Jehova oye ‘ohotengulu yetu mefimbo lomaudjuu’
“Ekwafo lovayuki otali di kOmwene, Oye ohotengulu yavo mefimbo lomaudjuu.”—EPSALME 37:39.
1, 2. (a) Oshike osho Jesus a ilikana omolwovahongwa vaye? (b) Ehalo laKalunga li na sha noshiwana shaye olilipi?
JEHOVA oku li omunaenghono adishe. Oku na eenghono okwaamena ovalongeli vaye ovadiinini monghedi keshe a hala. Ota dulu nokuli ngeno oku va tukula ko pambelela kovanhu vakwao mounyuni, ndele te va tula monhele ya amenwa noi na ombili. Ndelenee shi na sha novahongwa vaye, Jesus okwa ilikana kuXe womeulu a ti: “Ihandi indile u va kufe mo mounyuni ou, ndele u va amene [komunawii, OB-1986].”—Johannes 17:15.
2 Jehova okwa hoolola e he tu kufe mo “mounyuni ou.” Ponhele yaasho, okwa hala tu kale mokati kovanhu vomounyuni ou opo tu va udifile etumwalaka laye leteelelo nolehekeleko. (Ovaroma 10:13-15) Ndelenee ngaashi Jesus a ulika meilikano laye, mokukala mounyuni ou otu li oishonekwa ‘yomunawii.’ Ovanhu ve he fi ovaduliki neemhepo dowii otadi etele ovanhu omauyahame mahapu, nOvakriste inava lya olusha lokuhahangika komaudjuu.—1 Petrus 5:9.
3. Ovalongeli vaJehova ovadiinini navo ove na okutaalela oinima ilipi, ndele ehekeleko lilipi hatu hange mEendjovo daKalunga?
3 Ngeenge pe na omayeleko, oshi li paushitwe okuteka omukumo omafimbo amwe. (Omayeletumbulo 24:10) Ombibeli oi na omahokololo mahapu e na sha novadiinini ovo va li momaudjuu. Omupsalme okwa ti: “Omaudjuu omuyuki oku li mahapu, ndelenee Omwene ote mu xupifa muaeshe.” (Epsalme 34:20) Heeno, oinima ii ohai ningilwa nokuli ‘nomuyuki.’ Ngaashi omupsalme David, omafimbo amwe otashi dulika tu ‘alamekwe nokumongoshoka.’ (Epsalme 38:9) Ndelenee otashi hekeleke okushiiva kutya “Omwene oku li popepi nomitima da teyauka, Ye oha xupifa ava ve nomhepo ya nyanyauka.”—Epsalme 34:19; 94:19.
4, 5. (a) Metwokumwe nOmayeletumbulo 18:10, oshike tu na okuninga opo tu mone eameno laKalunga? (b) Eenghatu dimwe dokondadalunde dilipi hatu dulu okukatuka opo tu mone eameno laKalunga?
4 Metwokumwe neilikano laJesus, Jehova ote tu amene shili. Oye ‘ohotengulu yetu mefimbo lomaudjuu.’ (Epsalme 37:39) Embo lOmayeletumbulo ola longifa outumbulilo wa yukila oko eshi la ti: “Edina lOmwene olo oshungongulu ya pama. Omuyuki ta hondama mo ndee ta amenwa.” (Omayeletumbulo 18:10) Omushangwa oo otau holola oshili ya fimana kutya Jehova oha kenukile oishitwa yaye. Kalunga oha amene unene tuu ovayuki ovo tave mu kongo, va fa tava tondokele moshungongulu ya pama omolweameno.
5 Ngeenge twa taalelwa komaupyakadi manene, ongahelipi hatu dulu okukonga eameno kuJehova? Natu konakoneni eenghatu nhatu da fimanenena odo hatu dulu okukatuka opo tu mone ekwafo laJehova. Yotete, otu na okupopya naTate yetu womeulu meilikano. Onhivali, otu na okukatuka metwokumwe nomhepo yaye iyapuki. Nonhinhatu, otu na okudulika kelongekido laJehova mokweendafana nOvakriste vakwetu ovo tava dulu oku tu kwafela tu lididimikile noupu omaudjuu etu.
