Ehena popepi naKalunga
“Aame Omwene Kalunga koye handi kwata eke loye lokolulyo”
NGEENGE xe omudali nokamatyona kaye tava tauluka epandavanda olo hali ende eehauto dihapu, ohe ka lombwele ta ti: “Kwata meke lange.” Okamati ohaka kala ke udite ka amenwa nokehe na oumbada washa ngeenge eenyala daxe da kola oda dingatele eke lako. Mbela naave oho kala u udite ngeno wa pumbwa umwe e ku kwate meke loye noku ku wilika eshi to tavakana mounyuni ou u yadi omaupyakadi? Ngeenge osho, oto dulu okuhekelekwa keendjovo edi da shangwa membo laJesaja. — Lesha Jesaja 41:10, 13.
Eshi Jesaja a shanga eendjovo odo okwa li ta popi nOvaisrael. Nonande Kalunga okwa li a tala ko Ovaisrael ve li ‘oshiwana shaye mwene,’ ova li va dingililwa kovatondi. (Exodus 19:5) Ndele mbela ova li ngoo va pumbwa okukala va tila? Jehova okwa li a shilipaleka oshiwana shaye okupitila muJesaja kutya inashi pumbwa okutila. Eshi hatu konakona eendjovo odo, natu dimbulukweni kutya otadi longo yo nokovalongelikalunga vokunena. — Ovaroma 15:4.
Jehova okwa li a ladipika oshiwana shaye muJesaja 41:10, a ti: “Ino tila”! Okwa li yo a yandja etomheno kutya omolwashike shihe na okukala sha tila. Okwa ti: “Osheshi Ame ondi li pamwe naave.” Jehova ke fi omuudaneki oo ha ti kutya ohandi ku kwafa ngeenge wa pumbwa ekwafo, ndele ta ka kala kokule naave. Onghee hano, okwa hala ovapiya vaye va shiive kutya oku li pamwe navo, onga ta ende polwamba lavo, e lilongekida alushe oku va kwafela. Eshilipaleko olo itali hekeleke tuu!
Jehova okwa li a shilipaleka natango ovalongeli vaye muJesaja 41:10, a ti: “Ino tala wa limbililwa.” Oshitya shOshiheberi osho sha longifwa movelishe oyo otashi dulu okuyukifwa kwaavo “hava kala tava lengalenga keembinga adishe tava tale ngeenge ope na sha tashi dulu oku va etela oshiponga.” Jehova okwa li a yelifila oshiwana shaye kutya omolwashike shihe na okulimbililwa, eshi a ti: “Ame ondi li pamwe naave.” Ope na ngoo vali eshilipaleko limwe la denga mbada li dulife pwaalo? Ahowe, molwaashi Jehova oye ‘Omukombadambada nOmunaenghono adishe.’ (Epsalme 91:1) Ngeenge Jehova Kalunga oo e li Omunaenghono adishe okwaama kombinga yavo, omolwashike ve na okukala va tila?
Ovalongeli vaJehova ove na okukala va teelela a ninge po shike? Okwa udaneka muJesaja 41:10, a ti: “[Ohandi] ku kwafa yo, Ame ohandi ku yambidida yo neke lolulyo louyuki.” Okwa twikila ko vali a ti: “Aame Omwene Kalunga koye handi kwata eke loye lokolulyo.” (Jesaja 41:13) Mbela eendjovo odo otadi ku diladilifa kombinga yashike? Embo lomauyelele limwe ola yelifa la ti: “Eevelishe odo mbali otadi ku diladilifa efano la twa li na sha nomudali nokaana. [Xe omudali] iha kala po ashike nelalakano lokwaamena okaana, ndele oha kala e li pamwe nako; noiha efa ka dje po puye.” Diladila ashike kwaashi: Jehova ita ka efa nande oshiwana shaye shi dje po puye, nokuli nopomafimbo oo tashi dulika taa monika a fa madjuu neenghono mokukalamwenyo kwasho! — Ovaheberi 13:5, 6.
Ovalongeli vaJehova vokunena navo otava dulu okumona ehekeleko linene meendjovo odo da shangwa membo laJesaja. Molwaashi otu li ‘pomafimbo madjuu,’ efimbo limwe otashi dulika tu kale twa wililwa po neenghono koisho yonghalamwenyo. (2 Timoteus 3:1) Ndele katu na okukondjifa omayeleko a tya ngaho kufye vene. Jehova okwe lilongekida oku tu kwafela nokukwata eke letu. Ngaashi ounona hava kala ve lineekela movadali, nafye ohatu dulu okukwata meke laJehova li na eenghono, tu na elineekelo kutya ota dulu oku tu wilika tu ende mondjila ya yuka noku tu kwafela ngeenge twa pumbwa ekwafo. — Epsalme 63:8, 9.