Eendjovo daKalunga nadi yukife eenghatu doye

“Ondjovo yoye oyo olamba yeemhadi dange, nouyelele mondjila yange.” — EPSALME 119:105.

1, 2. Omolwashike ovanhu vahapu inava dula okumona ombili nehafo lashili?

MBELA oto dimbuluka oshikando shimwe eshi wa li wa puka oku to i ndele to pula umwe e ku pukulule? Otashi dulika wa li pokufika oku to i, ndele to tumhakanifa ondjila oyo u na okuya nayo. Ile tashi dulika wa li wa kana filufilu nowa li wa pumbwa okuya nondjila imwe. Kashi na nee mbudi kutya oshike sha li sha ningwa po, mbela itashi ka kala pandunge okulandula omayele omunhu oo e shii nawa oshitukulwa omo to ende? Omunhu a tya ngaho ota dulu oku ku kwafela u fike oko to i.

² Oule womido omayovi, ovanhu vahapu ova kala tava kendabala okuyukifa eenghatu davo monghalamwenyo nopehe na ewiliko laKalunga. Ngeenge ovanhu inava wanenena ova kala va manguluka ko filufilu kuKalunga itava ka pondola sha nandenande. Ovanhu kave shii kutya oshike tashi dulu oku va etela ombili nehafo lashili. Mbela omolwashike inava dula okumona ombili nehafo lashili? Omido di dule 2 500 da pita, omuprofeti Jeremia okwa popya a ti: “Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” (Jeremia 10:23) Keshe oo ta kendabala okuyukifa eenghatu daye nopehe na ewiliko lomunhu oo e na owino ita ka kala a hafa. Ovanhu ova pumbwa shili ewiliko monghalamwenyo yavo!

3. Omolwashike Jehova Kalunga oye aeke a wana oku tu pa ewiliko, nokwe tu udanekela shike?

³ Jehova Kalunga oye aeke a wana oku tu pa ewiliko olo twa pumbwa. Omolwashike mbela? Omolwaashi oku shii nawa oshitwe yovanhu e dule omunhu keshe noku shii nawa nghee ovanhu va puma mo mondjila ndele tava kana meityo lopafaneko. Oku shii yo kutya ovanhu ova pumbwa okuninga shike opo va alukile mondjila ya yuka. Kakele kaasho, Jehova oku shii filufilu osho tashi dulu oku tu etela ouwa molwaashi oye Omushiti wetu. (Jesaja 48:17) Nomolwaasho otu na okulineekela filufilu eudaneko laye olo li li mEpsalme 32:8 tali ti: “Onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.” Osha yela kutya Jehova ohe tu pe ewiliko la denga mbada. Ndele mbela ohe tu wilike ngahelipi?

4, 5. Ongahelipi eendjovo daKalunga tadi dulu oku tu wilika?

⁴ Omupsalme umwe okwa ilikana kuJehova a ti: “Ondjovo yoye oyo olamba yeemhadi dange, nouyelele mondjila yange.” (Epsalme 119:105) Eendjovo daKalunga nomadimbulukifo aye oo taa hangwa mOmbibeli, otaa dulu oku tu kwafela tu finde omashongo oo tashi dulika tu shakeneke monghalamwenyo yetu. Ngeenge ohatu lesha Ombibeli nokweefa i tu wilike, ohatu ka wanifilwa pauhandimwe osho sha shangwa muJesaja 30:21 taku ti: “Omatwi eni otaa ka uda ondjovo ei tai di konima yeni, tai ti: Apa ondjila, ei mu nokweenda nayo!”

