Septemba

Kalunga okwa pa Jesus eenghono dokukandula po omaupyakadi aeshe ovanhu. Eshi Jesus a longa oikumwifilonga, okwa ulika kutya ota dulu okukufa po omaupyakadi aeshe, oo itatu dulu okuxulifa po fye vene. Pashihopaenenwa, oku na eenghono doku tu mangulula kodjo, oyo ya etifa omaupyakadi ovanhu, oulunde oo twa fyuulula nosho yo oilanduliko yao, omikifi nefyo. (Mat. 9:​1-6; Rom. 5:​12, 18, 19) Oikumwifilonga yaye oya ulika kutya ota dulu okuvelula omikifi “di lili noku lili” nokunyumuna nokuli oonakufya. (Mat. 4:23; Joh. 11:​43, 44) Natango okwa li e na yo eenghono dokupangela oikungulu inene nosho yo eenghono dokufinda eemhepo da nyata. (Mark. 4:​37-39; Luk. 8:2) Itashi hekeleke tuu okushiiva kutya Jehova okwa pa Omona waye eenghono da tya ngaho! Ohatu dulu okukala nelineekelo filufilu kutya omaudaneko omonakwiiwa, oo taa ka etwa kOuhamba waKalunga, otaa ka wanifwa shili. Oikumwifilonga oyo Jesus a longa, eshi a li kombada yedu, otai tu hongo kutya ote ke i longa kombada yedu alishe e li Ohamba yomeulu yOuhamba waKalunga. w23.04 3 ¶5-7

Ngeenge eongalo leni oli na ovaudifi vahapu nou udite iho tumbulwa luhapu, otashi dulika u kwatwe keamo lokweefa po okukufa ombinga pokwoongala. Ashike ino efa po okukendabala okuyandja etyekosha. Oto dulu okukala ho lilongekida omatyekosha mahapu pokwoongala keshe. Opo ngeenge ino tumbulwa pehovelo loshitukulwa, natango ou na omhito yokuyandja omatyekosha momukokomoko wokwoongala. Ngeenge to lilongekidile ekonakono lOshungonangelo, diladila nghee okatendo keshe ka pambafana nenenediladilo loshitukulwa. Ngeenge owa ningi ngaho, oto ka kala u na omatyekosha mawa, oo to dulu okuyandja. Shikwao vali, oto dulu okulilongekida omatyekosha poutendo ovo va kundafana oshili yomoule oyo idjuu okuyelifa. Omolwashike? Omolwaashi poutendo ovo, otashi dulika ovanhu ashike vanini va ulike. Ongahelipi ngeenge owa mona kutya natango opa pita omakwoongala mahapu, ashike ino mona omhito yokuyandja etyekosha? Oto dulu okupopya naao ta kwatele komesho ofimbo okwoongala inaku hovela noku mu lombwela epulo olo wa hala oku ka nyamukula. w23.04 21-22 ¶9-10

Josef okwa li ha kala a halelela okutula moilonga ewiliko laJehova, naasho oshe mu ningifa a kale omushamane e li xwepo. Peemhito dopatatu, okwa li a pewa omalombwelo kuKalunga e na sha noukwaneumbo waye. Okwa li a dulika diva pomhito keshe, nokuli nonande okwa li e na okuninga omalunduluko manene. (Mat. 1:20; 2:​13-15, 19-21) Molwaashi Josef okwa li a shikula ewiliko laKalunga, okwa li a amena Maria noku mu fila oshisho. Diladila kunghee eenghatu daJosef da li de linyengifa Maria a kale e mu hole neenghono nokwe mu fimaneka. Ovashamane, otamu dulu okuhopaenena Josef mokukala hamu kongo omayele a kanghamena kOmbiibeli e na sha nanghee mu na okufila oshisho omaukwaneumbo eni. Ngeenge omwa tula moilonga omayele oo, nokuli nonande otamu pumbwa okuninga omalunduluko, otamu ka ulika kutya omu hole ovakulukadi veni notashi ka pameka eehombo deni. Omumwameme wokoVanuatu, oo a kala mohombo omido di dulife 20, okwa ti: “Ngeenge omushamane wange ta kongo ewiliko kuJehova noku li tula moilonga, ohashi ningifa nge ndi mu fimaneke neenghono. Ohandi kala ndi udite nda amenwa, nonde lineekela omatokolo aye.” w23.05 21 ¶5

Ovajuda ovo va li tava shuna okudja kuBabilon ova li ve na okukala “oshiwana sha yapulilwa” Kalunga kavo. (Deut. 7:6) Ashike osho inashi hala okutya kava li va pumbwa okuninga omalunduluko, opo va hafife Jehova. Ovajuda vahapu va dalelwa muBabilon, osha fa shi li ngaha kutya ova li va tambula ko onghedi yokudiladila yOvababilon nosho yo omifikamhango davo. Omido omilongo konima eshi Ovajuda votete va alukila muIsrael, ngoloneya Nehemia okwa li a kumwa, eshi a mona kutya ounona ovo va dalelwa muIsrael kava li ve lihonga elaka lOvajuda. (Deut. 6:​6, 7; Neh. 13:​23, 24) Ongahelipi ovanyasha ovo va li tave ke lihonga okukala ve hole Jehova noku mu longela, ngeenge kava li ve udite ko Oshiheberi, elaka omo Eendjovo daKalunga da li da shangwa? (Esra 10:​3, 44) Ovajuda ova li va pumbwa okuninga omalunduluko manene. Ashike osha li tashi ka kala shipu kuvo okuninga omalunduluko oo muIsrael, omo elongelokalunga la koshoka la li tali ka tungululwa mokweendela ko kwefimbo. — Neh. 8:​8, 9. w23.05 15 ¶6-7

