Deuteronomion
32 “Eulu, pwilikina osho handi ka popya,
Nedu nali ude eendjovo domokanya kange.
2 Omalombwelo ange oku li ngaashi odula tai loko;
Eendjovo dange odi li ngaashi omume tai wile,
Ngaashi odula tai loko omwiidi tai nyanyangele
Nongaashi odula yepoola tai loko oimeno.
3 Ohandi ka shiivifa edina laJehova.
Ohandi ka hepaulula ounene waKalunga ketu!
4 Ye Emanya, oilonga yaye oya wanenena,
Eendjila daye adishe oda yuka.
Okalunga omudiinini, oo iha tokola shihe li pauyuki;
Omuyuki nomunashili.
5 Ovanhu ovo ova katuka shihe li pandunge.
Kave fi ovana vaye, ve lietela oupyakadi.
Epupi la nyonauka nola pilalala.
6 Mbela osho mu na okulihumbatela Jehova ngaha,
Nye omalai novanhu vehe na eendunge?
Haye Xo oo e mu eta po,
Oo e mu shita nokwe mu ninga oshiwana?
7 Dimbulukeni efimbo lonale;
Diladileni komido domapupi onale.
Puleni ooxo, notave ke mu lombwela;
Ovakulunhu veni otave ke mu shiivifila.
8 Eshi Omukombadambada a pa oiwana efyuululo layo,
Naashi a tukula ovana vaAdam* kuvakwao,
Okwa tukula eengaba dovanhu,
She likolelela komuvalu wovanamati vaIsrael.
9 Oshiwana shaJehova oshi li oshitukulwa shaye;
Jakob oku li efyuululo laye.
10 Okwe mu hanga mombuwa,
Mombuwa yongaho, mu na oinamwenyo tai kwena.
Okwe mu dingilila, opo e mu amene noku mu fila oshisho,
Okwe mu amena ngaashi omuni yeisho laye.
11 Ngaashi onhwa tai tukifa oudilona vayo poshihadi,
Tai tengele kombada youdilona vayo,
Tai xwaananeke omavava ayo, tai va tumbu po,
Noku va humbata pombuda yayo,
12 Jehova oye aeke a kala te mu* wilike;
Nokape na kalunga wokoilongo imwe a kala pamwe naye.
13 Okwe mu endifa keenhele dokoikulundudu,
Opo a lye oikunomwa yomepya.
Okwa kala noku mu palula nomaadi eenyiki taa di memanya
Nomaadi taa di memanya likukutu,
14 Omaadi eengobe nomashini eedi noikombo,
Pamwe needi odo da denga mbada,*
Eedi deendume, oikombo yoindume,
Pamwe noilya oyo ya denga mbada yo-wheat;
Nowa nwa omaviinyu.*
15 Eshi Jesurun* a ondoka, okwa tukululila oshibofa omwene waye.
Owa ondoka, wa pama nowa paluka.
Onghee okwa efa po Kalunga, oo e mu shita,
Nokwa tonda Emanya lexupifo laye.
16 Ove mu handukifa, eshi va longela ookalunga vokoilongo imwe;
Ove mu nyemateka noinima itondifa.
17 Ova li tava yambele eendemoni, ndele haKalunga,
Ookalunga ovo vehe shii,
Ookalunga ovo vape opo ve uya,
Ovo ooxokulululwa vehe shii.
18 Omwa dimbwa Emanya olo li li xo yeni,
Omwa dimbwa Kalunga oo e mu shita.
19 Eshi Jehova e shi mona, okwe va ekelashi,
Molwaashi ovana vaye ovamati noukadona ove mu nyemateka.
20 Opo nee okwa ti: ‘Itandi va kwafele vali;*
Ame ndi tale eshi tava ningi.
Molwaashi ove li epupi la nyonauka,
Ovana ovo vehe fi ovadiinini.
21 Ova nyemateka nge neenghono* omolwokulongela ookalunga vongaho;
Ova handukifa nge omolwoikalunga yavo ihe na ekwafo lasha.
Ohandi ke va ningifa va kwatwe kondubo mokulongifa ovanhu ovo vehe fi oshiwana;
Ohandi ke va handukifa mokulongifa oshiwana shihe na eendunge.
22 Ehandu lange ola etifa omundilo
Oo tau ka xwika fiyo okoshi yOmbila,*
Notau ka lungwinifa po edu noinima aishe i li ko
Notau ka xwika po omakanghameno eemhunda.
23 Ohandi ka hapupalifa omaupyakadi avo;
Ohandi ke va umba noikuti yange.
24 Otava ka hepekwa kondjala
Notava ka hangika koshidu shidjuu nokehanauno la kwata moiti.
Ohandi ke va tumina oilyani oyo ya nyika oshiponga
Nomayoka* oudiyo oo hae lipweda pedu.
25 Ovo ve li kondje, otava ka dipawa keongamukonda
Naavo ve li meni, otava ka kwatwa koumbada
Osho otashi ka ningilwa yo ovalumenhu ovanyasha, oukadona elela,
Ouhanana novakulupe.
