Omayele oo ho yandje oho a yandje monghedi ya tya ngahelipi?

Mbela owa pulilwe ngoo nande onale omayele kuumwe? Pashihopaenenwa, otashi dulika wa li wa pulwa omapulo ngaashi: ‘Ondi na okuninga po shike? Nandi ye ngoo shili kokavilo oko? nandi lalakanene ngoo shili eifano olo? ile natu endelafane ngoo shili nomunhu ou fye tu ka hombole?’

Ovanhu ovo ve hole osho sha yuka otashi dulika ve ku pule ekwafo ngeenge va hala okuninga omatokolo onhumba oo tashi dulika a ka kume ekwatafano lavo nookaume kavo, noilyo yomaukwaneumbo avo ile nokuli naJehova. Mbela oto ke va pa omayele a kanghamena kushike? Shito oho ningi po shike ngeenge vamwe ve ku pula u va pe omayele? Ndele kashi na nee mbudi kutya oupyakadi waao e kupula omayele owa nafangwa ile owa kwata moiti, Omayeletumbulo 15:28 okwa ti: “Omutima womuyuki otau diladila osho tau shi nyamukula.” Natu ka taleni nghee omafinamhango atano Ombibeli aa taa shikula apa taa dulu oku tu kwafela ngeenge hatu yandje omayele.

1 Kendabala okuuda ko ashishe osho sha kwatelwa mo.

“Ou ta nyamukula fimbo ina uda ko, osho oulai waye ndee tashi mu fifa ohoni.” — OMAYEL. 18:13.

Opo tu dule okuyandja omayele mawa, otu na tete okuuda ko onghalo nosho yo etaleko laao ta kongo ekwafo. Oku shi faneka, natu tye nee ngeno omunhu wonhumba okwe ku dengela ongodi ta ti kutya okwa hala okuuya keumbo leni ndele ke shii kutya ne uye nondjila ilipi. Mbela oshike u na okushiiva tete opo u dule oku mu pukulula? Mbela oto dulu ngoo oku mu lombwela kutya oshiwa okuuya nondjila yonhumba ove ino uda kutya ota denge e li peni? Hasho nandenande! Sha faafana, opo u dule okuyandja omayele taa wapalele, owa pumbwa tete okushiiva kutya nakukonga ekwafo okwa fikama naanaa peni meityo lopafaneko, mokutala konghalo omo e li nosho yo ketaleko laye. Mbela owa pumbwa okushiiva oinima yonhumba i na sha nonghalo omo e li opo u dule nawa oku mu pa omayele? Ngeenge otwa pe omunhu omayele tuhe shii nawa onghalo yaye, otashi dulika tu ke mu ngwangwaneke shi dulife nale. — Luk. 6:39.

Tala kutya okwa konga nale ouyelele u fike peni. Otashi ka kala pandunge okupula omunhu oo a pumbwa okupewa omayele omapulo ngaashi: “Omafinamhango Ombibeli elipi wa diladila okutula moilonga?” “Osho wa hala okuninga oshi na omauwa nomawii elipipo?” “Fiyo opapa owa konga ouyelele u fike peni?” “Ekwafo lilipi wa mona nale okudja kuvamwe, ngaashi kovakulunhuongalo, kovadali voye ile kwaao ha konakona naave Ombibeli?”

Omanyamukulo omapulo oo otashi dulika e ke tu kwafele tu mone kutya oo ta kongo omayele okwa ninga nale eenghendabala di fike peni. Eshi hatu yandje omayele otu na okudiladila komayele oo vakwetu va pa nale omunhu oo. Otu na yo okutala ngeenge omunhu oo ota kongo ashike omuyandjimayele oo ta ‘nyuwifa omatwi aye’ nomayele oo e wete tae mu wapalele. — 2 Tim. 4:3.

2 Henuka okuyandja omayele meendelelo.

“Omunhu keshe na kale ha endelele okupwilikina, ne liteelele mokupopya.” — JAK. 1:19.

Omafimbo amwe otashi dulika tu diladile kutya okuyandja omayele meendelelo otashi ka kwafela oo e a pumbwa. Ndele mbela osho otashi ka kala ngoo pandunge, naunene tuu ngeenge omunhu ota pula omayele kombinga yoshinima osho tuhe shii nawa? Omayeletumbulo 29:20 otaa ti: “Wa mona ko tuu omulumenhu ta endelele okupopya? Okuteelela eendunge delai ku dule winya.”