Kashi na nee mbudi kutya otu na omukumo u fike peni, ile elipangelo, ohatu dulu okushakeneka omainda. Pashihopaenenwa, ‘oiningwanima yombadilila’ otai dulu okumana po efimbo letu lokuhanga elalakano letu. (Omuud. 9:​11, NWT) Otashi dulika tu hangwe koupyakadi oo tau tu teya omukumo notau tu ningifa tu kale tuhe na eenghono. (Omayel. 24:10) Molwaashi inatu wanenena, otashi dulika tu ninge omapuko, oo tae shi ningifa shidjuu kufye okuhanga elalakano letu. (Rom. 7:23) Ile otashi dulika tu kale tu udite twa loloka. (Mat. 26:43) Oshike tashi dulu oku tu kwafela tu henuke omainda? Dimbuluka kutya, ngeenge ope na omainda, inashi hala kutya owa dopa. Ombiibeli oya popya kutya otashi dulika tu shakeneke omaupyakadi, ile omaudjuu lwoikando. Ashike oya yelifa kutya ohatu dulu okuyambuka po natango. Oto ka ulika kutya owa hala okuhafifa Jehova, ngeenge owa pula komesho, nonande ope na omainda. Jehova iha kala tuu a hafa, ngeenge te ku tale to pula komesho, opo u hange elalakano loye! w23.05 30 ¶14-15

Okukokola ondjila ohaku kwafele omulumenhu omunyasha e lihonge nghee ta dulu okulonga novanhu va yoolokafana. Otaku dulu yo oku mu kwafela a kale ha kwata nawa oshimaliwa nokuhe shi longife moinima oyo ina pumbwa. (Fil. 4:​11-13) Onghedi iwa yokuhovela oilonga yefimbo li yadi, okukufa oukwafelikokolindjila, oo tau ke mu kwafela a ninge omukokolindjila wondjikilile. Oukokolindjila otau dulu yo oku ku yeululila eemhito doilonga ikwao yefimbo li yadi, mwa kwatelwa oilonga yokutunga omatungo ehangano, ile okuninga Omubetel. Ovalumenhu Ovakriste ove na okulitulila po elalakano lokuyakula ovamwatate novamwameme meongalo ve li ovakulunhuongalo. Ombiibeli oya ti ovalumenhu ovo tava lalakanene oshilonga osho ove “lihalela oshilonga shiwa.” (1 Tim. 3:1) Tete, omumwatate oku na okuninga omuyakuliongalo. Ovayakuliongalo ohava kwafele ovakulunhuongalo meenghedi dihapu. Ovakulunhuongalo novayakuliongalo ohava yakula ovamwatate novamwameme nelininipiko, nohava kufa ombinga moilonga yokuudifa nouladi. w23.12 28 ¶14-16

Ohamba Josia okwa li omunyasha, eshi a hovela okukonga Jehova. Okwa li a hala okulihonga kombinga yaJehova nokulonga ehalo laYe. Ashike osho kasha li shipu kohamba oyo inyasha. Pefimbo opo ovanhu vahapu ova li hava longele oikalunga, na Josia okwa li a pumbwa ouladi, opo e va kelele vaha ninge ngaho. Onghee okwa li a katuka nouladi. Fimbo Josia a li ina wanifa omido 20, okwa li a hovela okuxulifa po elongelokalunga loipupulu mokati koshiwana. (2 Omaf. 34:​1, 2) Nokuli nonande ou li omunyasha neenghono, oto dulu okuhoolola okuhopaenena Josia mokukonga Jehova nokulihonga kombinga yomaukwatya aYe a denga mbada. Ngeenge owa ningi ngaho, oto ka kala wa hala oku mu liyapulila. Mbela osho otashi ka kuma ngahelipi onghalamwenyo yoye? Luke, oo a ninginifwa eshi a li e na omido 14, okwa ti, “Okudja paife, ohandi ka pitifa komesho okulongela Jehova monghalamwenyo yange nokukendabala oku mu hafifa.” (Mark. 12:30) Itashi ka kala tuu enangeko noupuna kwoove, ngeenge naave owa hala okuninga sha faafana! w23.09 11 ¶12-13

