‘Ame ohandi ka dula nee ngahelipi okuudifa?’
Mounyuni aushe, omu na oihopaenenwa yovamwatate novamwameme ya denga mbada ovo hava kufa ombinga nouladi moilonga yokuudifa nonande ove na omaupyakadi a kwata moiti e na sha noukolele. Natu ka tale koshihopaenenwa shaDalia, oo ha kala moshilandopangelo shaLithuania shedina Vilnius.
Omumwameme Dalia paife oku na omido 30 nasha. Okwa dalwa e na oupyakadi wonhumba kouluvi, oo we mu ningifa a kale a fya ombinga imwe noha popi noudjuu. Ovanhu vambulavo ovo aveke hava dulu oku mu uda nawa ngeenge ta popi. Dalia oha di meumbo limwe naina Galina oo he mu file oshisho. Ndele Dalia okwa kala e na etaleko liwa nonande onghalamwenyo yaye oya kala i yadi omaupyakadi noisho. Mbela oshike sha li she mu kwafela a kale e na etaleko la tya ngaho?
Galina okwa yelifa a ti: “Mo 1999, otwa li twa talelwa po komupambele wetu umwe wedina Apolonija, oo a li Ondombwedi yaJehova. Otwa li twa didilika kutya Apolonija oku shii nawa Ombibeli, na Dalia okwa li e mu pula omapulo mahapu. Okafimbo kaxupi konima yaasho, Dalia okwa li a hovela okukonakona Ombibeli naApolonija. Ame onda ka kala handi kala pekonakonombibeli lavo opo ndi yelifile Apolonija ngeenge Dalia ta popi. Ndele onda li da didilika kutya Dalia okwa li ha mono mo ouwa shili mukeshe osho e lihonga. Okudja opo, naame onda li nda pula Apolonija a konakone naame Ombibeli.”
Eshi Dalia a hovela okuuda ko omahongo Ombibeli, okwa kala e na epulo limwe le mu limbililika neenghono. Opo nee, okwa li a pula Apolonija a ti: “Ongahelipi omunhu oo a lemana ngaashi ame ta dulu okuudifa?” (Mat. 28:19, 20) Apolonija okwa li a nyamukula Dalia a ngungumana noku mu shilipaleka a ti: “Ino tila, Jehova ote ke ku kwafela.” Jehova okwa li naanaa e mu kwafela shili.
Ndele mbela Dalia okwa ka dula ngahelipi okuudifa? Okwa kala ha longifa eenghedi di lili naku lili. Pashihopaenenwa, ovamwameme ohave mu kwafele a lombwele vamwe etumwalaka lOmbibeli okupitila meenhumwafo. Tete, Dalia oha lombwele ovamwameme osho a hala va shange. Opo nee, ovamwameme ohava shange omadiladilo aye monhumwafo. Dalia oha yandje yo oundombwedi mokushanga omatumwalaka kongodi yaye yopeke. Ngeenge onghalo yomhepo i li nawa, ovamwatate ohave mu twala koparka nosho yo mepandavanda lopopepi opo a dule okuudifila ovanhu ovo tava ende po.
Dalia naina otava twikile okuninga exumokomesho lopamhepo. Aveshe ove liyapulila Jehova nova li va ninginifwa muNovemba 2004. Opa li pa totwa ongudu yovapopi vOshipolanda muVilnius, muSeptemba 2008. Ndele molwaashi okwa li ku na omhumbwe yovaudifi vOuhamba, Dalia naina ova li va ka kwafela ongudu oyo. Dalia okwa ti: “Ohandi kala ndi udite nai ngeenge inandi ya moukalele eemwedi donhumba. Ndele shimha nda ilikana kombinga yasho, ohaku di ashike omunhu wonhumba inandi shi teelela ndele hatu ningi oshilaye shoku ka longa moukalele.” Ndele mbela omumwameme omuholike Dalia oha kala e uditile ngahelipi onghalo yaye? Okwa ti: “Omukifi ou owa dipaa shili ombinga imwe yolutu lange, ndele nande ongaho, inau dipaa ouluvi wange. Onda hafa neenghono eshi handi dulu okuhepaululila vamwe kombinga yaJehova!”