Tanga Jehova omolwoilonga yaye inene!
“Omwenyo wange otau hambelele pombada Omwene . . . Osheshi Omunaenghono a ningila nge oinima inene.”—LUKAS 1:46-49.
JEHOVA okwa wana okutangwa omolwoilonga yaye inene. Eshi omuprofeti Moses a hepaulula okumangululwa kwOvaisrael muEgipti, okwa ti: “Omesho eni a mona oilonga aishe ei Omwene e i longele.” (Deuteronomion 11:1-7) Sha faafana, eshi omweengeli Gabriel a shiivifila okakadona Maria okudalwa kwaJesus oko kwa li pokuuya, Maria okwa ti: “Omwenyo wange otau hambelele pombada Omwene . . . Osheshi Omunaenghono a ningila nge oinima inene.” (Lukas 1:46-49) Tu li Eendombwedi daJehova, ohatu mu tange omolwoilonga inene ya tya ngaha, ngaashi okumangululwa kwOvaisrael moupika wOvaegipti nosho yo okutulwa kwOmona waye omuholike pashikumwifilonga moshidalelo shaina.
2. (a) ‘Elalakano laalushe’ laKalunga otali ti shike kovanhu ovaduliki? (b) Johannes okwa mona shike konhunhu yaPatmos?
2 Ihapu yomoilonga inene yaJehova oya li i na sha ‘nelalakano laye laalushe’ okunangeka noupuna ovanhu hava dulika omolwaMessias nosho yo epangelo lOuhamba waye. (Ovaefeso 3:8-13, yelekanifa NW.) Elalakano eli ola li tali xumu komesho kanini nakanini eshi omuyapostoli omukulupe Johannes kwa li a pitikwa a mone memoniko oshivelo sha yeuluka meulu. Okwa uda ondaka ya fa yenghuma tai ti: “Ila oku pombada, ndee handi ku ulikile osho shi nokuningwa komesho.” (Ehololo 4:1) Eshi kwa li a taataelwa kepangelo laRoma konhunhu yaPatmos “omolwondjovo yaKalunga nomolwehepaululo laJesus Kristus,” Johannes okwa pewa “ehololo laJesus Kristus.” Osho omuyapostoli a mona nokwa uda osha holola shihapu kombinga yelalakano laalushe laKalunga notashi yandje hano ouyelele wopamhepo nosho yo etwomukumo li li pefimbo omolwOvakriste aveshe vashili.—Ehololo 1:1, 9, 10.
3. Oolyelye ve lilwe po kovakulunhu 24 va monika kuJohannes memoniko?
3 Okupitila moshivelo eshi sha yeuluka meulu, Johannes okwa mona ovakulunhu ve li 24, ve li koshipangelapundi nove na oikoroni ngaashi eehamba. Ova twa eengolo koshipala shaKalunga ndele tava ti: “Omwene wetu naKalunga ketu, Ove wa wana okutambula efimano nefimaneko nepangelo, osheshi Ove wa shita oinima aishe, ndele kehalo loye i li po noya shitwa.” (Ehololo 4:11) Ovakulunhu ovo ove lile po Ovakriste ovavaekwa aveshe ovanyumunwa pondodo ya tumbala oyo va udanekelwa kuKalunga. Ove linyengifwa va tange Jehova omolwoilonga yaye inene i na sha nokushita. Nafye yo otwa kumwa keuliko ‘leenghono daJehova daalushe noukalunga waye.’ (Ovaroma 1:20) Apa ngoo pe fike okulihonga kwetu kombinga yaJehova, opo ngoo pe fike okukala netomheno loku mu tanga omolwoilonga yaye inene.
Udifa oilonga yaJehova i shii okutangwa!
4, 5. Yandja oihopaenenwa yanghee David a tanga Jehova.
4 Omupsalme David okwa tanga Kalunga omolwoilonga yaYe inene. Pashihopaenenwa, David okwa imba ta ti: “Imbileni Omwene, ou ta kala muSion, udifileni mokati koiwana oinenelonga yaye. Omwene, file nge onghenda, tala oudjuu wange nda hepekwa nao kovatondi vange, ou ho kufa nge moivelo yefyo, oilonga yefimano loye alishe opo ndi shiive oku i hepaulula, ndi shiive okunyakukilwa exupifo loye moivelo yokakadona kaSion.” (Epsalme 9:12, 14, 15) Konima yokupa omona waye Salomo omhangela yokutunga otembeli, David okwa pandula nokutanga Kalunga, ta ti: “Omwene, ounene owoye, neenghonopangelo odoye, noshinge oshoye, nouyelele owoye, nepangelofimano oloye . . . Oshilongo oshoye Omwene, ndele Oove Omupangeli waaishe! . . . Ndele paife, Kalunga ketu, hatu ku hambelele ndele hatu fimaneke edina loye noshinge shalo.”—1 Omafimbo 29:10-13.
