Eedjo dokafo Onghalamwenyo yopaKriste noilonga yokuudifa
6-12 MARSA
OMAMONA OMEENDJOVO DAKALUNGA | JEREMIA 1-4
“Ame ondi li pamwe naave”
(Jeremia 1:6) Opo nee ame onda tya: “Akutu Omwene Kalunga! Tala, ame kandi shii kupopya, osheshi aame omunyasha.”
Kala oupafi ngaashi Jeremia!
4 Jeremia otashi dulika a li pokuwanifa omido 25 eshi Jehova a li e mu pa oshinakuwanifwa shokulonga e li omunangeli. (Jer. 1:1, 2) Ndele nande ongaho, Jeremia okwa li e udite kutya ye omunyasha natango noina wana oku ka popya novakulunhu voshiwana, ovalumenhu ovo va li ovanamido nova li ve na eenghonopangelo. (Jer. 1:6) Okwa li e na okushiivifila ovanhu omatokolo aJehova a kwata moiti nomatilifi, unene tuu ovapristeri, ovaprofeti ovanaipupulu, ovapangeli, ovo va li tava “tondoka omatondoko avo” nosho yo ‘ovashunimonima.’ (Jer. 6:13; 8:5, 6) Otembeli yoshinge oyo ya li ya tungwa kohamba Salomo, oyo ya kala ondingandinga yelongelokalunga lashili oule womafelemido ane lwaapo, oya li tai ka hanaunwa po. Oshilando Jerusalem naJuda nayo oya li tai ka hanaunwa po novakalimo ova li tava ka twalwa moukwatwa. Onghee hano, osha yela kutya etumwalaka olo Jeremia a li a pewa ola li la endelela neenghono!
(Jeremia 1:7-10) Ndelenee Omwene okwa lombwela nge, ta ti: “Ino tya: ‘Aame omunyasha,’ osheshi keshe apa handi ku tumu ou nokuya po, nakeshe eshi handi shi ku lombwele ou noku shi popya. 8 Ino va tila, osheshi Ame ondi li pamwe naave ndele handi ku xupifa.” Omwene osho ta ti. 9 Opo nee Omwene okwa nana eke laye nokwa kuma nge kokanya. Ndele Omwene okwa tya kwaame: “Tala, ohandi tula eendjovo dange mokanya koye. 10 Tala, nena eli ohandi ku tula po kombada yoiwana noyomauhamba oku i dikula po noku i nyona po, noku i hanauna po noku i tunga noku i twika.”
(Jeremia 1:17-19) Ove hano limangeleka moshiya shoye, fikama u tonge kuvo adishe handi di ku lombwele. Ino va tila, opo Ame ndihe ku halukife moipafi yavo. 18 Osheshi tala, onena tuu eli ohandi ku ningi ohotengulu ya pama nongudi yoshivela nekumahote loshikushu okukondjifa oshilongo ashishe, eehamba daJuda, omalenga aye omakulunhu, ovapristeli noshiwana shomoshilongo. 19 Ndele vo otave ke ku lwifa, ndelenee itave ku dulu nande, osheshi Ame ondi li pwoove nohandi ku xupifa,” Omwene osho ta ti.
Oho dulika kuKalunga ile okovanhu?
18 Kalunga okwa li a lombwela omuprofeti Jeremia a ti: “Ame ondi li pamwe naave ndele handi ku xupifa.” (Jeremia 1:8) Ongahelipi Jehova ta dulu oku tu xupifa momahepeko kunena? Otashi dulika a longife ovapanguli ve na ondjele, ngaashi a li a longifa Gamaliel. Ile otashi dulika a yukife oinima opo omukwanepangelo omupataneki a pingenwe po ombadilila kuumwe oo e na ondjele. Omafimbo amwe, Jehova ota dulu okweefa ovapiya vaye va kale tava hepekwa. (2 Timoteus 3:12) Ndele ngeenge okwa efa tu hepekwe, ote ke tu pameka opo tu lididimike. (1 Ovakorinto 10:13) Kashi na nee mbudi kutya Kalunga ota efa shike shi tu ningilwe, oushili oo tu na oyoo kutya: Ovo tava kondjifa oshiwana shaKalunga, paulelalela oye tava kondjifa, noitava ka pondola sha.
jr 88 okat. 14-15
“Ame ohandi hekeleke omwenyo wa loloka”
OHO HEKELEKE NGOO EEMWENYO ODO DA LOLOKA?