Shilipaleka tete ngeenge omayele oo wa hala okuyandja oku li ngoo filufilu metwokumwe nounongo wopakalunga. Lipula kutya, ‘Mbela onda nwefwa mo komadiladilo nosho yo “komhepo younyuni”?’ (1 Kor. 2:12, 13) Dimbuluka kutya inashi wana ashike okuyandja omayele to shi ningi nomalinyengotomheno mawa. Eshi omuyapostoli Petrus a li a uda kutya Jesus oku na okuwanifa po oshinakuwanifwa shonhumba shidjuu, okwe mu pa omayele a ti: “Omwene, osho nashi ku kale kokule u ha ningwe ngaha.” Oshike hatu lihongo monghedi omo Petrus a li a katuka? Ohatu lihongo mo kutya nokuli nomunhu oo e hole osho sha yuka ota dulu okuxumifa komesho ‘omadiladilo opanhu’ ponhele yokuxumifa komesho ‘aa aKalunga.’ (Mat. 16:21-23) Inashi fimana tuu okukala hatu diladila tete fimbo inatu yandja omayele! Shimwe vali, mbela owino oo tu na kau dulike kokule kounongo waKalunga? — Job 38:1-4; Omayel. 11:2.

3 Tula moilonga nelininipiko Eendjovo daKalunga.

“Ihandi longo sha muame mwene, ndelenee osho Tate e shi . . . longa nge, osho ashike handi shi tongo.” — JOH. 8:28.

Omafimbo amwe otashi dulika tu lombwele omunhu hatu ti: “Ngeno ame onda li oove, ngeno . . . ?” Nokuli nonande otu shii nawa enyamukulo laasho twa pulwa, otashi ka kala pandunge okushikula oshihopaenenwa shaJesus shelininipiko noshokukala tu shii omangabeko etu. Jesus okwa li shili e na ounongo nowino muhapu e dule ovanhu vakwao aveshe, ndele nande ongaho, okwa ti: “Inandi popya muame mwene, ndele Tate . . . okwa pa nge oshipango eshi ndi noku shi popya naashi ndi noku shi tonga.” (Joh. 12:49, 50) Omahongo nomayele aJesus okwa li alushe haa kala metwokumwe nehalo laXe.

Pashihopaenenwa, Lukas 22:49 okwa popya kutya eshi Jesus a li e li pokukwatwa po, ovahongwa vaye ova li ve mu pula shi na sha nangeenge ove na okulwa. Ndele nande ongaho, omuhongwa umwe okwa li a longifa eongamukonda. Ngeenge owa tale mehokololo olo li li muMateus 26:52-54 oto ka didilika kutya nokuli nonande pefimbo opo Jesus okwa li e li meenghalo didjuu, okwa li a tomhafana nomuhongwa oo opo e mu kwafele a shiive ehalo laJehova. Molwaashi Jesus okwa li e shii efinamhango olo li li muGenesis 9:6 nosho yo omaxunganeko oo e li mEpsalme 22 nomuJesaja 53, okwa li a dula okuyandja omayele opandunge oo a li a xupifa eemwenyo nokwa hafifa Jehova.

4 Longifa oishangomwa yehangano.

“Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo [layo]?” — MAT. 24:45.

Jesus okwa nangeka po ongudu yomupiya oyo hai yandje eendja dopamhepo odo da fimanenena. Oho kongo ngoo nelitulemo ouyelele moishangomwa oyo ya kanghamena kOmbibeli ngeenge to ka yandja omayele e na sha noshinima shonhumba osho sha fimana?

Ohatu dulu okuhanga ouyelele muhapu nowa yela nawa mo-Watch Tower Publications Index nosho yo mo-Watchtower Library.a Kashi li pandunge okudina ouyelele wa fimanenena wa tya ngaho. Moishangomwa oyo omu na oikundafanwa omayovi nosho yo oitukulwa ihapu oyo tai dulu okukwafela oo ta kongo omayele. Mbela ou na owino u fike peni wokukwafela vamwe va kale hava longifa oishangomwa oyo opo va konakone omafinamhango Ombibeli nokutomhafana ve likolelela kEendjovo daKalunga? Ngaashi ashike omadidiliko omeendjila haa kwafele omunhu a mone kutya oku li peni nohae mu wilike a fike oko a yuka, oikwanoipangifo oyo yokukonga omauyelele nayo otai dulu okukwafela omunhu a mone kutya oku li mondjila ilipi nonghee ta dulu okukala mondjila oyo tai twa komwenyo.

