Natu kaleni twa hafa omolweteelelo olo tu na
“[Otu na eteelelo] lomwenyo waalushe, ou wa udanekwa kuKalunga iha fufya, nalenale efimbo manga inali hovela.” — TIT. 1:2.
OMAPULO EENDULULO
Otu shi shii ngahelipi kutya meulu ohamu kala ehafo ngeenge omuvaekwa a kanyatela oudiinini waye fiyo okefyo?
Ewanifo leteelelo leedi dimwe ola pambafana ngahelipi naali lovavaekwa?
Opo tu ka mone nghee oinima oyo twa kala twa teelela tai wanifwa, otu na okuulika ngahelipi kutya ohatu ‘ende mouyapuki nometilokalunga’?
1. Ongahelipi eteelelo olo twa pewa kuJehova tali dulu oku tu kwafela tu lididimike?
OMBIBELI oya ti kutya Jehova ‘oKalunga keteelelo.’ Kakele kaasho, omuyapostoli Paulus okwa popya shi na sha naJehova a ti: ‘Ote mu yadifa nehafo alishe nombili meitavelo, opo mu kale mu neteelelo linene okeenghono domhepo iyapuki.’ (Rom. 15:13) Ngeenge otu na eteelelo la twa, ohatu ke lididimikila onghalo keshe, omitima detu otadi ka kala tadi xunga kehafo nohatu ka kala tu na ombili. Kutya nee otu li Ovakriste ovavaekwa ile eedi dimwe, eteelelo letu otali ka kala la fa “ekanghamifo lomwenyo la pama nola kwatelela.” (Heb. 6:18, 19) Otwa pumbwa okukala twa dama meteelelo letu ngeenge tu li meenghalo didjuu, molwaashi otali ke tu kwafela tuha kwatwe komalimbililo notuha kanife eitavelo letu. — Lesha Ovaheberi 2:1; 6:11.
2. Ovakriste vokunena ove na eteelelo lilipi, nomolwashike ‘eedi dimwe’ di na ohokwe meteelelo lovavaekwa?
2 Ovakriste vamwe vopefimbo eli lexulilo ove na eteelelo lokuya meulu, ofimbo vamwe ve na eteelelo loku ka kala moparadisa kombada yedu. Ovakriste ovavaekwa ovo ve li oilyo ‘yokangudu’ ove na eteelelo loku ka kala nomwenyo fiyo alushe meulu notava ka pangela pamwe naKristus mOuhamba waye ve li eehamba novapristeri. (Luk. 12:32; Eh. 5:9, 10) Ofimbo “ongudu inene” ‘yeedi dimwe’ i na eteelelo loku ka kala nomwenyo fiyo alushe moparadisa kombada yedu i li ovapangelwa vOuhamba wopaMessias. (Eh. 7:9, 10; Joh. 10:16, NW) Eedi dimwe odi na okudimbuluka alushe kutya exupifo lado ole likolelela kokuyambidida kwado noudiinini ‘ovamwaxe’ vaKristus ovavaekwa ovo ve li natango kombada yedu. (Mat. 25:34-40) Ngaashi ashike Ovakriste ovavaekwa, eedi dimwe nado odi na etimaumbwile kutya otadi ka pewa ondjabi yado. (Lesha Ovaheberi 11:39, 40.) Paife natu ka kundafaneni manga kombinga yeteelelo olo ovavaekwa ve na.
OVAKRISTE OVAVAEKWA OVE NA “ETEELELO LI NOMWENYO”
3, 4. Ongahelipi Ovakriste ovavaekwa hava ‘dalululilwa eteelelo li nomwenyo,’ neteelelo olo olilipi?
3 Omuyapostoli Petrus okwa popya meenhumwafo mbali odo a li a shangela Ovakriste ovavaekwa a ti kutya ove li “ovahoololwa.” (1 Pet. 1:1) Okwa li a yandja ouyelele muhapu meenhumwafo odo u na sha neteelelo likumwifi olo li niwe kokangudu. Petrus okwa popya monhumwafo yaye yotete a ti: “Kalunga naXe yOmwene wetu Jesus Kristus na [hambelelwe], Oye ou, e tu dalululila pafilonghenda laye linene eteelelo li nomwenyo okokunyumuka kwa Jesus Kristus movafi, opo tu mone efyuululo itali nyonauka ndele inali nyata ndee itali xulu po, twe li tuvikililwa meulu, ofye ava hatu amenwa keenghono daKalunga molweitavelo, tu mone exupifo eli la longekidwa li hololwe mefimbo laxuuninwa. Osho tuu eshi hamu li hafele.” — 1 Pet. 1:3-6.
