Eehamba dotete
21 Lwanima, opa ningwa oshiningwanima shi na sha noshikunino shomandjebele shaNabot, Omujisreel; osha li muJisreel, popepi nombala yaAhab, ohamba yaSamaria. 2 Ahab okwa tya kuNabot: “Pe nge oshikunino shoye shomandjebele ndi shi ninge oshikunino shoikwambidi yange, molwaashi oshi li popepi neumbo lange. Opo nee ohandi ke ku pa oshikunino shi li nawa, shi shi pingene po. Ile ngeenge owa hala ohandi ke ku pa oimaliwa i fike pondado yasho.” 3 Ashike Nabot okwa tya kuAhab: “Pataleko laJehova, kashi li pandunge kwaame ndi ku pe efyuululo lootatekulululwa.” 4 Onghee Ahab okwe uya meumbo, a handuka nokwa nyika oluhodi omolwenyamukulo olo a pewa kuNabot, Omujisreel, eshi a ti: “Itandi ku pe efyuululo lootatekulululwa.” Opo nee okwa ka nangala kombete yaye, a taalela mekuma, noka li a hala okulya.
5 Omukulukadi waye, Isabel, okwe uya kuye, ndele te mu pula ta ti: “Omolwashike wa nyika oluhodi noino hala okulya?” 6 Ahab okwe mu nyamukula, a ti: “Molwaashi onda lombwela Nabot, Omujisreel, kutya ‘Nandi lande po oshikunino shoye shomandjebele, ile ngeenge owa hala, ohandi ke ku pa oshikunino shimwe shi shi pingene po.’ Ashike okwa ti, ‘Itandi ku pe oshikunino shange shomandjebele.’” 7 Omukulukadi waye, Isabel, okwa tya kuye: “Haave ohamba yaIsrael? Fikama, ndele to li, nomutima woye nau nyakukwe. Ohandi ke ku pa oshikunino shomandjebele shaNabot, Omujisreel.” 8 Onghee Isabel okwa shanga eenhumwafo medina laAhab, ndele te di tula oshihako shaAhab, nokwe di tumina kovakulunhu nokovawiliki ovo hava di moshilando omo hamu di Nabot. 9 Meenhumwafo okwa shanga mo ngaha: “Napa ningwe eingido lefiku lokulidilika, na Nabot na kale omutumba komesho yovanhu aveshe. 10 Ovalumenhu vavali vongaho nava kale omutumba komesho yaye, noku mu lundila tava ti, ‘Owa tuka Kalunga nohamba!’ Opo nee mu eteni pondje, ndele tamu mu dipaa nomamanya.”
11 Ovakulunhu novawiliki, ovo hava di moshilando omo ha di, ova ninga naanaa ngaashi sha li sha shangwa meenhumwafo odo Isabel e va tumina. 12 Ova ninga eingido li na sha nokulidilika, ndele tava kaleke Nabot omutumba komesho yovanhu. 13 Opo nee ovalumenhu vavali vongaho ove uya mo, ndele tava kala omutumba komesho yaye, nova hovela okulundila Nabot moipafi yovanhu, tava ti: “Nabot okwa tuka Kalunga nosho yo ohamba!” Konima yaasho, ove mu kufa mo moshilando, ndele tave mu dipaa nomamanya. 14 Onghee ova tumina Isabel etumwalaka tali ti: “Nabot okwa dipawa nomamanya.”
15 Diva eshi Isabel a uda kutya Nabot okwa dipawa nomamanya, okwa tya kuAhab: “Inda, ndele to kufa po oshikunino shomandjebele shaNabot, Omujisreel, osho a anya okulandifa po kwoove, osheshi Nabot ke na vali omwenyo. Okwa fya.” 16 Diva eshi Ahab a uda kutya Nabot okwa fya, Ahab okwa ya koshikunino shomandjebele shaNabot, Omujisreel, ndele te shi fyuulula po.
17 Ondjovo yaJehova oye uya kuElia, Omutisbi, tai ti: 18 “Fikama, ndele to i u ka shakeneke Ahab, ohamba yaIsrael, oo e li muSamaria. Oku li koshikunino shomandjebele shaNabot, oko a ya e ke shi fyuulule po. 19 Ou na oku mu lombwela ngaha, ‘Jehova okwa ti: “Ndi shii owa dipaa omulumenhu, nowa kufa po oshikunino shaye?”’ Opo nee okwa tya kuye, ‘Eshi osho Jehova a popya: “Ponhele opo eembwa da lafela ohonde yaNabot, opo yo tadi ka lafela ohonde yoye.”’”
20 Ahab okwa tya kuElia: “Omutondi wange, owa hanga nge.” Okwa nyamukula, a ti: “Onde ku hanga. ‘Molwaashi owa tokola* okuninga osho shii momesho aJehova, 21 ohandi ku etele oupyakadi nohandi ke ku hanauna po nokuhanauna po ovalumenhu* aveshe vomepata laAhab, mwa kwatelwa ovo vehe na ekwafo lasha naavo inava fimana muIsrael. 22 Ohandi ka ninga eumbo loye ngaashi eumbo laJerobeam, omonamati waNebat, nongaashi eumbo laBaasha, omonamati waAhia, osheshi owa handukifa nge nowa ningifa Israel shi nyone.’ 23 Natango, shi na sha naIsabel, Jehova okwa ti: ‘Eembwa otadi ka lila Isabel medu laJisreel. 24 Keshe umwe womeumbo laAhab, oo ta file moshilando, ota ka lika po keembwa, nakeshe oo ta ka fila mofuka ota ka lika po keedila dokeulu. 25 Kape na nande oumwe a li ngaashi Ahab, oo a li a tokola* okulonga osho shii momesho aJehova, ta yambididwa komukulukadi waye, Isabel. 26 Okwe lihumbata monghedi ii neenghono, eshi a shikula oikalunga itondifa,* ngaashi ashike Ovaamori aveshe va li va ninga, ovo Jehova a ta mo moipafi yOvaisrael.’”
27 Diva eshi Ahab a uda eendjovo odo, okwa pombaula oshikutu shaye, ndele ta djala oshako, nokwe lidilika, ndele ta kala a nangala a djala oshako, nokwa enda e lifya ounye. 28 Opo nee ondjovo yaJehova oye uya kuElia, Omutisbi, tai ti: 29 “Mbela owa mona ngoo nghee Ahab e lininipika koshipala shange? Molwaashi okwe lininipika koshipala shange, itandi mu etele vali owii pefimbo lokukalamwenyo kwaye. Ashike ohandi ka etela owii eumbo laye pefimbo lomonamati waye.”