Ombiibeli ohai lundulula onghalamwenyo yovanhu

OMULUMENHU umwe wokoScotland oshike osho a li a tala ko sha fimana shi dulife ongeshefa tai pondola? Oshike sha kwafela omulumenhu wokoBrazil a xulife po onghedi yokukalamwenyo inai koshoka noku efe po oingangamifi? Ongahelipi omulumenhu wokoSlovenia a dula okweefa po okunwa sha pitilila? Lesha oimoniwa yavo, opo u ude osho tava ti.

JOHN RICKETTS okwa ti: “Onghalamwenyo yange oya li tai monika itunhula.”

ODULA OMO A DALWA: 1958

OSHILONGO OMO A DALELWA: SCOTLAND

ONAKUDIWA: OKWA LI OMUNANGESHEFA HA PONDOLA

ONGHALAMWENYO YANGE YONALE: Onda dalwa moukwaneumbo u na sha. Tate okwa li omukulunhu metangakwaita laBritina, onghee oukwaneumbo wetu owa li hau tembuka luhapu. Kakele ashike kokukala moScotland, otwa kala yo moEngland, moGermany, moKenya, moMalaysia, moIreland nosho yo moCyprus. Eshi nda li ndi na omido hetatu, onda li nda ya kofikola i na omuhandjo moScotland. Opo nee, onda ka manifa ofikola yange kounivesiti yedina Cambridge.

Eshi nda li ndi na omido 20, onda li nda hovela okulandifa omahooli oule womido hetatu. Tete, onda li handi landifile moSouth America, opo nee lwanima omuAfrica nohauxuuninwa omoWestern Australia. Konima eshi nda tembukila koAustralia, onda li nda tota po ongeshefa oyo hai tuvikile oimaliwa yovanangeshefa vamwe, oyo nda ka landifa po mokweendela ko kwefimbo.

Molwaashi onda li nda mona oimaliwa ihapu, onda efa po ongeshefa pomido 40. Onda longifa efimbo lange okuya momalweendo. Onda endaenda Australia ashishe oikando ivali nomota, nonda enda ounyuni aushe. Onghalamwenyo yange oya li tai monika itunhula.

NGHEE OMBIIBELI YA LUNDULULA ONGHALAMWENYO YANGE: Nokuli nofimbo inandi efa po ongeshefa, onda li nda hala okumona onghedi omo handi dulu okupandula Kalunga omolwonghalamwenyo oyo nda li handi hafele. Onda li nda hovela okuya kongeleka yaAngelikana, omo nda kulila. Ashike ongeleka kaya li tai hongo lela okudja mOmbiibeli. Opo nee onda ka konakona nOvamormon, ashike onda ka efa po, molwaashi inave lineekela mOmbiibeli.

Efiku limwe, Eendombwedi daJehova oda li da konghola peumbo lange. Onda li nda didilika diva kutya ehongo lado ola kanghamena filufilu kOmbiibeli. Omushangwa umwe oo vali va kundafana naame 1 Timoteus 2:3, 4. Eevelishe odo oda popya kutya oshi li ehalo laKalunga “ovanhu vomaludi aeshe va xupifwe nova shiive nawa oshili.” Onda li nda kumwa eshi Eendombwedi da divilika eshiivo lashili la kanghamena kOmbiibeli.

Okukonakona nEendombwedi daJehova okwa kwafela nge ndi mone eshiivo lashili la tya ngaho. Pashihopaenenwa, onde lihonga kutya Kalunga naJesus kave fi omunhu umwe, ndele ovanhu vavali va yoolokafana. (Johannes 14:28; 1 Ovakorinto 11:3) Onda li nda tunhukwa okulihonga oshili oyo i li paunafangwa. Onda li yo nda nyemata, eshi nda longifa eenghono dihapu mokukendabala okuuda ko omahongo oipupulu, oo itaa dulu okuudiwa ko.

