OSHILESHWA 23

Eninginifo elalakano la fimana olo to dulu okulitulila po

Molupe la fa la pilindwa

Jesus okwa ti kutya, opo omunhu a ninge Omukriste, oku na okuninginifwa. (Lesha Mateus 28:19, 20.) Ndele mbela eninginifo oshike? Noshike osho omunhu e na okuninga, opo a hange elalakano olo?

1. Eninginifo oshike?

Oshitya “okuninginifwa” osha dja koshitya shOshigreka osho tashi ti “okutula” koshi yomeva. Eshi Jesus a ninginifwa, okwa li a tulwa koshi yomeva momulonga waJordan nokwa li “a dja momeva.” (Markus 1:9, 10) Sha faafana, Ovakriste vashili ohava ninginifwa mokutulwa olutu lavo alishe koshi yomeva.

2. Eninginifo otali ulike shike?

Ngeenge omunhu ta ninginifwa, ota ulike kutya okwe liyapulila Jehova Kalunga. Omunhu ohe liyapulile ngahelipi Kalunga? Fimbo ina ninginifwa, oha ilikana paumwene ta lombwele Jehova kutya okwa hala oku mu longela fiyo alushe. Oha udaneke kutya ota ka longela Jehova oye aeke nota ka pitifa komesho okulonga ehalo laye monghalamwenyo yaye. Oha hoolola “okulixupula ye mwene nokushikula” omahongo noshihopaenenwa shaJesus. (Mateus 16:24) Eliyapulo laye neninginifo ohali shi ningifa tashi shiiva, opo a kale e na oukaume wa kola naJehova nosho yo novaitaveli vakwao.

3. Ongahelipi omunhu ta dulu okuninga exumokomesho fiyo a ninginifwa?

Oto dulu okulilongekidila eninginifo mokulihonga kombinga yaJehova nokukala u na eitavelo muye. (Lesha Ovaheberi 11:6.) Eshi eshiivo loye tali ende tali hapupala, neitavelo loye tali kolo, oto ka kala u hole Jehova neenghono. Opo nee oto ka kala wa hala okupopya kombinga yaye nokukala metwokumwe nomifikamhango daye. (2 Timoteus 4:2; 1 Johannes 5:3) Ngeenge omunhu ota ‘wapalele Jehova noku mu hafifa moinima aishe,’ otashi dulika a kale a hala oku mu liyapulila nokuninginifwa.— Ovakolossi 1:9, 10.a

KONAKONA MOULE

Tala kutya oshike hatu lihongo keninginifo laJesus, nongahelipi umwe ta dulu okulilongekidila onghatu oyo ya fimana.

4. Ohatu dulu okulihonga keninginifo laJesus

Lesha Mateus 3:13-17, opo u lihonge shihapu shi na sha neninginifo laJesus. Opo nee kundafaneni omapulo taa shikula:

Mbela Jesus okwa li okahanana, eshi a ninginifwa?
Okwa li a ninginifwa ngahelipi? Mbela okwa shashaminwa ashike omeva?

Jesus okwa li a hovela okulonga oilonga yaye ye likalekelwa, oyo a li a pewa kuKalunga kombada yedu, konima eshi a ninginifwa. Lesha Lukas 3:21-23 nosho yo Johannes 6:38, ndele tamu kundafana epulo tali shikula:

Konima eshi Jesus a ninginifwa, oilonga ilipi a li a pitifa komesho monghalamwenyo yaye?

5. Eninginifo elalakano olo to dulu okuhanga

Ediladilo lokuliyapulila Kalunga nokuninginifwa otashi dulika tali monika litilifa potete. Ashike oto dulu okuninga exumokomesho fiyo oposhitwa opo to ka kala u udite u na omukumo wokuninga etokolo olo la fimana. Opo u mone ovanhu vamwe ovo va ninga ngaho, dana OKAVIDIO.

VIDEOOKAVIDIO: Pameka ekwatafano loye naJehova (1:11)

Lesha Johannes 17:3 nosho yo Jakob 1:5, ndele tamu kundafana epulo tali shikula:

Oshike tashi dulu okukwafela omunhu, opo e lilongekidile okuninginifwa?

