Omafimbo omativali
14 Opo nee Abia okwa nangekwa pooxekulululwa, nove mu paka mOshilando shaDavid. Omonamati waye, Asa, okwa ninga ohamba ponhele yaye. Pefimbo laye, edu ola li la tulumukwa* eedula omulongo.
2 Asa okwa ninga osho shiwa nosha yuka momesho aJehova, Kalunga kaye. 3 Okwa hanauna po eealtari dookalunga vokoilongo, eenhele dokoikulundudu nokwa teyaula po eengudimanya diyapuki neepala diyapuki.* 4 Okudja opo, okwa lombwela Ovajuda va konge Jehova, Kalunga kooxekulululwa, nova diinine Omhango noshipango. 5 Moilando aishe yaJuda okwa hanauna po eenhele dokoikulundudu neealtari dokutwimina, nopefimbo lokupangela kwaye, ouhamba owa twikila okukala u na ombili. 6 Okwa tunga oilando ya dingililwa komakuma a pama muJuda, molwaashi edu ola li li na ombili, nokapa li oo a li te mu lwifa peedula odo, osheshi Jehova okwe mu pa etulumuko. 7 Okwa lombwela Ovajuda, a ti: “Natu tungeni oilando noku i dingililifa omakuma male, eeshungongulu, omivelo noihakifo. Edu oli li mepangelo letu natango, molwaashi otwa konga Jehova, Kalunga ketu. Otwe mu konga, nokwe tu pa etulumuko keembinga adishe.” Onghee ova li va pondola moilonga yavo yokutunga.
8 Asa okwa li e na etangakwaita la fikama po movalumenhu 300 000 va dja muJuda, va homatekwa oikelelifo inene nomaonga. NomuBenjamin omwa dja ovakwaita ovanaenghono 280 000 va humbata oikelelifo* nomauta.*
9 Lwanima, Sera, Omuetiopia, okwe uya oku va lwifa, e uya pamwe netangakwaita lovalumenhu 1 000 000 nosho yo omatemba 300. Eshi va fika puMaresha, 10 Asa okwa ya e ke mu lwife, nove lilongekidila olwoodi mEfilu laSefata, puMaresha. 11 Opo nee Asa okwa indila Jehova, Kalunga kaye, a ti: “Alikana, Jehova, kashi na nee mbudi kutya ovo to kwafele ovahapu, ile kave na eenghono. Alikana, tu kwafela, Jehova, Kalunga ketu, molwaashi otwe lineekela* mwoove, nohatu lwifa ongudu ei medina loye. Alikana, Jehova, oove Kalunga ketu. Ino efa ovanhu vongaho ve ku finde.”
12 Opo nee Jehova okwa finda Ovaetiopia moipafi yaAsa noyOvajuda, nOvaetiopia ova ya onhapo. 13 Asa novanhu ovo va li puye ova taataa Ovaetiopia fiyo okuGerar, nova twikila oku va dipaa, noinapa xupa nande oumwe, molwaashi ova findwa filufilu kuJehova noketangakwaita laye. Konima yaasho, ova kufa oixuulwa* ihapu neenghono. 14 Okudja opo, ova hanauna po oilando aishe oyo ya dingilila Gerar, molwaashi Jehova okwe va ningifa va kale va mbadapala. Ova li va kwata ko oilando aishe, osheshi omwa li oinima ihapu. 15 Ova ponokela yo omatwali aavo ve na oimuna, nova kwata ko omuvalu munene woimuna neengamelo, nokudja opo, ova shuna kuJerusalem.