Hesekiel

37 Eke laJehova ola li kombada yange, na Jehova okwa kufa nge po nomhepo yaye, ndele ta tula nge mokati kefilu, nomwa li mu yadi omakipa. 2 Okwa endifa nge mokati kao aeshe, nonda li nda mona kutya omwa li omakipa mahapu neenghono, a kangavala mefilu nokwa li a kukuta unene. 3 Okwa pula nge a ti: “Omona womunhu, mbela omakipa aa otaa dulu ngoo okukala nomwenyo?” Onda nyamukula nda ti: “Omwene Omunamapangelo aeshe, Jehova, oove u shi shii.” 4 Opo nee okwa tya kwaame: “Xunganeka shi na sha nomakipa aa, ndele to ti kuo, ‘Nye omakipa a kukuta, udeni ondjovo yaJehova:

5 “‘Eshi osho Omwene Omunamapangelo aeshe, Jehova, ta ti komakipa aa: “Ohandi ka eta munye omufudo, notamu ka kala nomwenyo. 6 Ohandi ke mu tula omifipa nosho yo eenhumba, nohandi ke mu uvika noshipa, noku mu tula omufudo, notamu ka kala mu na omwenyo; nomu na oku ka shiiva kutya aame Jehova.”’”

7 Opo nee onda xunganeka ngaashi ashike nda lombwelwa. Diva ashike eshi nda xunganeka, opa li eweelelo, omalinyengo omakolokoto, nomakipa okwa hovela okuya kumwe, ekipa nekipa. 8 Opo nee onda mona omifipa nombelela ye uya kuo, noshipa she i uvika, ashike muo kamwa li natango omufudo.

9 Opo nee okwa tya kwaame: “Xunganekela omhepo. Omona womunhu, xunganeka, ndele to ti komhepo, ‘Eshi osho Omwene Omunamapangelo aeshe, Jehova, ta ti: “Ila mo, ove omhepo,* okudja keemhepo nhee, nokufudila ovanhu ava va li va dipawa, opo ve uye omwenyo.”’”

10 Onghee onda xunganeka ngaashi ashike a lombwela nge, nomufudo* owe uya muo nokwa hovela okukala nomwenyo nokufikama keemhadi dao, etangakwaita linene neenghono.

11 Opo nee okwa tya kwaame: “Omona womunhu, omakipa aa oo eumbo alishe laIsrael. Otava ti, ‘Omakipa etu okwa kukuta, neteelelo letu ola xula po. Otwa hanaunwa po filufilu.’ 12 Onghee xunganeka, ndele to ti kuo, ‘Eshi osho Omwene Omunamapangelo aeshe, Jehova, ta ti: “Ohandi ka yeulula eembila deni, noku mu pendula mo meembila deni, ovanhu vange, ndele handi mu twala kedu laIsrael. 13 Nomu na oku ka shiiva kutya aame Jehova, eshi handi ka yeulula eembila deni, naashi handi ke mu pendula mo meembila deni, nye ovanhu vange.”’ 14 ‘Ohandi ka tula omhepo yange munye, notamu ke uya omwenyo, nohandi ke mu tula medu leni; nomu na oku ka shiiva kutya ame mwene, Jehova, onde shi popya nonde shi wanifa,’ Jehova osho a popya.”

15 Ondjovo yaJehova oye uya vali kwaame tai ti: 16 “Ashike ove, omona womunhu, kufa oshiti nokushanga kusho, ‘OshaJuda noshovanhu vaIsrael, ovo ve li naye.’* Opo nee kufa vali oshiti nokushanga kusho, ‘OshaJosef, oshiti shaEfraim, nosheumbo alishe laIsrael olo li li naye.’* 17 Opo nee i ehenifa kumwe, opo i ninge ashike oshiti shimwe meke loye. 18 Ngeenge ovanhu voye* ova ti kwoove, ‘Mbela ito tu lombwele kutya oinima ei oya hala okutya shike?’ 19 va lombwela to ti, ‘Eshi osho Omwene Omunamapangelo aeshe, Jehova, ta ti: “Ohandi ka kufa oshiti shaJosef, osho shi li meke laEfraim, nosho yo omapata aIsrael, oo e li pamwe naye, nohandi ke a twikinika koshiti shaJuda; nohandi ke i ninga oshiti shimwe, notai kala oshiti shimwe meke lange.”’ 20 Oiti oyo wa shanga, oi na okukala meke loye, opo ve i mone.

21 “Opo nee va lombwela to ti, ‘Eshi osho Omwene Omunamapangelo aeshe, Jehova, ta ti: “Ohandi ka kufa Ovaisrael okudja mokati koiwana omo va ya, nohandi ke va ongela pamwe okudja keembinga adishe noku va twala kedu lavo. 22 Ohandi ke va ninga oshiwana shimwe medu olo, keemhunda daIsrael, notava ka pangelwa aveshe kohamba imwe, noitava ka kala vali oiwana ivali; noitava ka kala vali va tukulwa momauhamba opavali. 23 Itave ke linyateka vali vo vene noikalunga yavo itondifa* nosho yo noilonga yavo itondifa nomatauluko avo aeshe. Ohandi ke va xupifa kokuhenoudiinini kwavo akushe omolwokunyona kwavo, nohandi ke va koshola. Otava ka ninga ovanhu vange, naame mwene ohandi ka kala Kalunga kavo.

24 “‘“Omupiya wange, David, ota ka kala ohamba yavo, notava ka kala aveshe ve na omufita umwe. Otave ke liufa komatokolo ange nokudiinina filufilu eenghedimhango dange. 25 Otava ka kala medu olo nda pa omupiya wange, Jakob, omo ooxokulululwa veni va li hava di, notava ka kala hava di omo fiyo alushe, vo novana* vavo novana vovana vavo; na David, omupiya wange, ota ka kala elenga* lavo fiyo alushe.

26 “‘“Nohandi ka ninga navo ehangano lombili; otali ka kala ehangano laalushe navo. Ohandi ke va pameka noku va hapupalifa, nohandi ka tula onhele yange iyapuki mokati kavo fiyo alushe. 27 Etwali* lange otali ka kala pamwe navo,* nohandi ka kala Kalunga kavo, notava ka ninga ovanhu vange. 28 Noiwana oi na oku ka shiiva kutya ame, Jehova, ohandi yapula Israel, eshi onhele yange iyapuki tai ka kala mokati kavo fiyo alushe.”’”