Eshi omuyapostoli Paulus a shanga onhumwafo ei, eongalo lokuTessalonika kala li la wanifa odula. Ovalumenhu ovo va li va nangekwa po, otashi dulika kava li ve na owino notashi dulika va li hava ningi omapuko. Ashike ova li va wana okufimanekwa. Eshi oudjuu munene tau ehene popepi, otwa pumbwa okukala twe lineekela ovakulunhuongalo vomomaongalo etu shi dulife nale, opo ve tu pe ewiliko. Otashi dulika itatu ka mona ewiliko okudja keembelewa detu da kula nosho yo koshitaimbelewa; onghee osha fimana okulihonga okukala tu hole notwa fimaneka ovakulunhuongalo vetu paife. Kashi na nee mbudi kutya oshike tashi ka ningwa po, natu twikileni okukala ovanaendunge. Katu na okuyandja elitulemo kokuhawanenena kwavo, ndele natu yandjeni elitulemo koushili oo kutya Jehova oye ta wilike ovalumenhu ovo ovadiinini okupitila muKristus. Ngaashi ashike embale hali amene omutwe womukwaita, eteelelo letu lexupifo ohali amene omadiladilo etu. Ohali tu kwafele tu mone kutya osho hashi yandjwa kounyuni ou oshongaho elela. (Fil. 3:8) Eteelelo letu ohali tu kwafele tu kale twa ngungumana notuha tengauke. w23.06 11-12 ¶11-12

Ovo tava pwilikine ‘komukainhu ehe netulumuko,’ ile tu tye ehe na eendunge, otava ka ninga etokolo, ngeenge otava ka tambula ko eshivo laye, ile hasho. Ope na omatomheno a femba kutya omolwashike tu na okuhenuka elihumbato olo tali twala moluhaelo. “Omukainhu ehe netulumuko” okwa ti: “Omeva oulunga omanyenye.” (Omayel. 9:17) “Omeva oulunga” oshike? Ombiibeli oya yelekanifa omilele pokati kovalihomboli nomeva taa tulumukifa. (Omayel. 5:​15-18) Omushamane nomukulukadi, ovo va hombola paveta, ova pitikwa va hafele omilele pamwe. Osho inashi yooloka ko tuu ‘komeva oulunga.’ Osho otashi dulika tashi ulike komilele inadi pitikwa, ile oluhaelo. Luhapu ohali ningwa meholeko, ngaashi ashike ombudi hai vake meholeko. “Omeva oulunga” otashi dulika taa monika manyenye, ngeenge ovo va kwatelwa mo otava diladila kutya kape na oo e wete osho tava ningi. Oko kaku fi tuu okulifufya kwa kwata moiti! Otave lipukifa vo vene, molwaashi Jehova oku wete keshe shimwe. Ngeenge okwa kala ine tu hokwa vali, otashi ka kala oshinima shii neenghono, oshinima osho tashi dulu oku tu ningilwa, ndele kashi ‘nyenye,’ ile shiwa. — 1 Kor. 6:​9, 10. w23.06 22 ¶7-9

Oshike u na okuninga po, ngeenge ou udite kutya eilikano loye itali di komutima, ile iho hafele vali oukalele ngaashi wa li ho u hafele nale? Ino fika pexulifodiladilo kutya ku na vali omhepo yaJehova. Molwaashi inatu wanenena, omaliudo etu otaa dulu okulunduluka efimbo nefimbo. Ngeenge oto kanifa ouladi woye, diladila koshihopaenenwa shomuyapostoli Paulus. Nonande okwa kendabala okuhopaenena Jesus, Paulus okwa kala e shi shii kutya omafimbo amwe iha kala a halelela okuninga osho a pumbwa okuninga. Paulus okwa li a tokola toko okuwanifa po oukalele waye, kashi na nee mbudi kutya oku udite ngahelipi pomhito oyo. Sha faafana, ino ninga omatokolo she likolelela ashike kwaasho u udite. Kala wa tokola toko okuninga osho shi li mondjila, nonande hasho wa hala okuninga. Ngeenge owa kala to ningi osho sha yuka, mokweendela ko kwefimbo, otashi dulika omaliudo oye a lunduluke. — 1 Kor. 9:16. w24.03 11-12 ¶12-13

Ohatu dulu okuulikila ovamwatate novamwameme ohole moku va tambula ko va ninge ookaume ketu. (2 Kor. 6:​11-13) Vahapu vomufye otu li momaongalo omo mu na ovamwatate novamwameme va dja momaputuko a yoolokafana nove na omaukwatya a yoolokafana. Ohatu dulu okupameka ohole yetu yoku va hola aveshe mokuyandja elitulemo komaukwatya avo mawa. Ngeenge otwe lihongo okutala ko vamwe ngaashi Jehova he va tale ko, ohatu ka ulika kutya otu va hole. Ohole otai ka kala ya fimanenena pefimbo loudjuu munene. Openi hatu ka hanga eameno, ngeenge oudjuu oo owa hovele? Didilika osho Jehova a li a lombwela oshiwana shaye shi ninge, eshi sha li sha ponokelwa kuBabilon shonale. Okwa ti: “Hano oove, oshiwana shange, liidilila monduda yoye, u ka hondame okafimbo kanini, fimbo oupyuhandu tau pitilile po.” (Jes. 26:20) Osha fa shi li ngaha kutya eendjovo odo otadi longo yo nokufye ovo twa taalela oudjuu munene. w23.07 6-7 ¶14-16

