Kalunga omunamwenyo, kutya omwene wange ke na apa ina tuma u ka kongwe, moshiwana keshe nosho yo mouhamba keshe. Konima eshi va ti kutya ‘ke ko,’ okwa ningifa ouhamba noshiwana shi ane kutya inashi ku mona. 11 Ndele paife ove oto ti, ‘Inda, ndele to lombwele omwene woye kutya: “Elia oye ou.”’ 12 Ngeenge nda di po pwoove, omhepo yaJehova otai ke ku twala konhele oko ndihe shii, nongeenge onda lombwele Ahab, ndele ine ku mona, ota ka dipaa nge filufilu. Ndele omupiya woye okwa kala ha tila Jehova okudja kounona waye. 13 Hano omwene wange ina lombwelwa osho nda ninga, eshi Isabel a li ta dipaa ovaprofeti vaJehova, nghee nda holeka ovaprofeti vaJehova 100 paengudu do 50 mekololo, nonda kala handi va pe omungome nomeva? 14 Ashike paife oto ti, ‘Inda, ndele to lombwele omwene woye kutya: “Elia oye ou.”’ Ota ka dipaa nge filufilu.” 15 Onghee Elia okwa tya: “Ohandi ane kuJehova, Kalunga womatangakwaita, omunamwenyo, oo handi longele,* kutya nena ohandi liyandje kuye.”
16 Obadja okwa ya a ka shakeneke Ahab, nokwe mu lombwela, na Ahab okwa ya a ka shakeneke Elia.
17 Diva eshi Ahab a mona Elia, okwe mu pula, a ti: “Ndishi oove to etele Israel oupyakadi?”*
18 Opo nee okwa tya: “Inandi etela Israel oupyakadi, ashike ove neumbo laxo onye mwa eta oupyakadi, eshi inamu dulika koipango yaJehova, nomwa shikula ooBaal. 19 Paife ifana Israel ashishe shi uye kwaame kOmhunda yaKarmel nosho yo ovaprofeti vaBaal 450 novaprofeti 400, ovo hava longele eepala diyapuki,* ovo tava li poshitaafula shaIsabel.” 20 Opo nee Ahab okwa lombwela Ovaisrael aveshe nokwa ongela ovaprofeti kOmhunda yaKarmel.
21 Elia okwa ya kovanhu aveshe, ndele ta ti: “Fiyo onaini tamu kala nokutengaukila kombinga nombinga? Ngeenge Jehova oye Kalunga kashili, mu shikuleni, ashike ngeenge oBaal, mu shikuleni!” Ndele ovanhu inave mu nyamukula sha nandenande. 22 Natango, Elia okwa tya kovanhu: “Aame andike omuprofeti waJehova a xupa po, ofimbo pe na ovaprofeti vaBaal ve li 450. 23 Nave tu pe eendumetana mbali, ndele tava hoolola po imwe noku i teta moinhimbu, ndele tave i tenheke koikuni, ashike inava tema po. Ohandi ka longekida ondumetana ikwao, nohandi ke i tenheka koikuni, ashike itandi ka tema po. 24 Opo nee omu na okwiifana edina lakalunga keni, naame ohandi ka ifana edina laJehova. Kalunga, oo ta ka nyamukula okupitila momundilo, ota ka ulika kutya oye Kalunga kashili.” Onghee ovanhu aveshe ova nyamukula va ti: “Osho wa popya oshi li nawa.”
25 Elia okwa lombwela ovaprofeti vaBaal, a ti: “Kufeni ondumetana, ndele tamu i longekida tete, molwaashi omuvahapu mu tu dule. Opo nee ifaneni edina lakalunga keni, ashike ondumetana oyo inamu i xwika.” 26 Onghee ova kufa ondumetana, oyo va pewa, tave i longekida, nova kala nokwiifana edina laBaal okudja ongula fiyo omutenya, tava ti: “Baal, tu nyamukula!” Ashike kapa li ondaka yasha, nokape na ou e va nyamukula. Ova kala tava dingilile oaltari oyo va ninga. 27 Lwopokati komutenya, Elia okwa hovela oku va mbweenga ta ti: “Ifaneni mokule kwaao tamu ti okalunga keni. Pamwe oku na osho te lipula nasho, ile a ya e ke livatela.* Ile otashi dulika a kofa, naumwe okwa pumbwa a ye ko e ke mu pendule.” 28 Ova kala nokwiifana pombada, nokulitetaula nomikonda nosho yo nomaonga, she likolelela keenghedindjikilile davo, fiyo osheshi ohonde yavo tai kunguluka komalutu avo. 29 Pefimbo lokomatango, ova twikila okulihumbata nai,* fiyo opefimbo opo eendjayambo dokonguloshi tadi yambwa, ashike kapa li ewi lasha nokapa li oo te va nyamukula, ile oo te va pwilikine.
