Konakona Eendjovo daKalunga
Omolwashike Ovakriste hava ninginifwa?
Oshitukulwa eshi osha kundafana omapulo oo tashi dulika ho lipula kombinga yao, nosha ulika opo to dulu okulesha omanyamukulo mOmbibeli yoye. Eendombwedi daJehova otadi ka kala da hafa okukundafana naave omanyamukulo oo.
1. Eninginifo lopaKriste otali ti shike?
Omunhu oha ninginifwa opo a dule okukala e na ekwatafano liwa naKalunga. Onghee hano, omunhu ke na okuninginifwa fimbo e li okahanana, ndele osheshi a kula, ta dulu okulihonga kombinga yaKalunga nokuninga omuhongwa waJesus. (Oilonga 8:12; 1 Petrus 3:21) Ohatu dulu ashike okuninga ovahongwa vaJesus ngeenge otwe lihongo nokuninga oinima oyo e tu lombwela. — Lesha Mateus 28:19, 20.
Pefimbo lovayapostoli vaJesus, ovanhu vahapu ova li va katuka onghatu meendelelo opo ve lihonge kombinga yaKalunga noyaJesus. Pashihopaenenwa, eshi omulumenhu umwe a li e lihonga kutya efyo laJesus ola yeululila ovanhu omhito yoku ka xupifwa, okwa li a ninga diva omuhongwa. Kunena, ovanamitimadiwa vahapu ova ninga ovashikuli vaJesus. — Lesha Oilonga 8:26-31, 35-38.
2. Omolwashike Jesus a li a ninginifwa?
Jesus okwa li e na omido 30 lwaapo eshi a li a ninginifwa kuJohannes Omuninginifi mOmulonga waJordan. Okuninginifwa kwaJesus okwa li taku ulike kutya okwa tokola okulonga ehalo laKalunga. (Ovaheberi 10:7) Osho osha li sha kwatela mo okuyandja omwenyo waye u ninge oikulila yomatimba ovanhu. Nokuli nofimbo Jesus a li ine uya kombada yedu, okwa kala alushe e hole Xe Jehova noha dulika kuYe. — Lesha Markus 1:9-11; Johannes 8:29; 17:5.
3. Omolwashike Omukriste e na okuninginifwa?
Onghalo yetu oya yooloka ko kwaayo yaJesus molwaashi fye otwa fyuulula oulunde. Ndele nande ongaho, efyo laJesus lopayambo ole tu yeululila omhito yokukala tu na ekwatafano liwa naKalunga. (Ovaroma 5:10, 12; 12:1, 2) Ohatu dulu okukala twaKalunga tu li onga oilyo youkwaneumbo waye. (2 Ovakorinto 6:18) Ongahelipi omunhu ta dulu okumona oufembanghenda oo? Omunhu okwa pumbwa okuliyapulila Jehova okupitila meilikano lopaumwene, ta ane opo a kale ta longo ehalo laYe onghalamwenyo yaye aishe. Konima ngeenge okwe liyapulile Jehova, ohe shi ulike moipafi okupitila mokuninginifwa. — Lesha Mateus 16:24; 1 Petrus 4:2.
4. Ongahelipi to dulu okulilongekidila okuninginifwa?
Eendombwedi daJehova ohadi konakona Ombibeli nakeshe oo a hala okweehena popepi naKalunga. Okukonakona Ombibeli nokukala ho i kokwoongala kwopaKriste otaku ka pameka eitavelo loye muKalunga noto ka kala u mu hole nohole yomoule. Otaku ke ku kwafela yo u kulike oikala neenghedindjikilile diwa. Ngeenge owa kala u na ohole, eitavelo nosho yo omaukwatya makwao oo a hokiwa kuKalunga, otashi ke ku kwafela u kale metwokumwe neano olo wa ninga kutya owa hala okulongela Jehova fiyo alushe. — Lesha Johannes 17:3; Ovaheberi 10:24, 25.
Opo u mone ouyelele muhapu, tala etukulwa 18 lembo olo la ulikwa opo Ombibeli otai hongo lela shike?, la nyanyangidwa kEendombwedi daJehova.