Okuyandja omatomheno e li pandunge

NGEENGE to popi sha, ovapwilikini voye ove na oufemba wokulipula kutya: “Mbela oshoshili ngoo osho tashi popi? Oumbangi ulipi tau ulike kutya osho omupopi ta popi oshi shii okulineekelwa?” U li omuhongi, ou na oshinakuwanifwa shokukwafela ovapwilikini okunyamukula omapulo a tya ngaho ile oku va kwafela va mone omanyamukulo oo. Ngeenge oshitwa shonhumba osha fimanenena mokutomhafana kwoye, shilipaleka kutya oto pe ovapwilikini voye omatomheno a kola oo taa ufa kutya omolwashike ve na okutambula ko oshinima osho. Kungaho, oshipopiwa shoye otashi ka tomha vamwe.

Omuyapostoli Paulus okwa li e shii okutomha ovanhu. Okwa li ha kendabala okulundulula okudiladila kwaavo a li ta popi navo mokutomhafana navo pandunge noku va kumaida a mana mo. Okwe tu tulila po oshihopaenenwa shiwa moshinima sha tya ngaho. (Oil. 18:4; 19:8) Ovapopi vomoipafi vamwe vomounyuni ohava popi eendjovo domaheka opo va pofipaleke ovanhu. (Mat. 27:20; Oil. 14:19; Kol. 2:4) Otashi dulika va hovele okupopya tava mbeleke, tava longifa eedjo domauyelele a pilama, tava tomhafana nopehe na oumbangi washa oo tau yambidida osho tava popi, tava henuka okulongifa ouyelele oo itau yambidida omataleko avo ile tava longifa ouyelele oo tau nyuwifa omatwi ovanhu ponhele yokupopya oinima i na ekanghameno. Otu na okuhenuka eenghedi adishe odo.

Okutomhafana kwoye naku kale kwe likolelela kEendjovo daKalunga. Katu na okuhonga ovanhu omadiladilo etu vene. Ohatu kendabala okulombwela vamwe osho twe lihonga mOmbibeli. Oishangomwa yomupiya omudiinini nomunaendunge ohai tu kwafele neenghono mwaasho. Ohai tu ladipike tu konakone nawa Omishangwa. Onghee hano, ohatu longifa Ombibeli ngeenge hatu popi navamwe, hanelalakano ngeno lokuulikila ovanhu kutya ova puka, ndele otwa hala va mone vo vene kutya Ombibeli otai hongo lela shike. Ohatu tu kumwe naJesus Kristus oo a li a ilikana kuXe a ti: “Eendjovo doye odo oshili.” (Joh. 17:17) Jehova Kalunga, Omushiti weulu nedu, oye Odjo yoshili ya shiya ko. Okutomhafana kwetu otaku ka kala ashike taku ti sha ngeenge okwa kanghamena kEendjovo daye.

Omafimbo amwe, otashi dulika u popye novanhu ovo vehe shii Ombibeli ile inave i tala ko i li Eendjovo daKalunga. Ou na okulongifa eendunge dokuyoolola u tale kutya onaini nongahelipi u na okulongifa Ombibeli. Ashike ou na okukendabala u yukife elitulemo lavo kodjo youyelele oyo i shii okulineekelwa nopehe na okwoongaonga.

Mbela ngeenge owa tofa omushangwa tau wapalele osha hala okutya owa tomhafana monghedi itai dulu okupatanekwa? Hasho lela. Otashi dulika u kale wa pumbwa okuyandja elitulemo ketukulwa ile kembo omo omushangwa oo wa kufwa, opo u ulike kutya otau yambidida shili osho to ti. Ngeenge oto longifa efinamhango olo li li momushangwa wonhumba ndele etukulwa ile embo omo omushangwa wa dja itali kundafana kombinga yoshinima osho to kundafana, otashi dulika u kale wa pumbwa okuyandja oumbangi wa wedwa po. Otashi dulika u kale wa pumbwa okulongifa omishangwa dikwao odo da pamba filufilu osho to kundafana opo u tomhe ovapwilikini voye va itavele kutya osho to popi osha kanghamena shili kOmishangwa.

Henuka okupopya to wedele ngeenge to yelifa omishangwa. Lesha nawa omushangwa oo. Omushangwa wonhumba otashi dulika u kale tau popi shi na sha naasho to kundafana, ashike, opo okutomhafana kwoye ku kale taku tomho vamwe, omupwilikini oku na okukala e wete momushangwa oumbangi oo tau yambidida okutomhafana kwoye.

Longifa omaumbangi a wedwa po oo taa tu kumwe noshikundafanwa shoye. Omafimbo amwe, otashi ka kwafa yo ngeenge owa longifa eedjo dimwe di shi okulineekelwa dihe fi Ombibeli, opo u kwafele ovanhu va mone kutya Omishangwa otadi popi oinima i li paushili.

