Omuudifi
12 Dimbuluka Omushiti woye Munenenene momafiku ounyasha woye, ofimbo omafiku oudjuu* inae uya, nofimbo omido inadi uya, eshi to ka tya: “Inandi di panda”; 2 ofimbo etango nouyelele nomwedi neenyofi inai fiilila, nofimbo oilemo inai aluka nokuloka;* 3 efimbo olo ovanangeli* veumbo tava kakama,* novalumenhu ovanaenghono tava ende omwoodimba, novakainhu itava tu vali, molwaashi va ninipala, noukadona ava hava talele momakende, ve wete ashike omilaulu; 4 eshi omivelo odo da taalela mepandavanda da idilwa, eshi omifindo daavo tava tu itadi linyenge vali mokule, eshi omunhu ta pendulwa kekweno lokadila, nosho yo eshi eendaka adishe dovanakadona ovaimbi tadi fiilile. 5 Natango, omunhu oha kala a tila poima pa londa, noha kala a tila okuya mepandavanda. Nomuti wo-almond otau temuna, na shanghana ote lifindaeke a finda komesho, noshiimati osho hashi eta ehalo lokulya ohashi tashuka, molwaashi omunhu okwa finda keumbo laye laalushe, novalilanghali otava endaenda mepandavanda; 6 ofimbo ongodi yoshisilveri inai kufwa po, noshiyaxa shoshingoli inashi tatuka, noshitoo shopofifiya inashi tatuka noshikweyo shondungu inashi teka. 7 Opo nee ondwi otai shuna medu ngaashi ashike ya li, nomhepo* otai shuna kuKalunga kashili, oo e i yandjele.
8 Omuudifi okwa ti kutya, “Aishe oyongaho elela! Oinima aishe oyongaho.”
9 Omuudifi ina ninga ashike omunaendunge, ndele okwa twikila okuhonga ovanhu osho a li e shii; okwa dilonga nokwa ninga omapekapeko nawanawa, opo a tule kumwe* omayeletumbulo mahapu. 10 Omuudifi okwa kendabala okukonga eendjovo da wapala nokushanga eendjovo di li paushili monghedi i li mondjila.
11 Eendjovo dovanaendunge odi li ngaashi oshixwango sheenhani,* neendjovo davo odo da hoololekeka oda fa eembosha da dengelwa moule; eendjovo adishe oda yandjwa komufita umwe. 12 Kakele kaasho, omumwange, kala wa londwelwa kutya: Okushangwa kwomambo mahapu kaku na exulilo, nomokulipaka mo muo unene otaku lolola olutu.*
13 Exulilo loinima aishe oyo twe i uda oleli: Tila Kalunga kashili nokudiinina oipango yaye, osheshi omunhu keshe osho e na okuninga. 14 Osheshi Kalunga kashili ota tokola oilonga aishe, mwa kwatelwa oinima aishe oyo ya holekwa, kutya nee oiwa, ile oii.