Oshili kombinga youlunde

MBELA omunhu oo ta ehama omukifi wonhumba ota dulu ngoo okupatana kutya ita ehama mokupombaula po ombapila yoidjemo yomakonakono aye oyo ya dja kundokotola, oyo tai ulike kutya oku na omukifi wa tya ngaho? Itashi shiiva nandenande! Sha faafana, eshi ovanhu vahapu inava hala okutambula ko etaleko laKalunga li na sha noulunde, inashi hala okutya oulunde kau ko. Eendjovo daye, Ombibeli, oda kundafana shihapu kombinga youlunde. Ndele mbela Ombibeli otai hongo lela shike kombinga youlunde?

Ovanhu aveshe ova nyona

Omido omayovi avali lwaapo da pita, omuyapostoli Paulus okwa li a popya a nyemata kombinga youshili oo kutya ‘ouwa oo a li a hala, ihe u longo, ndele owii oo ina hala, ohe u longo.’ (Ovaroma 7:19) Ngeenge fye ovanashili, ohatu ka dimina kutya otu li monghalo ya faafana naayo yaPaulus. Otashi dulika hatu kala twa hala okudulika kOipango Omulongo ile komifikamhango dimwe vali dopaenghedi, ndele luhapu ohatu nyengwa okuninga ngaho. Osho inashi hala okutya ohatu ka nyonena owina, ndele omolwaashi ashike inatu wanenena. Mbela omolwashike osho shi li ngaho? Paulus okwa yandja enyamukulo a ti: “Hano ngenge handi longo eshi inandi [shi hala, OB-1986], haame vali handi shi longo, ndelenee oulunde ou wa kala muame.” — Ovaroma 7:20.

Ngaashi Paulus, ovanhu aveshe ohava hangwa koilanduliko yokuhawanenena, osho tashi ulike kutya ova dalwa noulunde. Paulus okwa ti: “Aveshe ova nyona, nove he noshinge shaKalunga.” Mbela oshike sha ningifa ovanhu va ye monghalo ya tya ngaho? Paulus okwa ti vali: “Ngaashi oulunde wa etwa mounyuni komunhu umwe [Adam], nefyo okoulunde, osho nee efyo ole uya movanhu aveshe, shaashi aveshe va nyona.” — Ovaroma 3:23; 5:12.

Ombibeli otai hongo kutya enyono lovadali vetu votete ole tu tukula ko kuKalunga nole tu ningifa tu kanife ewaneneno, nonande ovanhu vahapu inava itavela oushili oo. Jesus okwa li a itavela kutya Adam naEva oko va li shili, eshi a li a tofa momatukulwa otete aGenesis. — Genesis 1:27; 2:24; 5:2; Mateus 19:1-5.

Oshitukulwa shimwe sha fimanenena shetumwalaka lOmbibeli oshosho kutya Jesus okwa li e uya kombada yedu opo a kulile ovanhu moulunde ovo ve na eitavelo tali longo muye. (Johannes 3:16) Etimaumbwile letu li na sha nonakwiiwa ole likolelela kokutambula ko oupitilo oo Jehova ta longifa opo a xupife ovanhu ovo ve na olupandu monghalo ya nyika oshiponga oyo itava dulu okuhenuka. Ndele ngeenge katu udite ko kutya oulunde oshike ngaashi Kalunga e u tala ko, itatu dulu okuuda ko nokupandula oupitilo oo ta longifa opo e tu xupife moulunde.

Ekuliloyambo laJesus nosho yo kutya omolwashike la li la pumbiwa

Jehova okwa li a shita omunhu wotete netimaumbwile lokukala nomwenyo fiyo alushe. Adam okwa kanifa etimaumbwile likumwifi la tya ngaho eshi a tukululila Kalunga oshibofa. Eshi Adam a tukula oshibofa ndele ta nyono, kungaho, okwa ninga omulunde. (Genesis 2:15-17; 3:6) Adam okwa li a katuka monghedi oyo i li omhinge nehalo laKalunga, ndele ta kanifa ewaneneno nokwa nyona po ekwatafano laye naKalunga. Eshi Adam a longa oulunde mokuteya omhango yaKalunga, okwa hovela okukulupa ndele ta fi. Shinyikifa oluhodi, oludalo laAdam alishe, nafye twa kwatelwa mo, ola dalwa noulunde nohali fi omolwoulunde. Omolwashike mbela?