Onda li nda hovela diva okukala pokwoongala kwEendombwedi daJehova. Onda li nda kuminwa oukaume nosho yo omufika wopaenghedi wakeshe umwe. Ova li tava monika ovanhu vawa nohava tila Kalunga. Ohole yavo yashili oya tomha nge kutya onda mona elongelokalunga lashili. — Johannes 13:35.

OUWA OO NDA MONA: Konima eshi nda ninginifwa, onda ka shakena naDiane. Okwa kula e li Ondombwedi yaJehova noku na omaukwatya mawa mahapu, oo nda li nda hokwa. Lwanima, otwa li twa hombola. Diane oku li enangeko noupuna linene la dja kuJehova.

Fye naDiane otwa li twa tokola okutembukila koshitukulwa oko ku na omhumbwe inene yovaudifi vonghundana iwa okudja mOmbiibeli. Mo 2010, otwa li twa tembukila koBelize, koCentral America. Otwa li hatu udifile ovanhu ovo ve hole Kalunga nova hala okulihonga shihapu kombinga yaye.

Osha etela nge ombili yopamadiladilo, eshi nda shiiva oshili kombinga yaKalunga nosho yo Eendjovo daye, Ombiibeli. Ndi li omulongi wefimbo li yadi, onda mona ehafo mokuhonga ovanhu vahapu Ombiibeli. Kape na shimwe shihafifa shi dulife okumona nghee Ombiibeli hai lundulula onghalamwenyo yovanhu, ngaashi nde shi ningilwa. Hauxuuninwa, onda mona onghedi ya denga mbada omo handi dulu okupandula Kalunga omolwonghalamwenyo oyo handi hafele.

MAURÍCIO ARAÚJO okwa ti:

“Ova li va ungaunga naame nonghenda.”

ODULA OMO A DALWA: 1967

OSHILONGO OMO A DALELWA: BRAZIL

ONAKUDIWA: OKWA LI E NA ONGHEDI YOKUKALAMWENYO INAI KOSHOKA

ONGHALAMWENYO YANGE YONALE: Onda kulila moAvaré, okadoolopa ka mwena oko ke li moshitukulwa shaSão Paulo. Ovakalimo vamo vahapu ovanashilonga.

Tate okwa fya, ofimbo meme e li meteelelo lange. Eshi nda li okamatyona, onda li handi djala mo oikutu yameme, ngeenge ehe mo. Onda li nda hovela okuulika oikala yoomeme, novanhu ova li va tala nge ko ndi li eshenge. Mokweendela ko kwefimbo, onda hovela okuya momilele noumatyona nosho yo novalumenhu va kula.

Eshi nda finda moukulunhu, onda hovela okukala handi kongo ovo handi i navo momilele (ovalumenhu novakainhu) keshe opo handi dulu oku va hanga meeba o, meeklaba doufiku nokuli nomeengeleka. Pefimbo loivilo yovakwashiwana, onda li handi danisa da fa omukainhu. Onda li ndi shiive keshe pamwe.

Ookaume kange ova li omashenge, eembwada nosho ho ovo va pikwa koingangamifi. Vamwe ova li va nwefa nge mo ndi hovele okulongifa oingangamifi, nonda li nda pikwa meendelelo. Fimbo limwe, otwa tokelwa hatu shili oingangamwifi oufiku aushe. Omafimbo amwe, onda li handi likalele, ndele handi shili aame andike efiku alishe. Onda li nda utama, novanhu ova li hava ti kutya onda kwatwa ko-AIDS.

NGHEE OMBIIBELI YA LUNDULULA ONGHALAMWENYO YANGE: Pefimbo opo, onda li nda hovela okweendafana nEendombwedi daJehova. Oda li da ungaunga naame nonghenda. Ovelishe imwe oyo va li va leshela nge okudja mOmbiibeli, Ovaroma 10:13, oyo tai ti: “Keshe ou ta ifana edina Jehova ota ka xupifwa.” Eendjovo odo oda li da kuma nge neenghono kutya osha fimana okulongifa edina Jehova. Oikando ihapu, konima eshi nda shila oingangamifi oufiku aushe, ohandi yeulula ekende, handi tale keulu nokwiilikana Jehova handi lili, handi mu pula a kwafele nge.