Eenghono deilikano
6. Ovakriste vashili ohava tale ko ngahelipi eilikano?
6 Ovanekeka vamwe ve na sha noukolele otava popile eilikano kutya otali dulu okuhakula epolimano nosho yo oudjuu oo hau etwa koisho. Nonande otashi dulu okukala shoshili kutya omafimbo elimweneneno okudilonga wa fa to ilikana otaa dulu okuninipika oudjuu oo hau etwa koisho, osho otashi dulu yo okukala ngaho ngeenge omunhu ta pwilikine komawi onhumba oinima yomoushitwe ile ta fulwa kombuda. Ovakriste vashili ihava tale ko eilikano li li oshinima shongaho shi li ashike ouhaku wopamaliudo. Ohatu tale ko eilikano li li okupopya netilofimaneko nOmushiti. Eilikano ola kwatela mo eliyandjo letu nosho yo elineekelo letu muKalunga. Heeno, eilikano oli li oshitukulwa shelongelokalunga letu.
7. Otashi ti ngahelipi okwiilikana tu na elineekelo, nongahelipi omailikano a tya ngaho hae tu kwafele tu lididimikile omaudjuu?
7 Omailikano etu oku na okweendela pamwe nomaliudo okulineekela Jehova. Omuyapostoli Johannes okwa shanga a ti: “Elineekelo eli letu tu li na muye oleli: ngenge hatu mu indile sha pahalo laye, ote tu udu.” (1 Johannes 5:14) Jehova, Omukombadambada, Kalunga aeke kashili nomunaenghono adishe, oha yandje shili elitulemo le likalekelwa komailikano ovalongeli vaye a mana mo. Okukala tu shi shii kutya Kalunga ketu omunahole ohe tu udu ngeenge hatu mu shiivifile oisho yetu nomaupyakadi etu, otashi hekeleke.—Ovafilippi 4:6.
8. Omolwashike Ovakriste ovadiinini ve he na nande okukala va fya ohoni ile ve udite inava wana ngeenge tava popi naJehova meilikano?
8 Ovakriste ovadiinini kave na nande okufya ohoni ile okukala ve udite inava wana ile okuhakala nelineekelo ngeenge tava popi naJehova meilikano. Odoshili kutya ngeenge hatu lipe oushima ile twa wililwa po komaupyakadi, otashi dulika omafimbo amwe tu ha kale tu na ehalo okupopya naJehova meilikano. Peemhito da tya ngaho otu na okudimbuluka kutya Jehova oha “file ovafininikwa vaye onghenda” nonokutya oha “hekeleke oonakupolimana.” (Jesaja 49:13; 2 Ovakorinto 7:6) Momafimbo ouyahame nomaudjuu omo unene tuu twa pumbwa okupopya nelineekelo naTate yetu womeulu oo e li ohotengulu yetu.
9. Eitavelo otali dana onghandangala ilipi mokupopya kwetu naKalunga meilikano?
9 Opo tu mone ouwa pauyadi moufembanghenda weilikano, otu na okukala tu na eitavelo lashili. Ombibeli otai ti kutya “ou ta ehene kuKalunga e nokwiitavela nokutya, oko e li, naava tave mu kongo, ote va pe ondjabi.” (Ovaheberi 11:6) Eitavelo ola kwatela mo shihapu shi he fi ashike okwiitavela kutya Kalunga “oko e li.” Eitavelo lashili ola kwatela mo okwiitavela filufilu kutya Kalunga ota dulu noku na ehalo oku tu pa ondjambi omolwokudulika kuye. “Omesho Omwene ohaa pashukile ovayuki nomatwi aye ohaa endekele komailikano avo.” (1 Petrus 3:12) Okukaleka alushe momadiladilo okunakonasha nafye kwaJehova kwopahole otaku ningi omailikano etu a kale taa ti sha.
10. Omailikano etu oku na okukala a tya ngahelipi ngeenge otwa hala okumona efiloshisho lopamhepo laJehova?
10 Jehova oha pwilikine komailikano etu ngeenge hatu ilikana nomutima aushe. Omupsalme okwa shanga a ti: “Ohandi ku ingida nomutima aushe: Ude nge, Omwene.” (Epsalme 119:145) Mepingafano nomailikano a tulwa po ondjikilile omalongelokalunga mahapu, omailikano etu ohaa di komutima. Ngeenge hatu ilikana kuJehova “nomutima aushe,” eendjovo detu ohadi kala di na eityo nelalakano. Konima eshi twa ilikana ngaho twa mana mo, ohatu hovele okukala tu udite epepelelwo olo hali etifwa kokuundulila ‘omitengi detu kOmwene.’ Ngaashi Ombibeli tai udaneke, Jehova ‘ote ke tu kalela noshisho.’—Epsalme 55:23; 1 Petrus 5:6, 7.