Omolwaashi ovadali inava wanenena itava dulu okudala ounona va wanenena. Oludalo laAdam alishe ola dalwa moulunde, nomuyapostoli Paulus okwa ti kutya “ondjabi youlunde oyo efyo.” (Ovaroma 6:23) Ndele oshitukulwa oshitivali shovelishe oyo otashi tu timaumbwilifa tashi ti: “Ndelenee oshalinghenda yaKalunga oyo omwenyo waalushe muKristus Jesus, Omwene wetu.” Osho osha hala okutya okupitila mefyo lopayambo laJesus, ovanhu ovaduliki nove na olupandu otava dulu okumangululwa koilanduliko youlunde oo wa longwa kuAdam.a (Mateus 20:28; 1 Petrus 1:18, 19) Mbela ou na okukala u udite ngahelipi kwaasho?

Ohole yaKristus ‘otai tu fininike’

Omuyapostoli Paulus okwa nwefwa mo kuKalunga a yandje enyamukulo lepulo olo li li mokatendo ka tetekela. Paulus okwa ti: “Ohole yaKristus tai tu fininike ofye ava twa tokola ngaha: umwe okwa fya omolwaaveshe, . . . ndele Oye okwa fya ponhele yaaveshe, opo ovo ve nomwenyo ve he likalele vali vo vene, ndelenee Oye tuu ou e va fila nokwe va nyumukila.” (2 Ovakorinto 5:14, 15) Ngeenge omunhu oku udite kutya eyambo laJesus otali dulu oku mu mangulula koilanduliko youlunde nokwa hala okuulika olupandu laye omolwefiloshisho olo, oku na okukendabala okukala metwokumwe nehalo laKalunga. Osho osha kwatela mo okuuda ko osho Kalunga a hala tu ninge, okudeula eliudo letu metwokumwe nomifikamhango dOmbibeli nokukala metwokumwe nado. — Johannes 17:3, 17.

Omapuko oo hatu ningi ohaa nyono po ekwatafano letu naJehova Kalunga. Eshi ohamba David ya li ya didilika kutya oya nyona sha kwata moiti eshi ya li ya ya moluhaelo naBatseba nosho yo okudipaa omushamane waye, osha yela kutya okwa li ya fya ohoni neenghono. Ndele osho David a li te lipula nasho unene oshosho kutya omanyono aye okwa li a nyemateka Kalunga. Osho osha li sha yuka kuDavid okukala te lipula shi na sha naasho. David okwa li a lombwela Jehova a nyika oluhodi a ti: “Kuove akuke nda nyona, nonda ninga eshi shii momesho oye.” (Epsalme 51:6) Sha faafana, eshi Josef a li ta yelekwa a ye moluhaelo, okwa li e linyengifwa keliudo laye a pule ta ti: “Ndi dule ngahelipi okuninga owii u fike opo nokunyona kuKalunga?” — Genesis 39:9.

Hano osha yela kutya oulunde kau fi ashike ngeenge twa kwatwa hatu ningi oshinima shonhumba sha puka ile ngeenge tashi dulika twa fya ohoni. Natango, kau fi ashike okulivela ombedi moipafi yovanhu ile yoshiwana, molwaashi tashi dulika twa dopa okuwanifa po oinima yonhumba. Ngeenge otwa kala ihatu dulika keemhango daKalunga di na sha nomilele, okukala ovanashili, okukala nefimaneko, di na sha nelongelokalunga nosho tuu, otashi ka nyona po ekwatafano letu naye. Ngeenge otwa kala hatu longo oulunde owina, ohatu liningi ovatondi vaKalunga. Oshinima osho oshoshili notwa pumbwa okudiladila kusho twa mana mo. — 1 Johannes 3:4, 8.

Hano oshike sha ningwa po shi na sha noulunde? Osha yela kutya oulunde oulunde ashike, ndele ovanhu ovo ashike va hovela okulongifa omautumbulilo amwe e lili ngeenge tava popi oulunde, tava diladila kutya oulunde otau ka kala oshinima inashi kwata unene moiti. Vahapu ova fifa eliudo lavo ile have li lipwililikile. Aveshe ovo va hala okukala va hokiwa kuKalunga ove na okuhenuka oikala ya tya ngaho. Ngaashi twa mona nale metetekelo, ondjabi youlunde kai fi ashike okuuda nai ile okufya ohoni ndele oyo efyo. Oulunde oo oshinima sha kwata moiti.

