Hesekiel
38 Ondjovo yaJehova oye uya vali kwaame tai ti: 2 “Omona womunhu, taalelifa oshipala shoye kuGog medu laMagog, elenga ekulunhu* laMesek naTubal, nokuxunganeka u li omhinge naye. 3 Tya, ‘Eshi osho Omwene Omunamapangelo aeshe, Jehova, ta ti: “Ondi li omhinge naave, ove Gog, elenga ekulunhu* laMesek naTubal. 4 Ohandi ke ku alula ko, noku ku tula eengona meehamama doye, noku ku kufa mo pamwe netangakwaita loye alishe, eenghambe novalondinghambe, aveshe va djala oikutu yondilo, ongudu inene yovanhu i na oikelelifo ya kula noikelelifo inini,* aveshe ve na omaongamukonda; 5 Persia, Etiopia naPuti ove li pamwe nalo, aveshe kumwe ve na oshikelelifo shinini nembale; 6 Gomer nomatangakwaita aye aeshe, eumbo laTogarma, olo la dja koitukulwa yokomikunda elela yokolundume, pamwe nomatangakwaita alo aeshe; ou li pamwe novanhu vahapu.
7 “‘“Lilongekida, kala komalwilo, ove nosho yo omatangakwaita oye aeshe, oo a ongala pwoove, noto ka kala omuwiliki* wao.
8 “‘“Oto ka pewa elitulemo* konima yomafiku mahapu. Pexulilo lomido, oto ka ponokela edu, olo ovanhu va li va peululwa omolwoidjemo yeongamukonda, va ongelwa pamwe okudja movanhu vahapu keemhunda daIsrael, odo da kala oule wefimbo da mbuwala. Ovakalimo aveshe vomedu eli ova li va alulilwa mo okudja movanhu, naaveshe kumwe ova kala meameno. 9 Oto ke uya oku va lwifa ngaashi oshikungulu, noto ka tuvikila edu ngaashi oilemo, ove nosho yo omatangakwaita oye aeshe novanhu vahapu pamwe naave.”’
10 “Eshi osho Omwene Omunamapangelo aeshe, Jehova, ta ti: ‘Mefiku olo, omadiladilo otae ke uya momutima woye, noto ka pangela omhangela ii. 11 Oto ka tya: “Ohandi ka ponokela edu loitukulwa* inai amenwa. Ohandi ke uya okulwifa ovo ve li meameno, vehe na omapiyaaneko, aveshe ovo hava di moitukulwa inai amenwa komakuma, koiidilifo, ile komivelo.” 12 Opo va kufe oixuulwa* ihapu nosho yo osho sha nyekwa ko, va ponokele eenhele, odo da mbuwala, odo paife hadi kalwa, novanhu ova ongelwa vali okudja moiwana, ovo tava likola oupuna nosho yo omaliko, ovo hava kala pokati kedu.
13 “‘Sheba naDedan, ovashingifi vokuTarsis nosho yo omatangakwaita* asho aeshe otaa ka tya kwoove: “Mbela oto ponokele u mone oixuulwa ihapu nokunyeka? Mbela owa ongaleka omatangakwaita oye a kufe ko oshisilveri noshingoli, a kufe po oupuna nomaliko, a nyeke ko oixuulwa ihapu neenghono?”’
14 “Onghee hano, omona womunhu, xunganeka, ndele to ti kuGog, ‘Eshi osho Omwene Omunamapangelo aeshe, Jehova, ta ti: “Mefiku olo, eshi ovanhu vange, Israel, tava ka kala meameno, mbela ito ke shi shiiva? 15 Oto ke uya okudja konhele yoye, okudja koitukulwa yokomikunda elela yokolundume, ove novanhu vahapu pamwe naave, aveshe kumwe va londa eenghambe, ongudu inene, etangakwaita la kula. 16 Ngaashi oilemo tai tuvikile edu, oto ke uya okulwifa ovanhu vange Israel. Pexulilo lomafiku, ohandi ke ku eta u li omhinge nedu lange, opo oiwana i shiive nge, eshi handi liyapulifa moipafi yayo okupitila mwoove, ove Gog.”’
17 “Eshi osho Omwene Omunamapangelo aeshe, Jehova, ta ti: ‘Mbela ove haave nda popile mefimbo la pita okupitila movapiya vange ovaprofeti vaIsrael, ovo va kala nokuxunganeka omido dihapu kutya oto ka etwa u va lwife?’
18 “‘Mefiku olo, efiku olo Gog ta ka ponokela Israel,’ Omwene Omunamapangelo aeshe, Jehova, ota ti, ‘ehandu lange linene otali ka xwama. 19 Ohandi ka popya nouladi wange, moupyuhandu wonya yange, nomefiku olo, medu laIsrael otamu ka ningwa ekakamo linene ledu. 20 Omolwange, eeshi domefuta, eedila dokeulu, oifitukuti yomoixwa, oilipwedi aishe, oyo tai linyenge kombada yedu, novanhu aveshe kombada yedu otava ka kakama, neemhunda otadi ka hanaunwa po, noikulundudu otai ka ngumauka po, nekuma keshe otali ka ongotela pedu.’
21 “‘Ohandi ka ifana eongamukonda li mu lwife keemhunda dange adishe,’ Omwene Omunamapangelo aeshe, Jehova, osho ta ti. ‘Omunhu keshe ota ka lwifa mukwao neongamukonda. 22 Ohandi ke mu tokola* noudu wolutapo nosho yo netiko lohonde; nohandi ka lokifa odula inene nosho yo eemhawe nomundilo nosho yo osulfuri kuye nosho yo komatangakwaita aye nokovanhu vahapu ovo ve li pamwe naye. 23 Nohandi ke litumbalekifa filufilu nokuliyapulifa ame mwene, nohandi ke lishiivifa moipafi yoiwana ihapu; noi na oku ka shiiva kutya aame Jehova.’