Kaleni mwa shiivikila ondjele. Lipula kutya: ‘Mbela ovanhu ova tala nge ko ndi na ondjele, handi tifuka nohandi tale onheni? Ile ova tala nge ko handi komangele, ndi na onyanya, ile ndi na omutwe mukukutu? Ile ohandi pwilikine kuvamwe nokutifuka, ngeenge osha pumbiwa?’ Ohatu ka ulika kutya ohatu hopaenene Jehova naJesus shi fike peni, monghedi omo hatu ulike ondjele. Okukala tu na ondjele okwa kwatela mo okukala hatu tifuka, ngeenge eenghalo detu da lunduluka. Omalunduluko a tya ngaho, okwa kwatela mo eenghalo didjuu odo twa li inatu teelela. Pashihopaenenwa, otashi dulika tu hangike ombadilila koupyakadi wokuhe na oukolele wa kwata moiti. Ile onghalo youxupilo, ile yopapolotika otai dulu okulunduluka ombadilila moshitukulwa omo tu li, naasho otashi dulu okudjuupaleka onghalamwenyo yetu. (Omuud. 9:11) Otashi dulu nokuli okukala shidjuu kufye, ngeenge ehangano ole tu pula tu longele Jehova monghedi imwe i lili, ile konhele imwe i lili. Ohatu dulu okutambula ko nomupondo onghalo oyo ipe, ngeenge otwa katuka eenghatu nhee tadi shikula: (1) dimina kutya onghalo yoye oya lunduluka, (2) diladila konakwiiwa, (3) yandja elitulemo koinima oyo tai tungu nosho yo (4) kwafela vamwe. w23.07 21-22 ¶7-8

Omuprofeti Daniel okwa li omunyasha, eshi Ovababilon va li ve mu kwata po e li onghwate ve mu twala kuBabilon okudja muJerusalem. Nonande Daniel okwa li omunyasha, okwa li a kumwifa omalenga omuBabilon. Ova tala “osho shokombada,” sha hala okutya Daniel ka li e na ‘oshipo shasha kolutu, ndelenee omuwa okutala’ nokwa dja yo moukwaneumbo wa punapala. (1 Sam. 16:7) Omolwomatomheno oo, Ovababilon ova li ve mu deula, opo a kale ta yakula mombala yavo. (Dan. 1:​3, 4, 6) Jehova okwa li e hole Daniel, hamolweholokepo laye lokombada, ile omaufembanghenda e likalekelwa oo a li e na mombala, ndele omolwonghedi omo omulumenhu oo omunyasha a hoolola onghalamwenyo yaye i kale. Eshi Jehova a popya kutya Daniel okwa fa Noa naJob, Daniel otashi dulika a li e na ashike omido 20 lwaapo. Onghee Jehova okwa li a tala ko omulumenhu oo omunyasha omuyuki ngaashi Noa naJob, ovo ve mu longela noudiinini omido dihapu. (Gen. 5:32; 6:​9, 10; Job 42:​16, 17; Hes. 14:14) Jehova okwa twikila okukala e hole Daniel momukokomoko wonghalamwenyo yaye ile noididilikwedi. — Dan. 10:​11, 19. w23.08 2 ¶1-2

Ngeenge to ningi etokolo lokulanda eumbo, oto ka kala wa hala okukonakona, oinima aishe komudidi oyo i li oshitukulwa sheumbo olo. Ohatu dulu okuninga sha faafana, ngeenge hatu lesha nokukonakona Ombiibeli. Ngeenge owa lesha to endelele, oto ka shiiva ashike “omahovelohongo eendjovo daKalunga.” (Heb. 5:12) Ngaashi ashike wa pumbwa okuya meni leumbo, opo u lihonge shihapu kombinga yalo, owa pumbwa yo okukonakona Ombiibeli noukeka, opo u dule oku i uda ko pauyadi. Onghedi imwe ya denga mbada yokukonakona Ombiibeli, okumona nghee oitukulwa ya yoolokafana yetumwalaka lOmbiibeli ya kwatafana. Kendabala okuuda ko osho wa itavela nosho yo omatomheno kutya omolwashike shoshili. Opo tu ude ko Eendjovo daKalunga pauyadi, otu na oku di konakona moule. Omuyapostoli Paulus okwa ladipika ovamwaxe va konakone Eendjovo daKalunga noukeka, opo va ‘shiive nawanawa ounene, oule womukokomoko, oule wopombada noule wopedu’ woshili. Kungaho, otava ka kala va “twama nova pamenena” meitavelo. (Ef. 3:​14-19) Nafye otwa pumbwa okuninga sha faafana. w23.10 18 ¶1-3