⁵ Didilika kutya Epsalme 119:105 ola tumbula eenghedi mbali da pambafana omo Eendjovo daKalunga hadi longo. Yotete, Eendjovo daKalunga odi li olamba yeemhadi detu. Ngeenge hatu shakeneke omashongo monghalamwenyo, natu efe omafinamhango Ombibeli a wilike eenghatu detu opo tu ninge omatokolo opandunge notu henuke eemwiyo dounyuni ou. Onhivali, omadimbulukifo aKalunga ohaa minikile mondjila yetu, tae tu kwafele tu ninge omatokolo oo e li metwokumwe neteelelo letu loku ka kala nomwenyo fiyo alushe mOparadisa oyo ya udanekwa kuKalunga. Ngeenge ohatu ende mondjila omo mu na ouyelele wa twa tau minikile nawa komesho, ohatu ka nongela eenghatu odo tadi dulu okweetifa oilanduliko ii ile oidjemo iwa. (Ovaroma 14:21; 1 Timoteus 6:9; Ehololo 22:12) Natu konakoneni moule shi na sha nanghee eendjovo daKalunga, Ombibeli, tadi dulu okukala olamba yeemhadi detu nosho yo ouyelele mondjila yetu.

“Olamba yeemhadi dange”

6. Omeenghalo dilipi eendjovo daKalunga tadi dulu okukala olamba yeemhadi detu?

⁶ Ohatu ningi omatokolo efiku keshe, amwe otashi dulika a kale inaa kwata moiti, ofimbo amwe haa kala a kwata moiti. Omafimbo amwe otashi dulika tu shakeneke onghalo oyo tai yeleke oukoshoki wetu wopaenghedi, ounashili wetu ile okuhenombinga kwetu. Opo tu finde omayeleko oo, otu na okukala twa ‘ika okutongola ouwa nowii.’ (Ovaheberi 5:14) Ngeenge otwa mono eshiivo lashili lEendjovo daKalunga nokukala tu udite ko omafinamhango ado, eliudo letu otali ka kala la deuka opo tu kale hatu ningi omatokolo oo taa hafifa Jehova. — Omayeletumbulo 3:21.

7. Hokolola onghalo oyo tai dulu okuningifa Omukriste a kale a hala okweendafana novanailonga vakwao vehe fi ovaitaveli.

⁷ Mbela ou li omukulunhu oo ta kendabala noudiinini okuhafifa omutima waJehova? (Omayeletumbulo 27:11) Ngeenge osho ngaho ou shii okupandulwa. Natu tye nee ngeno vamwe vomovanailonga vakweni ove ku pa okatekete opo u ye pamwe navo koudano wonhumba. Ohava hafele oukaume naave koilonga ndele ova hala mu ka hafele pamwe konhele imwe i lili shihe fi koilonga. Otashi dulika u diladile kutya oohandimwe ovo kave na eenghedi dii. Otashi dulika nokuli va kale ve na omaukwatya onhumba mawa. Mbela oto ka ninga po shike? Mbela osha nyika oshiponga okutambula ko eshivo olo? Ongahelipi Eendjovo daKalunga tadi dulu oku ku kwafela u ninge etokolo li li pandunge moshinima osho?

8. Omafinamhango opamishangwa elipi tae tu kwafele tu diladile nawa kombinga yokweendafana navamwe?

⁸ Natu konakoneni omafinamhango onhumba opamishangwa. Otashi dulika tu dimbuluke tete olo li li mOvakorinto votete 15:33 tali ti: “Inamu puka: Ookaume [vai] otava nyono po eenghedi diwa.” Mbela okudulika kefinamhango olo osha hala okutya omunhu oku na okuhenuka filufilu ovanhu ovo vehe fi ovaitaveli? Omishangwa otadi ti hasho nandenande. Omuyapostoli Paulus naye okwa li e na ko nasha novanhu ‘aveshe,’ mwa kwatelwa ovo va li vehe fi ovaitaveli. (1 Ovakorinto 9:22) Ovakriste ove na okukala ve na ko nasha novanhu aveshe, mwa kwatelwa ovo vehe fi ovaitaveli. (Ovaroma 10:13-15) Ngeenge otwa henuka filufilu ovanhu ovo tashi dulika va pumbwa ekwafo letu, ongahelipi hatu dulu okukala metwokumwe nomayele oo taa ti kutya natu “ningileni aveshe ouwa”? — Ovagalati 6:10.

