Olyelye e na okuhonga ounona kombinga yaKalunga?
“Omulongwa ke dule omulongi waye; keshe ou a pwa okulongwa oye e fike pomulongi waye.” — LUKAS 6:40.
OVADALI vamwe ove wete kutya inava wana okuhonga ovana vavo kombinga yaKalunga. Otashi dulika tava diladila kutya inava mona ehongo la wana ile kave shii shihapu shi na sha nelongelokalunga opo va dule okuhonga nawa ovana vavo. Oshidjemo, otashi dulika va kwatwe keamo lokweefela oshilonga osho sha fimanenena momake ovapambele ile ovawiliki vomalongelokalunga.
Ndele mbela olyelye naanaa a wana filufilu okuhonga ounona eeshili dopalongelokalunga nosho yo omifikamhango dopaenghedi? Natu ka taleni osho Ombibeli tai ti shi na sha naasho, noku shi yelekanifa naasho ovakonakoni va mona.
Xe omudali ota dana onghandangala ilipi?
Osho Ombibeli tai hongo: “Ooxe, inamu shinda ovana veni noku va handukifa, va tekuleni meduliko nomekumaido lOmwene.” — Ovaefeso 6:4.
Osho ovakonakoni va mona: Ooxe otava ka mona ouwa ulipi ngeenge ova kala ve na eitavelo la kola lopalongelokalunga? Oshitukulwa Fathers’ Religious Involvement and Early Childhood Behavior, osho sha li sha nyanyangidwa mo 2009, osha ti: “Okukufa ombinga melongelokalunga lonhumba otaku dulu okukwafela ovalumenhu va ninge ooxe ve li xwepo. Elongelokalunga ohali kwafele ovanhu panghalafano nova kale ve na elandulafano nohali yandje ehongo nomifindalandu di na sha nanghee omunhu e na okukala monghalamwenyo.”
Ombibeli oya divilika neenghono efimano longhandangala oyo ooxe tava dana mokutekula nokudeula ounona. (Omayeletumbulo 4:1; Ovakolossi 3:21; Ovaheberi 12:9) Ndele mbela omayele oo otaa longo ngoo nokunena? Ounivesiti yaFlorida oya li ya nyanyangida oshitukulwa mo 2009 osho sha kundafana shi na sha nanghee ooxe tava dulu okunwefa mo ovana vavo. Ovakonakoni ova didilika kutya ounona ovo ooxe hava kufa ombinga lela moku va tekula otashi dulika va ka kale hava yavelele vamwe nove lifimaneka. Ounona voumati otashi dulika va ka kale ve na eenghedi, nounona voukadona otashi dulika va ka kale ve na oukolele wopamadiladilo. Nopehe na omalimbililo, omayele Ombibeli otaa longo nokunena.
Onghandangala oyo omudalakadi ta dana oya fimana shi fike peni?
Osho Ombibeli tai hongo: “Ino ekelashi elongo lanyoko.” — Omayeletumbulo 1:8.
Osho ovakonakoni va mona: Embo ledina Handbook of Child Psychology lomo 2006 ola ti: “Ovadalakadi ohava longifa oupokati wefimbo leepersenda 65 fiyo 80 okupopya nokukundafana nounona vavo shi dulife ootate, neepersenda da tya ngaho oda faafana moilongo i lili noku lili.” Mokulongifa efimbo alishe olo, omudalakadi oha nwefa mo okaana neenghono eshi taka putuka okupitila mokupopya kwaye, meenghatu daye nosho yo moikala yaye.
Ngeenge xe naina otava longele kumwe mokuhonga ounona vavo oshili kombinga yaKalunga, kungaho otave va pe eeshali di na ondilo dopavali. Yotete, ounona otava ka kala ve na omhito yokupanga oukaume naXe yavo yomeulu, oukaume oo tau dulu oku va etela ouwa monghalamwenyo yavo aishe. Onhivali, ounona otave lihongo koshihopaenenwa shovadali vavo nghee omushamane nomukulukadi ve na okulongela kumwe opo va hange omalalakano a fimana. (Ovakolossi 3:18-20) Nonande otashi dulika ounona vamwe tava dulu okukwafela xe naina, ovadali ovo ve na oshinakuwanifwa shokuhonga ounona vavo kombinga yaKalunga nosho yo kombinga yanghee Kalunga a hala oukwaneumbo u kale.
Ndele mbela ovadali ove na okuhonga ovana vavo ngahelipi? Eenghedi dilipi tashi dulika di pondole?