MOmbiibeli omu na oihopaenenwa ihapu yovanhu ovo va li va ulika elididimiko. Omolwashike ito konakona oihopaenenwa oyo pefimbo lekonakono loye lopaumwene? Pashihopaenenwa, nonande David okwa li a nangekwa po, ofimbo a li omunyasha a ninge ohamba yOvaisrael yomonakwiiwa, okwa li e na okuteelela oule womido dihapu, ofimbo ina ninga ohamba. Simeon naAnna ova li hava longele Jehova noudiinini, ofimbo va teelela Messias oo a udanekwa. (Luk. 2:​25, 36-38) Eshi to konakona omahokololo oo, kendabala okumona omanyamukulo komapulo taa shikula: Oshike sha kwafela omunhu oo a ulike elididimiko? Ongahelipi a mona ouwa mokukala omulididimiki? Ongahelipi handi dulu oku mu hopaenena? Otashi dulika u mone ouwa mokulihonga kombinga yaavo va li inava ulika elididimiko. (1 Sam. 13:​8-14) Otashi dulika u lipule kutya: ‘Oshike she va ningifa vaha ulike elididimiko? Oilanduliko ilipi va li va mona?’ w23.08 25 ¶15

Omuyapostoli Petrus okwa li omudiinini; ka li a efa nande osha shi mu efife po okushikula Jesus. Okwa li a ulika oudiinini waye pomhito imwe, eshi Jesus a li a popya oshinima shonhumba osho ovahongwa vaye va li vehe udite ko. (Joh. 6:68) Vahapu ova li va efa po okushikula Jesus nopehe na okuteelela va yelifilwe. Ashike Petrus ka li a ninga ngaho. Okwa li a didilika kutya Jesus oye ashike e na “eendjovo domwenyo waalushe.” Jesus okwa li e shii kutya Petrus novayapostoli vakwao ova li tave ke mu fiya po. Ndele nande ongaho, Jesus okwa li e na elineekelo kutya Petrus ota ka aluka nokukala omudiinini. (Luk. 22:​31, 32) Jesus okwa li e udite ko kutya “omhepo oya halelela, ndele ombelela oi na ounghundi.” (Mark. 14:38) Onghee hano, nokuli nokonima eshi Petrus e mu lidimbika, Jesus ka li a fya ounye omuyapostoli waye. Eshi Jesus a nyumuka, okwa li e lihololela Petrus, eshi a li oye aeke. (Mark. 16:7; Luk. 24:34; 1 Kor. 15:5) Osho kasha li tuu sha twa omukumo omuyapostoli, oo a li a teka omukumo! w23.09 22 ¶9-10

Kalunga oha dimine po, ile ha tuvikile omatimba aavo ve na eitavelo muye. Ohe va dimine po filufilu noiha dimbuluka vali omatimba avo. (Eps. 32:​1, 2) Oha tale ko ovanhu va tya ngaho vehe na ondjo novayuki omolweitavelo lavo. Nonande Abraham, David nosho yo ovalongelikalunga vakwao ovadiinini ova li va talika ko ovayuki, kava li va wanenena. Ndele omolweitavelo lavo, Kalunga okwa li e va tala ko vehe na oshipo, unene tuu moku va yelekanifa naavo va li vehe na eitavelo muye. (Ef. 2:12) Monhumwafo yaye oyo a shangela Ovaroma, omuyapostoli Paulus okwa yelifa kutya otu na okukala tu na eitavelo, opo tu kale ookaume kaKalunga. Abraham naDavid ova li ookaume kaKalunga, molwaashi ova li ve na eitavelo muye. Nafye ohatu dulu okuninga ookaume kaKalunga, molwaashi otu na eitavelo muye. w23.12 3 ¶6-7

Kunena, Ovakriste aveshe ove na oufembanghenda wokuyandja omayambo kuJehova mokulongifa efimbo lavo, eenghono nosho yo oiniwe yavo, opo va xumife komesho oinima yOuhamba waKalunga. Ohatu dulu okuulika kutya otwa pandula oufembanghenda wetu wokulongela Jehova moku mu longela ngaashi hatu dulu. Omuyapostoli Paulus okwa popya oinima oyo tu na alushe okukala hatu ningi, eshi hatu longele Jehova. (Heb. 10:​22-25) Osho osha kwatela mo okwiilikana kuJehova, okushiivifila vamwe kombinga yeteelelo letu, okwoongala pamwe nokutwaafana omukumo, “unene tuu eshi tu wete efiku [laJehova] tali ehene popepi.” Lwopexulilo lehokololo olo tali hangwa mEhololo, omweengeli waJehova okwa divilika outumbulilo tau shikula, eshi e u endulula luvali, a ti: “Linyongamena Kalunga!” (Eh. 19:10; 22:9) Onghee inatu dimbwa nandenande oshili oyo yomoule yopamhepo i na sha notembeli yaJehova yopamhepo inene nosho yo oufembanghenda oo tu na wokulongela Kalunga ketu munene! w23.10 29 ¶17-18

