Hesekiel

34 Ondjovo yaJehova oye uya vali kwaame tai ti: 2 “Omona womunhu, xunganeka u li omhinge novafita vaIsrael. Xunganeka, nokulombwela ovafita to ti, ‘Eshi osho Omwene Omunamapangelo aeshe, Jehova, ta ti: “Woo, ovafita vaIsrael, ovo va kala tave lipalula vo vene! Mbela ovafita kave na okupalula oufita? 3 Ohamu li oinghene, ohamu djala olududi leedi, nohamu dipaa oshimuna, osho sha ondoka elela, ashike ihamu palula oufita. 4 Inamu pameka odo da nghundipala, ile mu velule odo tadi ehama, ile mu mange odo da ehamekwa, ile mu alule odo da dja mo, ile mu konge odo da kana; ponhele yaasho, omwe di pangela nonyanya nomwe di fininika. 5 Onghee oda li de lihana, molwaashi kapa li omufita; oda li de lihana, noda ninga oikulya yoilyani aishe yomoixwa. 6 Eedi dange oda li tadi elaela keemhunda adishe nosho yo koikulundudu aishe ile; eedi dange oda li de lihanena kombada yedu alishe, pehe na ou te di kongo, ile ou te di talaatala e di mone.

7 “‘“Onghee, nye ovafita, udeni ondjovo yaJehova tai ti: 8 ‘“Oshili, ofimbo ame ndi na omwenyo,” Omwene Omunamapangelo aeshe, Jehova, osho ta ti, “molwaashi eedi dange oda ninga oihakanwa, oikulya yoilyani aishe yomoixwa, osheshi kapa li omufita, novafita vange inava konga eedi dange; ponhele yaasho, ova kala nokulipalula vo vene, noinava palula eedi dange,”’ 9 onghee hano, nye ovafita, udeni ondjovo yaJehova. 10 Eshi osho Omwene Omunamapangelo aeshe, Jehova, ta ti: ‘Ondi li omhinge novafita, nohandi ke va pula eedi dange* momake avo; ohandi ke va kufa mo moshilonga shokupalula* eedi dange, novafita ovo itava ka kala vali tave lipalula vo vene. Ohandi ka xupifa eedi dange momakanya avo, noitadi ka kala vali oikulya yavo.’”

11 “‘Osheshi eshi osho Omwene Omunamapangelo aeshe, Jehova, ta ti: “Aame ou, nohandi ka konga eedi dange ame mwene, nohandi ke di fila oshisho. 12 Ohandi ka fila oshisho eedi dange ngaashi omufita, oo a mona eedi daye, odo da li da halakanifwa, note di palula. Ohandi ke di xupifa okudja meenhele adishe omo de lihanena, mefiku loilemo nolomilaulu fokofoko. 13 Ohandi ke di kufa mo movanhu, noku di ongela pamwe okudja moilongo, ndele handi di eta medu lado noku di palulila keemhunda daIsrael, pomakungulukilo nosho yo peenhele adishe dokukala domedu. 14 Ohandi ke di lifa moulifilo muwa, nomedu omo mu na oulifilo wado otali ka kala koxulo yeemhunda daIsrael. Otadi ka omba medu, olo li na oulifilo muwa, notadi ka lya opo pe na oulifilo muwa elela keemhunda daIsrael.”

15 “‘“Ohandi ka palula eedi dange, nohandi ke di ombifa ame mwene,” Omwene Omunamapangelo aeshe, Jehova, osho ta ti. 16 “Ei ya kana, ohandi ke i konga, oyo tai elaela, ohandi ke i alula, ei ya ehamekwa, ohandi ke i manga, naayo ya nghundipala, ohandi ke i pameka; ashike oyo ya ondoka naayo i na eenghono, ohandi ke i hanauna po. Ohandi ke i palula netokolo.”

17 “‘Ashike nye, eedi dange, eshi osho Omwene Omunamapangelo aeshe, Jehova, ta ti: “Ondi li pokutokola pokati kodi imwe nodi ikwao, pokati keedi deendume nokoikombo yoindume. 18 Mbela inashi wana, eshi mwa kala tamu lipalula noulifilo muwa elela? Mbela nanye omu na okulyataula neemhadi deni oulifilo weni aushe? Nokonima eshi mwa nwa omeva mayela shekesheke, mbela omu na okukakeka omeva moku a lyata neemhadi deni? 19 Mbela paife eedi dange nadi palulwe moulifilo, oo mwa lyataula neemhadi deni, nokunwa omeva, oo mwa dongela, eshi mwe a lyataula neemhadi deni?”

20 “‘Onghee eshi osho Omwene Omunamapangelo aeshe, Jehova, ta ti kuvo: “Aame ou, nohandi ka tokola ame mwene pokati kodi oyo ya ondoka nodi oyo ya utama, 21 osheshi omwa twikila okuundula nomalutu eni nosho yo nomapepe eni, nomaluvinga eni okwa twikila okuhavela aveshe ovo tava ehama, fiyo osheshi mwe ve lihanifila keenhele dokokule. 22 Nohandi ka xupifa eedi dange, noitadi ka kala vali di li oshihakanwa; nohandi ka tokola pokati kodi nodi. 23 Ohandi ka pendula po omufita umwe e di life, omupiya wange, David, note ke di palula. Ote ke dipalula ye mwene, nota ka ninga omufita wado. 24 Naame, Jehova, ohandi ka kala Kalunga kavo, nomupiya wange, David, elenga mokati kavo. Ame mwene, Jehova, onde shi popya.

25 “‘“Nohandi ka ninga ehangano lombili navo, nomedu ohandi ka yeleka mo oilyani ya nyika oshiponga, opo va kale va amenwa mombuwa nokunangala mofuka. 26 Ohandi ke va ninga, vo nosho yo onhele oyo ya dingilila oshikulundudu shange, enangeko noupuna, nohandi ka lokifa odula pefimbo la wapala. Omanangeko noupuna otaa ka loka ngaashi odula. 27 Omiti domepya olo otadi ka yandja oiimati yado, nedu otali ka yandja oilikolomwa yalo, notava ka kala meameno medu olo. Notava ka shiiva kutya aame Jehova, eshi handi ka teyaula eesikei* deendjoko davo, noku va xupifa kwaavo va li ve va twala moupika. 28 Itava ka kala vali oihakanwa koiwana, noilyani yokombada yedu itai ke va xwaka po, notava ka kala meameno, nopehe na oo te va tilifa.

29 “‘“Ohandi ke va dikila oshikunino shetumbalo,* noitava ka fya vali kondjala medu olo, noitava ka fifwa vali ohoni koiwana. 30 ‘Otava ka shiiva kutya ame, Jehova Kalunga kavo, ondi li pamwe navo nonokutya vo, eumbo laIsrael, ovanhu vange,’ Omwene Omunamapangelo aeshe, Jehova, osho ta ti.”’

31 “‘Ashike nye, eedi dange, eedi odo handi file oshisho, nye ovanhu ashike, naame oKalunga keni,’ Omwene Omunamapangelo aeshe, Jehova, osho ta ti.”