Omhepo yaKalunga oi li omukwafi wetu
11. Onghedi imwe ilipi omo Jehova he tu nyamukula ngeenge hatu mu ‘indile’ ekwafo?
11 Jehova ke fi ashike Omuudi womailikano, ndele oku li yo Omunyamukuli wao. (Epsalme 65:3) David okwa shanga a ti: “Fiku handi hangika koudjuu, ohandi ku ifana, [osheshi oho nyamukula omaindilo ange, OB-1986].” (Epsalme 86:7) Nomolwaasho Jesus okwa ladipika ovahongwa vaye va ‘indile’ ekwafo laJehova molwaashi ‘Tate womeulu’ ota ka ‘yandja omhepo iyapuki kuava tave mu indile.’ (Lukas 11:9-13) Heeno, eenghono daKalunga tadi longo ohadi longo di li omukwafi, omuhekeleki ile omupopili, koshiwana shaye.—Johannes 14:16.
12. Ongahelipi omhepo yaKalunga tai dulu oku tu kwafela ngeenge omaupyakadi taa monika a fa madjuu unene?
12 Nokuli nongeenge twa taalelwa komayeleko, omhepo yaKalunga otai dulu oku tu pa “eenghono di dule odo dopaushitwe.” (2 Ovakorinto 4:7, NW) Omuyapostoli Paulus oo e lididimikila eenghalo dihapu didjuu, okwa popya nelineekelo a ti: “Aishe ohandi i dulu [omolwaau, NW] ta pameke nge.” (Ovafilippi 4:13) Sha faafana, Ovakriste vahapu kunena ova mona kutya ova pewa eenghono dopamhepo nodopamaliudo shi li enyamukulo komaindilo avo. Luhapu, omaupyakadi manene ihaa kala vali a fa madjuu unene konima eshi twa mona ekwafo lomhepo yaKalunga. Omolweenghono odo hadi di kuKalunga, nafye ohatu dulu okupopya ngaashi omuyapostoli Paulus, eshi a tile: “Muaishe otu li po twa fininikwa, ndele inatu patekena po, ofye twa limbililwa, ndele inatu kanifa eteelelo, ohatu tewaatewa, ndele inatu ekelwashi, twa natwa poshi, ndele inatu nyonwa po.”—2 Ovakorinto 4:8, 9.
13, 14. (a) Ongahelipi Jehova a kala ohotengulu yetu okupitila mEendjovo daye da shangwa? (b) Ongahelipi okutula moilonga omafinamhango Ombibeli kwe ku kwafela paumwene?
13 Omhepo iyapuki oya nwefa mo noya amena Eendjovo daKalunga da shangwa, omolwouwa wetu. Ongahelipi Jehova ha kala ohotengulu yetu mefimbo lomaudjuu okupitila mEendjovo daye? Onghedi imwe omo ku tu pa ounongo tau longo nosho yo oukeka wokudiladila. (Omayeletumbulo 3:21-24) Ombibeli ohai deula oukwatya wetu wokudiladila nokuxwepopaleka eenghono detu dokutomhafana. (Ovaroma 12:1) Okupitila mokulesha nokukonakona pandjikilile Eendjovo daKalunga noku di tula moilonga, ohatu dulu ‘okwiika [“okudeula eenghono detu dokukoneka opo tu dule,” NW] okutongola ouwa nowii.’ (Ovaheberi 5:14) Otashi dulika wa mona paumwene nghee omafinamhango Ombibeli e ku kwafela u ninge omatokolo opandunge eshi wa li wa taalelwa komaudjuu. Ombibeli otai tu pe eshiivo olo tali dulu oku tu kwafela tu mone nghee tu na okukandula po omaupyakadi manene.—Omayeletumbulo 1:4.