30 Elia okwa lombwela ovanhu aveshe, a ti: “Ileni kwaame.” Opo nee ovanhu aveshe ova ya kuye. Onghee okwa tungulula oaltari yaJehova, oyo ya li ya hanaunwa po. 31 Opo nee Elia okwa kufa omamanya 12 e fike pomuvalu womapata ovanamati vaJakob, oo Jehova a popya, a ti: “Israel otali ka ninga edina loye.” 32 Omamanya oo okwe a tungifa oaltari yokufimanekifila edina laJehova. Opo nee okwa fa omukangha wa dingilila oaltari, onhele ya kula ya wana okukuna eembuto tadi wana oimbale ivali.* 33 Lwanima, okwa tula oikuni melandulafano, ta tete ondumetana, ndele te i tula kombada yoikuni. Opo nee okwa ti: “Tuleni omeva moitoo ine ya kula, ndele tamu tile omeva kexwikiloyambo nokoikuni.” 34 Ndele ta ti yo: “Shi ningeni vali.” Onghee ove shi ninga natango. Natango, okwa tya: “Shi ningeni oshikando oshititatu.” Onghee ove shi ninga oshikando oshititatu. 35 Omeva okwa kunguluka, a dingilila oaltari aishe, ndele ta yadeke yo omukangha nomeva.
36 Pefimbo lokonguloshi, eshi omayambo a yambwa, omuprofeti Elia okwa ehena komesho, ndele ta ti: “Jehova, Kalunga kaAbraham, kaIsak nokaIsrael, nena ovanhu aveshe nava shiive kutya oove Kalunga muIsrael, nonokutya ame omupiya woye, noinima aishe oyo nda ninga onde i ninga palombwelo loye. 37 Jehova, alikana nyamukule nge. Nyamukule nge, opo ovanhu ava va shiive kutya ove Jehova, oove Kalunga kashili, nonokutya oove we va ningifa va alukile kwoove.”
38 Opo nee Jehova okwa tuma omundilo, nowa hovela okuxwika po exwikiloyambo, oikuni, omamanya, edu nowa pwiininika omeva momukangha. 39 Eshi ovanhu aveshe ve shi mona, ove linyongamena diva pedu, ndele tava ti: “Jehova oye Kalunga kashili! Jehova oye Kalunga kashili!” 40 Onghee Elia okwa tya kuvo: “Kwatei po ovaprofeti vaBaal! Inamu efa nande oumwe a faduke po!” Opo nee ove va kwata po diva, na Elia okwe va twala kokamulonga* kaKison, ndele te va dipaele oko.
41 Elia okwa tya kuAhab: “Inda, ndele to li nokunwa, molwaashi ondi udite odula inene tai popoma.” 42 Opo nee Ahab okwa ya, nokwa lya, ndele ta nu, ofimbo Elia a ya koxulo yOmhunda yaKarmel, ndele ta tu eengolo a tula oshipala pokati keengolo. 43 Elia okwa lombwela omupiya waye, a ti: “Alikana, inda, ndele to tale kombinga yokefuta.” Okwa ya nokwa tala pombada, ndele ta ti: “Kaku na sha nandenande.” Elia okwe mu lombwela lwoikando iheyali, a ti, “Shuna ko.” 44 Oshikando oshitiheyali omupiya waye okwe mu lombwela ta ti: “Tala, ope na okalemo kanini ke fike peke lomunhu, taka di mefuta.” Elia okwa tya: “Inda, ndele to lombwele Ahab to ti, ‘Longekida etemba. Inda, opo odula yepoola ihe ku kelele.’” 45 Diva, eulu ola laulikwa koilemo, omhepo oya hovela okupepa, nodula yepoola oya li ya hovela okuloka; Ahab okwa twikila okushinga etemba fiyo okuJisreel. 46 Ashike Jehova okwa pa Elia eenghono, nokwe likambeka* oshikutu shaye moshiya, ndele ta tondoka e li komesho yaAhab fiyo okuJisreel.