Omapulo a dja kovaleshi

Mbela onghedindjikilile yOmukriste yokutala omafano oipala otai dulu okunaipala neenghono fiyo oposhitwa shoku mu kondifa mo meongalo lopaKriste?

▪ Enyamukulo kepulo olo: Oheeno! Onghee hano, osha fimanenena okuhenuka filufilu omafano oipala omaludi aeshe, kutya nee omahokololo a shangwa, omafano moifo, meefilima, meevidio ile kointaneta.

Omafano oipala otaa hangwa keshe pamwe kunena mounyuni aushe. Omuvalu wovanhu ovo hava tale omafano oipala owa hapupala neenghono kunena omolwointaneta. Ovanyasha novakulunhu vamwe ohave lihange va ya keenhele dokointaneta oko haku ulikwa omafano oipala nonande inava ya ko owina. Ofimbo vamwe hava kongo eenhele da tya ngaho owina nohava kala ve wete va manguluka okuya ko unene tuu ngeenge ve li momaumbo ile meembelewa ovo aveke. Ndele mbela omolwashike okutala omafano oipala ku li oshinima sha nyika oshiponga kOvakriste?

Etomheno la fimanenena otali hangwa melondwelo laJesus, olo tali ti: “Okeshe tuu ou ta tale omukainhu nokahalu, oye okwe mu haela momutima waye.” (Mat. 5:28) Oshoshili kutya Jehova okwa shita ovanhu va kale hava hafele omilele ngeenge ova hombolafana. (Omayel. 5:15-19; 1 Kor. 7:2-5) Ndele osho inashi kwatela mo okutala omafano oipala, molwaashi omafano oipala okwa nyata nohaa pendula omadiladilo a nyata momunhu ngaashi naanaa Jesus e tu londwela. Oku shi popya paunafangwa, okutala omafano oipala oku li omhinge filufilu neendjovo daKalunga, odo tadi ti: “Dipaeni hano oinhimbu yeni yopadu: oluhaelo, onyata, olwisho loipala, okahalu kaii, nolwisho leliko olo elongelo loikalunga.” — Kol. 3:5.

Ongahelipi ngeenge Omukriste okwa tala ashike omafano oipala oshikando shimwe ile ivali? Onghalo yaye otashi dulika i kale ya faafana nonghalo ya nyika oshiponga omo omupsalme Asaf a li e lihanga oshikando shimwe, eshi a ti: “Ame mwene hanga eemhadi dange da punduka; okokangodi kanini, mokukatuka kwange ndi fenungute po.” Ndele mbela Omukriste ota dulu ngoo okukala e na eliudo la koshoka noku na ombili naKalunga ngeenge okwa tala omafano ovalumenhu ile ovakainhu ve li hamunghele ile ovanhu tava i moluhaelo? Ahowe, naye ota ka kala ashike e udite ngaashi omupsalme Asaf, oo a ti: “Onda kala [handi] hepekwa omutenya aushe, nakeshe tuu ongula ehepeko lange opo li li.” — Eps. 73:2, 14.

Omukriste oo ha tale omafano oipala oku na okudimbuluka kutya ota nyono po ekwatafano laye naJehova noku na okukonga ekwafo lopamhepo. Ekwafo olo otali monika momaongalo, molwaashi Ombibeli oya ti: “Omunhu ngenge ta hangika a nyona, opo nee onye ava vopamhepo mu pukululeni nomhepo yonheni, ove u lungame naave yo u ha hongaulwe.” (Gal. 6:1) Omunhu a tya ngaho ota dulu okupewa ekwafo olo a pumbwa komukulunhuongalo umwe ile vavali, ‘neilikano leitavelo otali xupifa omunaudu, nomatimba aye otae mu kufilwa po.’ (Jak. 5:13-15) Ngaashi Asaf, ovo va konga ekwafo olo opo omafano oipala a dje mo momadiladilo avo ova mona kutya oshiwa okukala popepi naKalunga. — Eps. 73:28.

Ndele nande ongaho, omuyapostoli Paulus okwa ti kutya ovanyoni vamwe inave livela ombedi ‘omolwonyata noluhaelo noumbudi woipala.’a (2 Kor. 12:21) Omuprofesa Marvin R. Vincent okwa ti kutya oshitya shOshigreka osho sha tolokwa ‘onyata’ otashi yandje “eityo lokukala ino koshoka omolwonyata i tondifa neenghono.” Shinyikifa oluhodi, omafano oipala amwe omatondifa neenghono e dule omafano ovanhu ve li hamunghele ile omulumenhu nomukainhu tava i moluhaelo. Omafano oipala oo matondifa neenghono okwa kwatela mo ngaashi omafano omashenge (ovanhu voukashike kookanhu wa faafana tava i momilele), oshimbwida shovanhu tava i momilele, omunhu ta nangala noshinamwenyo, omafano oipala ounona, engafifi lovanhu tava kwata umwe onghonga, okuhepeka omukainhu pamilele, okupandeka umwe nokuya naye momilele ile wa hokwa okuyahameka umwe pamilele. Ovanhu vamwe vopefimbo laPaulus ovo va li “va laula meendunge davo” ova li ‘va fifa omaliudo avo nove liefela mouhalu okuwanifa ashishe osho sha nyata molwisho.’ — Ef. 4:18, 19.

Paulus okwa tumbula yo “onyata” mOvagalati 5:19. Omuhongwanhu umwe Omubritania okwa ti kutya oshitya “onyata” ‘otashi dulika pomhito ei tashi ulike kouhalu keshe mwii.’ Mbela ope na ngoo Omukriste ita dimine kutya omaludi aeshe omafano oipala oo a tumbulwa metetekelo otaa ulike shili ‘kouhalu mwii’ nonokutya omatondifa? MOvagalati 5:19-21 omuyapostoli Paulus okwa ti kutya “ava tava longo oilonga” ya nyata ya tya ngaho, “itava ka fyuulula ouhamba waKalunga.” Onghee hano, ngeenge omunhu okwa kala ha tale omafano oipala matondifa oule wefimbo lile noina hala okulivela ombedi nokulialuluka, ita dulu okukala meongalo lopaKriste. Oku na okukondwa mo opo eongalo li kale la koshoka nomu kale mu na omhepo iwa. — 1 Kor. 5:5, 11.

Itashi hekeleke tuu okushiiva kutya vamwe vomwaavo va li hava tale omafano oipala matondifa ova popya novakulunhuongalo ndele tava pewa ekwafo lopamhepo olo va pumbwa nova ninga omalunduluko manene! Jesus okwa li a kumaida Ovakriste vokuSarde shonale a ti: ‘Pamekeni oyo ya xupa po, oyo i li pokufya. Dimbulukwa nhumbi wa pelwe nowa udile, ove u shi diinine u lidilulule. Ndelenee ngenge ito kala wa pashuka, ku na apa to ka shiiva otundi oyo handi ku hange.’ (Eh. 3:2, 3) Omunhu ota dulu okulivela ombedi noku va kulwa momundilo pafaneko. — Jud. 22, 23.

Osha fimanenena kufye okukala twa tokola toko okulikaleka kokule nomafano oipala. Onghee hano, natu henukeni filufilu oludi keshe lomafano oipala!

[Eshangelo lopedu]

[Eendjovo dididilikwedi pepandja 30]

Omukriste oo ha tale omafano oipala oku na okudimbuluka kutya ota nyono po ekwatafano laye naJehova noku na okukonga ekwafo lopamhepo