Natu kwafeleni ovanhu va “penduke mo meemhofi”
‘Efimbo eli omu li shii, nokutya, otundi oya fika mu penduke mo meemhofi.’ — ROM. 13:11.
OTO DULU OKUYELIFA?
Omolwashike sha fimanenena kOvakriste okukala oupafi pamhepo?
Omolwashike ovaudifi ovo ve li oupafi pamhepo hava pwilikine kuvamwe nohava konenene?
Ongahelipi okukala tu na olune nombili hashi tu kwafele moukalele?
1, 2. Omeityo lilipi ovanhu vahapu va pumbwa okupapuduka mo meemhofi?
OVANHU omayovi ohava file moiponga yoihauto omudo keshe molwaashi tava shingi va fya eemhofi ile tava kofa. Vamwe ohava tewa moilonga molwaashi hava kofelele ndele tava ovelelwa okuya koilonga ile eshi hava kofa koilonga. Ashike eemhofi dopamhepo otadi dulu okweetifa oilanduliko inyikifa oluhodi neenghono. Onghee hano, Ombibeli oya ti: “Omunelao [oyou] ha kala oupafi.” — Eh. 16:14-16.
2 Ovanhu vahapu ova kofa pamhepo, naunene tuu eshi efiku linene laJehova tali ehene popepi. Nokuli novawiliki vamwe vomalongelokalunga Oukwakriste ohava ti kutya oilyo yeengeleka davo oi li meemhofi didjuu dopamhepo. Ndele mbela eemhofi dopamhepo oshike? Omolwashike sha fimanenena kOvakriste vashili okukala oupafi pamhepo? Ongahelipi hatu dulu okukwafela vamwe va papuduke mo meemhofi dopamhepo?
EEMHOFI DOPAMHEPO OSHIKE?
3. Oshike tashi dulu okuulika kutya omunhu wonhumba okwa kofa pamhepo?
3 Luhapu omunhu ngeenge a kofa eemhofi do venevene, iha kala vali e lipyakidila nasha. Ndele mepingafano neemhofi do venevene, omunhu oo a kofa pamhepo otashi dulika a kale e lipyakidila neenghono, ndele hanoinima yopamhepo. Otashi dulika a kale te lipula unene noisho yonghalamwenyo yakeshe efiku ile a pwila mokulalakanena omalihafifo, efimano ile oupuna. Osho ohashi mu ningifa aha kale ta yandje lela elitulemo keemhumbwe daye dopamhepo. Ndele molwaashi ovanhu ovo ve li oupafi pamhepo ove shii kutya otu li “momafiku axuuninwa,” ohava kala ve lipyakidila neenghono nokulonga ehalo laKalunga. — 2 Pet. 3:3, 4; Luk. 21:34-36.
4. Paulus okwa li a hala okutya shike eshi a ti: “Inatu kofeni hano ngaashi venya vamwe”?
4 Lesha 1 Ovatesaloniki 5:4-8. Omuyapostoli Paulus okwa li a ladipika ovaitaveli vakwao a ti kutya “inatu kofeni hano ngaashi venya vamwe.” Ndele mbela Paulus okwa li naanaa a hala okutya ngahelipi? Onghedi imwe omo hatu dulu ‘okukofa’ oyo okukala hatu lipwililikile omifikamhango daJehova dopaenghedi. Onghedi vali imwe omo hatu dulu ‘okukofa’ oyo okulipwililikila oushili oo kutya mafiku Jehova ota ka hanauna po ovahenakalunga. Onghee hano, otu na okukala twa lungama tuha nwefwe mo koikala nokeenghedi dovahenakalunga va tya ngaho.
5. Ovanhu ovo va kofa pamhepo ohava diladila ngahelipi?
5 Ovanhu vamwe ohava kala tava diladila kutya itave ke lihokolola kuKalunga molwaashi vati ke ko. (Eps. 53:2) Vamwe ohava ti kutya kave na naKalunga molwaashi naye ke na ko nasha navo. Ofimbo vamwe hava ti kutya otava dulu okuninga ookaume kaKalunga shimha ashike ve li oilyo yelongelokalunga lonhumba. Ovanhu va tya ngaho ova kofa eemhofi dopamhepo nova pumbwa okupendulwa mo. Ndele mbela ongahelipi hatu dulu oku va kwafela?