5 Heeno, Omishangwa otadi tu ladipike luhapu tu tange Kalunga, ngaashi David e mu tanga. Embo lOmapsalme oli na omautumbulilo mahapu okutanga Kalunga, netata lomaimbilo oo okwa popiwa kutya okwa shangwa kuDavid. Okwa tanga nokwa pandula Jehova alushe. (Epsalme 69:31) Kakele kaasho, okudja nale oitukulwa yaDavid ya nwefwa mo kuKalunga nosho yo yavamwe oya longifwa okutanga Jehova.
6. Ongahelipi Omapsalme a nwefwa mo tae tu kwafa?
6 Omapsalme itaa kwafa tuu ovailikani vaJehova! Ngeenge twa hala okupandula Kalunga omolwoilonga yaye inene aishe oyo e tu ningila, omadiladilo etu naa yukifwe keendjovo diwa tadi hangika mOmapsalme. Pashihopaenenwa, okupendukila mefiku lipe, ohatu dulu okulinyengifwa tu popye sha faafana naashi: “Osha wapala unene okupandula Omwene, nokwiimbila edina loye ehambelelo, Oove ou wOkombadambada; okuhepaulula ouwanghenda woye ongula inene, nokutonga oudiinini woye oufiku . . . Osheshi Omwene, Ove wa hafifa nge mokulonga kwoye; ohandi nyakukilwa oilonga yomake oye.” (Epsalme 92:2-5) Ngeenge twa pondola endangalati mokukula kwetu kwopamhepo, otashi dulika tu kale twa hala okupopya ehafo nosho yo olupandu letu meilikano, ngaashi omupsalme a ninga eshi a imba ta ti: “Ileni, tu kuwilileni Omwene, tu nyakukwilweni emanya lexupifo letu! Tu holokeni koshipala shaye nokupandula, fye tu mu tanheleni nomaimbilo ehambelelo.”—Epsalme 95:1, 2.
7. (a) Oshike shi shii okudimbulukiwa shi na sha nomaimbilo mahapu haa imbwa kOvakriste? (b) Omolwetomheno lashike tu na okufika diva pokwoongala nokukala po fiyo opokudimbuka?
7 Luhapu ohatu yelula eendaka detu momaimbilo okutanga Jehova pokwoongala kweongalo nosho yo poyoongalele oyo inini naayo ya kula. Oshi shii okudimbulukiwa kutya mahapu omomaimbilo aa okwe likolelela komadiladilo a nwefwa mo a dja membo lOmapsalme. Inatu hafa tuu okukala tu na omaimbilo taa wapalele pefimbo letu notaa hafifa omutima mokutanga Jehova! Okwiimbila Kalunga omahambelelo oku li etomheno limwe liwa lokufika diva pokwoongala nokukala po fiyo opokudimbuka, nokungaha ohatu ka kufa ombinga pamwe novailikani vakwetu mokutanga Jehova neimbilo nosho yo neilikano.
“Tangeni Jehova”
8. Oshitya “Halleluya” otashi ti ngahelipi?
8 Okutanga Jehova oku li meendjovo edi “Halleluya,” oshitya shOshiheberi osho tashi ti “Tangeni Jehova.” Pashihopaenenwa, mEpsalme 135:1-3, ohatu hange mo eladipiko eli lopahole nola divilikwa tali ti: “Halleluya! Tangeni edina [laJehova], li tangeni, ovapiya nye [vaJehova], ava hamu kala ofika meumbo lOmwene, momikala deumbo laKalunga ketu. Tangeni [Jehova], osheshi [Jehova] omuwa. Imbileni edina laye ehambelelo, osheshi olo olinyenye.”—Yelekanifa KB-1955.
9. Oshike tashi tu linyengifa tu tange Jehova?
9 Eshi hatu konakona oilonga ikumwifa yeshito laKalunga nosho yo oilonga aishe oyo e tu ningila, olupandu tali di komutima otali tu linyengifa tu mu tange. Ngeenge hatu konakona oinenelonga oyo Jehova a ninga omolwoshiwana shaye momafimbo a pita, omitima detu otadi tu linyengifa tu mu tange. Naashi hatu dilonga komaudaneko manene oinima oyo Jehova ta ka ninga natango, ohatu kongo eenghedi tu mu tange noku mu pandula.