Atusheni otwa hala tu ‘kale tu holafane.’ Ashike osha fimana kufye okudimbuluka kutya Jesus okwa londwela a ti kutya ‘ohole yavahapu otai ka talala.’ (Mat. 24:12) Jesus ka li ta popi kutya ovahongwa vaye vahapu otava ka efa po okuulikilafana ohole. Ndele otu na okukala twa lungama, opo tuha nwefwe mo koikala yovanhu vomounyuni ovo vehe na ohole. Tu na osho momadiladilo, natu ka taleni kepulo eli la fimana: Oshike tashi ke tu kwafela tu mone ngeenge ohole yetu yokuhola ovamwatate novamwameme oya xwama ngoo? Onghedi imwe omo hatu dulu okumona kutya ohole yetu oya xwama, omokukonakona nghee hatu ungaunga neenghalo donhumba monghalamwenyo. (2 Kor. 8:8) Onghalo imwe oya popiwa komuyapostoli Petrus, a ti: “Komesho yaaishe, kaleni mu holafane nohole yomoule, molwaashi ohole ohai tuvikile onduba yomatimba.” (1 Pet. 4:8) Onghee omaunghundi nokuhawanenena kwavamwe otaku dulu okuyeleka ohole yetu. w23.11 10-11 ¶12-13

Itatu dulu okudulika koshipango shaJesus shi na sha nohole, ngeenge otu hole ashike vamwe meongalo, ndele katu hole ovanhu aveshe. Otashi dulika tu kale tu na ekwatafano lopofingo navamwe, ngaashi Jesus a li a ninga. (Joh. 13:23; 20:2) Ashike omuyapostoli Petrus okwe tu dimbulukifa kutya otu na okukendabala okukala tu na “ohole youmwainafana,” tu hole ovamwatate novamwameme aveshe. (1 Pet. 2:17) Petrus okwe tu ladipika tu kale tu “holafane tashi di komutima.” (1 Pet. 1:22) Movelishe oyo, outumbulilo ohole “tai di komutima,” ile yomoule owa hala okutya okuhola umwe nokuli nonande oshidjuu oku mu ulikila ohole. Pashihopaenenwa, ongahelipi ngeenge omumwatate okwe tu udifa nai, ile e tu ehameka monghedi yonhumba, ile yongadi? Potete otashi dulika tu kale twa hala okuungaunga naye monghedi omo a ungaunga nafye, ponhele yoku mu ulikila ohole. Ashike Petrus okwe lihonga kuJesus kutya elihumbato la tya ngaho ihali hafifa Kalunga. (Joh. 18:​10, 11) Petrus okwa shanga, a ti: “Inamu lishunifila owii ile omatukano. Ndele ponhele yaasho, nangekeni noupuna vakweni.” (1 Pet. 3:9) Ngeenge oho ulike ohole tai di komutima, oto ka kala omunalukeno noto ka kala u na ko nasha navamwe. w23.09 28-29 ¶9-11

Ohatu kala twa kumwa okumona nghee okaana haka kulu meendelelo nokuninga omukulunhu. Osha fa shi li ngaha kutya okaana ohaka kulu nopehe na okuninga eenghendabala dasha. Ashike ngeenge otwa hala okushikula oshihopaenenwa shaJesus filufilu, otwa pumbwa okuninga po sha. (1 Kor. 13:11; Heb. 6:1) Opo tu hange elalakano olo, otwa pumbwa okukala tu na ekwatafano lopofingo naJehova. Otwa pumbwa yo omhepo yaye iyapuki, opo i tu kwafele tu kulike omaukwatya oo taa hafifa Kalunga, tu kulike ounghulungu nokulilongekidila oinakuwanifwa yomonakwiiwa. (Omayel. 1:5) Jehova okwa shita ovanhu va kale ovalumenhu nosho yo ovakainhu. (Gen. 1:27) Oshipu okumona kutya ovalumenhu nosho yo ovakainhu ova yoolokafana palutu, ashike ova yoolokafana yo momikalo dikwao vali. Pashihopaenenwa, Jehova okwa shita ovalumenhu nosho yo ovakainhu va wanife po oinakuwanifwa yonhumba yokondadalunde. Onghee ova pumbwa omaukwatya nosho yo ounghulungu oo tau va kwafele va wanife po oinakuwanifwa ya tya ngaho. — Gen. 2:18. w23.12 18 ¶1-2

Mbela Jesus okwa li a hala vamwe navo va longife edina laXe lopaumwene? Osho naanaa. Ovawiliki vamwe vomalongelokalunga otashi dulika va li va itavela kutya itashi ulike efimaneko okulongifa edina laKalunga. Ashike Jesus ka li a efa eenghulunghedi da tya ngaho, dihe li pamishangwa, di mu imbe a fimaneke edina laXe. Diladila pomhito imwe eshi a li a velula omulumenhu, oo e na ondemoni, moshitukulwa shOvagerasa. Ovanhu ova li va tila neenghono, nova li va indila Jesus a fiye po oshitukulwa shavo. (Mark. 5:​16, 17) Natango, Jesus okwa li a hala edina laJehova li shiivike moshitukulwa osho. Onghee okwa li a lombwela omulumenhu, oo a velula, a lombwele ovanhu osho Jehova a ninga, ndele hashosho Jesus a ninga. (Mark. 5:19) Jesus okwa hala nafye kunena tu shiivife edina laXe mounyuni aushe. (Mat. 24:14; 28:20) Ngeenge otwa ningi ngaho, ohatu ka hafifa Ohamba yetu, Jesus. w24.02 10 ¶10