14 Oshi li pandunge okutala kunghee Jeremia a li a tuwa omukumo nosho yo nghee a li a twa omukumo ovo va li ve na ‘eemwenyo da loloka.’ (Jer. 31:25) Omuprofeti oo okwa li a tuwa omukumo kuJehova odikilila. Diladila ashike ngeno nghee tashi ke ku pameka okuuda Jehova te ku lombwele ta ti: “Osheshi tala, onena tuu eli ohandi ku ningi ohotengulu ya pama . . . vo otave ke ku lwifa, ndelenee itave ku dulu nande, osheshi Ame ondi li pwoove nohandi ku xupifa, Omwene osho ta ti.” (Jer. 1:18, 19) Jeremia okwa li a popya shi na sha naJehova e na omalinyengotomheno mawa a ti: “Oove eenghono dange neameno lange noshihondameno shange mefiku loudjuu!” — Jer. 16:19.
15 Oshididilikwedi eshi Jehova a lombwela Jeremia a ti: “Ame ondi li pamwe naave.” Mbela owa didilika osho u na okuninga po ngeenge to tu umwe omukumo? Osho osho tu na okukaleka momadiladilo ngeenge hatu tu ovaitaveli vakwetu omukumo tashi dulika omumwatate ile omumwameme ile keshe tuu oo a pumbwa ehekeleko. Peemhito dihapu, otwa pumbwa okuhopaenena onghedi omo Kalunga a li a twa Jeremia omukumo. Peemhito dimwe otwa pumbwa okupopya eendjovo tadi tu omukumo ashike hakupopyaana. Eendjovo dinini ohadi tu omukumo ngeenge oda hoololekeka. Eendjovo detu nadi kale alushe tadi tungu. Eendjovo doye nadi kale da nafangwa, di hokwifa notadi kumu Ovakriste vakweni. Eendjovo da tya ngaho ohadi tu lela omukumo. — Lesha Omayeletumbulo 25:11.
Konakona moule omamona opamhepo
(Jeremia 2:13) Osheshi ovanhu vange ova nyona pavali: Ove liteeka nge nande Aame ofifiya yomeva omwenyo, ndele vo ve lixupila omifima da tenda omifya, dihe shii okukala omeva.
(Jeremia 2:18) Hano paife oto ka mona shike, eshi to i kuEgipiti u ka nwe omeva aNil? Ndele to ka mona shike eshi to i kuAsiria u ka nwe omeva omulonga waEufrat?
Omanenediladilo okudja membo laJeremia
2:13, 18. Ovaisrael ovashunimonima ova li va nyona omanyono opavali. Ova li va fiya po Jehova, oo e li odjo yashili yomanangeko noupuna, yewiliko nosho yo yeameno. Ova li yo ve lixupila omifima davo dopafaneko mokuninga oukumwe wopakwaita nOvaegipti nOvaassiria. Ngeenge otwa fiye po Kalunga kashili kunena nokushikula oufilosofi wovanhu nosho yo omadiladilo neepolotika dounyuni, otwa fa omunhu te liteeka po “ofifiya yomeva omwenyo” ndele te lixupile “omifima da tenda omifya.”
(Jeremia 4:10) Opo ame onda tya: “Akutu, Omwene Kalunga, oshili Ove wa limbilika oshiwana eshi nOvajerusalem, eshi wa tile: Onye otamu ka kala mu nombili, ndele eongamukonda otali tyuula fiyo momwenyo.”
