Ofye Ovo Tu Na Eitavelo
Okuudifa onghundana iwa momapya olwishi aTaiwan
TAIWAN luhapu ohashi mono omuloka muhapu, oo hau shi ningi tashi shiiva shi teye eteyo liwa lolwishi luvali odula keshe. Ndelenee omafimbo amwe odula ihai loko pefimbo opo ya teelelwa, nomhaona ohai fi. Ngee eshi sha ningwa, mbela omunafalama oha teka omukumo? Hasho. Oku shii kutya oudiinini owa pumbiwa. Oha kunu omhaona ipe ndele ta twikulula epya. Nongeenge onghalo ya xwepopala, omunafalama oha teya eteyo liwa. Omafimbo amwe okukuna nokuteya pamhepo okwa faafana.
Oudiinini meteyo lopamhepo
Eedula da pita, Eendombwedi daJehova muTaiwan oda longa noudiinini okukuna nokuteya eembuto doshili yopamishangwa moitukulwa oyo tai monika ihai imike sha. Oshihopaenenwa shimwe omoshitukulwa shaMiao-li. Omwa kala elinyengo linini keenghendabala dokuyandja oundombwedi moshitukulwa osho omafimbo amwe. Mo 1973 ovakokolindjila ovalihomboli ve likalekelwa ova ulikwa va longe ve li ovaudifi vOuhamba vefimbo liyadi moshitukulwa omo. Petameko, vamwe okwa li tava ulike ohokwe monghundana iwa. Ndelenee ohokwe ei oya kana po diva. Opo nee ovakokolindjila ve likalekelwa ova tuminwa koshitukulwa shimwe.
Mo 1991 ovakokolindjila vavali ve likalekelwa ova tuminwa ko vali. Ndele natango oidjemo otai ulike kutya onghalo yomhepo kaya li iwa omolwekulo lopamhepo. Konima yeedula dinini, ovakokolindjila ve likalekelwa ova tuminwa kwaasho kwe lineekelwa tashi ka kala shi li edilopya. Kungaha, edu ola kala eputu oule wefimbo.
Eenghendabala dipe otadi eta eteyo liwa
Mu Septemba 1998 okwa ningwa etokolo ku ningwe eenghendabala dokutala kutya oitukulwa ilipi oyo i na oidjemo ihapu moshitukulwa sha kula shomuTaiwan oyo i he li mepashukilo leongalo. Mbela eshi okwa li shi na okuwanifwa po ngahelipi? Omokutuma ovakokolindjila ve likalekelwa vopokafimbo ve fike 40 opo va ka longe moitukulwa oyo i he li mepashukilo leongalo omo mu na ovakalimo vahapu.
Oilando ivali ya shaama moshitukulwa shaMiao-li oyo imwe yomoitukulwa oyo ya hoololelwa oshikonga. Ovamwameme vane inava hombolwa okwa li ve na oku ka longa eemwedi nhatu oko va lole oshitukulwa. Diva konima eshi va fika, ova shanga olopota ihafifa kombinga yomuvalu wovanhu ovo tava mono ve na ohokwe. Eshi va mana eemwedi davo nhatu doukokolindjila moshitukulwa, ova hangika va tameka okukonakona Ombibeli novanhu vahapu. Ova tota po yo ongudu yekonakono lembo kekwafo lomukulunhuongalo weongalo lopopepi.
Vatatu vomovamwameme ava ove shi ulika kutya ova hala okutwikila nokufiloshisho nohole “omhaona” oyo kwa li tai kulu nawa. Onghee, vavali vomuvo ova nangekwa ve li ovakokolindjila ve likalekelwa tava kalelele, nomutitatu ota twikile okulonga e li omukokolindjila wondjikilile. Omukulunhuongalo umwe womeongalo lopopepi okwa tembukila moshitukulwa eshi e va kwafele. Poshipopiwa shotete shomoipafi sha yandjwa moshitukulwa omu opa li ovanhu ve dulife po 60. Paife eongalo lopopepi otali kwafele ongudu ei ipe i diinine okwoongala alushe kwOshoondaxa oko kwa wedwa komakonakono embo e lili naku lili. Mafiku eongalo lipe otashi dulika li totwe po moshitukulwa.
Oudiinini otau eta omanangeko noupuna
moitukulwa imwe yaTaiwan
Moitukulwa imwe omwa li elinyengo la faafana. Moshitukulwa shaI-lan moushilolundume woshitukulwa shokonhunhu, Ekonakono lEmbo lEongalo lipe ola totwa po moshitukulwa omo ovakokolindjila ve likalekelwa vopokafimbo va longa.
Omukokolindjila e likalekelwa wopokafimbo fimbo kwa li ta longo eumbo neumbo onguloshi imwe, okwa shakeneka omulumenhu omunyasha nokwe mu ulikila okambapila kelandulafano lokwoongala. Diva omulumenhu okwa pula: “Mbela ohandi dulu okukala pokwoongala mongula konguloshi? Nongeenge osho, ondi na okudjala shike?” Omukokolindjila ou okwa li ha ningi omakonakonombibeli e li ahetatu naavo ve na ohokwe oshivike keshe. Vamwe vomovakonakonimbibeli ova ninga diva eemhangela kuvo vene va ninge ovaudifi vonghundana iwa, nelalakano lokukala va ninginifwa.
Omunhu umwe modoolopa oyo tuu oyo okwa kala iha faula okuya kongeleka eedula dihapu ndele ina dula nande okumona umwe oo te mu hongo Ombibeli. Eshi a uda kombinga yelongekido lekonakonombibeli, okwa longifa omhito nope he na okwoongaonga. Okwa li a ladipikwa opo a kale he lilongekida oshileshwa shaye komesho yefimbo. Eshi omukokolindjila e likalekelwa wopokafimbo e uya va ninge ekonakono, okwa mona kutya omukainhu ou okwa li e lilongekida nawa mokulanda oshifo shokushanga omo a shanga omapulo aeshe oo e li moshitukulwa osho tava konakona. Nokwa li a shanga omanyamukulo aye pepulo keshe. Okwa li yo a tapela mo omishangwa adishe odo da yandjwa moshileshwa shaye. Pefimbo eli omumwameme e uya okuninga ekonakono oshikando shotete, omukainhu okwe lilongekida nale oileshwa itatu yotete!
Oidjemo ya faafana oya monika modoolopa yaDongshih pondingandinga yaTaiwan. Ovakokolindjila ve likalekelwa vopokafimbo ova yandja oubroshure ve dule 2 000 meemwedi nhatu odo va longa oko. Momwedi omutitatu, ova ninga omakonakonombibeli opeumbo e li 16. Konyala odoolopa aishe okwa li ya hanaunwa po kekakamo ledu olo la denga ondingandinga yaTaiwan mo 21 Septemba 1999, ndele vamwe ovo ve na ohokwe otava twikile nokuninga exumokomesho lopamhepo, nonande ohava ende nokuli oule wovili okukala pokwoongala pOlupale lOuhamba olo li li popepi. Heeno, oudiinini owa pumbiwa opo ku teywe eteyo liwa, kutya nee omoinima yopamaliko ile oyoyo yopamhepo.
[Efano pepandja 8]
CHINA
[Efano pepandja 8]
Taiwan Strait
[Efano pepandja 8]
TAIWAN
[Efano pepandja 8]
Mountain High Maps® Copyright © 1997 Digital Wisdom, Inc.