Otwa nangekwa noupuna, eshi tu li oshitukulwa shehangano laJehova momafiku aa madjuu axuuninwa. Onghalamwenyo mounyuni ou otai ende nokudjuupala, ashike Jehova okwe tu pa ovamwatate novamwameme ve tu kwafele. (Eps. 133:1) Ohe tu kwafele tu kale tu na ekwatafano la kola novaneumbo letu. (Ef. 5:33–6:1) Ohe tu pe yo eendunge nounongo oo twa pumbwa, opo tu kale tu na ombili yashili yokomutima. Otu na okulonga twa tula ombuda moshixwa, opo tu twikile okulongela Jehova noudiinini. Omolwashike? Omolwaashi omafimbo amwe, ohatu udifwa nai kwaasho vamwe va popya, ile va ninga. Otashi dulika yo tu teke omukumo omolwomapuko oo twa ninga, unene tuu ngeenge otwe a endulula lwoikando. Otwa pumbwa okutwikila okulongela Jehova (1) ngeenge omwiitaveli mukwetu e tu udifa nai, (2) ngeenge kaume ketu kopahombo e tu nyemateka (3) ngeenge twa teka omukumo omolwomapuko etu. w24.03 14 ¶1-2

Efimbo nefimbo, ohatu udu oimoniwa yovamwatate novamwameme ovo va tokola okuninga shihapu moilonga yaJehova. Otashi dulika va ya kOfikola yOvaudifi vOuhamba, ile va tembukila konhele oko ku na omhumbwe inene. Ngeenge oto dulu okulitulila po elalakano la tya ngaho, pula komesho. Oshiwana shaJehova osha halelela okutamununa mo oukalele washo. (Oil. 16:9) Ongahelipi ngeenge ito dulu okuninga ngaho pomhito ei? Ino diladila kutya ove ito dulu okuninga sha. Osho sha fimana oshosho kutya oto twikile okulididimika. (Mat. 10:22) Ino dimbwa kutya oto hafifa Jehova unene, ngeenge wa ningi ngaashi eenghalo doye tadi ku pitike. Eshi oshi li onghedi ya fimana, opo u kale to shikula Jesus konima yeninginifo loye. — Eps. 26:1. w24.03 10 ¶11

Tate yetu womeulu okwa udaneka oku tu dimina po, ngeenge otwe livela ombedi. (Eps. 86:5) Onghee ngeenge otwe livela ombedi shili omolwomanyono etu, ohatu dulu okukala tu na elineekelo kutya osho Jehova a popya oshoshili nokwe tu dimina po. Dimbuluka kutya Jehova oku na ondjele. Ina teelela tu ninge shihapu shi dulife pwaasho hatu dulu. Jehova ohe tu pandula mwaashishe osho hatu mu ningile, shimha ashike hatu mu pe osho sha denga mbada. Natango, diladila koihopaenenwa yopaMbiibeli yaavo va longela Jehova nomutima aushe. Pashihopaenenwa, diladila kombinga yomuyapostoli Paulus. Okwa longa noudiinini oule womido, a enda oinano ile nokwa tota po omaongalo mahapu. Ndele eshi onghalamwenyo yaye ya lunduluka noka li vali ha dulu okuudifa ngaashi nale, mbela osho osha hala kutya ka li vali a hokiwa kuJehova? Ahowe. Okwa twikila okuninga ngaashi ta dulu, na Jehova okwe mu nangeka noupuna. (Oil. 28:​30, 31) Sha faafana, onghedi omo hatu longele Jehova otai dulu okulunduluka efimbo limwe. Ashike osho sha fimana kuye omalinyengotomheno etu oku mu longela. w24.03 27 ¶7, 9

Jesus okwa tulila po ovahongwa vaye oshihopaenenwa osho ve na okushikula okupitila momailikano aye, oo a ilikana kuJehova. Jesus okwa li ha ilikana lwoikando moukalele waye aushe. Okwa li he litulile po efimbo, opo a ilikane, molwaashi luhapu okwa li ha kala e lipyakidila nokwa dingililwa kovanhu vahapu. (Mark. 6:​31, 45, 46) Okwa li ha kwata oxuxwa komulungu, opo a ilikane ofimbo e li oye aeke. Pomhito imwe, okwa li a ilikana oufiku aushe, ofimbo ina ninga etokolo la fimana. (Luk. 6:​12, 13) Jesus okwa li a ilikana lwoikando oufiku, oo wa tetekela efyo laye, ofimbo ina manifa oshinakuwanifwa shaye shidjuu shokombada yedu. (Mat. 26:​39, 42, 44) Oshihopaenenwa shaJesus otashi tu hongo kutya kashi na nee mbudi kutya ohatu kala twe lipyakidila shi fike peni, otwa pumbwa okulitulila po efimbo lokwiilikana. Ngaashi Jesus, otashi dulika twa pumbwa okulitulila po efimbo tu ilikane, tashi dulika tu penduke ongula inene, ile konguloshi. Ngeenge otwa ningi ngaho, ohatu ka ulikila Jehova kutya otwa pandula oshali oyo ye likalekelwa. w23.05 3 ¶4-5