10, 11. Ongahelipi okukala po kwetu kwo vene taku tu pe etomheno lokutanga Kalunga?
10 Okukala po kwetu kwo vene otaku tu pe etomheno lokutanga Jehova. David okwa imba ta ti: “Ohandi ku pandula [Jehova], eshi nda tungwa nda tungikikika; oilonga yoye oya longekeka, nomwenyo wange otau shi shiiva nawa.” (Epsalme 139:14) Heeno, otwa ‘tungwa twa tungikikika’ notu na eeshali di na ondilo ngaashi okumona ko, okuuda ko nosho yo oukeka wokudiladila. Kungaha, katu na mbela okukala nomwenyo panghedi oyo tai hambelelifa Omushiti wetu? Paulus okwa popya omadiladilo a faafana eshi a shanga ta ti: “Ngenge tamu li ile tamu nu, ile keshe tuu eshi tamu shi ningi, ashishe shi ningeni okufimanekifa Kalunga.”—1 Ovakorinto 10:31.
11 Ohatu ka ninga oinima aishe omolwokufimanekifa Jehova ngeenge otu mu hole shili. Jesus okwa ti kutya oshipango shotete osho: “Hola Omwene Kalunga koye nomutima woye aushe nomwenyo woye aushe [neenghono] doye adishe.” (Markus 12:30; Deuteronomion 6:5) Otu na okuhola shili Jehova noku mu tanga e li Omushiti wetu nOmuyandji ‘wakeshe oshipewa shiwa, nokeshe oshali sha wanenena.’ (Jakob 1:17; Jesaja 51:13; Oilonga 17:28) Oshi li pandunge oku shi ninga molwaashi oukeka wetu wokutomhafana, oupamhepo wetu nosho yo eenghono detu dopalutu—omaukwatya etu aeshe nosho yo okudula kwetu akushe—ohaku di kuJehova. E li Omushiti wetu, okwa wana okukala tu mu hole noku mu tanga.
12. Ou udite ngahelipi kombinga yoilonga inene yaJehova nosho yo eendjovo domEpsalme 40:6?
12 Oilonga inene yaJehova otai tu pe omatomheno itaa dulu okuvalulwa okukala tu mu hole nosho yo oku mu tanga! “Oilonga inene Ove wa longa, Omwene, Kalunga kange, noikumifi yoye neemhangela kufye,” osho David a imba. “Kape na eshi tashi yelekwa naave; ngeno nda hala oku i udifa noku i vilikila,—ndele yo ihapu, itai dulika okuvalwa.” (Epsalme 40:6) David ka li ta dulu okuvala oilonga aishe ikumwifa yaJehova, nafye itatu dulu oku i valula. Ndelenee natu tange alushe Kalunga ngeenge hatu ulikilwa oilonga yaye inene.
Oilonga ya kwatakanifwa kumwe nelalakano laalushe laKalunga
13. Ongahelipi eteelelo letu la pambafana noilonga inene yaKalunga?
13 Eteelelo letu lonakwiiwa ola pambafana unene noilonga inene noi shii kutangwa oyo i na ko nasha nelalakano laKalunga laalushe. Konima yoshibofa muEden, Jehova okwa yandja exunganeko lotete olo liyadi eteelelo. Mokutokolela eyoka ehandukilo, Kalunga okwa ti: “Ame ohandi ka tula outondanhu pokati koye nomwalikadi . . . nokoludalo loye nokoludalo laye. Ye ota ka nyanyaula omutwe woye ndele ove to ke mu twa moshififinwa.” (Genesis 3:15) Eteelelo lokuteelela Oludalo lomukainhu la udanekwa ola kala natango momitima dovanhu ovadiinini konima eshi Jehova a longa oilonga inene mokuxupifa Noa noukwaneumbo waye mEyelu lomounyuni aushe olo la komba po ovanhu ovanawii. (2 Petrus 2:5) Omaudaneko opaxunganeko kovanhu ovo va kala neitavelo ngaashi Abraham naDavid, okwa yandja natango eudeko okuuda ko osho Jehova ta ka ninga okupitila mOludalo olo.—Genesis 22:15-18; 2 Samuel 7:12.
