Hesekiel
35 Ondjovo yaJehova oye uya vali kwaame tai ti: 2 “Omona womunhu, taalelifa oshipala shoye koshitukulwa shokeemhunda shaSeir, nokuxunganeka u li omhinge nasho. 3 Tya kusho, ‘Eshi osho Omwene Omunamapangelo aeshe, Jehova, ta ti: “Ondi li omhinge naave, ove oshitukulwa shokeemhunda shaSeir, nohandi ka nana eke lange li li omhinge naave noku ku ninga ombuwa ihe na sha. 4 Ohandi ka ninga oilando yoye oikulukuma, noto ka ninga ombuwa ihe na sha; noto ka shiiva kutya aame Jehova. 5 Osheshi owa ulika ehandu linene, nowa yandja Ovaisrael keongamukonda pefimbo loudjuu wavo, pefimbo lehandukilo lavo laxuuninwa.”’
6 “‘Onghee hano, oshili, ofimbo ame ndi na omwenyo,’ Omwene Omunamapangelo aeshe, Jehova, ota ti, ‘Ohandi ke ku longekidila etiko lohonde, netiko lohonde otali ke ku shikula. Molwaashi ohonde oyo wa li u tonde, etiko lohonde otali ke ku shikula. 7 Oshitukulwa shokeemhunda shaSeir, ohandi ke shi ninga ombuwa ihe na sha, nohandi ka teta mo keshe oo ta ende mo nosho yo keshe oo ta alukile mo. 8 Ohandi ka yadifa eemhunda dasho noonakudipawa; naavo va dipawa keongamukonda otava ka wila koikulundudu yoye, momalufilu oye nosho yo momakungulukilo oye aeshe. 9 Ohandi ke ku ninga eputu laalushe, nomoilando yoye itamu ka kaliwa; notamu ka shiiva kutya aame Jehova.’
10 “Molwaashi owa ti, ‘Oiwana ei ivali nosho yo omadu aa avali otai ka ninga yange, nohatu ke i kwata ko aishe,’ nonande Jehova ye mwene oko a li oko, 11 ‘onghee hano, oshili, ofimbo ame ndi na omwenyo,’ Omwene Omunamapangelo aeshe, Jehova, ota ti, ‘Ohandi ka ungaunga naave nehandu, nondubo nosho yo noutondwe oo we va ulikila; nohandi ke lishiivifa ame mwene mokati kavo, eshi handi ke ku tokola. 12 Opo nee ou na oku ka shiiva kutya ame mwene, Jehova, onda uda oinima aishe oyo wa popya nodino shi na sha neemhunda daIsrael, eshi wa ti, “Ova ningwa onhele ihe na sha, notwe va pewa, tu va xwake po.”* 13 Nomwa popya nounhwa mu li omhinge naame, nomwa popya eendjovo deni di li omhinge naame. Adishe onde di uda.’
14 “Eshi osho Omwene Omunamapangelo aeshe, Jehova, ta ti: ‘Edu alishe otali ka hafa, eshi handi ke ku ninga ombuwa ihe na sha. 15 Ngaashi ashike wa li wa hafa, eshi efyuululo leumbo laIsrael la li la mbuwalekwa, osho handi ka ungaunga naave. Oto ka ninga ombuwa yoikulukuma, ove oshitukulwa shokeemhunda shaSeir, heeno, Edom ashishe; notava ka shiiva nokutya aame Jehova.’”