Eehamba dotete
17 Elia,* Omutisbi, omukalimo womuGilead, okwa lombwela Ahab, a ti: “Ohandi ane kuJehova, Kalunga kaIsrael, omunamwenyo, oo handi longele,* kutya moule womido odo itaku kala omume, ile odula, kakele ashike ngeenge nde shi popi.”
2 Opo nee ondjovo yaJehova oye uya kuye tai ti: 3 “Dja ko oko, u ye kombinga yokoushilo, ndele to ka hondama mEfilu laKerit, koushilo womulonga waJordan. 4 Oto ka nwa mokamulonga, nohandi ka lombwela omakola e ku etele oikulya oko.” 5 Okwa ya diva, nokwa ninga osho a lombwelwa kuJehova; okwa ya, ndele ta kala ha di pEfilu laKerit, koushilo womulonga waJordan. 6 Omakola okwa kala hae mu etele omungome nombelela efimbo longula nosho yo omungome nombelela efimbo lokonguloshi, nokwa kala ha nu mokamulonga. 7 Ndele konima yomafiku onhumba, okamulonga oka pwiinina, molwaashi medu olo kamwa li mwa lokwa.
8 Onghee ondjovo yaJehova oye uya kuye tai ti: 9 “Fikama, inda kuSarefat muSidon, ndele to kala oko. Tala, ohandi ka lombwela omufiyekadi waako e ku longekidile oikulya.” 10 Opo nee okwa fikama, nokwa ya kuSarefat. Eshi a fika poshivelo shoshilando, okwa hanga po omufiyekadi ta tyava oikuni. Okwe mu ingida, ndele ta ti: “Pe nge omeva manini mekopi ndi nwe.” 11 Ofimbo a li ta ka tala omeva, Elia okwe mu ingida ta ti: “Alikana, etele nge mo yo omungome.” 12 Opo nee omufiyekadi okwa ti: “Ohandi ane medina laJehova, Kalunga koye, omunamwenyo, kutya kandi na omungome. Molwiyo eli la kula omu na ashike oufila tau yada eke, nomolwiyo eli linini omu na ashike omaadi manini. Paife ohandi tyava oukuni, ndele handi i, opo ndi ka longekide sha shetu nomonamati wange. Konima ngeenge twa li, ohatu fi.”
13 Elia okwa tya kuye: “Ino kala wa tila. Inda, ndele to ningi osho wa popya. Ashike tete ningile nge omungome munini wongonga noufila oo u li mo, ndele to u eta kwaame. Konima yaasho, oto dulu okulongekida sha sheni nomonamati woye. 14 Jehova, Kalunga kaIsrael, okwa ti: ‘Oufila itau pu mo molwiyo olo la kula, nomaadi itaa pu mo molwiyo olo linini fiyo osheshi Jehova a lokifa odula kombada yedu.’” 15 Opo nee okwa ya nokwa ninga osho a lombwelwa kuElia, ndele omufiyekadi noukwaneumbo waye nosho yo Elia ova kala ve na oikulya ya wana omafiku mahapu. 16 Oufila inau pwa mo molwiyo olo la kula, nomaadi inaa pwa mo molwiyo olo linini, metwokumwe nondjovo yaJehova, oyo a popya okupitila muElia.
17 Konima yoinima oyo, omonamati womukainhu, mwene weumbo olo, okwa ka vela, nouvela waye owa li wa kwata moiti neenghono noka li vali ta fuda. 18 Opo nee omukainhu oo okwa tya kuElia: “Omupiya waKalunga kashili, onde ku ningila owii washike? Owe uya okudimbulukifa nge omanyono ange nokudipaa omonamati wange?” 19 Ashike Elia okwa tya kuye: “Pe nge omonamati woye.” Opo nee okwe mu kufa ko komukainhu, nokwa ya naye ponduda yopombada e mu humbata, ndele te mu nangeke kombete yaye. 20 Elia okwa ilikana kuJehova ta ti: “Alikana, Jehova, Kalunga kange, mbela oto efa omufiyekadi ou ndi li naye a mone oixuna? Oto efa omonamati waye a fye?” 21 Opo nee Elia okwe linyongamena lutatu kokaana, ndele ta ilikana kuJehova ta ti: “Jehova, Kalunga kange, okaana aka naka kale vali nomwenyo.”* 22 Jehova okwa uda eilikano laElia, nokaana oka nyumuka. 23 Elia okwa kufa okaana ponduda yopombada, nokwe ka twala meumbo, ndele te ka yandje kuina. Opo nee Elia okwa ti: “Tala, omonamati woye oku na omwenyo.” 24 Omukainhu okwa tya kuElia: “Paife ondi shi shii shili kutya ove omupiya waKalunga, nonokutya ondjovo yaJehova, oyo tai di mokanya koye, oyoshili.”