9. Omayele Ombibeli elipi tae tu kwafele tu kale tu na ondjele shi na sha nokukala noukaume novanailonga vakwetu?

⁹ Ope na eyooloko la kula pokati kokukala noukaume nomunailonga mukweni nosho yo okukala kaume kaye kopofingo. Efinamhango limwe lopamishangwa olo tali dulu oku tu kwafela moshinima osho otali hangwa melondwelo lomuyapostoli Paulus olo a londwela nalo Ovakriste a ti: “Inamu humbata ondjoko imwe pamwe naava ve he neitavelo.” (2 Ovakorinto 6:14) Outumbulilo “inamu humbata ondjoko imwe” otau ti shike? Omatoloko amwe Ombibeli okwa toloka outumbulilo oo taa ti “inamu limanga kumwe naavo vehe fi ovaitaveli,” “inamu kala momuko umwe naavo vehe fi ovaitaveli,” ile “efeni okupanga oukaume inau wapala naavo vehe fi ovaitaveli.” Mbela onaini oukaume nomunailonga mukwetu tau ka kala inau wapala? Onaini oukaume wa tya ngaho tau ka kala wa pitilila ndele tau tu ningifa tu humbate ondjoko imwe pamwe naye? Eendjovo daKalunga, Ombibeli, otadi dulu okuwilika eenghatu detu monghalo ya tya ngaho.

10. (a) Jesus okwa li a hoolola ngahelipi ookaume kaye? (b) Omapulo elipi taa dulu okukwafela omunhu a ninge etokolo li li pandunge shi na sha nookaume?

¹⁰ Tala koshihopaenenwa shaJesus, oo a kala e hole ovanhu okudja pokushitwa kwavo. (Omayeletumbulo 8:31) Okwa li a panga oukaume wopofingo novashikuli vaye eshi a li kombada yedu. (Johannes 13:1) Okwa li nokuli a “hokwa” omulumenhu umwe oo a li a pukifwa komalongelokalunga. (Markus 10:17-22) Ndele nande ongaho, okwa li yo a tula po omangabeko e na sha nokuhoolola kwaye ookaume vopofingo. Kali a panga oukaume wopofingo novanhu ovo va li vehe na ohokwe shili yokulonga ehalo laXe. Okwa popile pomhito imwe, a ti: “Onye ookaume kange, ngenge tamu ningi eshi handi shi mu lombwele.” (Johannes 15:14) Odoshili kutya otashi dulika u kale u na oukaume nomunailonga mukweni wonhumba. Ndele lipula kutya: ‘Mbela omunhu a tya ngaho okwa hala ngoo okudulika koipango yaJesus? Mbela oku na ngoo ehalo okulihonga kombinga yaJehova? Mbela oku na ngoo ehalo okulongela Jehova ngaashi Jesus e tu lombwela? Mbela oha kala ngoo pamifikamhango dopaenghedi dopaKriste ngaashi ame?’ (Mateus 4:10) Ngeenge owa popi novanailonga vakweni nokudivilika kombinga yokutula moilonga omifikamhango dOmbibeli, oto ka mona omanyamukulo omapulo oo.

11. Tumbula oihopaenenwa yonhumba omo tu na okuwilikwa keendjovo daKalunga.

¹¹ Ope na natango eenghalo dihapu omo eendjovo daKalunga tadi dulu okukala olamba yeemhadi detu yopafaneko. Pashihopaenenwa, Omukriste oo ehe na oilonga otashi dulika a mone oilonga oyo a kala ta kongo. Ndele oilonga oyo otai pula omunhu a longe efimbo lihapu, nongeenge okwe i tambula ko ota ka kala ta faula okwoongala kwopaKriste lwoikando ihapu nosho yo okukufa ombinga momalipyakidilo makwao e na sha nelongelokalunga lashili. (Epsalme 37:25) Omukriste umwe otashi dulika a yelekwe neenghono a tale oinima oyo tai dulu oku mu ningifa a nyone omafinamhango Ombibeli. (Ovaefeso 4:17-19) Omukriste umwe otashi dulika a kale e na eamo lokuhanduka diva omolwokuhawanenena kwovaitaveli vakwao. (Ovakolossi 3:13) Otu na okweefa Eendjovo daKalunga di kale olamba yeemhadi detu meenghalo adishe odo. Ngeenge otwa kala hatu dulika komafinamhango Ombibeli, ohatu dulu okupondola omashongo aeshe oo hatu shakeneke monghalamwenyo. Eendjovo daKalunga “odi shii kulonga nokukumaida nokupukulula nokutekula mouyuki.” — 2 Timoteus 3:16.

