Okudja eshi Ovaisrael va mangululwa moupika waEgipti fiyo osheshi pa nangekwa ohamba yotete yaIsrael

Moses okwa li a kwatela komesho Ovaisrael okudja moupika waEgipti fiyo ve uya pomhunda yaSinai, opo Kalunga e va pela oipango. Lwanima Moses okwa li a tuma eendadi 12 di ka lave edu laKanaan. Eendadi 10 oda li da etelela ehokololo lii. Eendadi odo 10 oda li da shololifa ovanhu vahapu, nomolwaasho ova li va hala okushuna kuEgipti. Kalunga okwa li a handukila Ovaisrael omolwokuheneitavelo kwavo. Ova li va pewa ehandukilo lokukala tava elaela mombuwa oule womido 40.

Lwopexulilo lomido odo, Josua okwa li a hoololwa a ninge omukwatelikomesho wOvaisrael eshi tava i medu laKanaan. Jehova okwa li a longa natango oikumwifilonga opo va dule okuya medu olo. Okwa li a kangheka omeva omulonga waJordan, okwa li a teyaula po omakuma aJeriko nokwa li a kangheka etango oule wefiku alishe. Kanaan ashishe osha li sha kwatwa ko moule womido hamano.

Oshiwana shaIsrael osha li sha pangelwa kovatokolipangeli oule womido 356. Josua oye a li omutokolipangeli wotete waIsrael. Ohatu ke lihonga kombinga yovatokolipangeli vahapu, mwa kwatelwa Balak, Gideon, Jefta, Simson naSamuel. Ohatu ke lihonga yo kombinga yovakainhu vonhumba ngaashi Rahab, Debora, Jael, Rut, Naomi naDelila. Oiningwanima aishe oyo i li moshitukulwa eshi oshititatu oya ningwa moule womido 396.