14 Eendjovo daKalunga otadi tu pe eteelelo lexupifo olo li li yo odjo yeenghono. (Ovaroma 15:4) Ombibeli otai tu lombwele kutya oinima ii itai ka kala tai ningwa fiyo alushe. Omaudjuu keshe tae tu hange oopakafimbo. (2 Ovakorinto 4:16-18) Otu na “[eteelelo] lomwenyo waalushe, ou wa udanekwa kuKalunga iha fufya, nalenale efimbo manga inali hovela.” (Titus 1:2) Ngeenge otwa hafele eteelelo olo, hatu kaleke alushe momadiladilo onakwiiwa ikumwifi oyo Jehova a udaneka, ohatu ka dula okulididimika moudjuu.—Ovaroma 12:12; 1 Ovatessaloniki 1:3.
Eongalo—efiloshisho laKalunga lopahole
15. Ongahelipi Ovakriste tava dulu okukwafelafana?
15 Efiloshisho vali limwe laJehova olo tali dulu oku tu kwafela mefimbo lomaudjuu eendafano olo hatu hafele meongalo lopaKriste. Ombibeli otai ti: “Okaume oku hole alushe, nomumwaina omulumenhu ta dalwa, a kwafe moluhepo.” (Omayeletumbulo 17:17) Eendjovo daKalunga otadi ladipike aveshe meongalo va fimanekafane nokukala ve holafane. (Ovaroma 12:10) Omuyapostoli Paulus okwa shanga a ti: “Inapa kala ou ta kongo ouwa waye mwene, ndelenee keshe na konge ouwa wamukwao.” (1 Ovakorinto 10:24) Okukala noikala yopamadiladilo ya tya ngaho otaku dulu oku tu kwafela tu yandje elitulemo keemhumbwe davamwe ponhele yoku li yukifa komayeleko oo tae tu hange. Ngeenge otwe liyambe okukwafela vamwe, itatu yandje ashike ekwafo, ndele ohatu mono yo ehafo nembilipalelo olo tali tu kwafele tu humbate omitengi detu noupu.—Oilonga 20:35.
16. Ongahelipi Omukriste keshe ta dulu okukala etwomukumo kuvamwe?
16 Ovalumenhu novakainhu ovo va pyokoka pamhepo otava dulu okudana onghandangala tai ti sha mokupameka vakwao. Opo va dule oku shi ninga, ove na okukala ve shii okupopiwa navo noupu. (2 Ovakorinto 6:11-13) Eongalo otali mono ouwa shili ngeenge aveshe ova kongo eemhito okupandula ovanyasha, okupameka ovaitaveli vape nokuladipika ovo va polimana. (Ovaroma 15:7) Ohole youmwainafana otai ke tu kwafela yo tu henuke oikala yokuhelineekelafana. Katu na okweendelela okufika pexulifodiladilo kutya omaudjuu oo tae tu hange paumwene oku li euliko kutya otwa nghundipala pamhepo. Osha yeleka eshi Paulus a ladipika Ovakriste va ‘popye nehekeleko neemwenyo da polimana.’ (1 Ovatessaloniki 5:14, NW) Ombibeli otai ulike kutya nOvakriste ovadiinini ohava hangika koudjuu.—Oilonga 14:15, OB-1954.
17. Eemhito dilipi tu na dokupameka ekwatafano loumwainafana wopaKriste?
17 Okwoongala kwopaKriste otaku yandje omhito iwaelela kufye opo tu hekelekafana nokutwaafana omukumo. (Ovaheberi 10:24, 25) Eendafano olo lopahole inali ngabekelwa ashike pokwoongala kweongalo. Ponhele yaasho, oshiwana shaKalunga ohashi kongo yo eemhito deendafano liwa pomafimbo amwe e lili. Ngeenge eenghalo didjuu tadi holoka, ohatu ka kwafelafana noupu molwaashi otwa panga nale oukaume wopofingo. Omuyapostoli Paulus okwa shanga a ti: “Molutu mu ha kale etukauko, oinhimbu aishe i kale hai filafana oshisho shi fike pamwe. Noshinhimbu shimwe ngenge tashi yahama, oinhimbu ikwao otai yahama pamwe nasho; ile oshinhimbu shimwe tashi fimanekwa, oinhimbu aishe otai hafe pamwe nasho.”—1 Ovakorinto 12:25, 26.