Didilika outumbulilo oo wa longifwa “yadifwa,” ile tililwa momushangwa wefiku wonena. Emboitya limwe lOmbiibeli ole u yelifa kutya “omulonga tau kunguluka.” Olo kali fi tuu efano la twa olo tali divilike ohole inene yaJehova yokuhola ovavaekwa! Ovavaekwa ove shi shii kutya ove “holike kuKalunga.” (Jud. 1) Omuyapostoli Johannes okwa holola omaliudo avo, eshi a shanga, a ti: “Diladileni kohole inene oyo Tate e tu ulikila eshi e tu pa oufembanghenda wokwiifanwa ovana vaye.” (1 Joh. 3:1) Mbela ohole yaJehova oya ngabekelwa ashike ovavaekwa? Hasho, Jehova okwa ulika kutya oku tu hole atusheni. Jehova okwa ulika ohole monghedi ya denga mbada ilipi? Osheshi a yandja ekulilo. Eshi a ninga ngaho, okwa ulika ohole e dule keshe umwe. — Joh. 3:16; Rom. 5:8. w24.01 28 ¶9-10

Ovelishe oyo oya holola oshinima shimwe vali osho sha kwafela David a finde oumbada, ngeenge a li a tila. Nokuli nonande onghalamwenyo yaye oya li natango moshiponga, David okwa li a dilonga kwaasho Jehova a li te ke mu ningila monakwiiwa. David okwa li e shii kutya Jehova ote ke mu xupifa pefimbo la wapala. Komesho yaaishe, Jehova okwa lombwela David kutya oye ta ka kala ohamba yaIsrael ya shikula ko. (1 Sam. 16:​1, 13) David okwa li e shii kutya keshe osho Jehova a udaneka ote ke shi wanifa po. Jehova okwa udaneka oku ku ningila shike? Inatu teelela Jehova e tu amene komaupyakadi aeshe. Ndele dimbuluka kutya, kashi na nee mbudi kutya owa taalela omayeleko elipi mounyuni ou, Jehova ote ke a xulifa po mounyuni mupe. (Jes. 25:​7-9) Omushiti wetu oku na eenghono dokunyumuna ovafi, doku tu velula nokuxulifa po ovapataneki aveshe. — 1 Joh. 4:4. w24.01 6 ¶12-13

Diladila keliyapulo loye neninginifo. Owa katuka eenghatu odo, molwaashi owa halelela okuyambidida Jehova. Dimbuluka osho she ku kwafela, opo u kale wa tomhwa kutya owa mona oshili. Owa shiiva Jehova nowa hovela okukala we mu fimaneka nou mu hole e li Tate woye womeulu. Owa kulika eitavelo nole ku linyengifa u livele ombedi. Omutima woye owe ku linyengifa u efe po oilonga oyo inai koshoka nokulonga ehalo laKalunga. Owa li wa pepelelwa, eshi wa mona nghee Kalunga e ku dimina po. (Eps. 32:2) Owa li wa hovela okukala pokwoongala kwopaKriste nokulombwela vamwe kombinga yoinima itunhula oyo we lihonga. U li Omukriste e liyapulila Jehova nowa ninginifwa, paife oto ende mondjila oyo tai twala komwenyo waalushe nowa tokola toko uha kanduke mo. (Mat. 7:​13, 14) Natu kaleni twa pama notuha tengauke, mokukala tu hole Jehova nokudulika koipango yaye. w23.07 17 ¶14; 19 ¶19

Okudiladila keilikano loye, eshi we liyapulila Jehova, ohaku ku kwafele, opo u mone eenghono u kondjife omayeleko. Pashihopaenenwa, mbela oto ke lihumbatela umwe oo ehe fi kaume koye kopahombo monghedi oyo tai kokele momilele? Hasho nandenande! Owa udanekela nale Jehova kutya ito ka ninga oshinima shi li ngaho. Ngeenge ino efa omaliudo e li ngaho a kule, ito ka pumbwa oku a kondjifa. Oto ka ‘kanduka mo melila lovahenakalunga.’ (Omayel. 4:​14, 15) Okudilonga koshihopaenenwa shaJesus, otashi ke tu kwafela. Okwa li a tokola okuhafifa Xe. Ngaashi Jesus, kala wa tokola toko, opo u henuke diva oshinima keshe osho u shii kutya itashi hafifa Kalunga oo we liyapulila. (Mat. 4:10; Joh. 8:29) Osho ho ningi ngeenge u na omaupyakadi, ile to yelekwa okuninga oshinima sha puka, ohashi ulike kutya owa hala okukala to ‘shikula’ Jesus. Ngeenge owa ningi ngaho, kala u shi shii kutya Jehova ote ke ku kwafela. w24.03 9-10 ¶8-10