“Ito dulu oku tu kwafela u tu faneke?”
Omumwatate umwe wedina Josué wokObetel yaMeksiko okwa li ta ende ta tale oshilando shedina Querétaro mefiku etivali konima eshi oshoongalele shavo shoshitukulwa sha dimbuka. Josué okwa li a shakena novatalelipo vavali ovalihomboli va dja kuColombia, Javier naMaru, nova li ve mu pula ngeenge ota dulu oku va faneka. Ndele molwaashi Josué nookaume kaye vEendombwedi ovo va li naye ova li va fewa nova djala oukalata vavo voshoongalele, ovalihomboli ovo ova li ve va pula ngeenge otava di koshivilo shavamwe ovo va mana ehongo lomounyuni ile kushimwe vali she likalekelwa. Josué okwa li e va yelifila kutya otava di koshoongalele shEendombwedi daJehova nokwa li e va shiva ve uye koshoongalele osho mOsoondaxa.
Ovalihomboli ovo ova ti kutya ova fya ohoni oku ka kala po molwaashi kave na omidjalo tadi wapalele poshoongalele sha tya ngaho. Ndele nande ongaho, Josué okwa li e va lombwela edina laye nokwe va pa onomola yongodi yokoshitaimbelewa oko ha longo.
Josué okwa li a kumwa eshi Javier a li e mu dengela ongodi konima yeemwedi nhee. Ovalihomboli ovo ova ile koshoongalele shimwe shEendombwedi daJehova nova li va hala umwe a kale he va talele po moshilandopangelo shaMeksiko omo va li hava di pefimbo opo. Eendombwedi oda li da hovela diva okukonakona navo Ombibeli, nokonima ashike yefimbo lixupi ova li va hovela okukala hava i kokwoongala. Konima ashike yeemwedi omulongo, Javier naMaru ova li va ninga ovaudifi. Nonande ovalihomboli ovo ova ka tembukila kuToronto, shomuKanada, ova li va twikila okuninga exumokomesho lopamhepo fiyo va ninginifwa.
Lwanima, Javier okwa li a shangela Josué onhumwafo omo a yelifa kutya oshike she mu linyengifa a tambule ko oshili. Okwa ti: “Fimbo inatu ya koshoongalele, ame nomukulukadi wange otwa li twa kundafana kutya otwa pumbwa ewiliko lopamhepo. Pomhito inya twa shakeneni nanye mwa fewa, otwa li hatu diladila kutya omu na okukala tamu di kokwoongala kwe likalekelwa. Eshi twa ka ya koshoongalele otwa li twa kuminwa onghedi yopahole omo vamwe va li ve tu kongela oipundi, ve tu kwafela tu shikule mOmbibeli nosho yo elihumbato laavo va li poshoongalele osho. Kava li nokuli ve tu tala ko nai eshi twa djala twa fa ovatalelipo.”
Josué ka li tuu a wanifilwa oushili weendjovo dohamba inaendunge Salomo! Ohamba oyo oya ti: “Ombuto yoye i kuna ongula, ndele ino tulumukifa eke loye komatango. Osheshi ku shi shii, ilipi po tai ka mena, oyo ile inya, ile ngenge aishe ivali tai ka kala ya wapala.” (Omuud. 11:6) Mbela ito dulu okukuna eembuto doye mokukonga eemhito u lombwele vamwe shi na sha noshoongalele sheni tashi landula ile oshipopiwa shomoipafi? Jehova ota dulu oku ku longifa u nane ovo va fya ondjala nenota lewiliko lopamhepo, ngaashi Javier naMaru. — Jes. 55:1.
[Efano pepandja 32]
Okudja kolumosho wa finda kolulyo: Alejandro Voeguelin, Maru Pineda, Alejandro Pineda, Javier Pineda, naJosué Ramírez ve li poshitaimbelewa shaMeksiko