‘Ouyelele mondjila yange’

12. Ongahelipi eendjovo daKalunga di li ouyelele mondjila yetu?

¹² Epsalme 119:105 ola ti yo kutya eendjovo daKalunga otadi dulu okukala ouyelele mondjila yetu, tadi minikile komesho yetu. Otu na eshiivo li na sha nonakwiiwa, molwaashi Ombibeli otai yelifa eityo leenghalo di nyikifa oluhodi odo di li mounyuni nosho yo kutya oshike tashi ka ningwa po. Otu shii kutya otu li ‘momafiku axuuninwa’ onghalelo ei yoinima youkolokoshi. (2 Timoteus 3:1-5) Okukala tu shii osho tashi ka ningwa komesho oshi na okunwefa mo onghedi yetu yokukalamwenyo. Omuyapostoli Petrus okwa shanga a ti: “Hano oinima ei aishe ngenge tai hanauka ngaha, omu nokuhangika mwa tya ngahelipi moweenda uyapuki nometilokalunga mokuteelela nokweendelelifa euyo lefiku laKalunga.” — 2 Petrus 3:11, 12.

13. Ongahelipi okweendelela kwefimbo olo tu li mulo ku na okunwefa mo okudiladila kwetu nosho yo onghedi yetu yokukalamwenyo?

¹³ Okudiladila kwetu nosho yo onghedi yetu yokukalamwenyo oi na okuulika kutya otwa itavela filufilu kutya “ounyuni otau xulu po pamwe nokahalu [kao].” (1 Johannes 2:17) Okutula moilonga omayele Ombibeli otaku ke tu kwafela tu ninge omatokolo opandunge e na sha nomalalakano etu omonakwiiwa. Pashihopaenenwa, Jesus okwa ti: “Kongeni tete ouhamba waKalunga nouyuki waye, opo tamu wedelwa ko ei aishe.” (Mateus 6:33) Ovanyasha vahapu ovo tava ulike kutya ove na eitavelo meendjovo daJesus mokulalakanena oukalele wefimbo liyadi ova wana okupandulwa. Ovakriste vamwe, mwa kwatelwa omaukwaneumbo, ova tembukila nehalo liwa koilongo oko ku na omhumbwe inene yovaudifi vOuhamba.

14. Oukwaneumbo umwe wopaKriste owa tamununa mo ngahelipi oukalele wao?

¹⁴ Diladila koukwaneumbo umwe wopaKriste wovanhu vane, oo wa tembukila kOrepublika yaDominika okudja kOilongo yaHangana opo u ka longe pamwe neongalo li li moshilando omo mu na ovakalimo 50 000. Eongalo olo oli na ovaudifi vOuhamba 130 lwaapo. Ndele nande ongaho, mo 12 Aprili 2006, ovanhu 1 300 lwaapo ova li pEdimbuluko lefyo laKristus. Epya lomoshitukulwa osho ola “pya okuteywa” neenghono molwaashi eshi ashike oukwaneumbo oo wa kala ko oule weemwedi nhano, owa li wa hovela okuninga omakonakonombibeli 30. (Johannes 4:35) Omushamane okwa hokolola a ti: “Meongalo omu na ovamwatate novamwameme 30 ovo va tembukila mo ve uya okukwafela. Omilongo mbali lwaapo vomuvo ova dja kOilongo yaHangana, ofimbo vakwao vamwe va dja koBahamas, koKanada, koItalia, koNew Zealand nosho yo koSpania. Ove uya va halelela okukufa ombinga moukalele nova xwameka neenghono ouladi wovamwatate vomoshitukulwa.”

