Omapsalme

37 Ino kala wa handuka* omolwovakolokoshi,

Ile u twile ondubo ovalongi vowii.

 2 Otava lembe diva ngaashi omwiidi,

Nokunganya ngaashi omwiidi mutalala.

 3 Lineekela muJehova nokulonga osho shiwa;

Kala kombada yedu,* nokukala omudiinini.

 4 Kala wa hafa unene* omolwaJehova,

Note ku wanifile po omahalo omutima woye.

 5 Ondjila yoye i tula* momake aJehova;

Mu lineekela, nota ka katuka ponhele yoye.

 6 Oilonga yoye youyuki ote i vemifa, ngaashi eluwa tali tende,

Nouyuki woye, ongaashi etango moshanga shomutenya.

 7 Kala wa mwena koshipala shaJehova,

Nokuteelela nodjuulufi* kuye.

Ino handukifwa komunhu,

Oo ha pondola mokuwanifa po eemhangela daye.

 8 Efa ehandu, noino kala wa fula onya;

Ino handuka, ndele to longo owii.*

 9 Osheshi ovalongi vowii otava ka kombololwa po,

Ashike ovo tava teelele Jehova otava ka fyuulula edu.

10 Konima ashike yokafimbo kanini, ovakolokoshi itava ka kala po vali;

Oto ka tala opo va li,

Ndele itava ka kala po vali.

11 Ashike ovalidiiniki* otava ka fyuulula edu,

Notava ka hafela neenghono ombili pauyadi.

12 Omukolokoshi oha pangelele omuyuki eemhangela;

Ohe mu likweshele komayoo.

13 Ashike Jehova ote mu yolo,

Molwaashi oku shii kutya efiku laye otali uya.

14 Ovakolokoshi ohava pweya mo omaongamukonda avo, nohava lukile* omauta avo,

Va pundule omufininikwa nosho yo ohepele,

Va dipae ovo ve li mondjila ya yuka.

15 Ashike eongamukonda lavo otali ka twa omitima davo vene;

Omauta avo otaa ka teyaulwa po.

16 Kanini, oko omuyuki e na, oke li xwepo

Ke dule omamona mahapu ovakolokoshi vahapu.

17 Osheshi omaoko ovakolokoshi otaa ka teyaulwa,

Ashike Jehova ota ka yambidida ovayuki.

18 Jehova oku shii onghalo yaavo vehe na etimba,*

Nefyuululo lavo otali ka kala po fiyo alushe.

19 Pefimbo loudjuu, itava ka fifwa ohoni;

Pefimbo londjala, otava ka kala ve na shihapu.

20 Ashike ovakolokoshi otava ka xula po;

Ovatondi vaJehova otava ka kana po ngaashi omaulifilo mawa;

Otava ka kana po ngaashi omwifi.

21 Omukolokoshi oha ehela, ndele iha shunifa,

Ashike omuyuki oha yandje nehalo liwa* noku na olukeno.*

22 Ovo va nangekwa noupuna kuYe otava ka fyuulula edu,

Ashike ovo va fingwa kuYe, otava ka kombololwa po.

23 Jehova oha wilike* eenghatu domunhu,

Ngeenge okwa hokwa ondjila yaye.

24 Nonande na punduke, ita ka ekelwa pedu,

Osheshi Jehova ohe mu yambidida neke.*

25 Onda li omunyasha, ndele paife onda kulupa;

Ashike inandi mona nande omuyuki umwe a efiwa,

Ile oludalo laye tali ehela omungome.*

26 Oha yandje alushe nehalo liwa,

Novana vaye ohava nangekwa noupuna.

27 Efa po okulonga owii, ndele to longo ouwa,

Noto ka kala fiyo alushe.

28 Osheshi Jehova oku hole ouyuki,

Noita efa ovadiinini vaye.

Otava pashukilwa alushe;

Ashike oludalo lovakolokoshi otali ka kombololwa po.

29 Ovayuki otava ka fyuulula edu,

Notava ka kala ko fiyo alushe

30 Okanya komuyuki ohaka popi ounongo,*

Nelaka laye ohali popi kombinga youyuki.

31 Omhango yaKalunga kaye oi li momutima waye;

Eenghatu daye itadi ponyo.

32 Omukolokoshi oha tale omuyuki,

Ta kongo omhito e mu dipae.

33 Ashike Jehova ite mu efele meke lomunhu oo,

Ile e mu mone ondjo, ngeenge a tokolwa.

34 Teelela kuJehova, nokushikula ondjila yaye,

Note ke ku tumbaleka u fyuulule edu.

35 Onda mona omunhu omukwanyanya ha longo owii,

Ta tandavele ngaashi omuti wa kula u li medu lao.

36 Ashike okwa vilola po diva, nokwa ya;

Onda kala noku mu konga, ndele ina monika.

37 Didilika oo ehe na etimba,*

Nokukala to tale omuyuki;

Osheshi onakwiiwa yomunhu oo otai ka kala i na ombili.

38 Ashike ovanyoni aveshe otava ka hanaunwa po;

Onakwiiwa yovakolokoshi otai ka xulifwa po.

39 Exupifo lovayuki ohali di kuJehova;

Oye ongulu yavo youhondameno pefimbo loudjuu.

Ote va xupifa kovakolokoshi, noku va amena,

Molwaashi ohava kongo eameno kuye.