4 Ovakriste ovo va hoololwa kuJehova va ka pangele pamwe naKristus mOuhamba womeulu ove na ‘okudalululwa’ ve li ovana vaKalunga vopamhepo. Ovakriste va tya ngaho ova vaekwa nomhepo iyapuki opo va ka pangele pamwe naKristus meulu ve li eehamba novapristeri. (Eh. 20:6) Petrus okwa ti kutya Ovakriste ovavaekwa ove na ‘okudalululilwa eteelelo li nomwenyo’ olo va “tuvikililwa meulu,” neteelelo olo oli li “efyuululo itali nyonauka ndele inali nyata ndee itali xulu po.” Onghee hano, itashi tu kumwifa eshi ovavaekwa hava “hafele” eteelelo lavo li na omwenyo. Ashike otava ka wanifilwa po ashike oinima oyo va teelela ngeenge ova kala ovadiinini.
5, 6. Omolwashike Ovakriste ovavaekwa ve na okuninga eenghendabala opo va shilipaleke kutya eifano lavo lomeulu ola pamekwa?
5 Petrus okwa li a ladipika Ovakriste ovavaekwa monhumwafo yaye onhivali a ti kutya nava ‘kendabale shili okupameka eifano lavo nokuhoololwa kwavo.’ (2 Pet. 1:10) Ovavaekwa ove na okuninga eenghendabala va kulike omaukwatya opaKriste, ngaashi eitavelo, eliyandjo lometilokalunga, ohole youmwainafana nosho yo ohole yokuhola ovanhu vakwao. Petrus okwa ti: “Oinima ei ngenge i li munye notai tane, itai mu efa, mu kale noundede ile mu he na oiimati.” — Lesha 2 Petrus 1:5-8.
6 Mefelemudo lotete, omunyumunwa Kristus okwa li a lombwela ovakulunhuongalo ovavaekwa nomhepo vomeongalo lomuFiladelfia shomuAsia Linini, a ti: “Molwaashi wa diinina ondjovo youtalanheni wange, naame yo ohandi ke ku diinina mefimbo leyeleko olo tali uya kombada yedu alishe okuyeleka oonakukala kombada yedu. Tala, ohandi uya diva; diinina shili u shi kwete u ha nyekwe oshishani shoye nande kuumwe.” (Eh. 3:10, 11) Ngeenge Omukriste omuvaekwa ina kanyatela oudiinini waye, “oshishani shefimano itashi lembe” osho sha udanekelwa ovahoololwa ovo tava kala ovadiinini fiyo okefyo ote shi kufwa. — 1 Pet. 5:4; Eh. 2:10.
OVE NA OMHITO YOKUYA MOUHAMBA
7. Eteelelo likumwifi lilipi Judas a tumbula monhumwafo yaye?
7 Mo 65 O.P. (paife pa pita omido 1947), omumwaina waJesus umwe wedina Judas okwa li a shangela Ovakriste vakwao ovavaekwa onhumwafo nokwa li e va popifa a ti, ‘ava va ifanwa.’ (Jud. 1; yelekanifa nOvaheberi 3:1.) Okwa li a hala okukundafana navo unene tuu kombinga yeteelelo lexupifo likumwifi lokuya mOuhamba waKalunga olo Ovakriste ovavaekwa ve na. (Jud. 3) Ndele ponhele yaasho, okwa li a kundafana kombinga yoinima vali imwe oyo ya li ya endelela. Ashike okwa li a tumbula pexulilo lonhumwafo yaye oyo ixupi shi na sha neteelelo likumwifi lOvakriste ovavaekwa, a ti: “Oye ou ta dulu oku mu amena, mu ha punduke note mu kaleke mehafo koshipala shoshinge shaye, mu he noshipo, Oye aeke Kalunga nOmuxupifi wetu omolwOmwene wetu Jesus Kristus, Oye na pewe efimano nounene neenghono nepangelo manga omafimbo a li [ehe] ko nena nofiyo alushe!” — Jud. 24, 25.
8. Pakupopya kwaJudas 24, oshike tashi ulike kutya meulu ohamu kala ehafo ngeenge omuvaekwa a kanyatela oudiinini waye fiyo okefyo?
8 Nopehe na omalimbililo, Ovakriste ovavaekwa ovadiinini ova hala Kalunga e va amene pauhandimwe opo vaha punduke novaha ka hanaunwe po. Ove na eteelelo la kanghamena kOmbibeli kutya Jesus Kristus ote ke va nyumuna koufi ve li oishitwa yopamhepo ya wanenena notava ka kala va manguluka okuholoka koshipala shaKalunga. Ngeenge omuvaekwa okwa fi e li omudiinini, oha kala e na eteelelo la twa ‘lokunyumunwa moshinge e nolutu lopamhepo itali xulu po.’ (1 Kor. 15:42-44) Molwaashi ‘meulu ohamu kala ehafo ngeenge omulunde umwe e lidilulula,’ osha yela kutya ohamu kala yo ehafo linene ngeenge omumwaxe waKristus a fya e li omudiinini. (Luk. 15:7) Jehova noishitwa yaye yopamhepo idiinini otava ka hafela pamwe novavaekwa eshi tava ka pewa ondjabi yavo ve na ‘ehafo linene.’ — Lesha 1 Johannes 3:2.
