Deuteronomion
33 Aa omanangeko noupuna oo Moses, omupiya waKalunga kashili, a lombwela Ovaisrael ofimbo ina fya. 2 Okwa ti:
“Jehova okwe uya a dja kuSinai,
Nokwe va minikila okudja kuSeir.
Okwa minikila noshinge okudja koshitukulwa shokeemhunda daParan,
Nokwa li pamwe novaengeli ovayapuki omayovi omilongo,
Keke laye lokolulyo okwa li ovakwaita vaye.
3 Oku hole oshiwana shaye;
Ovayapuki vavo aveshe ove li meke loye.
Ova li omutumba peemhadi doye;
Nova li va hovela okupwilikina keendjovo doye.
4 (Moses okwe tu pa oshipango, omhango,
Shi li emona leongalo laJakob.)
5 Kalunga okwa ninga ohamba yaJesurun,*
Eshi ovawiliki voshiwana va ongala
Pamwe nomapata aeshe aIsrael.
6 Ruben ina fya, na kale nomwenyo,
Novalumenhu vomepata laye inava ninipala.”
7 Okwa popya shi na sha naJuda, ta ti:
“Jehova, uda ondaka yaJuda,
Ove mu alulila koshiwana shavo.
Omaoko aye okwa amena* osho shaye.
Mu kwafela a lwife ovatondi vaye.”
8 Shi na sha naLevi, okwa ti:
“Oumanya voye* voTummim novoUrim otava ningi vomunhu oo omudiinini kwoove,
Oo wa yeleka muMassa.
Ova hovela oku mu lwifa pomeva omuMeriba,
9 Omunhu oo ta popi shi na sha naxe nosho yo ina, ta ti: ‘Ame inandi va fimaneka.’
Nokuli novamwaina ke va shii,
Nokwe lidimbika ovanamati vaye.
Molwaashi ova kala metwokumwe nondjovo yoye,
Nova diinina ehangano loye.
10 Nava honge Jakob omatokolo oye
NaIsrael Omhango yoye.
Nave ku yambele* oitwimifo yedimba liwa
Neyambo alishe koaltari yoye.
11 Jehova, nangeka noupuna eenghono daye,
Kala wa hokwa oilonga yomake aye.
Nyanyaula omaulu* aavo tave mu lwifa,
Opo ovo ve mu tonde vehe mu lwife vali.”
12 Shi na sha naBenjamin, okwa ti:
“Oo e hole Jehova na kale meameno laye;
Ofimbo ye te mu amene efiku alishe,
Ota ka kala komapepe aye.”*
13 Shi na sha naJosef, okwa ti:
“Jehova na nangeke noupuna edu laye,
Noinima iwa elela ya dja keulu,
Nomume nosho yo omeva taa di meefifiya domedu,
14 Noinima iwa elela oyo ya kulikwa ketango
Nosho yo oinima iwa elela oyo tai likolwa omwedi keshe,
15 Noinima ya denga mbada elela ya dja keemhunda* odo da kala po nale,
Noinima iwa elela ya dja koikulundudu oyo tai kala po alushe,
16 Noinima iwa elela yokedu naashishe osho shi li ko,
Nokukala a hokiwa kwaao a li a holoka meno.
Omanangeko noupuna nae uye kombada yomutwe waJosef,
Koshikoroni shokomutwe waao a tongolwa mo movamwaxe.
17 Eholokepo laye likumwifi ola fa longobe yomhedi, oyo ya dalwa tete,
Eembinga daye oda fa eembinga domhedi yomoixwa.
Ote di undulifa* oiwana
Aishe fiyo okominghulo dedu.
Ove li ovalumenhu omayovi omilongo vometangakwaita laEfraim,
Novalumenhu omayovi vometangakwaita laManasse.”
18 Shi na sha naSebulon, okwa ti:
“Sebulon, kala wa hafa eshi to di mo,
Naave Isaskar, kala wa hafa momatwali oye.
19 Otava ka ifana ovanhu komhunda.
Naako otava ka yambela ko omayambo e li pauyuki.
Otava ka kufa* moupuna muhapu womomafuta
Nomomamona omedu a holekwa.”
20 Shi na sha naGad, okwa ti:
“Ou ta tamununa mo eengaba daGad na nangekwe noupuna.
Okwa nangala kwinya ngaashi onghoshi,
E lilongekida okunyanyaula po okwooko, noshikoroni shokomutwe.
21 Ote ke lihoololela ye mwene oshitukulwa shotete,
Noshitukulwa osho osho a ufilwa komuyandjimhango.
Ovawiliki vovanhu otava ka ongala pamwe.
Ota ka wanifa po ouyuki waJehova
Nosho yo omatokolo aye pamwe naIsrael.”
22 Shi na sha naDan, okwa ti:
“Dan okanghoshona.
Ota ka ponokela okudja muBasan.”
23 Shi na sha naNaftali, okwa ti:
“Naftali okwa mbilipalelwa, molwaashi okwa hokiwa
Nokwa nangekwa noupuna filufilu kuJehova.
Na kwate ko edu lokoushilo nolokolukadi.”
24 Shi na sha naAsser, okwa ti:
“Asser na nangekwe noupuna a kale e na ovanamati.
Na kale e holike kovamwaxe,
Nosho yo na yaveke* eemhadi daye momaadi.
25 Omakumba opoivelo yoye otaa ka kala a longwa moshivela shilaula nomongopolo,
Noto ka kala wa amenwa omafiku oye aeshe.*
26 Kape na ou a fa Kalunga kashili kaJesurun,
Oo ha kuluka okudja meulu, opo e ku kwafele
Noha kuluka a londa koilemo neenghono daye dinene.
27 Kalunga oye eameno okudja nalenale,
Omaoko aye aalushe otae ku yambidida.
Ota ka taataa po ovatondi moipafi yoye,
Note ke ku lombwela kutya: ‘Va hanauna po!’
28 Israel ota ka kala meameno,
Noludalo laJakob* otali ka kala meameno,
Medu li na oilya nomaviinyu mape,
Olo eulu lalo tali di omume.
29 Israel, kala wa hafa!
Olyelye e li po e ku fa,
Oshiwana osho tashi hafele exupifo laJehova,
Oshikelelifo shoye shoku ku amena
Neongamukonda leenghono doye?
Ovatondi voye otave ke ku linyongamena va tila moipafi yoye,
Noto ka enda keembuda davo.”*