Okutala nghee meme ta mono oixuna, eshi nda nyonauna po onghalamwenyo yange noingangamifi, oshe linyengifa nge ndi efe po oku i longifa. Diva konima yaasho, onda li nda hovela okukonakona Ombiibeli nEendombwedi daJehova. Oda shilipaleka nge kutya ekonakono otali ka pameka etokolo lange lokweefa po oingangamwifi, nosha kwafela nge shili.

Eshi nda twikila okukonakona Ombiibeli, onda li nda mona kutya onda pumbwa okulundulula onghedi yange yokukalamwenyo. Osha li shidjuu okweefa po onghalo youshenge, molwaashi onda kala monghalo ya tya ngaho oule wefimbo lile. Oshinima shimwe osho sha kwafela nge, okweefa po omanwefemo a puka. Onda efa po ookaume vange vakulu, okuya keenhele domanwino nosho yo keeklaba.

Nonande kasha li shipu okuninga omalunduluko oo, onda li nda tuwa omukumo, eshi nda shiiva kutya Jehova oku na ko nasha naame noku wete eenghendabala dange. (1 Johannes 3:19, 20) Mo 2002, onda li nda efa po onghalo youshenge, nonda li nda ninginifwa ndi li Ondombwedi yaJehova momudo oo tuu oo.

OUWA OO NDA MONA: Meme okwa li a kuminwa omalunduluko oo nda ninga noshe mu linyengifa a konakone Ombiibeli. Shinyikifa oluhodi, okwa ka kwatwa kombada. Ashike nande ongaho, okwa twikila okukulika ohole yaye yokuhola Jehova nosho yo oshili yOmbiibeli.

Moule womido hetatu da pita, onda kala ndi longo efimbo li yadi moukalele, handi longifa efimbo lange lihapu mokuhonga vamwe Ombiibeli. Ohandi kala handi kondjifa omahalo a puka omafimbo nomafimbo. Ashike ohashi tunge omukumo kutya okukala itandi kufa ombinga momahalo a tya ngaho, ohandi hafifa Jehova.

Okweehena popepi naJehova nosho yo okukala nonghalamwenyo oyo tai mu hafifa, osha kwafela nge ndi kale nde lifimaneka. Paife, ondi li omulumenhu a hafa.

LUKA ŠUC okwa ti: “Onda li handi nu sha pitilila.”

ODULA OMO A DALWA: 1975

OSHILONGO OMO A DALELWA: SLOVENIA

ONAKUDIWA: OKWA LI A PIKWA KOMALUDO

ONGHALAMWENYO YANGE YONALE: Onda dalelwa moLjubljana, oshilandopangelo shaSlovenia. Onda kala nonghalamwenyo ihafifa fiyo opomido nhee. Opo nee tate okwe lidipaa. Okudja poshiningwanima osho shinyanyalifa, meme okwa kala ha longo noudiinini, opo a file oshisho ovanamati vaye vavali, ame nomukulu wange.

Eshi nda li ndi na omido 15, onda ka tekulwa kumeekulu. Onda li ndi hole okukala kuye, molwaashi ookaume kange vahapu ohava di pomudingonoko wavo. Onda kala yo ndi na emanguluko lihapu shi dulife ngeenge ndi li keumbo. Eshi ndi na omido 16, onda li nda hovela okweendafana novanhu ovo hava ka nwa momaxuliloshivike. Onda xunga eexwiki dange, nda hovela okudjala nai, nolwanima onda ka hovela okushila omakaya.

Nonande onda hetekela oingangamwifi i lili noku lili, inandi efa po okunwa omalodu, molwaashi okwa li handi ku hafele. Diva, onda hovela okunwa ekende alishe lo-wine noshitata poshikando. Ovanhu ova ka kala ihava didilike nge, ngeenge nda tetwa kekende. Lwanima, onda li ashike handi udu edimba lomalodu eshi handi fuda, naasho osha li hashi ulike kutya onda pitililifa. Ndele nande ongaho, kape na oo a li e shii kutya onda nwa tashi dulika eelitela donhumba do-wine, ile deebiila nosho yo o-vodka pefimbo limwe.