NATU KALENI OUPAFI PAUHANDIMWE
6. Omolwashike Ovakriste ve na okukendabala va kale oupafi pamhepo?
6 Opo tu dule okupendula mo vamwe meemhofi, nafye otu na okukala oupafi. Ndele mbela osho osha kwatela mo shike? Eendjovo daKalunga otadi ulike kutya okukofa pamhepo okwa pambafana ‘noilonga yomulaulu,’ ngaashi oufukulume woivilo, oukolwe, oluhaelo, okukondjifafana nefupa. (Lesha Ovaroma 13:11-14.) Ashike ihashi kala shipu okuhenuka oikala ya tya ngaho, nomolwaasho osha fimanenena okuninga eenghendabala tu kale oupafi. Omushingi wohauto ota dulu okutula omwenyo waye moshiponga ngeenge ota shingi ta kofa. Onghee hano, osha fimana kOvakriste okukaleka momadiladilo oushili oo kutya eemhofi dopamhepo oda nyika oshiponga neenghono.
7. Okukala tu na etaleko lii li na sha novanhu vomoshitukulwa shetu otaku dulu oku tu kuma ngahelipi?
7 Omukriste otashi dulika a kale ta diladila kutya ovanhu aveshe vomoshitukulwa shavo inava hala okuudifilwa onghundana iwa. (Omayel. 6:10, 11) Otashi dulika a kale ta tomhafana ta ti: ‘Omolwashike ndi na okutwikila okuninga eenghendabala da mana mo ndi kwafele ovanhu ngeenge ihava pwilikine?’ Ovanhu vahapu ova kofa shili pamhepo, ndele otashi dulika eenghalo noikala yavo i ka lunduluke. Vamwe otashi dulika va ka papuduke mo meemhofi ndele tava pwilikine kufye. Ndele ohatu ka dula ashike okukwafela ovanhu va tya ngaho ngeenge nafye otu li oupafi. Pashihopaenenwa, ohatu dulu okukala hatu lundulula eenghedi detu dokuudifa etumwalaka lOuhamba opo tu hange omitima davo. Okukala hatu lidimbulukifa kutya omolwashike oukalele wetu wa fimanenena otaku ke tu kwafela yo tu kale oupafi.
OMOLWASHIKE OUKALELE WETU WA FIMANENENA?
8. Omolwashike oukalele wetu wopaKriste wa fimanenena?
8 Dimbuluka kutya oilonga yetu yokuudifa otai fimanekifa Jehova notai dana onghandangala mokuwanifwa kwelalakano laye, kashi na nee mbudi kutya ovanhu ohave linyenge ngahelipi. Kakele kaasho, ovo ihava tambula ko onghundana iwa mafiku otava ka handukilwa kuJehova. Ovanhu otava ka tokolwa she likolelela konghedi omo have linyenge ketumwalaka olo hatu va udifile. (2 Tes. 1:8, 9) Ndele itashi ka kala pandunge kOmukriste okudiladila kutya ina pumbwa okuudifa nouladi molwaashi taku “ka kala enyumuko lovayuki nolovalunde.” (Oil. 24:15) Otwe lihonga mEendjovo daKalunga kutya ovo ve li ngaashi ‘oikombo’ otava ka ya “mokuhandukilwa kwaalushe.” Oilonga yetu yokuudifa oi li euliko kutya Kalunga omunanghenda, molwaashi ohai pe ovanhu omhito va lundulule oikala yavo opo va dule oku ka mona ‘omwenyo waalushe.’ (Mat. 25:32, 41, 46; Rom. 10:13-15) Ndele ngeenge osho ngaho, ovanhu otava ka dula ngahelipi okuuda etumwalaka lexupifo ngeenge ihatu va udifile?
9. Ongahelipi okukufa ombinga moilonga yokuudifa taku dulu oku ku etela ouwa nosho yo vamwe?
9 Okukufa ombinga moilonga yokuudifa onghundana iwa ohaku tu etele yo ouwa. (Lesha 1 Timoteus 4:16.) Mbela ino didilika kutya okukala ho popi kombinga yaJehova nosho yo eteelelo lOuhamba ohashi pameke eitavelo loye nohole yoye yoku mu hola? Mbela inashi ku kwafela u kulike omaukwatya opaKriste? Mbela iho kala wa hafa okuulika kutya owe liyapulila Kalunga mokukufa ombinga moilonga yokuudifa? Ovaudifi vahapu ohava kala va hafa eshi ve wete nghee omhepo yaKalunga tai kwafele ovakonakonimbibeli vavo va lundulule onghedi yavo yokukalamwenyo.