Ovakulunhuongalo vahapu ova kwafela ovaudifi va kale hava tomhafana tava longifa Omishangwa, moku va deula nghee ve na okukonga oitukulwa yonhumba tava longifa o-Index ile Watchtower Library. Osho osha kwafela ovaudifi va kale hava kandula po diva omaupyakadi avo, ve hole okukonga omauyelele nokukala hava longifa omafiloshisho opamhepo oo Jehova he tu pe. Kungaho, “eenghono davo dokukoneka [ohadi] deulwa moku di longifa va dule okutongola ouwa nowii.” — Heb. 5:14, NW.

5 Henuka okuningila vamwe omatokolo.

“Keshe tuu oku nokuhumbata omutengi waye mwene.” — GAL. 6:5.

Keshe umwe womufye oku na oshinakuwanifwa shokutokola kuye mwene kutya omayele elipi e na okushikula. Jehova okwa pa keshe umwe womufye emanguluko lokutokola kutya ota ka wilikwa komafinamhango aye ile hasho. (Deut. 30:19, 20) Omafimbo amwe onghalo yomunhu otashi dulika tai mu pula a tule moilonga omafinamhango Ombibeli mahapu, ndele nande ongaho, omunhu oye mwene e na okuninga etokolo laye la xuuninwa. Otwa pumbwa yo okutala kutya oo ta kongo omayele oku na oupyakadi u fike peni ile omido daye, ndele hatu lipula hatu ti: ‘Ondi na ngoo shili oufemba wokuyandja omayele e na sha noshinima eshi?’ Otashi ka kala shiwa okweefela oinima imwe momake ovakulunhuongalo ile momake ovadali ngeenge oo ta kongo omayele omunini.

[Eshangelo lopedu]

[Oshimhungu/Efano pepandja 8]

Osho tamu dulu okuninga pElongelokalunga lOukwaneumbo

Omolwashike itamu kongo omanyamukulo pefimbo lelongelokalunga leni loukwaneumbo omapulo oo opo mwa pulwa kuvamwe? Oitukulwa nomafinamhango Ombibeli elipi mu wete taa dulu okukwafela ovanhu ovo ve mu pula omapulo? Pashihopaenenwa, natu tye nee omumwatate ile omumwameme wonhumba okwe ku pula u mu pe omayele e na sha nokweendelafana nomunhu wonhumba oo va hala okuhombola naye. Otamu dulu okulongifa o-Index ile o-Watchtower Library mu konge tete oikundafanwa oyo tai popi lelalela kombinga yoshinima osho. Pashihopaenenwa, ngeenge oto longifa o-Index, oto dulu okukonga oshitya “Dating” (okweendelafana) ile “marriage” (ohombo). Opo nee, tala oupalanyole ovo ve li koshi yoitya oyo opo u mone oitukulwa omo mwa kundafanwa oshinima osho. Tala yo ngeenge koshi yoitya oyo oku na oupalanyole ve li poima pa shangwa “see also” (tala yo) molwaashi otashi dulika ve ku kwafele u mone oitukulwa vali imwe oyo tai wapalele.

[Oshimhungu pepandja 9]

Otwa pandula omafiloshisho oo Jehova he tu pe okupitila mehangano laye, molwaashi paife ohatu dulu okupewa nokuyandja omayele a denga mbada. Omuudifi 12:11 okwa ti: “Eendjovo dovalumenhu ovanamayele odi li ngaashi [oumbetifo, NW] neendjovo da ongelwa di li ngaashi eembosha da dengelwa mokule, adishe da yandjwa kOmufita umwe auke.” Ngaashi ashike “oumbetifo” ile tu tye, oiti ya honga koxulo oyo ya li hai longifwa kovanhu ngeenge tava wilike oinamwenyo oyo tai nane etemba ile oshipululo, omayele opahole noopandunge ohaa kwafele ovanamitimadiwa va ende mondjila ya yuka. Ngeenge “eembosha da dengelwa mokule” ohadi kwafele etungo li kale la kola. Sha faafana, okuyandja omayele mawa otaku dulu okweetifa oidjemo iwa. Ovanaendunge ohava kala va hafa neenghono ngeenge tava konakona ‘eendjovo da ongelwa’ nawa odo tadi holola ounongo ‘wOmufita wavo umwe auke,’ Jehova.

Kala ho hopaenene Omufita wetu ngeenge to yandje omayele. Kashi li tuu oufembanghenda munene okukala hatu pwilikine nawa nokuyandja omayele oo taa kwafele vamwe! Ngeenge omayele etu okwa kanghamena filufilu komafinamhango Ombibeli, otaa ka kala opandunge notaa ka etela ouwa tau kalele ovo hatu a pe.