Job
29 Job okwa twikila okupopya,* ta ti:
2 “Ngeno onda li ngaashi nda li peemwedi da ya,
Momafiku oo Kalunga a li ta amene nge,
3 Eshi a minikilifa olamba yaye kombada yomutwe wange,
Eshi nda enda momulaulu kouyelele waye,
4 Eshi nda li* omunyasha,
Eshi nda li ndi udite kutya ondi na oukaume naKalunga metwali lange,
5 Eshi Omunaenghono adishe a li natango pamwe naame,
Eshi ovana* vange va li va dingilila nge,
6 Eshi eemhadi dange da li koshi yombuta,
Naashi omamanya a li haa dile nge omaadi taa kunguluka.
7 Eshi nda li handi i koshivelo shoshilando,
Nokukala omutumba mehalandjadja,
8 Ovalumenhu ovanyasha ova li hava mono nge, ndele tava kunduluka nge,*
Nokuli novalumenhu ovanamido ova li hava kala ofika, ndele tava kala va fikama.
9 Omalenga okwa li hae likelele okupopya;
Okwa li hae likwata komilungu.
10 Eendaka dovalumenhu va tumbala oda li hadi mwenekwa;
Nomalaka avo okwa li haa kanyatele moihokohoko yomakanya avo.
11 Keshe oo a uda nge, okwa li ha popile nge mouwa,
Naavo va mona nge, ova li hava popile nge.
12 Osheshi onda li handi kwafele ohepele, oyo tai pula ekwafo,
Pamwe nokaana, oko kehe na xe, nosho yo keshe oo ehe na oo te mu kwafele.
13 Oo e li pokuxula po okwa li ha nangeke nge noupuna,
Nonda hafifa omutima womufiyekadi.
14 Onda li handi djala ouyuki ngaashi oikutu yange;
Ouyuki wange owa li wa fa oshikutu* nelapi lokulimanga komutwe.
15 Onda li ngaashi omesho komupofi,
Neemhadi koshingudu.
16 Onda li xe yeehepele;
Onda li handi konakona oikoya yaavo ndihe shii.
17 Onda li handi teyaula eehamama domulongi wowii,
Nokunyekula ko oshihakanwa komayoo aye.
18 Onda li handi ti, ‘Ohandi ka fila meumbo lange mwene,*
Nomafiku ange otaa ka kala mahapu ngaashi ehekedu.
19 Omidi dange otadi ka tandavela fiyo omomeva,
Nomume otai ka kala koitai yange oufiku aushe.
20 Ovanhu otava ka kala nokufimaneka nge,
Nouta, ou u li meke lange, otau ka twikila okuyasha.’
21 Ovanhu ova li hava pwilikine nelitulemo,
Va teelela omayele ange ve limwenenena.
22 Ngeenge nda mane okupopya, ihava kala vali ve na sha shokupopya;
Eendjovo dange oda li hadi fiki nawa* momatwi avo.
23 Ova li hava teelele nge, ngaashi ovanhu va teelela odula,
Ohava ekameke omakanya avo a pwa ko, ngaashi ovanhu va teelela odula yopokwenye.
24 Ngeenge handi ve limemeshele, ova li have shi itavele noudjuu;
Ehafo lokoshipala shange ola li hali va shilipaleke.*
25 Onda li handi va pe ewiliko ngaashi omuwiliki wavo,
Onda kala ngaashi ohamba i li mokati kovakwaita vayo,
Ngaashi oo ha hekeleke ovalilanghali.