Omanenediladilo okudja membo laJeremia
4:10; 15:18—Omeityo lilipi Jehova a li a limbililika oshiwana shaye osho sha li she mu liteeka? Pefimbo laJeremia opa li ovaprofeti ovo va li tava “xunganeke oipupulu.” (Jeremia 5:31; 20:6; 23:16, 17, 25-28, 32) Jehova okwa li a efa ovaprofeti ovo va kale tava xunganeke oinima yongaho.
Elesho lOmbiibeli
(Jeremia 4:1-10) Israel ngeenge to aluka, Omwene ta ti, aluka u uye kwaame. Nongeenge to kombo po oixuna yoye koshipala shange, opo nee ito pumbwa okweelaela vali. 2 Opo nee ove to ka ana moshili nomouyuki nomouyapuki, to ti: “Oshili, ngaashi Omwene e nomwenyo!” Noiwana aishe otai linangeke noupuna muye, ndele tai lifimanekele muye. 3 Osheshi Omwene osho ta ti kovalumenhu Ovajuda nOvajerusalem: Likokoleleni oshikokola shipe, inamu kuna meeshosholo. 4 Lipitifileni Omwene etanda nye mu ekeleshi onyata yokomutima, onye ovalumenhu Ovajuda nOvajerusalem, oupyuhandu wange opo uha xwame ngaashi omundilo wa xwama, uhe shi kudimwa, omolwowii woilonga yeni. 5 Udifileni mu Juda nye mu shiivifile muJerusalem mu tye: Shikeni omanghuma moshilongo ashishe! Ingideni pombada mu tye: Ongaleni, tu yeni moilando i nohotekuma ya pama. 6 Dikeni epandela lwokuSion, fadukeni po, inamu kanghama! Osheshi ohandi eta omupya tau di koumbangalanhu nomahanauno madjuu. 7 Onghoshi otai shituluka momufitu wayo, nomuhanauni woiwana okwa fikama, a dja konhele yaye yokukala, a teye po oshilongo shoye shi ninge ombuwa. Oilando yoye otai ka ninga omaputu, itamu kala vali ovanhu. 8 Onghee hano lidikeni eeshako, kemeni nokulila, osheshi oupyuhandu wOmwene inau tu efa. 9 Ndele mefiku tuu olo, Omwene osho ta ti, ohamba nomalenga aye otava ka kala va limbililwa vehe nouladi, ovapristeli tava ka kala va haluka novaxunganeki tava kala nokumwena. 10 Opo ame onda tya: “Akutu, Omwene Kalunga, oshili Ove wa limbilika oshiwana eshi nOvajerusalem, eshi wa tile: Onye otamu ka kala mu nombili, ndele eongamukonda otali tyuula fiyo momwenyo.”
13-19 MARSA
OMAMONA OMEENDJOVO DAKALUNGA | JEREMIA 5-7
“Ova efa po okulonga ehalo laKalunga”
(Jeremia 6:13-15) “Osheshi vo aveshe, ounona vavo novakulunhu, ve hole eliko loipupulu, ovaxunganeki novapristeli aveshe ve nekonda. 14 Ndele vo ova hala okuhakula noupu oshiponga shomona okakadona koshiwana shange, eshi tava ti: Ombili, ombili. Nande kape nombili. 15 Vo otava ka fifwa ohoni, shaashi ova longa oixuna, voovene inava shiiva okufya ohoni, vehe neudito lohoni, onghee ove nokufila pamwe noonakudipawa. Pomafiku enya nge handi va handukile, otava ka xutuka, Omwene osho ta ti.
w88 4/1 11-12 okat. 7-8
Jeremia omuprofeti wetokolo laKalunga olo li tondike
7 Jehova okwa lombwela Jeremia a ti: “Ndele vo otave ke ku lwifa, ndelenee itave ku dulu nande.” (Jeremia 1:19) Ndele omolwashike Ovajuda novapangeli vali va hala okulwifa omuprofeti oo? Omolwaashi etumwalaka olo ola li la kuma onghedi yavo yokukalamwenyo nonghedi yavo yelongelokalunga yoshito oyo inai koshoka. Jeremia ka li nande e va ningila owii, okwa ti: “Tala, ondjovo yOmwene oya ninga oiyolifa yavo inave i hala. Osheshi vo aveshe, ounona vavo novakulunhu, ve hole eliko loipupulu, ovaxunganeki novapristeli aveshe ve nekonda.” — Jeremia 6:10, 13.