Pashihopaenenwa, oto dulu u popye shi na sha nevalelwa olo li wetike opo u ulike kutya oku na Omushiti. Oto dulu okupopya shi na sha neemhango dopaushitwe, ngaashi eenghono dedu, nokutomhafana kutya ngeenge oku na eemhango da tya ngaho, otashi ulike kutya oku na Omuyandjimhango. Okutomhafana kwoye otaku ka kala pandunge ngeenge oku li metwokumwe naasho Eendjovo daKalunga tadi ti. (Job 38:31-33; Eps. 19:2; 104:24; Rom. 1:20) Oumbangi wa tya ngaho owa wapala molwaashi otau ulike kutya osho Ombibeli tai oshi li metwokumwe noinima oyo tu wete.

Mbela oto kwafele umwe a mone kutya Ombibeli oi li shili Eendjovo daKalunga? Otashi dulika u tofe eendjovo dovahongwanhu ovo va popya kutya Ombibeli Eendjovo daKalunga, ndele mbela omatofwemo a tya ngaho otaa koleke oshinima osho? Omatofwemo a tya ngaho otaa kwafele ashike ovanhu ovo va fimaneka ovahongwanhu ovo. Mbela ito dulu okulongifa omauyelele ovanongononi opo u ulike kutya Ombibeli oi li paushili? Ngeenge owa longifa omataleko ovanongononi inava wanenena e li odjo yoye, oumbangi woye itau ka kala wa kola. Mepingafano naasho, ngeenge owa hovele nEendjovo daKalunga opo nee tu yukifa elitulemo lomunhu kwaasho ovanongononi tava ti, osho tashi ulike kutya Ombibeli oi li paushili, kungaho, okutomhafana kwoye otaku ka pondola.

Yandja oumbangi wa wana, kashi na nee mbudi kutya oto kendabala okutomhafana kombinga yashike. Ovapwilikini voye ovo tava ka ufa kutya owa pumbwa oumbangi u fike peni. Pashihopaenenwa, ngeenge oto kundafana shi na sha nomafiku axuuninwa oo a tumbulwa mu 2 Timoteus 3:1-5, oto dulu okuyukifa elitulemo lovapwilikini voye koiningwanima oyo ya kundanekwa apeshe, oyo tai koleke kutya ovanhu kave na “ohole.” Osho osho ashike wa pumbwa okupopya opo u koleke kutya oshiningwanima osho shi li oshitukulwa shedidiliko lomafiku axuuninwa otashi wanifwa paife.

Okulongifa efaafanifo, sha hala okutya, okuyelekanifa oinima ivali oyo i na omaukwatya a faafana ohaku eta luhapu ouwa. Efaafanifo mulo vene ihali koleke oshinima shonhumba; owa pumbwa okutala osho Ombibeli tai ti opo u li koleke. Ndele efaafanifo otali dulu okukwafela omunhu a mone nghee ediladilo lonhumba li li pandunge. Pashihopaenenwa, oto dulu okulongifa efaafanifo ngeenge to yelifa kutya Ouhamba waKalunga epangelo. Oto dulu okupopya kutya Ouhamba waKalunga ou na ovapangeli, ovapangelwa, eemhango, omulandu wopamhangu nosho yo omulandu wehongo, ngaashi ashike omapangelo opanhu.

Oto dulu yo okulongifa oimoniwa yavamwe opo u ulike nghee shi li pandunge okudulika komayele Ombibeli. Oto dulu yo okulongifa oimoniwa yoye mwene opo u yambidide osho to popi. Pashihopaenenwa, ngeenge to lombwele omunhu shi na sha nanghee sha fimana okulesha nokukonakona Ombibeli, oto dulu oku mu yelifila nghee okuninga ngaho kwa xwepopaleka onghalamwenyo yoye. Omuyapostoli Petrus okwa li a popya shi na sha neshituluko, olo a li omumoninomesho walo, opo a ladipike ovamwaxe. (2 Pet. 1:16-18) Omuyapostoli Paulus okwa li a popya shi na sha noimoniwa yaye mwene. (2 Kor. 1:8-10; 12:7-9) Ashike, ou na okulungama uha kale to longifa unene oimoniwa yoye mwene opo uha yukife elitulemo kwoove mwene.

Molwaashi ovanhu ova dja momaputuko e lili noku lili nohava diladila meenghedi da yoolokafana, omaumbangi oo ta tomho vamwe va itavele otashi dulika aha tomhe vakwao. Onghee hano, diladila kombinga yomataleko ovapwilikini voye ngeenge to hoolola kutya oto ka tomhafana ngahelipi. Omayeletumbulo 16:23 otaa ti: “Omutima womunongo tau mu nongeke mokanya kaye ndee tau hapupalifa elongo lomilungu daye.”