OSHIPALANYOLE SHOKOMBADA | KALUNGA OKU NA KO NGOO NASHA NAAVE?
Kalunga Ohe Ku Pashukile
“Omesho aye taa pashukile eendjila domunhu, ndee ta tale eenghatu daye adishe.” — JOB 34:21.
Okaana ohaka pumbwa okupewa elitulemo kovadali she likolelela komido dako
OMOLWASHIKE VAMWE VE LI MOMALIMBILILO: Pamakonakono amwe oo opo a ningwa, otaku tiwa kutya omuhalavili wetu oo auke otashi dulika u na eepulaneta omabiliyona 100 lwaapo. Pakutala kounene weshito, ovanhu vahapu ohava pula tava ti: ‘Omolwashike Omushiti omunaenghono adishe ha tale osho ovanhu vongaho tava ningi kopulaneta ei inini?’
OSHO EENDJOVO DAKALUNGA TADI HONGO: Kalunga ine tu pa ashike Ombibeli ndele ta kala ehe na ko nasha vali nafye. Ponhele yaasho, okwe tu shilipaleka ta ti: “Onda hala ndi ku twe omayele; eisho lange tali ku pashukile.” — Epsalme 32:8.
Diladila kuHagar, omukainhu Omuegipti womefelemudo eti-20 K.O.P. Hagar okwa li a dina omuyandji woilonga waye, Sarai, nomolwaasho, Sarai okwa li e mu ninipika, na Hagar okwa ya onhapo mombuwa. Ndele eshi Hagar a ninga epuko, mbela Kalunga ka li vali e na ko nasha naye? Ombibeli oya ti: “Omwengeli [wOmwene] okwe mu mona.” Omwengeli oo okwa li a shilipaleka Hagar ta ti: ‘Omwene okwe ku uda moudjuu woye.’ Opo nee Hagar okwa tya kuJehova: “Ove Kalunga u wete nge.” — Genesis 16:4-13.
‘Kalunga oo kwa li e wete’ Hagar naave ohe ku pashukile. Oku shi faneka: Omudalakadi omunahole oha pashukile ounona vaye naunene tuu ovo vanini, molwaashi okaana ohaka pumbwa okupewa elitulemo kovadali vako she likolelela kutya oke fike peni. Sha faafana, Kalunga ohe tu pashukile naunene tuu ngeenge tu li ovalininipiki notwa pumbwa ekwafo. Jehova okwa ti: “Ame ohandi kala pokule mokombadambada nomouyapuki nomuava ve na omhepo ya nyanyaulwa noye lininipika, opo ndi hekeleke omhepo yovalininipiki nondi tululule omwenyo momutima waava va nyanyaulwa.” — Jesaja 57:15.
Ndele nande ongaho, otashi dulika u lipula kutya: ‘Kalunga oha pashukile nge ngahelipi?’ Mbela oha tokola nge she likolelela keholokepo lange ile oha tale meni lange noku shii kutya ame omunhu naanaa a tya ngahelipi?’