8 Oshoshili kutya ovo va li tava wilike oshiwana mokuninga omayambo. Ova li hava kufa ombinga melongelokalunga lashili, ashike ka va li have shi ningi nomutima aushe. Ova li va fimaneka eenghedindjikilile ponhele yokukala nelihumbato la koshoka. Pefimbo opo tuu opo, ovawiliki velongelokalunga lOshijuda ova li va ningifa oshiwana shi itavele oipupulu tava ti: “Ombili, ombili.” Nande kape nombili. (Jeremia 6:14; 8:11) Ova li tava fufya ovanhu va itavele kutya ope na ombili pokati kavo naKalunga. Ova li tava diladila kutya oinima aishe otai ende nawa, na Jehova ote va amene ve li oshiwana shaye, osho shi li moshilando shiyapuki notembeli. Ndele mbela Jehova osho ngoo a li e shi tala ko ngaho?
(Jeremia 7:1-7) Ondjovo yOmwene, ei ya hanga Jeremia, otai ti: 2 “Inda u ka kale ofika poshivelo shotembeli yOmwene, ove u ka udife ko ondjovo ei, u tye: Udeni ondjovo yOmwene, onye amushe vomuJuda, hamu uya mo moivelo ei okwiilikana Omwene.” 3 Omwene womatanga ovakwaita, Kalunga kaIsrael ota ti ngaha: Wapekeni eendjila deni noilonga yeni, opo nee Ame ohandi mu pe onhele okukala apa 4 Inamu lineekela eendjovo doipupulu, eshi tava ti: Otembeli yOmwene, otembeli yOmwene, otembeli yOmwene oyo ei. 5 Ndelenee ngeenge tamu wapaleke eendjila deni neenghedi deni, nongeenge tamu kala nokudiinina etokolo liyuki mokukalafana kweni 6 novaendanandjila neefiye novafiyekadi itamu va hepeke nongaashi itamu tileshi ohonde ihe netimba ponhele ei noitamu shikula oikalunga yokoilongo, i mu twale moshiponga 7 opo nee Ame ohandi mu itavelele okukala monhele ei, medu eli nde li pa ooxokulu fiyo alushe.”
w88 4/1 12 okat. 9-10
Jeremia omuprofeti wetokolo laKalunga olo li tondike
9 Jehova okwa li a lombwela Jeremia a kale ta pashukile omivelo dotembeli nokuudifile ovanhu etumwalaka laYe ovo tave uya kotembeli. Okwa li e na oku va lombwela kutya: ‘Inamu lineekela eendjovo doipupulu, eshi tava ti: Otembeli yOmwene, otembeli yOmwene, otembeli yOmwene oyo ei ihe na nekwafo lasha.’ Ovajuda ova li tava ende she likolelela kwaasho ve wete ndele ha neitavelo eshi va li tave litadele otembeli. Ova li va dimbwa diva eendjovo daJehova eshi a li te va londwele a ti: “Eulu olo olukalwapangelo lange, nedu olo oshipundi sheemhadi dange. Ongulu ei tamu i tungile nge oi li peni?” Jehova oo e li Omunaenghono meshito alishe ita nyengwa okuhanauna po otembeli nande nai kale iyapuki shi fike peni. — Jeremia 7:1-8; Jesaja 66:1.