15. Omanangeko noupuna elipi wa hafela omolwokupitifa komesho oinima yOuhamba monghalamwenyo yoye?

¹⁵ Oshoshili kutya Ovakriste vahapu itava dulu okutembukila koilongo imwe opo va ka longe oko ku na omhumbwe inene. Ndele ovo tava ningi omalunduluko monghalamwenyo yavo opo va dule oku shi ninga otava ka mona shili omanangeko noupuna mahapu mokukufa ombinga moukalele wa tya ngaho. Kashi na nee mbudi kutya oto longo peni, mona ehafo olo hali di mokulongela Jehova neenghono doye adishe. Ngeenge owa pitifa komesho oinima yOuhamba monghalamwenyo yoye, Jehova okwa udaneka kutya ‘ote ke ku lokifila enangekonoupuna la wanenena.’ — Malakia 3:10.

Mona ouwa mewiliko laJehova

16. Ongahelipi hatu dulu okumona ouwa mokweefa eendjovo daKalunga di tu wilike?

¹⁶ Eendjovo daJehova ohadi tu wilike meenghedi mbali da pambafana, ngaashi twe shi kundafana nale. Odi li olamba yeemhadi detu, molwaashi otadi tu kwafele tu twikile okweenda mondjila ya yuka nohadi tu wilike ngeenge hatu ningi omatokolo. Odi li yo ouyelele mondjila yetu, tadi tu kwafele tu mone nawa komesho oko twa yuka. Osho otashi tu kwafele yo tu dulike kekumaido laPetrus, tali ti: “Mangeni oiya yomadiladilo eni nokulidilika; lineekeleni shili efilonghenda olo tamu ke li pewa peholoko laJesus Kristus.” — 1 Petrus 1:13.

17. Ekonakonombibeli otali ke tu kwafele ngahelipi tu landule ewiliko laKalunga?

¹⁷ Osha yela kutya Jehova ote tu wilike shili. Ndele ope na epulo olo kutya: Mbela oto ka dulika ngoo kewiliko olo? Opo u mone ewiliko olo Jehova ta yandje, kala wa tokola toko okulesha Ombibeli efiku keshe. Dilonga kwaasho wa lesha, kendabala okushiiva ehalo laJehova li na sha noinima yonhumba, nokudiladila keenghalo di lili noku lili omo to dulu okutula moilonga ouyelele oo monghalamwenyo yoye. (1 Timoteus 4:15) Longifa ‘eenghono doye dokudiladila’ ngeenge to ningi omatokolo opaumwene. — Ovaroma 12:1, NW.

18. Ohatu ka mona omanangeko noupuna elipi ngeenge otwa efa Eendjovo daKalunga di tu wilike?

¹⁸ Ngeenge otwa efa tu nongopalekwe notu wilikwe komafinamhango oo taa hangwa mEendjovo daKalunga, ohatu ka ninga omatokolo e li pandunge ngeenge hatu hoolola ondjila oyo tu na okweenda nayo. Ohatu dulu okukala nelineekelo kutya eendjovo daJehova, Ombibeli, ohadi “nongopaleke omalai.” (Epsalme 19:8) Ngeenge otwa efa Ombibeli i tu wilike, ohatu ka kala tu na eliudo la koshoka nosho yo embilipalelwo olo hali etifwa kokuhafifa Jehova. (1 Timoteus 1:18, 19) Ngeenge otwa efa eendjovo daKalunga di wilike eenghatu detu efiku keshe, xuuninwa Kalunga ote ke tu nangeka noupuna moku tu pa omwenyo waalushe. — Johannes 17:3.

Oto dimbuluka?

• Omolwashike sha fimana okweefa Jehova Kalunga a wilike eenghatu detu?

• Omonghedi ilipi eendjovo daKalunga hadi kala olamba yeemhadi detu?

• Ongahelipi eendjovo daKalunga tadi dulu okukala ouyelele mondjila yetu?

• Ekonakonombibeli otali ke tu kwafela ngahelipi tu landule ewiliko laKalunga?

[Efano pepandja 19]

Onaini okweendafana nomunhu ehe fi omwiitaveli haku kala kuhe li pandunge?

[Efano pepandja 20]

Ookaume kaJesus vopofingo ova li ovanhu ovo va li hava longo ehalo laJehova

[Omafano pepandja 21]

Mbela onghedi yetu yokukalamwenyo otai ulike ngoo kutya otwa pitifa komesho oinima yOuhamba?