Honga ounona voye
Onaini tu na okukala oupafi?
OTASHI dulika to dimine kutya osha fimana okukala oupafi ngeenge u li kofikola. Vahapu ohava kala tava kofa ngeenge ve li meetundi, ndele opo u dule okulihonga, ou na okukala oupafi. Otashi dulika naave ho i kokwoongala oko haku konakonwa Ombibeli.
Oshike u na okuninga opo u kale ho kala oupafi? — a Oshinima shimwe osho oku ka nangala kuyele. Oto dulu yo okufefeleka po omutenya. Natu ka tale kutya oshike hatu lihongo mwaasho sha li sha ningilwa omunyasha umwe oo a li ta kofa konguloshi imwe pefimbo loshipopiwa shomuyapostoli Paulus. Tala mOmbibeli mOilonga 20:7-12, ndele to lesha osho sha ningilwe po.
Paulus okwa li ta talele po eongalo olo la li koshilando shetulilo leeshikepa shedina Troas. Ombibeli otai ti kutya Paulus okwa li a “hala oku ka enda mefiku lomongula” noshikepa. Onghee hano, ‘eendjovo daye okwe di twikila fiyo opokati koufiku.’ Ombibeli oya ti: ‘Omunyasha umwe edina laye Eutikus, okwa li a kala omutumba pekende, ndele ta loloka keemhofi eshi Paulus a popya lule.’ Oshike sha li sha ningwa po konima yaasho? —
Eutikus okwa li a wa mekende okudja ‘kondjuwo onhinhatu yopombada.’ Paulus navamwe ova li va londoloka tava endelele ngaashi tava dulu. Eutikus okwa li a nangala pedu a fya. Mbela ou shii kutya aveshe ova li va nyika oluhodi shi fike peni? — Ombibeli oya ti kutya Paulus okwa li a kufa Eutikus ndele te mu papatele. Opo nee Paulus okwa ingida diva a hafa ta ti: ‘Inamu tila, oku li nawa!’ Kalunga okwa li a nyumuna Eutikus.
Oshike hatu lihongo kombinga yaKalunga shi na sha naasho sha li sha ningilwa Eutikus? — Oshinima shimwe oshosho kutya Jehova, Tate yetu womeulu, ota dulu okunyumuna oonakufya, mwa kwatelwa ovanyasha. Jehova oku udite ko onghalo yoye noku ku hole, e dule nokuli ovadali voye. Eshi Jesus a li kombada yedu, okwa li a ulika kutya Xe okwa tya ngahelipi eshi a li a ukata ounona noku va nangeka noupuna. Okwa li yo a nyumuna ovanyasha, mwa kwatelwa okakadona komido 12.
Okushiiva kutya Xo womeulu oku ku hole otashi ku linyengifa u kale u udite ngahelipi? — Ohashi tu linyengifa nafye tu kale tu hole Jehova nokukala twa hala okudulika kwaasho ta ti. Mbela ou shii kutya ongahelipi hatu dulu okuulika kutya otu mu hole? — Onghedi imwe oyo okupopya kutya otu mu hole. Jesus okwa ti: “Ame ondi hole Tate.” Ashike Jesus okwa li a ninga shihapu shihe fi ashike okutya oku hole Kalunga. Okwa li e shi ulika okupitila mwaasho a ninga.
Jesus okwa li ha dulika kuKalunga. Jesus okwa ti: “Ohandi longo ashishe eshi she mu wapalela.” Ngeenge nafye otwa kala hatu dulika kuJehova opo tu mu hafife nOmona waye Jesus, ohatu ka ninga eenghendabala da mana mo tu kale oupafi ngeenge sha pumbiwa.
Lesha omishangwa edi mOmbibeli yoye
[Eshangelo lopedu]
a Ngeenge oto lesha nokaana, ou na okukanghama pokamufinda oko ke lile po oku ku dimbulukifa u kanghame po nokupula okaana ka popye omadiladilo ako.