A. Omukainhu te liyapulile Kalunga okupitila meilikano.

B. Omukainhu oye tuu oo ta ninginifwa e li Ondombwedi yaJehova eshi ta tulwa olutu laye alishe koshi yomeva.

Ohatu liyapulile Jehova moku mu lombwela kutya otwa hala oku mu longela fiyo alushe
Ngeenge hatu ninginifwa, ohatu ulikile ovatalinomesho kutya otwe liyapulila Kalunga

6. Ngeenge otwa ninginifwa, ohatu ka ninga oshitukulwa shoukwaneumbo waJehova

Ngeenge otwa ninginifwa, ohatu ka ninga oshitukulwa shoukwaneumbo wa hangana womounyuni aushe. Nonande otwa dja keenhele nomomaputuko a yoolokafana, atushe otwa itavela oinima ya faafana nohatu kala metwokumwe nomifikamhango dopaenghedi da faafana. Lesha Epsalme 25:14 nosho yo 1 Petrus 2:17, ndele tamu kundafana epulo tali shikula:

Okuninginifwa ohaku kumu ngahelipi ekwatafano loye naJehova nosho yo naavo have mu longele?

Omafano: Omumwameme oo a ninginifwa ta diladila nehafo kombinga yekwatafano laye liwa noilyo yeongalo. 1. Ta mbubulile omutima waye omumwameme. 2. Ta kwafele omumwameme omunamido eshi ta ende. 3. Ta li pamwe nookaume vomido da yoolokafana. 4. Ta udifile omulumenhu e li pamwe nomumwameme umwe. 5. Tave lifaneke poshoongalele nEendombwedi mbali da dja momihoko da yoolokafana.

VAMWE OHAVA TI: “Inandi lilongekidila okuninginifwa.”

Ngeenge osho u udite ngaho, mbela owa tala ko ngoo natango eninginifo li li oshinima sha fimana kwoove?

ENGONGO

Jesus okwa honga kutya Ovakriste ova pumbwa okuninginifwa. Opo omunhu a hange elalakano olo, oku na okukala e na eitavelo la kola muJehova, okukala metwokumwe nomifikamhango daye nosho yo oku mu liyapulila.

Eendululo

Eninginifo oshike, nomolwashike la fimana?
Eliyapulo neninginifo oya pambafana ngahelipi?
Omunhu okwa pumbwa okuninga shike, ofimbo ine liyapulila Kalunga nokuninginifwa?

Efiku nda mana ko oshileshwa:

Omalalakano

Tala omisholondodo odo di li pexulilo loshitukulwa 4, “Onda wana ngoo okuudifa pamwe neongalo?” nosho yo “Onde lilongekidila ngoo okuninginifwa?,” opo u tale osho u na okuninga, opo u kale wa wana okuningifwa monakwiiwa.

Amwe vali:

Your other goal

TALA OUYELELE WA WEDWA PO

Lihonga kutya eninginifo oshike nosho yo kutya kali fi shike.

“Eninginifo oshike?” (Oshitukulwa shi li ko jw.org)

Konakona eenghedi omo omunhu ta dulu okuninga exumokomesho fiyo a ninginifwa.

“Ohatu ka ninginifwa ngeenge otu hole Jehova notu na olupandu” (Oshungonangelo, Marsa 2020)

Lesha u mone nghee etokolo lomulumenhu umwe lokuninginifwa la li inali kanghamena ashike komaliudo.

“Ova li va hala ndi mone ame mwene kutya Ombibeli otai hongo lela shike” (Oshungonangelo, 1 Marsa 2013)

Konakona kutya omolwashike eninginifo li li elalakano la fimana, nanghee to dulu oku li lilongekidila.

“Nandi ninginifwe ngoo?” (Omapulo oo ovanyasha hava pula— Omanyamukulo oo taa kwafele, Embo 2, etukulwa 37)

a Ngeenge omunhu okwa li a ninginifwa nale kelongelokalunga limwe, okwa pumbwa vali okuninginifululwa. Omolwashike? Molwaashi elongelokalunga olo inali mu honga oshili yOmbiibeli.— Tala Oilonga 19:1-5 nosho yo Oshileshwa 13.