Peemhito dihapu, aame nda li handi yambidida ookaume kange va kale ofika, konima eshi twa kala oufiku aushe hatu nu, nonande aame nda li nda nwa shihapu ndi va dulife. Efiku limwe, onda uda kaume kange umwe ta popi kutya ame omufinyuni. Omupopyo oo wesheko owa li u shiivike nawa moSlovenian, molwaashi ohau ulwa omunhu oo ha nu e dulife vakwao. Osho osha li sha udifa nge nai neenghono.

Onda li nda hovela okudiladila kutya ohandi longifa ngahelipi onghalamwenyo yange. Onda li nda wililwa po komaliudo okukala ndi udite ndihe na oshilonga. Okwa li ndi wete ndihe na osho nda pondola monghalamwenyo.

NGHEE OMBIIBELI YA LUNDULULA ONGHALAMWENYO YANGE: Pefimbo opo, onda didilika kutya omunafikola umwe womongudu yetu okwa lundulula, a ninga omunhu wombili. Molwaashi okwa li nda halelela okushiiva osho she mu kwafela, onda li nde mu shiva tu ka lye pamwe. Eshi twa li hatu kundafana, okwa li a yelifila nge kutya okwa hovela okukonakona Ombiibeli nEendombwedi daJehova. Okwa li a lombwela nge oinima imwe oyo a li te lihongo, oyo aishe ya li ipe filufilu kwaame noinandi uda nande onale tai hongwa kelongelokalunga lonhumba, omo nda enda. Onda li nda hovela okwoongala nEendombwedi nokukonakona Ombiibeli nado.

Ekonakonombiibeli ola li la pashula nge ndi mone omatwomukumo a denga mbada. Pashihopaenenwa, onda li nde lihonga kutya otu li mefimbo olo Ombiibeli ya popya kutya ‘omafiku axuuninwa.’ (2 Timoteus 3:1-5) Onde lihonga yo kutya mafiku Kalunga ota ka hanauna po ovakolokoshi novayuki otava ka hafela omwenyo waalushe mOparadisa. (Epsalme 37:29) Onda tokola okuyukifa onghalamwenyo yange, opo ndi kale umwe womovanhu va tya ngaho.

Onda li nda hovela okulombwela ookaume kange kombinga yoshili yOmbiibeli, oyo nda li handi lihongo. Vahapu ova li va sheka nge eshi handi va lombwele, ashike eenghatu davo oda li da kwafela nge meenghedi odo inandi didilika. Eenghatu davo oda kwafela nge ndi mone kutya kava li ookaume vawa. Onda ka didilika kutya oupyakadi wange u na sha nokunwa otau etifwa kwaavo handi endafana navo. Momukokomoko woshivike, ohava kala va teelela exuliloshivike, opo va ka kolwe.

Onda li nda xulifa po oukaume wa tya ngaho nokupanga oukaume tau tungu nEendombwedi daJehova. Onda mona etwomukumo eshi nda kala handi endafana nado. Odi hole Kalunga neenghono nohadi kendabala okukala metwokumwe nomifikamhango daye. Onda enda handi efa po okunwa sha pitilila kanini nakanini.

OUWA OO NDA MONA: Ohandi pandula Jehova eshi inandi pumbwa vali omalodu, opo ndi kale nda hafa. Kandi shii kutya ngeno paife ondi li monghalo ya tya ngahelipi ngeno nghi lundululile. Ashike onda tomhwa kutya onghalamwenyo yange paife oi li xwepo.

Onda kala handi longo keembelewa dEendombwedi daJehova moSlovenia oule womido heyali, naasho oshi li oufembanghenda munene. Paife ondi na onghalamwenyo tai ti sha eshi nda shiiva Jehova nohandi mu longele.