9. Omeityo lilipi ovavaekwa ovadiinini hava mono omhito iwa yokuya mOuhamba “ya wana,” neteelelo olo ohali va kumu ngahelipi ofimbo ve li natango kedu?
9 Metwokumwe naJudas, Petrus naye okwa ti kutya ngeenge Ovakriste ovavaekwa ova kala ovadiinini keifano lavo, otava ka “pewa omhito iwa ya wana yokuya mouhamba waalushe wOmwene Omukulili wetu Jesus Kristus.” (2 Pet. 1:10, 11) Eshi Petrus a ti kutya ovavaekwa otava ka mona omhito iwa yokuya mOuhamba “ya wana,” otashi dulika a li ta ulike kokuya kwavo meulu ve na oshinge. Otashi dulika yo a li ta ulike komanangeko noupuna mahapu oo tava ka hafela meulu. Ovavaekwa otava ka kala va hafa neenghono ngeenge tava diladila shi na sha nanghee va li va kanyatela oudiinini wavo. Eteelelo olo ohali pameke Ovakriste ovavaekwa opo va dule okukanyatela oudiinini wavo ofimbo ve li natango kombada yedu. — 1 Pet. 1:13.
EEDI DIMWE NADO ODI “NETEELELO”
10, 11. (a) Eedi dimwe odi na eteelelo loku ka kala peni? (b) Eteelelo loku ka kala nomwenyo kombada yedu ola pambafana ngahelipi ‘neholoko lovana vaKalunga’ nosho yo naKristus?
10 Omuyapostoli Paulus okwa ti kutya ‘ovana vaKalunga’ ovavaekwa ove na eteelelo loku ka ninga ‘ovafyuululi pamwe’ naKristus. Opo nee, okwa ka popya kombinga yeteelelo likumwifi olo Jehova a nunina eedi dimwe odo da nyengana okuvala, a ti: “Osheshi nokudjuulukwa shili oishitwa aishe [ovanhu] tai teelele eholoko lovana vaKalunga [ovavaekwa]. Osheshi oishitwa ya yandjwa menyonauko, hakehalo layo vene, ndele olaau e i yandja, onghee tuu i neteelelo, osheshi oishitwa yovene otai ka mangululwa moupika wenyonauko i ye memanguluko loshinge shovana vaKalunga.” — Rom. 8:14-21.
11 Jehova oye a li a pa ovanhu ‘eteelelo’ eshi e va udanekela kutya ota ka yandja ‘oludalo’ olo tali ke va mangulula moupika ‘weyoka likulu,’ Satana Ondiaboli. (Eh. 12:9; Gen. 3:15) Jesus Kristus oye oshitukulwa sha fimanenena ‘sholudalo’ olo. (Gal. 3:16) Efyo nenyumuko laye ola li la pa ovanhu eteelelo nosho yo oumbangi wa kola kutya fiku limwe onava ka mangululwe mo moupika woulunde nefyo. Eteelelo olo ola pambafana ‘neholoko lovana vaKalunga.’ Ovakriste ovavaekwa ove li oshitukulwa oshitivali ‘sholudalo’ notava ka ‘holoka’ pamwe naKristus eshi tava ka hanauna po ounyuni waSatana woukolokoshi. (Eh. 2:26, 27) Osho otashi ka tya exupifo keedi dimwe odo tadi ka xupa poudjuu munene. — Eh. 7:9, 10, 14.
12. Eholoko lovavaekwa otali ka etela ovanhu omanangeko noupuna elipi?
12 “Oishitwa” otai ka pewa emanguluko linene pefimbo lEpangelo lOmido Eyovi laKristus. Pefimbo olo, ‘ovana vaKalunga’ ovatumbalekwa otava ka ‘holoka’ natango monghedi imwe vali. Otava ka longa pamwe naKristus ve li ovapristeri notava ka kwafela ovanhu va mone ouwa mekuliloyambo laJesus. Okudja opo, ovapangelwa vOuhamba womeulu ovo tava ifanwa “oishitwa,” otava ka mangululwa moupika woulunde nefyo. Nomokweendela ko kwefimbo, ovanhu ovaduliki otava ka “mangululwa moupika wenyonauko.” Ngeenge ova twikile okukanyatela oudiinini wavo kuJehova moule wEyovimudo nokupita momayeleko axuuninwa opexulilo lomido odo, omadina avo otaa ka shangwa ‘membo lomwenyo’ fiyo alushe. Opo nee, otava ka ya “memanguluko loshinge shovana vaKalunga.” (Eh. 20:7, 8, 11, 12) Olo kali fi tuu eteelelo likumwifi!