14. Oshihopaenenwa dingi shilipi shoilonga inene yaJehova sha ningilwa ovanhu aveshe?
14 Euliko dingi laJehova e li umwe oo ta longele ovanhu oilonga inene ola ningwa eshi a yandja Omona waye ewifa—Oludalo la udanekwa, Jesus Kristus—a ninge ekuliloyambo. (Johannes 3:16; Oilonga 2:29-36) Oikulila oya tula po ekanghameno omolwokuhangana naKalunga. (Mateus 20:28; Ovaroma 5:11) Jehova okwa ongela ovo votete ovo va hanganifwa meongalo lopaKriste, la dikwa po pOpentekoste yo 33 O.P. Omolwekwafo lomhepo iyapuki, ova udifa onghundana iwa apeshe, tava ulike nghee efyo laJesus nosho yo enyumuko laye la yeulula ondjila omolwovanhu hava dulika va mone omanangeko noupuna aalushe koshi yepangelo lOuhamba waKalunga womeulu.
15. Ongahelipi Jehova a longa monghedi ikumwifa pefimbo letu?
15 Pefimbo letu, Jehova okwa longa monghedi ikumwifi okwoongela Ovakriste ovavaekwa vaxuuninwa. Eemhepo dehanauno oda li da kanghekwa omolwokupitika okudidilikwa koixupe yo 144 000, ovo tava ka pangela pamwe naKristus meulu. (Ehololo 7:1-4; 20:6) Kalunga okwa fya oshisho opo Ovakriste ovavaekwa va xupifwe moupika wopamhepo ‘waBabilon shinene,’ ouhamba wounyuni womalongelokalunga oipupulu. (Ehololo 17:1-5) Emangululo olo lomo 1919 nosho yo eameno laKalunga olo va mona okudja opo ola pa oixupe yovavaekwa omhito okuninga shike? Oi minikile mokuyandja oundombwedi waxuuninwa fimbo Jehova ina eta exulilo longhalelo yoinima yaSatana ya nyonauka ‘moudjuu unene’ olo tali ehene popepi neendelelo.—Mateus 24:21; Daniel 12:3; Ehololo 7:14.
16. Oshike tashi ningwa shi li oshidjemo shoilonga yokuudifa Ouhamba mounyuni aushe kunena?
16 Eendombwedi daJehova da vaekwa oda kala nokukwatela komesho nouladi oilonga yokuudifa Ouhamba mounyuni aushe. Oshidjemo, omuvalu tau hapupala ‘weedi dimwe’ paife otau ningi ovailikani vaJehova. (Johannes 10:16, OB-1954) Otwa hafa omolwomhito oyo ya yeulukila natango ovalininipiki vokombada yedu ve limbwange mumwe nafye mokutanga Jehova. Ovo tave linyenge keshivo olo tali ti: “Ila,” ove li monghalo omo tava dulu okuxupifwa va pite moudjuu unene, ve na etimaumbwile lokutanga Jehova fiyo alushe.—Ehololo 22:17.
Omayovi taa mbobolokele kelongelokalunga lashili
17. (a) Jehova ota longo ngahelipi oilonga inene shi na sha noilonga yetu yokuudifa? (b) Ongahelipi Sakaria 8:23 ta wanifwa?
17 Paife Jehova ota longo oilonga inene noi shi kutangwa i na sha noilonga yetu yokuudifa. (Markus 13:10) Omido opo da di ko, okwa ‘yeulula omivelo doilonga dinene.’ (1 Ovakorinto 16:9) Eshi oshe shi ninga tashi shiiva opo onghundana iwa i udifwe apeshe moitukulwa ya kula omo nale ovatondi voshili va li ve i kelela. Vahapu ovo va li momilaulu dopamhepo paife otave linyenge keshivo olo tali va shivi va longele Jehova. Otava wanifa eendjovo edi dopaxunganeko tadi ti: “Omwene womatanga ovakwaita ota ti: Omafiku tuu enya ovalumenhu omulongo vomomalaka aeshe oiwana otava ka kwata koshikutu shomulumenhu Omujuda nokukanyatela ko, ndee tava ti: Ofye twa hala okweenda pamwe nanye, osheshi ofye twa uda, nokutya Kalunga e li pamwe nanye.” (Sakaria 8:23) “Ovalumenhu omulongo” ovo tava popiwa navo Ovajuda vopamhepo, oixupe yOvakriste ovavaekwa vonena. Molwaashi omulongo otau dulu okukalela po ewaneneno lokedu, “ovalumenhu omulongo” ove lile po “ongudu inene” oyo ya tulwa kumwe ‘naIsrael yaKalunga’ nokuninga “oshiunda shimwe.” (Ehololo 7:9, 10; Ovagalati 6:16) Kali fi tuu ehafo okumona vahapu tava longo pamwe oshilonga shiyapuki ve li ovalongeli vaJehova Kalunga paife!
