Eehamba dotete

20 Benhadad, ohamba yaSiria, okwa ongela etangakwaita alishe pamwe neehamba dikwao 32 neenghambe dado nosho yo omatemba ado. Okwa ya nokwa nangela Samaria, ndele te shi lwifa. 2 Opo nee okwa tuma ovatumwa kuAhab, ohamba yaIsrael, koshilando, ndele ta ti kuye: “Benhadad okwa ti, 3 ‘Oshisilveri shoye, oshingoli shoye, ovakulukadi voye ovo vawa novanamati voye ovange.’” 4 Ohamba yaIsrael oya nyamukula ya ti: “Omwene wange ohamba, metwokumwe neendjovo doye, ame ondoye nosho yo oinima yange aishe.”

5 Lwanima, ovatumwa ova aluka, ndele tava ti: “Benhadad okwa ti, ‘Onda li nde ku tumina etumwalaka tali ti: “Oshisilveri shoye, oshingoli shoye, ovakulukadi voye novanamati voye oto va pe nge.” 6 Ashike mongula ngaalo, ohandi ke ku tumina ovapiya vange, notava ka hada nawanawa eumbo loye nomaumbo ovapiya voye notava ka kwata ko oinima yoye aishe oyo u hole, ndele tava i nayo.’”

7 Opo nee ohamba yaIsrael oya ifana ovakulunhu aveshe vomedu olo, ndele tai ti: “Alikana, kaleni mu shi shii kutya omulumenhu ou okwa hala oku tu etela oupyakadi, molwaashi okwa hala ovakulukadi vange, ovanamati vange, oshisilveri shange noshingoli shange, ashike inandi i mu anyena.” 8 Ovakulunhu aveshe novanhu aveshe ova tya kuye: “Ino pwilikina kuye noino ninga osho te ku lombwele.” 9 Onghee okwa tya kovatumwa vaBenhadad: “Lombweleni omwene wange ohamba tamu ti, ‘Ashishe osho wa pula tete omupiya woye ohandi shi ningi, ashike eshi itandi dulu oku shi ninga.’” Opo nee ovatumwa ova ya nove ke mu lombwela eendjovo odo.

10 Benhadad okwe mu tumina etumwalaka tali ti: “Ookalunga nava handukile nge unene, ngeenge muSamaria omwa kala mu na ondwi tai dulu okupewa omukwaita keshe womovakwaita vange eke liyadi.” 11 Ohamba yaIsrael oya nyamukula ya ti: “Mu lombwela kutya, ‘Keshe oo ta homata oilwifo yaye, ine litada ngaashi oo te i kufa mo.’” 12 Diva eshi a uda enyamukulo olo, ofimbo ye neehamba dikwao va li tava nu, ve li momatwali avo, okwa tya kovapiya vaye: “Lilongekidileni okulwa.” Opo nee ove lilongekidila okulwifa oshilando.

13 Opo nee omuprofeti okwa hanga Ahab, ohamba yaIsrael, ndele ta ti: “Jehova okwa ti, ‘Ongudu aishe oyo inene owe i mona? Ohandi i yandje meke loye nena eli, noto ka shiiva kutya aame Jehova.’” 14 Ahab okwa pula, a ti: “Ngahelipi?” Opo nee omuprofeti okwa nyamukula, a ti: “Eshi osho Jehova a ti, ‘Okupitila movayakuli vomalenga oitukulwa.’” Onghee Ahab okwa pula, a ti: “Olyelye ta hovele olwoodi?” Omuprofeti okwa nyamukula, a ti: “Oove.”

15 Ahab okwa valula ovayakuli vomalenga oitukulwa nova li 232. Konima yaasho, okwa valula ovalumenhu aveshe Ovaisrael nova li 7 000. 16 Opo nee ova dja mo moshilando omutenya, ofimbo Benhadad a li ta nu momatwali pamwe neehamba 32, odo da li tadi mu kwafele, nokwa li a kolwa. 17 Eshi ovayakuli vomalenga oitukulwa va dja mo tete, Benhadad okwa tuma diva ovatumwa. Ove mu lombwela kutya: “MuSamaria omwa dja ovalumenhu.” 18 Opo nee okwa ti: “Ngeenge ova dja mo nombili, va kwatei po nomwenyo, ile ngeenge ova dja mo va ka lwe, natango va kwatei po nomwenyo.” 19 Eshi va dja mo moshilando, ovayakuli vomalenga oitukulwa nomatangakwaita oo a li tae va shikula, 20 keshe umwe okwa dipaa omutondi waye. Opo nee Ovasiria ova faduka po, na Israel okwe va ta, ndele Benhadad, ohamba yaSiria, okwa faduka po a londa konghambe pamwe novalondinghambe vamwe. 21 Ashike ohamba yaIsrael oya dja mo, noya kala tai dipaa eenghambe, ya hanauna po omatemba noya finda* filufilu Ovasiria.

22 Lwanima, omuprofeti okwa hanga ohamba yaIsrael, ndele ta ti kuyo: “Inda, ndele to pameke etangakwaita loye nokudiladila osho to ka ninga po, molwaashi pehovelo lodula* ohamba yaSiria otai ke uya i ku lwife.”