KALEKA ETEELELO LOYE LA TWA
13. Eteelelo letu ole likolelela kushike, nonaini Kristus ta ka holoka?
13 Eenhumwafo mbali daPetrus odi na shihapu osho tashi dulu okukwafela eedi dimwe nosho yo ovavaekwa va kaleke eteelelo lavo la twa. Petrus okwa yelifa kutya eteelelo leedi dimwe nosho yo lovavaekwa inali likolelela koilonga yavo, ndelenee okefilonghenda linene laJehova. Okwa ti: “Mangeni oiya yomadiladilo eni nokulidilika; lineekeleni shili efilonghenda olo tamu ke li pewa peholoko laJesus Kristus.” (1 Pet. 1:13) Kristus ota ka holoka eshi te uya okupa ovashikuli vaye ovadiinini ondjabi nokutokola ovahenakalunga. — Lesha 2 Ovatesaloniki 1:6-10.
14, 15. (a) Otu na okukaleka shike momadiladilo opo tu kaleke eteelelo letu la twa? (b) Petrus okwe tu pa omayele elipi?
14 Opo tu kale tu na eteelelo la twa, otu na okukaleka alushe momadiladilo euyo “lefiku laKalunga.” Efiku olo otali ka eta ehanauno ‘leulu’ lokunena, olo tali faneke omapangelo opanhu, ‘ledu,’ olo tali faneke ovakolokoshi, nosho yo ehanauno ‘loilongwanima’ yedu. Petrus okwa ti: “Omu nokuhangika mwa tya ngahelipi . . . mokuteelela nokweendelelifa euyo lefiku laKalunga, efiku tuu olo tali lungwinifa po eulu ndee tali hengumukifa oihovelitungifo komundjene woupyu.” — 2 Pet. 3:10-12.
15 ‘Eulu nedu’ lokunena otali ka pingenwa po ‘keulu lipe’ [epangelo lOuhamba waKristus] nosho yo ‘kedu lipe’ [ovanhu ovo tava ka kala kombada yedu ve li ovapangelwa vOuhamba]. (2 Pet. 3:13) Opo nee, Petrus okwa li a yandja omayele a yela nawa e na sha ‘nokuteelela’ kwetu ile okukaleka eteelelo letu la twa li na sha nounyuni mupe oo wa udanekwa, a ti: “Onghee hano, ovaholike, omokuteelela oinima ei kendabaleni shili, mu monike puye mu he nonyata nomu he noshipo mombili.” — 2 Pet. 3:14.
NATU KALENI METWOKUMWE NETEELELO LETU
16, 17. (a) Ongahelipi tu na okuulika kutya ohatu ‘ende mouyapuki nometilokalunga’? (b) Ongahelipi hatu ka wanifilwa po oinima oyo twa kala twa teelela?
16 Katu na ashike okukaleka eteelelo letu la twa, ndele otu na yo okukala metwokumwe nalo. Otu na okukala hatu likonakona tu tale kutya oupamhepo wetu ou li monghalo ya tya ngahelipi. Shimwe vali, ‘okweenda mouyapuki’ okwa kwatela mo ‘okukala hatu ende tuhe noshipo mokati kovapaani.’ (2 Pet. 3:11; 1 Pet. 2:12) Otu na yo okukala tu “holafane.” Osho osha kwatela mo okukala hatu ningi eenghendabala opo tu kaleke po oukumwe wetu woumwainafana womounyuni aushe, nokuli nomeongalo letu. (Joh. 13:35) Ndele otu na okukala hatu longo oilonga ‘yometilokalunga’ oyo tai ulike kutya otu na ekwatafano lopofingo naJehova. Osho osha kwatela mo oinima ngaashi okwiilikana tashi di komutima, okulesha Ombibeli keshe efiku, okuninga ekonakono lopaumwene lomoule, elongelokalunga loukwaneumbo nokukala hatu kufa ombinga pandjikilile moilonga yokuudifa “evangeli eli louhamba.” — Mat. 24:14.
17 Atusheni otwa halelela okukala twa hokiwa kuJehova nosho yo okuxupifwa eshi ounyuni ou woukolokoshi tau ka ‘hengumukifwa’ po. Opo nee, oinima oyo twa kala twa teelela otai ka wanifwa po “[pateelelo] lomwenyo waalushe, ou wa udanekwa kuKalunga iha fufya, nalenale efimbo manga inali hovela.” — Tit. 1:2.
[Efano pepandja 22]
Ovakriste ovavaekwa ohava ‘dalululilwa eteelelo li nomwenyo’
[Efano pepandja 24]
Kala ho kwafele oukwaneumbo weni opo u kale u na eteelelo la twa