18, 19. Euliko lashike li li po kutya Jehova ota nangeke noupuna oilonga yokuudifa?
18 Otwa hafa eshi omayovi omilongo—nokuli omayovi omafele—taa tambula ko elongelokalunga lashili moilongo oyo kwa li tai pangelwa komalongelokalunga oipupulu nokwa li tashi monika sha fa ovanhu vamo itava ka tambula ko nande onghundana iwa. Konakona okambo kopaife koYearbook of Jehovah’s Witnesses, nokudidilika oilongo oyo tai lopota paife ovaudifi vOuhamba okudja 100 000 fiyo hanga 1 000 000. Eli euliko li na eenghono kutya oilonga yokuudifa Ouhamba ohai nangekwa noupuna kuJehova.—Omayeletumbulo 10:22.
19 Tu li oshiwana shaJehova, ohatu tange nokupandula Tate yetu yomeulu omolwoku tu pa elalakano lashili monghalamwenyo, oilonga i na ondjabi moilonga yaye nosho yo etaleko la twa lokutala ko onakwiiwa. Otwa teelela nehalo ewanifo lomaudaneko aeshe aKalunga notwa tokola toko ‘okukala mohole yaKalunga nokuteelela omwenyo waalushe.’ (Judas 20, 21) Inatu hafa tuu okumona kutya ongudu inene oyo tai tange Kalunga paife oi fike po 6 000 000 lwaapo! Omolwomanangeko noupuna aJehova e liwetikile, oixupe yovavaekwa pamwe needi dimwe odo hadi longele pamwe nayo, ova hangana momaongalo 91 000 lwaapo moilongo 235. Atusheni ohatu palulwa nawa pamhepo okupitila meenghendabala ihadi loloka ‘domupiya omudiinini nomunaendunge.’ (Mateus 24:45) Ehangano lopauteokratika tali xumu komesho otali wilike oilonga yOuhamba okupitila moitaimbelewa yEendombwedi daJehova i li 110 noku i pashukila nohole. Otwa pandula molwaashi Jehova e linyengifa omitima doshiwana shaye shi ‘mu fimaneke nomaliko asho.’ (Omayeletumbulo 3:9, 10) Oshidjemo, oilonga yetu yokuudifa mounyuni aushe otai twikile, notapa tungwa oinyanyangido, omaumbo aBetel nosho yo ovatumwa, Omalupale Ouhamba nosho yo Omalupale Oyoongalele ngaashi sha pumbiwa.
20. Ongahelipi okudiladila koilonga yaJehova inene noi shi kutangwa ku na oku tu nwefa mo?
20 Itashi shiiva kufye tu tumbule oilonga aishe inene noi shi kutangwa yaTate yetu womeulu. Ndelenee mbela ope na ngoo umwe e na omutima muwa ta dulu okweefa okulimbwanga mumwe nongudu ya kula tai tange Jehova? Doshili, kape na! Onghee hano, ovo ve hole Kalunga aveshe nava ingide nehafo tava ti: “Halleluya! Nye vomomaulu, tangeni Omwene, moule wopombada, mu tangeni! Ovaengeli vaye nye amushe, mu tangeni! . . . Ovamati nye noukadona, ovaxungu nounona nye. Ovo tuu, nava tange edina lOmwene, osheshi edina laye olo alike la fimana; oshinge shaye ohashi mane ko eulu nedu.” (Epsalme 148:1, 2, 12, 13) Heeno, natu tange Jehova omolwoilonga yaye inene paife nofiyo alushe!
Oto nyamukula ngahelipi?
• Oilonga imwe yaJehova i shi kutangwa oilipi?
• Omolwashike u udite we linyengifwa u tange Jehova?
• Ongahelipi eteelelo letu la kwatakanifwa kumwe noilonga inene yaKalunga?
• Ongahelipi Jehova ta longo oilonga i shi kutangwa i na sha noilonga yokuudifa Ouhamba?
1. Otwa wana okutanga Jehova omolwoilonga inene ilipi?
[Efano pepandja 8]
Oho kufa tuu ombinga nomutima aushe momaimbilo okutanga Jehova?
[Efano pepandja 11]
Otwa hafa eshi omhito ya yeulukila natango ovalininipiki ve limbwange mumwe nafye mokutanga Jehova