Ounona ove na okulihonga shike kombinga yaKalunga?

“Omishangwa adishe da yandjwa keenghono dOmhepo yaKalunga odi shii kulonga nokukumaida nokupukulula nokutekula mouyuki.” — 2 TIMOTEUS 3:16.

OUNONA ova pumbwa okuhongwa oshili kombinga yaKalunga. Openi tava dulu okulihonga oshili oyo? Otava dulu okulihonga membo lopalongelokalunga olo la fimanenena mounyuni aushe, Ombibeli.

Ombibeli oya fa onhumwafo ya dja kuKalunga. Kalunga okwa holola omaukwatya aye nokwa yandja ewiliko lopaenghedi kovana vaye aveshe, ovanyasha novakulunhu, okupitila monhumwafo oyo. Natu ka taleni komahongo amwe oo taa hangwa mOmbibeli nosho yo oilihongomwa oyo nounona nokuli tava dulu okulihonga muo.

Kalunga okwa hala tu shiive shike kombinga yaye?

◼ Osho Ombibeli tai hongo: “Jehova ofule, edina laye Jehova.” — Exodus 15:3, OB-1954.

Oshilihongomwa: Kalunga kefi ashike eenghono donhumba, ndele Omunhu wolela, oo e na edina le likalekelwa.

◼ Osho Ombibeli tai hongo: “Omwene ta panaapana omitima adishe nediladilo keshe lomomwenyo ye e li shii. Ove ngenge to mu kongo, oto ke mu mona.” — 1 Omafimbo 28:9.

Oshilihongomwa: Jehova Kalunga oku na ko nasha nafye atushe, mwa kwatelwa nounona vanini. (Epsalme 10:14; 146:9) Okwa hala tu lihonge kombinga yaye.

◼ Osho Ombibeli tai hongo: ‘Ino fininika ofiye, osheshi ngenge ho va fininike, ndele vo tava kuwile nge ekwafo, Ame ohandi ka uda shili onghuwo yavo.’ — Exodus 22:22-24.

Oshilihongomwa: Jehova oha pwilikine komailikano nokuli naao ounona vanini. Ohatu dulu okupopya naKalunga efiku keshe noku mu mbubulila omaliudo nomadilongo etu omoule.

◼ Osho Ombibeli tai hongo: “Alushe ova li va shinda Kalunga, nova handukifa Omuyapuki waIsrael.” — Epsalme 78:41.

Oshilihongomwa: Okupopya kwetu nosho yo eenghatu detu ohadi kumu omaliudo aJehova, onghee hano, otu na okukala hatu diladila fimbo inatu popya ile inatu katuka eenghatu.

Otu na okuungaunga ngahelipi naavo va yooloka ko kufye?

◼ Osho Ombibeli tai hongo: “Kalunga iha tale omunhu kombada, ndele moshiwana keshe, keshe ou he mu tila ndee ta diinine ouyuki, ote mu wapalele.” — Oilonga 10:34, 35.

Oshilihongomwa: Ngeenge Kalunga oha tambula ko ovanhu vomaputuko aeshe, nafye inatu ninga vamwe okatongotongo molwaashi oluvala lavo ile eholokepo lavo la yooloka ko kuletu.

◼ Osho Ombibeli tai hongo: ‘Hangikeni alushe mu shii kunyamukula keshe tuu ou te mu pula ekanghameno leteelelo eli li li munye, ndelenee shi ningeni nengungumano netilo.’ — 1 Petrus 3:15.

Oshilihongomwa: Ngeenge hatu kundafana navamwe kombinga yoinima yopalongelokalunga, otu na okupopila eitavelo letu hatu ulike kutya otwa tomhwa, ndele ohatu shi ningi nombili. Otu na yo okuungaunga nefimaneko novanhu ovo vehe fi veitavelo letu.

Otu na okuungaunga ngahelipi noilyo youkwaneumbo?

◼ Osho Ombibeli tai hongo: “Ounona nye, dulikeni kovakulunhu veni moinima aishe, osheshi osho sha wapalela mOmwene.” — Ovakolossi 3:20.

Oshilihongomwa: Ngeenge ounona ohava dulika, osho otashi ulike kutya ove hole ovadali vavo nova hala okuhafifa Kalunga.

◼ Osho Ombibeli tai hongo: “Lididimikilafaneni, diminafaneni po omanyono, ngenge mwa ningafana nomukweni, ngaashi Kristus e mu dimina po, osho nanye yo mu ninge.” — Ovakolossi 3:13.

Oshilihongomwa: Ovanhu vamwe, mwa kwatelwa oilyo yomoukwaneumbo etu, otashi dulika i tu nyemateke omafimbo amwe. Ndele ngeenge otwa hala Kalunga e tu dimine po, otu na okukala hatu dimine po vamwe. — Mateus 6:14, 15.

Omolwashike tu na okukala ovanashili novanambili?

◼ Osho Ombibeli tai hongo: “Efeni oipupulu, popyeni oshili keshe tuu namukwao.” — Ovaefeso 4:25.

Oshilihongomwa: Ngeenge ohatu popi oshili, ohatu hopaenene Kalunga nohatu mu hafifa. Ndele ngeenge otwa kulike oikala yokupopya oipupulu, ohatu ka kala twa fa omutondi waKalunga, Ondiaboli, oo ‘e li xe yoipupulu.’ — Johannes 8:44; Titus 1:2.

◼ Osho Ombibeli tai hongo: “Eshi mwa hala ovanhu ve mu ningile, osho va ningileni yo.” — Mateus 7:12.

Oshilihongomwa: Otu na okukala tu na ko nasha nomaliudo, omadiladilo neemhumbwe doilyo yomaukwaneumbo etu nosho yo vamwe momudingonoko wetu. Ngeenge otwa ‘file onghenda’ vamwe, navo otashi dulika va ka ungaunge nafye monghedi ya faafana. — 1 Petrus 3:8; Lukas 6:38.

Ngaashi oihopaenenwa oyo ye shi ulika, oilihongomwa oyo tai hangwa mOmbibeli otai dulu okukwafela ounona va ka kale ovakulunhu ve na olupandu, efimaneko nokukala hava ulike oukwao wananghali. Ndele mbela olyelye e na okuhonga ounona oilihongomwa ya tya ngaho?