Eehamba eenhivali

1 Konima yefyo laAhab, Moab okwa li a pilukila po Israel.

2 Ahasia okwa wa ponduda yopombada, opo pa li pa yalwa oiti, meumbo laye muSamaria, ndele ta mono oshiponga. Onghee okwa tuma ovatumwa, nokwa tya kuvo: “Indeni mu ka pulile nge ekwafo kuBaal-sebub, kalunga kaEkron, opo a tale ngeenge ohandi veluka ngoo.” 3 Ashike omweengeli waJehova okwa tya kuElia,* Omutisbi: “Fikama u ka shakeneke ovatumwa vohamba yaSamaria, ndele to ti kuvo, ‘Mbela muIsrael kamu na Kalunga, eshi tamu i mu ka pule ekwafo kuBaal-sebub, kalunga kaEkron? 4 Onghee Jehova okwa ti: “Ito di mo mombete omo wa nangala, osheshi ou na okufya shili.”’” Opo nee Elia okwa ya.

5 Eshi ovatumwa va shuna kohamba, oye va pula diva, ya ti: “Omwa alukila shike?” 6 Ove i nyamukula, va ti: “Otwa shakenekwa komulumenhu umwe, ndele ta ti kufye, ‘Shuneni kohamba, oyo ye mu tuma, ndele tamu i lombwele kutya, “Jehova okwa ti: ‘Mbela muIsrael kamu na Kalunga, eshi to tumu ku ka pulwe ekwafo kuBaal-sebub, kalunga kaEkron? Ito di mo mombete omo wa nangala, osheshi ou na okufya shili.’”’” 7 Opo nee ohamba oya tya kuvo: “Omulumenhu oo a li e uya oku mu shakeneka noku mu lombwela eendjovo odo okwa tya ngahelipi?” 8 Ova nyamukula va ti: “Omulumenhu a djala oshikutu sholududi nekwamo loshipa moshiya shaye.” Diva ohamba oya ti: “OElia, Omutisbi.”

9 Opo nee ohamba oya tumina Elia elenga tali pashukile ovakwaita 50 pamwe novakwaita valo 50. Eshi la ya kuye, ola hanga e li omutumba koxulo yomhunda. Ola tya kuye: “Omupiya waKalunga kashili, ohamba oya ti, ‘Londoloka ko oko.’” 10 Ashike Elia okwa nyamukula elenga, olo tali pashukile ovakwaita 50, a ti: “Ngeenge ame omupiya waKalunga, meulu namu dje omundilo, ndele tau ku lungwinifa po, pamwe novakwaita voye 50.” Opo nee meulu omwa dja omundilo, ndele tau lungwinifa po elenga olo novakwaita valo 50.

11 Natango, ohamba oya tumina Elia elenga likwao tali pashukile ovakwaita 50 pamwe novakwaita valo 50. Elenga ola ya, nola tya kuElia: “Omupiya waKalunga kashili, ohamba oya ti, ‘Londoloka ko diva.’” 12 Ashike Elia okwe va nyamukula, a ti: “Ngeenge ame omupiya waKalunga kashili, meulu namu dje omundilo, ndele tau ku lungwinifa po, pamwe novakwaita voye 50.” Opo nee meulu omwa dja omundilo, wa tumwa kuKalunga, ndele tau lungwinifa po elenga olo novakwaita valo 50.

13 Opo nee ohamba oya tuma elenga etitatu tali pashukile ovakwaita 50 pamwe novakwaita valo 50, ndele elenga etitatu, olo tali pashukile 50, ola ya, nola twa eengolo koshipala shaElia, tali mu pula e li file onghenda, tali ti: “Omupiya waKalunga kashili, alikana, tala ko omwenyo wange neemwenyo dovapiya voye 50 di na ondilo momesho oye. 14 Omundilo oo wa dja meulu owa lungwinifa po nale omalenga avali otete, oo a li taa pashukile ovakwaita 50 nosho yo ovakwaita vao 50, ashike omwenyo wange u tala ko u na ondilo momesho oye.”

15 Opo nee omweengeli waJehova okwa lombwela Elia, a ti: “Inda pamwe naye. Ino mu tila.” Onghee okwa fikama nokwa ya pamwe naye kohamba. 16 Elia okwa tya kohamba, “Jehova okwa ti: ‘Owa li wa tuma ovatumwa va ka pule ekwafo kuBaal-sebub, kalunga kaEkron. Mbela owe shi ninga, molwaashi muIsrael muhe na Kalunga? Omolwashike ino mu pula? Ito di mo mombete omo wa nangala, osheshi ou na okufya shili.’” 17 Onghee ohamba oya fya, ngaashi Jehova a popya okupitila muElia. Ndele molwaashi kaya li i na omonamati, Jehoram* okwa ninga ohamba ponhele yayo, momudo omutivali wepangelo laJehoram, omonamati waJosafat, ohamba yaJuda.

18 Ondjokonona aishe yaAhasia, osho a ninga, mbela inai shangwa membo londjokonona yopefimbo leehamba daIsrael?