Ekonakonombibeli loye nali kale lihokwifa notali tungu
Ongahelipi to dulu okuninga ekonakonombibeli loye lopaumwene li kale lihokwifa notali tungu? Natu ka kundafaneni kombinga yoinima itatu ya fimana oyo tai ke tu kwafela tu mone mo ouwa muhapu mekonakonombibeli lopaumwene.
1 EILIKANO: Oshinima osho u na okuninga tete fimbo ino hovela okukonakona osho okwiilikana. (Eps. 42:9) Omolwashike mbela? Omolwaashi otu na okukala twa tala ko okukonakona Eendjovo daKalunga ku li oshitukulwa shelongelokalunga letu. Onghee hano, otwa pumbwa okwiilikana kuJehova opo omadiladilo etu a kale e li ponhele noku tu pe omhepo yaye iyapuki. (Luk. 11:13) Omumwameme umwe wedina Barbara oo a kala moilonga youtumwa oule wefimbo lile, okwa ti: “Ohandi ilikana alushe fimbo inandi hovela okulesha ile okukonakona Ombibeli. Konima yaasho, ohandi kala ndi udite kutya Jehova oku li pamwe naame nokwa hokwa osho handi ningi.” Ngeenge owa ilikana fimbo ino konakona Ombibeli, ohashi yeulula omutima nomadiladilo oye opo u dule okutambula ko pauyadi eendja dopamhepo odo wa hala okulya.
2 OKUDILONGA: Molwaashi efimbo ola pumba kunena, vamwe ohava lesha ashike Eendjovo daKalunga shimha va lesha. Ndele kungaho ihava mono vali ouwa oo va li tava dulu okumona mekonakonombibeli. Carlos, oo a kala ta longele Jehova oule womido da konda po 50, okwa didilika kutya osha fimana okulitulila po alushe efimbo lokudilonga opo a dule okumona mo ouwa mwaasho a konakona. Okwa ti: “Paife ihandi lesha vali omapandja Ombibeli mahapu poshikando, ndele ohandi lesha ashike omapandja avali efiku keshe. Kungaho, opo ashike handi dulu okulifiila po efimbo lokudilonga kwaasho nda lesha nokumona kutya oilihongomwa ya fimana ilipi nde lihonga mo.” (Eps. 77:12, yelekanifa no-NW.) Okudilonga ohaku hapupalifa eshiivo letu nohaku tu kwafele tu ude ko kutya ehalo laKalunga olilipi. — Kol. 1:9-11.
3 ETULOMOILONGA: Oshiwa alushe okutala kutya ouwa ulipi to dulu okumona ngeenge owa tula moilonga osho we lihonga. Efinamhango olo otali longo yo nongeenge hatu konakona Ombibeli. Omumwatate umwe omunyasha wedina Gabriel, oo e na ondjikilile yokukonakona Ombibeli, okwa ti: “Ekonakono ohali kwafele nge ndi lilongekidile omaupyakadi efiku keshe nondi dule yo okukwafela vamwe.” Okwa twikila ko a ti: “Ohandi kendabala okutula moilonga keshe osho nde lihonga.” (Deut. 11:18; Jos. 1:8) Ohatu ka mona shili eshiivo lokushiiva Kalunga ngeenge otwa kala hatu tula moilonga osho twe lihonga. — Omayel. 2:1-5.
ENGONGO: Kashi li tuu oufembanghenda munene okukala hatu vandamene mounongo oo hatu pewa kOdjo younongo aushe, Jehova! (Rom. 11:33) Onghee hano, fimbo ino hovela okukonakona Eendjovo daKalunga moshikando tashi uya, tete ilikana nokwiindila Jehova e ku pe omhepo yaye iyapuki nomadiladilo e li ponhele. Opo nee, kala ho tula po manga u dilonge kombinga yaasho wa lesha. Kakele kaasho, kala ho dulika nokutula moilonga osho we lihonga mokukalamwenyo kwoye kwakeshe efiku. Ngeenge owa tula moilonga oinima itatu ya fimana oyo twa dja nokukundafana, oto ka mona kutya ekonakonombibeli loye otali ka kala lihafifa neenghono notali tungu.