18. Eamo lilipi tu na okuhenuka ngeenge twa teka omukumo?
18 Omafimbo amwe otashi dulika tu kale tu udite twa teka omukumo unene ndee hatu kala tu he na ehalo okuhafela eendafano nOvakriste vakwetu. Otu na okukondjifa omaliudo a tya ngaho opo e he tu imbe ehekeleko nekwafo olo ovaitaveli vakwetu tava dulu okuyandja. Ombibeli otai tu londwele tai ti: “Ou te litukula, ota kongo omahalo aye mwene. Neenghono adishe ta kondjifa osho shi neendunge.” (Omayeletumbulo 18:1) Ovamwatate novamwameme ove li efiloshisho olo twa pewa kuKalunga. Ngeenge otwa tambula ko efiloshisho olo lopahole, ohatu ka mona epepelelwo mefimbo lomaudjuu.
Kala u na omukumo
19, 20. Ongahelipi Omishangwa tadi tu kwafele tu ekeleshi omadiladilo mai?
19 Ngeenge twa teka omukumo notwa nyika oluhodi, oshipu okuyandja elitulemo komadiladilo mai. Pashihopaenenwa, ngeenge vamwe tava hangika komaudjuu, otashi dulika va hovele okulimbililwa oupamhepo wavo nokufika pexulifodiladilo kutya omaudjuu avo oku li euliko kutya Kalunga ine va hokwa. Ndele dimbuluka kutya Jehova iha yeleke nande omunhu ‘nowii.’ (Jakob 1:13) Ombibeli otai ti: “Hakomutima [Kalunga] ta fininike nokunyikifa oluhodi ovana vovanhu.” (Omaimbilokemo 3:33) Ponhele yaasho, Jehova oha kala a nyika oluhodi neenghono ngeenge ovapiya vaye tava mono oixuna.—Jesaja 63:8, 9; Sakaria 2:8.
20 Jehova “oXe yefilonghenda naKalunga kehekeleko alishe.” (2 Ovakorinto 1:3) Ohe tu file oshisho note ke tu nenepeka pefimbo la wapala. (1 Petrus 5:6, 7) Okukaleka alushe momadiladilo ohole yaKalunga yoku tu hola otashi ke tu kwafela tu kale tu na omukumo, nokuli nokukala twa hafa. Jakob okwa shanga a ti: “Ovamwatate, hafeni shili, ngenge tamu hangika komahongaulo opahapu.” (Jakob 1:2) Omolwashike mbela? Okwa nyamukula a ti: “Osheshi ngenge a ninga omuduli walo [weshindo], ota ka pewa oshishani shomwenyo, ou Omwene e shi udanekela ava ve mu hole.”—Jakob 1:12.
21. Kashi na nee mbudi kutya omaudjuu elipi e tu taalela, eshilipaleko lilipi Kalunga ta shilipaleke nalo ovo ve li ovadiinini kuye?
21 Ngaashi Jesus a londwela, ohatu ka mona oudjuu mounyuni. (Johannes 16:33) Ndele Ombibeli otai udaneke kutya, kutya nee ‘oudjuu ile efininiko ile okutewaatewa ile ondjala ile onghai ile oshiponga,’ itai ka dula oku tu tukula mohole yaJehova nomohole yOmona waye. (Ovaroma 8:35, 39) Itashi hekeleke tuu okushiiva kutya oudjuu keshe we tu taalela owopokafimbo! Lwopokati opo, fimbo twa teelela exulilo lokumona oixuna kwovanhu, Tate yetu omunahole, Jehova, ote tu amene. Ngeenge otwa kongo eameno kuye, ota ka kala “emanyahote kovafininikwa, emanyahote mefimbo loudjuu.”—Epsalme 9:10.
Otwe lihonga shike?
• Oshike osho Ovakriste ve na okuteelela ofimbo ve li mounyuni ou woukolokoshi?
• Ongahelipi omailikano etu a mana mo tae tu pameke ngeenge twa taalelwa komayeleko?
• Ongahelipi omhepo yaKalunga i li omukwafi?
• Ongahelipi hatu dulu okukwafelafana?
[Efano pepandja 15]
Otu na okukonga Jehova twa fa hatu tondokele moshungongulu ya pama
[Efano pepandja 16]
Ovo va pyokoka pamhepo ohava longifa omhito keshe va pandule nokutwa omukumo vakwao