10 Jeremia okwa li a twikila nokuudifa etumwalaka olo li tondike a ti: “Ongahelipi hano? Nye otamu vake nokudipaa nokuhaela nokwaana nokutwimina Baal nokufimaneka oikalunga yokoilongo muhe i shii, . . . ndele tamu ti: Fye otwa mangululwa, opo tu wanife vali oixuna ei aishe.” Ovajuda, ovo ve li oshiwana shaKalunga oshihoololwa, ova li tave lipopile kutya Kalunga ote ke va dimine po omolwomatauluko avo shimha ashike tava eta omayambo kotembeli. Ashike ova li ve na okulundulula omikalo davo ngeenge ova li va tala ko Jehova a fa xe oo a efela omona waye noke na omikalo. — Jeremia 7:9, 10; Exodus 19:5, 6.
(Jeremia 7:8-15) Ndelenee tala, nye hamu lineekele eendjovo doipupulu dihe nekwafo lasha. 9 Ongahelipi hano? Nye otamu vake nokudipaa nokuhaela nokwaana nokutwimina Baal nokufimaneka oikalunga yokoilongo muhe i shii, 10 ndele tamu uya ndele tamu holoka koshipala shange mongulu ei ya lukilwa edina lange, ndele tamu ti: Fye otwa mangululwa, opo tu wanife vali oixuna ei aishe. 11 Omwa tala ongulu ei ya lukilwa edina lange, oya ninga ekololo lovanyeki? Naame yo osho handi i tale, Omwene osho ta ti. 12 Indeni konhele yange ei ya li muSilo oko nda nangekele pehovelo edina lange, nye mu tale nhumbi nde i ninga omolwowii wovanhu vange Ovaisraeli. 13 Hano paife, osheshi mwa longa oilonga aishe ei, Omwene osho ta ti, nande nde mu popifa manga ku yela, nye inamu uda, ndele nande Ame nde mu ifana pombada, nye inamu itavela nge, 14 osho hano ongulu ei ya lulikwa edina lange, ndele tamu i lineekele, nonhele ei nde i mu pa, onye nooxokulu, nda hala ndi ninge ngaashi nda ninga Silo. 15 Ndele handi ke mu kandula po koshipala shange ngaashi nda kandula po ovakweni nepata alishe laEfraim.
jr 21 okat. 12
“Pomafiku axuuninwa”
12 Pehovelo lokupangela kwohamba Jehoiakim, Jehova okwa li a lombwela Jeremia a ye kotembeli opo a ka tokole oilonga ii yOvajuda. Ova li va tala ko otembeli yaJehova i li oshiketi shoku va amena. Jehova ka li ta kala a hokwa otembeli ngeenge kava li tava ka efa po ‘okuvaka, okudipaa, okuhaela, okwaana nokutwimina Baal nokufimaneka oikalunga yokoilongo.’ Jehova okwa li ta ka ningila ovanaihelele ngaashi ashike a li a ningila etwalihangano lomuShilo pefimbo lOmupristeri Omukulunhu Eli. Oshilongo shOvajuda “otashi ka ninga omakulukuma ongaho.” (Jer. 7:1-15, 34; 26:1-6) Jeremia ka li tuu a pumbwa ouladi opo a dule okuudifa etumwalaka olo! Shihokwifa, Jeremia okwa li ha udifile moipafi yovanenenhu. Nokunena, ovamwatate novamwameme vamwe ova pumbwa ouladi opo va dule okukala tava udifa momapandavanda ile okuudifila ovanenenhu ile ovanhu ovo va talika ko va fimana. Nafye ohatu dulu okukala noushili kutya Jehova ota ka kala pamwe nafye ngaashi ashike a li pamwe naJeremia. — Heb. 10:39; 13:6.
Konakona moule omamona opamhepo
(Jeremia 6:16) Omwene osho okwa popya: Indeni ko keendjila, nye mu tale, mu pule omalila enya oshito, a endwa nale, oo okwa li ondjila yelao, nye mu ende nayo, ndele nye otamu ka monena eemwenyo deni etulumuko. Ndelenee vo ova nyamukula: Inatu hala okweenda nado.