KALA HO KONENENE
10, 11. (a) Jesus naPaulus ova li va ulika ngahelipi kutya ove li oupafi nohava konenene oinima? (b) Yelifa nghee okukala oupafi nokukala ho konenene taku dulu oku ku kwafela u xwepopaleke oukalele woye.
10 Otashi dulika twa pumbwa okulongifa eenghedi di lili noku lili opo tu kwafele oohandimwe va kale ve na ohokwe metumwalaka lOuhamba. Onghee hano, Ovakriste ove na okukala oupafi nohava konenene. Jesus okwe tu tulila po oshihopaenenwa shiwa moshinima osho. Molwaashi Jesus okwa li a wanenena, okwa li a dula okumona momitima dovanhu. Pashihopaenenwa, okwa li a mona kutya omukainhu umwe oo a li omulunde okwe livela ombedi shili, Omufarisai wonhumba ote lipopile meni a handuka nosho yo kutya omufiyekadi wonhumba oku na omhepo yeliyambo. (Luk. 7:37-50; 21:1-4) Jesus okwa li ha dulu okuwanifa po eemhumbwe dopamhepo dakeshe umwe. Ashike osho inashi hala kutya omupiya waKalunga okwa pumbwa okukala a wanenena opo a dule okukala e shii nawa okukonenena. Oushili waasho otu u liwetele moshihopaenenwa shomuyapostoli Paulus. Paulus okwa li ha lundulula omatwalemo aye she likolelela kwaavo ta udifile nosho yo koikala yavo. — Oil. 17:22, 23, 34; 1 Kor. 9:19-23.
11 Ngeenge otwa kala oupafi nohatu konenene ovanhu ngaashi Jesus naPaulus, ohatu ka dula okumona kutya ongahelipi hatu dulu okupendula ohokwe yaavo hatu udifile. Pashihopaenenwa, ngeenge to i pomunhu wonhumba, kendabala u tale kutya oweputuko lilipi, osho e na ohokwe musho ile eenghalo doukwaneumbo wavo. Oto dulu yo okuhovela eenghundafana deni naye mokuninga etyekosha kombinga yaasho ta ningi ile oku mu pandula.
12. Omolwashike tu na okulungamena eenghundafana detu naavo hatu longo navo moukalele?
12 Omunhu oo e li oupafi noha konenene iha efa a piyaanekwe kusha. Nonande eenghundafana detu naavo hatu longo navo moukalele otadi dulu oku tu tunga, otu na okudimbuluka kutya elalakano letu lokuya moukalele olo okuudifila vamwe. (Omuud. 3:1, 7) Onghee hano, ngeenge hatu longo eumbo neumbo, otu na okulungama opo eenghundafana detu diha ye moshipala oukalele wetu. Oshinima shimwe osho tashi tu kwafele tuha dimbwe elalakano loukalele wetu osho okukala hatu kundafana osho hatu ka tya eshi hatu i kwaavo ve na ohokwe. Kakele kaasho, nonande ongodi yopeke ohai tu kwafele tu pondole moukalele, otu na okulungama ihe tu piyaaneke ngeenge hatu kundafana nomuneumbo.
ULIKA OKUNAKONASHA KWOYE
13, 14. (a) Ongahelipi hatu dulu okumona kutya omunhu oku na ohokwe mushike? (b) Oshike tashi dulu okulinyengifa omunhu a kale e na ohokwe moinima yopamhepo?
13 Ovaudifi ovo ve li oupafi ohava pwilikine nelitulemo kwaavo tava udifile. Omapulo elipi to dulu okupula opo u linyengife omunhu wonhumba womoshitukulwa sheni a popye omaliudo aye? Mbela oha kala te lipula shi na sha nokuhapupala kwomalongelokalunga, elongifo leenghono moshitukulwa sheni ile okuhapondola kwomapangelo? Ito dulu mbela oku mu kwafela a kale e na ohokwe moinima yopamhepo mokukundafana naye shi na sha nonghedi ikumwifi omo oinima i na omwenyo ya shitwa ile nghee omayele Ombibeli haa kwafa? Hanga konyala ovanhu vomomaputuko aeshe, nokuli naavo inava itavela muKalunga, ohava kala va hala okukundafana kombinga yeilikano. Vahapu ohava kala tave lipula ngeenge ope na tuu shili ou ha pwilikine komailikano avo. Ofimbo vamwe hava kala va halelela okumona omanyamukulo omapulo ngaashi: Mbela Kalunga oha pwilikine ngoo komailikano aeshe? Nongeenge hasho, mbela oshike tu na okuninga po opo omailikano etu a udike kuKalunga?