23 Ovapiya vohamba yaSiria ova tya kuyo: “Kalunga kavo, oKalunga keemhunda, nomolwaasho ve tu finda. Ashike ngeenge otwa lwile pedu la lalakana ohatu ke va finda. 24 Natango, ninga ngaha: Eehamba adishe di kufa oinakuwanifwa yado, ndele to di pingene po noongoloneya. 25 Opo nee ongela* etangakwaita li fike pamwe naalo wa kanifa, onghambe omonghambe netemba ometemba. Natu ke va lwifileni pedu la lalakana nohatu ke va finda filufilu.” Onghee oya pwilikina komayele avo noya ninga ngaashi va popya.

26 Pehovelo lodula,* Benhadad okwa ongela Ovasiria, ndele tava i kuAfek va ka lwife Israel. 27 Ovaisrael navo ova li va ongala nove lilongekida, ndele tava i ve ke va shakeneke. Eshi Ovaisrael va onga onhanda komesho yavo, ova li ngaashi omaufita avali manini oikombo, ofimbo Ovasiria va li ve yadi oshilongo ashishe. 28 Opo nee ohamba yaIsrael oya holokelwa komupiya waKalunga kashili, ndele ta ti: “Jehova okwa ti, ‘Molwaashi Ovasiria ova ti: “Jehova oKalunga keemhunda, ndele ke fi Kalunga komaluhaela,” ongudu aishe oyo ohandi ke i yandja meke loye noto ka shiiva filufilu kutya aame Jehova.’”

29 Ova kala va onga onhanda va taalelafana oule womafiku aheyali, nomefiku etiheyali, ova hovela olwoodi. Ovaisrael ova dipaa ovakwaita vokolupadi vOvasiria 100 000 mefiku limwe. 30 Ovo va li va xupa po, ova faduka po va ya kuAfek moshilando, ndele ekuma ola wila ovalumenhu 27 000 ovo va li va xupa po. Benhadad naye okwa faduka po, ndele ta i moshilando nokwa ka hondama monduda yomeni.

31 Opo nee ovapiya vaye ova tya kuye: “Tala, otwa uda kutya eehamba domepata laIsrael, eehamba di na onghenda.* Alikana, natu djaleni eeshako moiya yetu nokulimanga eengodi komitwe detu, ndele hatu i kohamba yaIsrael. Otashi dulika i xupife omwenyo woye.” 32 Onghee ova djala eeshako moiya yavo nove limanga eengodi komitwe davo, ndele tava i kohamba yaIsrael nova tya kuyo: “Omupiya woye Benhadad okwa ti, ‘Alikana xupife nge.’”* Oya nyamukula ya ti: “Natango oku na omwenyo? Benhadad omumwameme.” 33 Ovalumenhu ovo ova li ve shi tala ko shi li edidiliko liwa nova li ve udite kutya osho a popya osho lela a hala okutya, onghee ova ti: “Benhadad omumwanyoko.” Okwa tya kuvo: “Indeni mu ke mu tale.” Opo nee Benhadad okwa ya kuye, nokwe mu londeka metemba.

34 Benhadad okwa tya kuye: “Oilando oyo tate e ku kufa ohandi i ku shunifile, noto dulu okuhoolola omapandavanda muDamaskus, omo to dulu okulandifila, ngaashi ashike tate a ninga muSamaria.”

Ahab okwa nyamukula, a ti: “Omolweudafanotwokumwe* eli, ohandi ku lekele u ye.”

Opo nee ova ninga eudafanotwokumwe, na Ahab okwe mu lekela a ye.

35 Metwokumwe nondjovo yaJehova, umwe womovana vovaprofeti* okwa tya komweendi pamwe naye: “Alikana, denge nge.” Ashike omulumenhu oo okwa anya oku mu denga. 36 Onghee okwa tya kuye: “Molwaashi ino pwilikina kondaka yaJehova, diva ashike ngeenge wa di po pwaame, oto ka dipawa* konghoshi.” Eshi a dja po puye, okwa hangwa konghoshi, ndele tai mu dipaa.

37 Okwa hanga vali omulumenhu umwe, ndele ta ti: “Alikana, denge nge.” Opo nee omulumenhu oo okwe mu denga nokwe mu monifa oshiponga.

38 Omuprofeti oo okwa ya nokwa kala a teelela ohamba pondjila, e limanga komesho, opo aha dimbulukiwe. 39 Eshi ohamba ya li tai piti po, okwa ingida ohamba mokule, ta ti: “Omupiya woye okwa li molwoodi la kwata moiti, nokwa li kwa dja omulumenhu umwe a etela nge omulumenhu mukwao, ndele ta ti, ‘Pashukila omulumenhu ou. Ngeenge okwa kana, omwenyo woye otau i ponhele yomwenyo waye, ile u fute oshitalenti* shoshisilveri.’ 40 Ndele ofimbo omupiya woye a li e lipyakidila apa naapenya, ombadilila omulumenhu oo okwa dja po.” Onghee ohamba yaIsrael oya tya kuye: “Olo olo tali ningi etokolo loye, owe litokola ove mwene.” 41 Opo nee okwe limangulula diva komesho, nohamba yaIsrael oya dimbuluka diva kutya oumwe womovaprofeti. 42 Okwa tya kuyo: “Jehova okwa ti, ‘Molwaashi owa efa omulumenhu oo nda ti kutya na hanaunwe po a dje mo meke loye, omwenyo woye otau i ponhele yomwenyo waye, novanhu voye otava pingene po ovanhu vaye.’” 43 Onghee ohamba yaIsrael oya ya keumbo kuSamaria, ya uda nai neenghono noya nyika oluhodi.