Exunganeko 1. Omakakamo edu — ONGULUMAMBO YOKOINTANETA

Exunganeko 1. Omakakamo edu

‘Otapa ka kala keenhele neenhele omakakamo madjuu edu.’ — LUKAS 21:11.

● Eshi ekakamo ledu la li la denga oshilongo shedina Haiti, okaana kedina Winnie keemwedi 16, oka li ka xupifwa. Omutoolinghundana umwe woko-TV okwa li a uda okaana oko taka keme ke li koshi yomakuma oo a ngumauka po. Opo nee, oka kufwa ko koshi yomakuma, ashike ovadali vako kava li va xupa.

MBELA OMAUMBANGI OTAA ULIKE SHIKE? Eshi ekakamo ledu lounene woshiyelekifo 7.0 la li la denga Haiti muJanuali 2010, ola dipaa ovanhu ve dulife po 300 000. Ekakamo olo ledu ola li yo la hanauna po omaumbo ovanhu emiliyona 1,3. Nonande ekakamo ledu olo lomuHaiti ola li linene, halo alike ekakamo ledu linene la ningwa. Okudja muAprili 2009 fiyo Aprili 2010 mounyuni aushe omwa ningwa omakakamo edu manene e li 18 lwaapo.

OSHO OVANHU VAHAPU HAVA TI: Omakakamo edu inaa hapupula; kunena otwa nongela ashike omakakamo edu oo taa ningwa shi dulife ovanhu vopefimbo lonale, molwaashi otwa xuma komesho moinima yopaunongononi.

EPOPYO OLO OLOSHILI NGOO? Diladila koushili ou: Ombibeli inai divilika kutya omuvalu womakakamo edu otau ka hapupala momafiku axuuninwa. Ndele ponhele yaasho, oya popya kutya ‘otapa ka kala keenhele neenhele omakakamo edu madjuu,’ naasho osho she a ningifa a kale oiningwanima ididilikwedi momafimbo aa matunhula. — Markus 13:8; Lukas 21:11.

OVE OTO TI NGAHELIPI? Mbela omakakamo edu oo haa ningwa kae fi madjuu ngaashi ashike Ombibeli ya xunganeka?

Omakakamo edu oo aeke otashi dulika itaa tomho lela omunhu a itavele kutya otu li momafiku axuuninwa, ndele nande ongaho, oku li limwe lomomaxunganeko oo taa wanifwa. Paife natu ka kundafaneni exunganeko etivali.

[Eendjovo dididilikwedi pepandja 4]

“Fye [tu li ovanongononi vedu] otwa tala ko kutya omakakamo edu oo taa ningwa kunena omadjuu, ofimbo ovanhu mounyuni ve a tala ko e li ashike oiningwanima inyikifa oluhodi.”

— KEN HUDNUT, U.S. GEOLOGICAL SURVEY.

[Odjo yefano pepandja 4]