14 Ohatu dulu okulihonga shihapu kovaudifi ovanawino shi na sha nanghee hatu dulu okuhovela eenghundafana navamwe. Tala nghee hava henuka okupula omapulo okanaku oo taa ningifa omunhu aha popye a manguluka. Tala yo kunghee omawi noipala yavo hai ulike kutya ove na ohokwe momatyekosha omuneumbo. — Omayel. 15:13.
KULIKA OLUNE NOUNGHULUNGU
15. Omolwashike tu na okuulika oukwatya wolune ngeenge hatu udifile vamwe?
15 Mbela oho kala u udite ngahelipi ngeenge umwe okwe ku pendula meemhofi doshitula? Vahapu ohava kala va handuka ngeenge ova pendulwa mo ombadilila. Ohashi kala shiwa okupendula mo omunhu to shi ningi noukeka. Otu na yo okuninga sha faafana ngeenge tashi uya pokupendula ovanhu meemhofi dopamhepo. Pashihopaenenwa, ngeenge omunhu wonhumba okwa handuka eshi we uya oku mu udifila, mbela luhapu ohashi kala shiwa okuungaunga naye ngahelipi? Ohashi kala shiwa okuulika kutya ou udite ko omaliudo aye, oku mu pandula eshi e ku lombwela nghee e udite ndele to shuna nombili. (Omayel. 15:1; 17:14; 2 Tim. 2:24) Olune loye otali ka ningifa omunhu oo e ke linyenge nawa monakwiiwa ngeenge ope ke uya vali Ondombwedi imwe tai mu udifile.
16, 17. Ongahelipi hatu dulu okulongifa elungi ngeenge tu li moukalele?
16 Oto dulu yo okupondola ngeenge to ungaunga novanhu ovo tava kendabala okukangheka eenghundafana. Omunhu otashi dulika a tye, “Tangi, ashike inandi hala. Ame ondi na nale elongelokalunga lange,” ile a tye, “Nghi na ohokwe mwaasho to popi.” Ndele ngeenge ou na owino nolune, oto dulu okutwikila eenghundafana moku mu pula epulo lonhumba olo tali pendula ohokwe muye. — Lesha Ovakolossi 4:6.
17 Omafimbo amwe ngeenge omunhu ote ku lombwele kutya okwe lipyakidila, ohashi kala shiwa okuuda ko onghalo yaye ndele to i. Ndele peemhito dimwe oto dulu okutya sha pauxupi tashi ti sha fimbo ino ya. Ovamwatate vamwe ohava lesha omushangwa wonhumba mOmbibeli oo tau ningifa omunhu a diladile moule noku mu pula epulo, tave shi ningi moule ashike womunute umwe. Etwalemo la tya ngaho la longekidwa nawa luhapu ohali kwafele omunhu a mone kutya mboli omalipyakidilo aye itae mu imbi a kundafane navo pauxupi. Omolwashike naave ito kendabala okuninga ngaho ngeenge eenghalo tadi shi pitike?
18. Oshike tashi dulu oku tu kwafela tu kale hatu yandje oundombwedi wohangelela nomupondo?
18 Ngeenge otwa kala alushe twe lilongekida okuyandja oundombwedi wohangelela, ohatu ka dula okupendula ohokwe yaavo hatu shakeneke momalipyakidilo etu akeshe efiku. Ovamwatate novamwameme vahapu ohava ende noileshomwa meendjato davo. Ohava kala yo ve na Omushangwa wonhumba momadiladilo oo ve lilongekida okuleshela vamwe ngeenge omhito oye shi pitike. Opo u shiive nghee u na oku shi enda, oto dulu okupula omayele komupashukili woilonga ile kovakokolindjila vomeongalo leni.
NATU KWAFELENI PAHOLE OVAPAMBELE VETU
19. Omolwashike tuhe na okusholola eshi hatu kwafele ovapambele vetu ve lihonge oshili?
19 Ohatu kala twa hala okukwafela ovapambele vetu va tambule ko onghundana iwa. (Jos. 2:13; Oil. 10:24, 48; 16:31, 32) Ndele otashi dulika tu kale twa fya ounye oku va kwafela ngeenge eenghendabala detu oda li da ponya potete. Otashi dulika nokuli tu fike pexulifodiladilo kutya katu na vali osho hatu dulu okuninga po opo tu va kwafele va lundulule oikala yavo. Ashike dimbuluka kutya eenghalo ile omataleko ovapambele voye otashi dulika a lunduluke. Ile otashi dulika paife wa xwepopaleka onghedi yoye yokuyelifa oshili noto dulu oku va kwafela noupu.
