Ovanhu otava ka mona omwenyo okupitila menyumuko laJesus
ENYUMUKO laJesus kali fi oshinima shi tu li kokule, oshiningwanima shonale osho itashi ti sha lela kufye kunena. Omuyapostoli Paulus okwa divilika efimano lasho, eshi a ti: “Kristus okwa nyumuka movafi, Oye wotete [waava] va kofa mo, osheshi efyo ngaashi le uya molwomunhu umwe, osho yo nenyumuko lovafi omolwomunhu umwe. Osheshi ngaashi aveshe tava file muAdam, osho yo aveshe tava ningwa ovanamwenyo muKristus.” — 1 Ovakorinto 15:20-22.
Jesus okwa nyumuka mo 16 Nisan 33 O.P., mefiku lokomudo omo Ovajuda va li hava ka yambela Jehova Kalunga osho va likola tete momapya avo kouyapuki wotembeli kuJerusalem. Eshi Paulus a popya kutya Jesus oye wotete, okwa ulika kutya otapa ka kala yo oohandimwe vamwe vali ovo tava ka nyumunwa.
Eendjovo daPaulus da landula ko oda yelifa kutya enyumuko laJesus ola ninga shike tashi shiiva. Okwa ti: “Osheshi efyo ngaashi le uya molwomunhu umwe, osho yo nenyumuko lovafi omolwomunhu umwe.” Atusheni ohatu fi molwaashi otwa fyuulula oulunde nokuhawanenena kuAdam. Ndele Jesus okwa yandja omwenyo waye wopanhu wa wanenena onga ekulilo, nokwa yeululila ovanhu ondjila opo va mangululwe moupika woulunde nefyo, e shi ninga tashi shiiva okupitila menyumuko. Mokukwatela kumwe oinima nawa, Paulus okwa shanga mOvaroma 6:23, a ti: “Ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.”
Jesus okwe tu yelifila osho efyo nenyumuko laye tali ti kufye. Okwa popya kombinga yaye mwene, a ti: “Omona wOmunhu oku nokutulikwa pombada, opo keshe tuu ou te mu itavele, a ha kane, ndele a kale e nomwenyo waalushe. Osheshi osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” — Johannes 3:14-16.
Diladila komwenyo uhe na exulilo, ito yahama, ito mono oixuna ile wa nyika oluhodi! (Ehololo 21:3, 4) Olo kali fi tuu etimaumbwile litunhula! Omuhongwanhu umwe okwa ti ngaha: “Fimbo eembila tashi dulika tadi dimbulukifa omunhu kutya okukalamwenyo okuxupi, enyumuko otali shilipaleke kutya efyo otali ka xula po.” Kape na omalimbililo, enyumuko laJesus otali ti omwenyo!