Oto dimbuluka?

Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:

Salomo oku li oshihopaenenwa tashi tu londwele meityo lilipi?

Kalunga okwa li a nangeka noupuna ohamba Salomo nokwa kala te i longifa. Ndele Salomo okwa ka ekelashi omayele oo kwa li a pewa kuKalunga pefimbo lokupangela kwaye. Okwa li a hombola omonakadona waFarao, oo a li ha longele oikalunga, nokwa li yo e likongela ovakulukadi vahapu. Lwanima, okwa ka efa ovakulukadi vaye ovo va li hava longele oikalunga ve mu amune ko kelongelokalunga lashili nokulongela oikalunga. Nafye otu na okulungama tuha kulike kanini nakanini oikala ile eamo lii. (Deut. 7:1-4; 17:17; 1 Eeh. 11:4-8) — 12/15, epandja 10-12.

Omolwashike tu na okukala metwokumwe nomifikamhango dOmbibeli?

Ovanhu ovo hava kala metwokumwe nomifikamhango dOmbibeli ove na eliudo la koshoka nohava hafele ekwatafano liwa momaukwaneumbo avo. (Eps. 19:9, 10) Ndele ovo ihava dulika komifikamhango dOmbibeli luhapu ohava ehameke vamwe pamaliudo. — 1/1, epandja 8, 9.

Omolwashike Ovakriste hava ninginifwa nomunhu oku na okuninga shike opo a kale a wana okuninginifwa?

Omukriste oku na okuninginifwa opo a kale e na ekwatafano liwa naKalunga. (1 Pet. 3:21) Ohatu liyapulile Jehova okupitila meilikano lopaumwene, hatu mu udanekele kutya ohatu ka longa ehalo laye okukalamwenyo kwetu akushe. Shimha twe liyapulile Jehova, ohatu ulike eliyapulo letu okupitila mokuninginifwa moipafi. — 4/1, epandja 16, 17.

Oshike tashi ulike kutya kombada yedu okwa kala alushe Ovakriste ovavaekwa vashili okudja ngoo pefimbo lovayapostoli?

Jesus okwa popya meyele laye li na sha ‘noilya neu’ kutya “ombuto iwa” otai faneke “ovanhu [“ovana,” NW] vouhamba.” (Mat. 13:24-30, 38) Okwa ti yo kutya oilya neu otai ka kulila mumwe fiyo efimbo leteyo. Onghee hano, nonande katu shii lela kutya oolyelye va kala va kwatelwa mongudu oyo yoilya, otu shi shii kutya kombada yedu okwa kala alushe ovo va kwatelwa mongudu oyo. — 1/15, epandja 7.

Olyelye a li a tuma “onyofi” oyo ya li tai wilike ovanongo vokoushilo?

OSatana Ondiaboli ou a li a halelela okudipaifa okahanana Jesus. Satana oha xumifa komesho oipupulu, elongifo leenghono nomadipao. Onghee hano, itashi kumwifa eshi Jesus e mu popya e li “omunaipupulu naxe yayo” nonokutya “omudipai nghee a dja.” (Joh. 8:44) — 4/1 epandja 29.

Oshike tashi dulu oku tu kwafela tu kondjife eamo lokufila vamwe efupandubo?

Oinima ei tai landula apa oyo tai ke tu kwafela: Kala u hole ovamwaxo, kala ho endafana noshiwana shaKalunga, kala ho longo ouwa nosho yo ‘hafa novahafi.’ (Rom. 12:15) — 2/15, epandja 16-17.

Olyelye a li Hannas oo a tumbulwa momahokololo Omavangeli e na sha nokutokolwa kwaJesus?

Otaku tiwa kutya Hannas okwa li ‘omupristeri omukulunhu’ pefimbo lokutokolwa kwaJesus. (Luk. 3:2) Okwa kala omupristeri omukulunhu okudja lwomomudo omuti-6 ile omuti-7 O.P. fiyo olwomomudo omuti-15 O.P. omo a li a kufwa oshinakuwanifwa shoupristeri ashike okwa kala natango e na eenghono dinene muIsrael. — 4/1, epandja 9.

Omafinamhango elipi tu na okukaleka momadiladilo ngeenge hatu pe vamwe omayele?

Kendabala okuuda ko ashishe osho sha kwatelwa mo. Henuka okuyandja omayele meendelelo. Tula moilonga nelininipiko Eendjovo daKalunga. Ngeenge otashi shiiva, longifa oishangomwa yehangano. Henuka okuningila vamwe omatokolo. — 3/15, epandja 7-9.

Jesus okwa li a hala okutya ngahelipi eshi a lombwela ovapwilikini vaye a ti mu findikila oshinano oshitivali? (Mat. 5:41)

Pefimbo opo, Ovaisrael ova li tava pangelwa kOvaroma ovo va li have va fininikile oilonga. Onghee hano, eshi Jesus a li ta ladipike ovapwilikini vaye va ye oshinano oshitivali, okwa li te va lombwele va wanife po nehalo liwa oilonga yopaveta oyo tava pulwa va longe kovapangeli. — 4/1, epandja 9.