20. Omolwashike sha fimana okukala hatu popi novapambele vetu nelungi?
20 Otu na okukala hatu yavelele omaliudo ovapambele vetu. (Rom. 2:4) Mbela katu na okukala hatu popi navo nolune ngaashi ashike hatu popi naavo hatu shakeneke moilonga yokuudifa? Otu na okukala hatu popi navo nombili nonefimaneko. Ponhele yokukala ashike to va udifile, va kwafela va mone nghee oshili ye ku etela ouwa. (Ef. 4:23, 24) Va kwafela va mone nghee Jehova e ku nangeka noupuna nonghee e ‘ku honga osho tashi ku wapalele.’ (Jes. 48:17) Va ulikila yo okupitila moshihopaenenwa shoye kutya Ovakriste ohave lihumbata ngahelipi.
21, 22. Hokolola oshimoniwa osho tashi ulike kutya osha fimana okutwikila okuudifila ovapambele vetu.
21 Omafimbo opo a di ko, omumwameme umwe okwa tile: “Onda kala handi ningi alushe eenghendabala ndi udifile ovakulu neendenge dange 13 noku va pa oundombwedi okupitila melihumbato lange. Aveshe onda kala handi va shangele eenhumwafo omudo keshe. Ndele oule womido adishe 30, aame andike nda kala Ondombwedi movapambele vange.”
22 Omumwameme oo okwa twikila ko a ti: “Efiku limwe, onda li nda dengela omukulu wange umwe ongodi oo ha kala moshitukulwa osho shi li eekilometa omafele okudja moshitukulwa shetu. Okwa li a lombwela nge kutya okwa pulile omufita wavo a kale he uya okukonakona naye Ombibeli, ndele ine uya ko kuye nandenande. Eshi nde mu lombwela kutya ohandi dulu oku mu kwafela, okwa ti: ‘Oshi li nawa, ndele ame nghi na efiku ndi ka ninge Ondombwedi yaJehova.’ Onda li nde mu tumina embo Ombibeli otai hongo lela shike? mopoosa, nokudja opo onda kala handi mu dengele konima yomafiku onhumba. Ndele ka li natango a hovela okulesha embo olo. Efiku limwe, onda li nde mu pula a kufe embo laye opo tu leshe nokukundafana moule wominute 15 lwaapo omishangwa donhumba odo da tofwa mo. Konima ashike yomafiku manini, okwa ka lombwela nge kutya okwa hala tu kale hatu konakona oule wominute da konda po 15. Lwanima okwa ka kala oye ha dengele nge, nomafimbo amwe okwa li nokuli ha denge ongula inene fimbo inandi penduka ile lwoikando ivali mefiku. Okwa ka ninginifwa momudo wa ka landula ko, nokonima yomudo umwe okwa ka ninga omukokolindjila.”
23. Omolwashike tu na okutwikila okupendula ovanhu meemhofi dopamhepo?
23 Okukwafela ovanhu va penduke mo meemhofi dopamhepo ohashi pula ounghulungu nosho yo eenghendabala tadi twikile. Ndele nande ongaho, ovalininipiki otava twikile natango okupenduka mo meemhofi dopamhepo eshi hatu va kwafele. Ovanhu ve dule po 20 000 ohava ninginifwa omwedi keshe ve li Eendombwedi daJehova. Onghee hano, natu kalekeni momadiladilo omayele oo omuyapostoli Paulus a li a pa omumwaxe Arkippus, a ti: “Diinina eyakulolonga eli we li pewa kOmwene, u li wanife shili.” (Kol. 4:17) Oshitukulwa tashi landula otashi ke tu kwafela tu ude ko kutya okuudifa neendelelo otashi ti shike.
[Oshimhungu pepandja 13]
OSHO TASHI DULU OKU KU KWAFELA U KALE OUPAFI
▪ Kala ho longo ehalo laKalunga
▪ Henuka oilonga yomilaulu
▪ Lungama uha kwatwe keemhofi dopamhepo
▪ Kala u na etaleko liwa li na sha novanhu vomoshitukulwa sheni
▪ Kendabala okuudifila ovanhu meenghedi dimwe vali dipe
▪ Dimbuluka alushe kutya oukalele woye owa fimana shi fike peni