Mbela Eendombwedi daJehova odi na ovakainhu ve li ovaudifi?

Heeno, Eendombwedi daJehova mounyuni aushe odi na ovakainhu omamiliyona mahapu ve li ovaudifi. Ove li ongudu inene yovaudifi vonghundana iwa yOuhamba waKalunga. Epsalme 68:11 ola popya paxunganeko shi na sha novaudifi ovo la ti: “Omwene okwa yandja ondjovo, ongudu inene yovakainhu tai twala ondaka yefindano.”

Ashike oilonga yokuudifa oyo hai longwa kovakainhu ovaudifi vEendombwedi daJehova inai faafana naayo hai longwa kovaudifi ovakainhu vomalongelokalunga amwe. Ope na eyooloko ko la kula pokati kavo. Omeenghedi dilipi mbela va yoolokafana?

Ohava udifile ovanhu va yooloka ko. Ovakainhu ovo ve li ovafita, unene tuu mOukwakriste, ohava dana onghandangala mokukwatela komesho momaongalo avo, novapwilikini vavo ova kwatela mo unene oilyo yomaongalo avo. Ovakainhu ovaudifi ovo ve li Eendombwedi daJehova ohava udifile unene kondje yeongalo, hava udifile ovanhu aveshe, ovo hava shakeneke moukalele weumbo neumbo nosho yo keshe pamwe.

Natango onghedi imwe omo ovakainhu ovaudifi ovo ve li Eendombwedi daJehova va yooloka ko kwaavo vomalongelokalunga amwe, oilonga yavo meongalo. Ovakainhu ovafita vOukwakriste noveengeleka dimwe ohava kwatele komesho nokuhonga oilyo yomaongalo avo metwokumwe neitavelo lavo. Ndele mepingafano naasho, ovakainhu ovaudifi vEendombwedi daJehova ihava hongo meongalo ngeenge pe na ovalumenhu va ninginifwa. Ovalumenhu ovo va nangekwa po ve li ovahongi ovo ashike hava ningi ngaho. — 1 Timoteus 3:2; Jakob 3:1.

Ombiibeli oya popya kutya ovalumenhu ovo ashike ve na okupashukila meongalo. Didilika oshihopaenenwa osho omuyapostoli Paulus a tula po eshi a li a shangela omupashukili mukwao Titus a ti: ‘Onde ku fiya muKreta, opo u nangeke po ovakulunhuongalo moilando i lili noku lili.’ Paulus okwa weda ko a ti kutya omulumenhu keshe a nangekwa po oku na okukala ha “popilwa mouwa, omushamane e na omukulukadi umwe.” (Titus 1:5, 6) Paulus okwa yandja omayele a faafana kuTimoteus e na sha nanghee eongalo li na okuunganekwa a ti: “Ngeenge ope na ou ta lalakanene okuninga omukulunhuongalo, okwe lihalela oshilonga shiwa. Omukulunhuongalo oku na okukala e na elihumbato liwa, omushamane e na omukulukadi umwe, . . . e shii okuhonga.” — 1 Timoteus 3:1, 2.

Omolwashike ovalumenhu ovo ashike ve na okukwatela komesho meongalo? Paulus okwa ti: “Omukainhu ina pitikwa a honge ile a pangele omulumenhu, ndele oku na okukala a mwena. Osheshi Adam oye a shitwa tete, opo nee taku shikula Eva.” (1 Timoteus 2:12, 13) Onghee hano, eshito otali ulike kutya omolwashike Kalunga a pa ovalumenhu oshinakuwanifwa shokuhonga nokukwatela komesho.

Ovakalele vaJehova ohava landula oshihopaenenwa shOmuwiliki wavo, Jesus Kristus. Omuhongwa Lukas okwa shanga kombinga youkalele waJesus a ti: “Okwa ya moilando noilando nosho yo momikunda nomikunda, ta udifa onghundana iwa yOuhamba waKalunga.” Lwanima, Jesus okwa li a tuma ovashikuli vaye va ka longe oilonga oyo tuu oyo. Ombiibeli oya ti: “Ova ya momikunda tava udifa onghundana iwa.” — Lukas 8:1; 9:2-6.

Kunena, ovakalele vaJehova, kutya nee ovalumenhu ile ovakainhu, ohava kufa ombinga pauyadi mexunganeko laJesus olo tali ti: “Onghundana ei iwa yOuhamba otai ka udifilwa ounyuni aushe opo ovanhu vomoiwana aishe ve i ude, opo nee exulilo tali uya.” — Mateus 24:14.