26 Onda li nda hala okutya: “Ohandi ke ve lihanifa;
Opo ovanhu vehe va dimbuluke vali.”
27 Onda li handi lipula kutya ovatondi vange otave ke linyenga ngahelipi,
Molwaashi ovatondi otashi dulika vehe shi ude ko nawa.
Otashi dulika va tye: “Otwa pondola omolweenghono detu;
Ndele haJehova a longa oinima aishe oyo.”
28 Ove li oshiwana shihe na eendunge,*
Nomokati kavo kamu na oo e na eendunge.
29 Ngeno ova li ovanaendunge, ngeno ova dilonga kwaasho.
Ngeno ova diladila koilanduliko oyo tai ke va hanga.
30 Ongahelipi umwe ta dulu okutaataa 1 000,
Nongahelipi vavali tava dulu okutaataa 10 000?
Ongeenge ashike emanya lavo le va landifa po
Nongeenge Jehova e va yandje kovatondi vavo.
31 Osheshi emanya lavo inali fa Emanya letu,
Nokuli novatondi vetu ove shi dimina.
32 Omaviinyu avo okwa fa omaviinyu omuSodom
Naao a dja moikunino yomuGomorra.
Omandjebele avo oku na oudiyo,
Nomashila omandjebele avo omalula.
33 Omaviinyu avo okwa fa oudiyo womayoka,
Oudiyo wongolonyoka wa nyika oshiponga.
34 Oilonga yavo aishe onde i pata noshipatifo,
Nonde i tuvikila meemhungulilo dange.
35 Ehandu olange, aame handi yandje outekuduliko,
Peufwafimbo eshi eemhadi davo tadi ka fenunguta,
Osheshi efiku loudjuu wavo oli li popepi,
Naasho tashi ke va hanga otashi uya diva.’
36 Jehova ota ka tokola oshiwana shaye,
Nota ka kenukila* ovapiya vaye,
Ngeenge a mono kutya kave na vali eenghono,
Nosho yo kutya ovo vehe na eenghono nekwafo ovo ashike va xupa po.
37 Opo nee ota ka tya: ‘Ookalunga kavo ove li peni,
Memanya omo hava kongo eameno,
38 Ovo va li hava li oinghene yomayambo avo,*
Nohava nu omaviinyu oikunwayambo yavo ove li peni?
Nave uye ve mu kwafele.
Va efeni va ninge onhele yeni yeameno.
39 Taleni, Aame andike Kalunga,
Kape na vali ookalunga vamwe, kakele kwaame.
Ohandi dipaa nohandi yandje omwenyo.
Ohandi ehameke, nohandi velula,
Kape na oo ta dulu okuxupifa umwe momake ange.
40 Ngeenge nda aneke eke lange keulu,
Ndele handi ane kutya: “Ngaashi ashike ndi li po fiyo alushe,”
41 Ngeenge onda upike eongamukonda lange tali taima
Nonda longekida eke lange ndi tokole,
Ohandi ka handukila ovatondi vange
Nohandi ka yandja outekuduliko kwaavo ve tonde nge.
42 Oikuti yange otai ka kolwa kohonde,
Neongamukonda lange otali ka lya ombelela,
Ohonde yaavo va dipawa noyeenghwate,
Nomitwe dovawiliki vovatondi.’
43 Oiwana nye, hafeni pamwe noshiwana shaye,
Osheshi ota ka pula ohonde yovapiya vaye,
Ota ka handukila ovatondi vaye
Nota ka koshola edu loshiwana shaye.”
44 Opo nee Moses okwe uya, ndele ta popi vali eendjovo adishe deimbilo olo ovanhu ve udite ko, ye naHosea,* omonamati waNun. 45 Konima eshi Moses a mana okupopya nOvaisrael aveshe eendjovo adishe odo, 46 okwa tya kuvo: “Diinineni eendjovo adishe delondwelo odo nde mu lombwela nena, opo mu dule okulombwela ovana veni va diinine eendjovo adishe dOmhango ei. 47 Eendjovo odo kadi fi ashike dongaho, ndele otadi ti omwenyo kunye, nomolweendjovo odo, otamu ka kala nomwenyo mule medu olo tamu i mu ka kale ngeenge omwa tauluka omulonga waJordan.”
48 Jehova okwa popya naMoses mefiku olo tuu olo, ta ti: 49 “Inda komhunda yaAbarim, komhunda yaNebo, oyo i li medu laMoab, i li popepi naJeriko, ndele to tale edu laKaanan, olo handi ka pa Ovaisrael va ka kale mo. 50 Opo nee oto ka fila komhunda oyo u li pokulonda, noto ka pakwa povakweni,* ngaashi omumwaxo Aron a fila komhunda yaHor, nokwa pakwa povakwao, 51 molwaashi amushe kamwa li ovadiinini kwaame mokati kOvaisrael pomeva opuMeriba, muKades, mombuwa yaSin, molwaashi inamu yapulifa nge moipafi yOvaisrael. 52 Oto ka monena edu olo kokule, ndele ito ka ya medu olo handi ka pa Ovaisrael.”