Onghundana iwa oyoyo kutya ngeenge otwe livele ombedi shili koulunde noku u efa po, ohatu dulu okudiminwa po pakanghameno lekuliloyambo laJesus. Paulus okwa ti: “Ovanelao ava omanyono avo a dimwa po nomatimba avo a tuvikwa. Omulumenhu omunelao oye ou, Omwene ite mu valulile etimba.” — Ovaroma 4:7, 8.

[Eshangelo lopedu]

[Oshimhungu/Efano pepandja 10]

Ehongo longeleka la lundululwa fifilufilu

Ovakatolika vahapu ovo hava i kongeleka kave udite ko lela kutya oLimbo oshike. Omido omilongo opo da di ko, ehongo olo ola enda tali kana po, fiyo osheshi la kufwa mo moutikisha. O-International Theological Commission oya ti kutya mo 2007, Ongeleka yaKatolika “oya xulifa po” pambelewa ehongo li na sha noLimbo momukanda oo wa popya kutya “omahongo elongelokalunga otaa ti kutya ope na etimaumbwile kutya ouhanana ovo va fya fimbo inava shashwa otashi dulika va ka xupifwe nokutwalwa mehafo laalushe.”

Omolwashike ehongo longeleka olo la lundululwa? Paulelalela, osho osha ningifa ongeleka i manguluke ko kwaasho sha popiwa komushangi woikundaneki umwe Omufransa wedina Henri Tincq a ti kutya oshi li “omutengi oo wa twikwa ovanhu nowa kala tau popilwa kOngeleka oyo i na ekoto okudja mOmafelemido Opokati fiyo omefelemudo eti-20 nowa li ashike wa longifwa okufininika ovadali va shashife ouhanana vavo meendelelo ngaashi tashi dulika, molwaashi va tilifwa kutya ounona vavo otava ka ya moLimbo.” Ashike okulundululwa kwehongo loLimbo okwa etifa po vali omapulo amwe.

Ehongo loLimbo olopamifyuululwakalo ile olopamishangwa? Pandjokonona, okwiitavela moLimbo okwa hovela omolweemhata dongeleka odo da li da holoka po mefelemudo eti-12 di na sha nomundilo wekoshokifo. Ongeleka yaKatolika ohai hongo kutya omwenyo womunhu ohau xupu po ngeenge a fi, nomolwaasho oya li i na okuyelifa kutya oshike hashi ningwa po shi na sha neemwenyo dounona ovo itava dulu okuya meulu molwaashi inava shashwa noinava wana okuya momundilo woheli. Onghee hano, osho osho sha li sha etifa po ehongo loLimbo.

Ndele Ombibeli itai hongo kutya omwenyo ohau xupu po ngeenge omunhu a fi. Ponhele yaasho, oya popya sha yela kutya omwenyo womunhu ohau fi eshi ya ti kutya omwenyo oo tau nyono otau dulu ‘okudimwa mo’ movanhu ile ‘okufya.’ (Oilonga 3:23; Hesekiel 18:4) Molwaashi omwenyo womunhu ohau fi, osha yela kutya kaku na oLimbo. Kakele kaasho, Ombibeli oya popya kutya oonakufya kave na eshi ve shii, ova fa omunhu a kofa. — Omuudifi 9:5, 10; Johannes 11:11-14.

Ombibeli oya popya kutya Kalunga okwa tala ko ounona vovadali Ovakriste kutya ovayapuki. (1 Ovakorinto 7:14) Eendjovo odo ngeno kadi na eshi tadi ti ngeenge ouhanana ova pumbwa okushashwa opo va ka xupifwe.

Ehongo li na sha noLimbo otali lundile Kalunga filufilu, molwaashi otali ti kutya Kalunga omuhepeki omukwanyanya oo ha handukile ovanhu vehe na ondjo, ponhele yokutya kutya oku li Xe omuyuki nomunahole. (Deuteronomion 32:4; Mateus 5:45; 1 Johannes 4:8) Nomolwaasho itashi kumwifa eshi ehongo olo lihe fi lopamishangwa lihe na eityo la sha kOvakriste vashili.

[Omafano pepandja 9]

Ohatu ka kala tu na ekwatafano liwa naKalunga nosho yo novanhu vakwetu ngeenge otwa kala hatu dulika kEendjovo daKalunga