“Onda li oshimhulu”

ONGHALAMWENYO YANGE YONALE:

Onda kulila moukwaneumbo wa hepa u li popepi nomunghulofuta wodoolopa Turku. Tate okwa li omudengingonyo dingi, ame nondenge yange otwa li yo hatu kufa ombinga moudano weengonyo. Fimbo nda li handi i kofikola, onda li luhapu handi lu omalwoodi, nokanda li nokuli handi ongaonga okulwa. Eshi nda li omunyasha, onda li nda waimina ongudu oyo i shiivikile ominyonena, naasho osha li sha ningifa nge ndi kale handi longo ominyonena neenghono shi dulife nale. Onda li yo nda hovela okukala ndi hole eengalo odo hadi ningi omaweelelo neenghono, nonda li nda hovela okudiladila kombinga yokuninga omushikingalo dingi.

Onda li nda landa oikwanoipangifo yokushika eengalo, handi toto po ongudu yokushika eengalo, nolwanima onda ka ninga omuwiliki wayo. Onda li handi lihumbata monghedi ii neenghono ngeenge ndi li komutune. Molwaashi ongudu yetu oya li ikolokoshi notwa li twa fa oifitukuti, otwa li twa mona diva ovayambididi vahapu. Ovanhu vahapu ova li have uya okutala ngeenge hatu dana eengalo, otwa li yo twa kwata eengalo donhumba, noka-CD kaxuuninwa oka li ke holike unene kovanhu. Mo 1980 nasha, otwa li twa ya kOilongo ya Hangana opo tu ka xumife komesho ongudu yetu. Otwa li twa dana eengalo moNew York nomoLos Angeles oule wefimbo lonhumba notwa li tu na ekwatafano nomahangano omo mu na ovashikingalo dingi manga inatu alukila koFinland.

Nonande onda li handi hafele okukala mongudu yovashikingalo, onda li nda halelela onghalamwenyo tai ti sha. Kanda li ndi hole omhepo yefiyafanepo noyoukolokoshi oyo i li mehangano leengalo. Onda li ndi udite kutya ame omunhu mwii, nonda li nda tila oku ka pya moheli. Onda li nda kendabala okukonga omanyamukulo momambo omalongelokalunga aeshe, nokwiilikana nda mana mo Kalunga a kwafele nge, nonande onda li ndi udite kutya kandi na efiku ndi mu wapalele.

NGHEE OMBIBELI YA LUNDULULA ONGHALAMWENYO YANGE:

Opo ndi lifile oshisho, onda li handi longo mOpoosa yomoshitukulwa shetu. Efiku limwe, onda li nda mona kutya omunailonga mukwetu oku li umwe womEendombwedi daJehova. Onda li nde mu pula omapulo mahapu. Omanyamukulo aye a yela nawa opamishangwa okwa li a ningifa nge ndi kale ndi na ohokwe, nonda li nda dimina okukonakona naye Ombibeli. Oivike ashike yonhumba eshi nda tameka okukonakona, ongudu yange yokushika eengalo oya li ya mona omhito iwa yoku ka pitifa eengalo kOilongo ya Hangana. Onda li ndi udite kutya osha li omhito ihe fi okweefiwa monghalamwenyo yange.

Onda li nda lombwela Ondombwedi oyo hai konakona naame kutya onda hala oku ka pitifa oka-CD kamwe vali, nokonima yaasho opo nee handi ka tula omafinamhango Ombibeli moilonga. Ponhele yokulombwela nge kutya nandi ninge po shike, oya pula nge ndi leshe eendjovo daJesus odo di li muMateus 6:24. Ovelishe oyo otai ti: “Kaku na ou ta dulu okukalela oovene vavali.” Onda li nda kanghwa neenghono eshi nda mona eityo leendjovo daJesus. Konima yomafiku manini, ou nda li handi konakona naye oye a li a kanghwa. Onda li nde mu lombwela kutya onda fiya po ongudu yokushika eengalo molwaashi onda hala okuninga omushikuli waJesus.

Ombibeli oya li ya fa okatengelelo oko ka nyaneka pomutenya omapuko ange. (Jakob 1:22-25) Onda mona kutya onda li oshimhulu molwaashi onda li ndi na ounhwa, nonda li nda hala ndi kale nda tumbala neenghono. Onda li handi tukana, ndi hole olwoodi, okushila omakaya nokunwa sha pitilila. Eshi nda didilika kutya onghedi yange yokukalamwenyo otai kondjifafana neenghono nomifikamhango dOmbibeli, onda li nde lihandukila. Nonande osha li shidjuu kwaame, onda li nda tokola okuninga omalunduluko oo a pumbiwa. — Ovaefeso 4:22-24.

Onda li nda wililwa po keliudo Ii udite etimba omolwomanyono ange onale. Ndele Ondombwedi oyo twa konakona nayo oya li ya kwafela nge neenghono. Oya ulikila nge osho Ombibeli ya popya muJesaja 1:18, oyo tai ti: “Omatimba eni nande naa tiliyane ngaashi ohonde, otaa ka toka ngaashi outokele weemhawe.” Ovelishe oyo nosho yo dikwao dOmbibeli oda li da tomha nge kutya Tate yetu womeulu omunanghenda nokwa hala okuvelula oipute yaavo ve livela ombedi omolwomapuko avo.

Eshi nda shiiva Jehova nokukala ndi mu hole, onda tokola oku mu liyapulila. (Epsalme 40:9) Onda ninginifwa mo 1992 poshoongalele shopaiwana shEendombwedi daJehova osho sha li mo-St. Petersburg, moRussia.

OUWA OO NDA MONA:

Onda panga oukaume washili navahapu mokati koshiwana shaJehova. Paife ohandi shiki eengalo tadi wapalele nookaume kange ovo nohandi hafele oshali oyo ya dja kuKalunga. (Jakob 1:17) Onda mona yo enangekonoupuna le likalekelwa eshi nda hombola omukulukadi wange omuholike Kristina. Ohandi kundafana naye oinima ihapu, ngaashi osho nda hafela, omashongo onghalamwenyo nosho yo omaliudo ange omoule.

Ngeno kanda ningile umwe womEendombwedi daJehova, ngeno otashi dulika kandi li momwenyo kunena. Efimbo la pita, onda li handi hangwa komaupyakadi e lili noku lili. Paife ondi na elalakano lashili monghalamwenyo yange nondi wete kutya oinima aishe otai ende nawa.