Oto ka enda tuu pamwe naKalunga?
11 Mbela ohatu efa ngoo shili Eendjovo daKalunga di tu wilike filufilu? Oshiwa okulikonakona nawa efimbo nefimbo. Tala kovelishe oyo tai ke tu kwafela tu shi ninge, tai ti: “Omwene osho [a] popya: Indeni ko keendjila, nye mu tale, mu pule omalila enya oshito, a endwa nale, oo okwa li ondjila [iwa, OB-1986], nye mu ende nayo, ndele nye otamu ka monena eemwenyo deni etulumuko.” (Jeremia 6:16) Eendjovo odo otashi dulika di tu dimbulukife omweendanandjila oo ta kanghama pomashakeneno eendjila opo a pukululwe. Meityo lopamhepo, oshiwana shaJehova oshinashibofa muIsrael osha li sha pumbwa okuninga sha faafana. Osha li sha pumbwa okushuna ‘komalila enya oshito, a endwa nale.’ “Ondjila iwa” oyo oya li ondjila oyo ooxekulululwa ovadiinini va li va enda nayo, oyo oshiwana osho sha li sha kanduka mo omolwoulai washo. Ndele shinyikifa oluhodi, Israel oshe linyenga nondudi kedimbulukifo olo lopahole la dja kuJehova. Ovelishe oyo tuu oyo otai twikile tai ti: “Ndelenee vo ova nyamukula: Inatu hala okweenda nado.” Ndele kunena oshiwana shaKalunga oshe linyenga monghedi i lili komayele a tya ngaho.
(Jeremia 6:22, 23) Omwene osho ta ti: Otapa di ovanhu kedu lokoumbangalanhu, noshiwana shinene tashi djuuka, tashi di kominghulo dedu. 23 Ove nomauta nomaonga, ovapwidi, vehe nonghenda. Eweelelo lavo ongaashi engungumo lefuta ndele tava londo eenghambe, ve lilongekida ngaashi ovakwaita, ve ku tondokele, ove omona okakadona kaSion.
w88 4/1 13 okat. 15
Jeremia omuprofeti wetokolo laKalunga olo li tondike
Oidjemo yaJuda
15 Lwomo 632 K.O.P., Assiria okwa li sha hanaunwa po kuKaldea naMedia naasho osha ninipika eenghono daEgipti dokupangela koumbuwanhu waJuda. Ovajuda ova li ve li moshiponga omolwomaponokelo oo kwa li tae va dilile koKaldea naMedia koumbangalanhu. Jeremia okwa li a lombwela Ovajuda vakwao onghundana ii tai ti: “Otapa di ovanhu kedu lokoumbangalanhu . . . ovapwidi, vehe nonghenda. . . . Ve lilongekida ngaashi ovakwaita, ve ku tondokele, ove omona okakadona kaSion.” Pefimbo opo Babilon osho sha li shi na eenghono mounyuni aushe. Otashi dulika Kalunga a longifa Babilon shi handukile Juda osho shi vehe fi shidiinini. — Jeremia 6:22, 23; 25:8, 9.
Elesho lOmbiibeli
(Jeremia 5:26-6:5) Osheshi movanhu vange omu novadinikalunga; vo ohava hondjaunine ngaashi ovakongi veedila have likoko, vo ohava tele omiyo ndele hava kwata ovanhu. 27 Ngaashi omhu i yadi oudila, osho yo omaumbo avo e yadi ekonda; panghedi ei ova ninga ovanenenhu noipuna. 28 Ova ondoka, va ondokelela, va twima omaadi, ndele hava kungu eendjovo dii; vo ihava yukifa pashili eendjovo deefiye ihave di yukifa noku va popila. Eehepele yo ihave va popile va tokolwe nawa. 29 Hano ondi kale ngahelipi itandi va handukile ngeno, Omwene osho ta ti, ile omwenyo wange u kwatele ovanhu va tya ngaha onghone? 30 Oixuna, oixuna tai tumhaukifa omaxwilili, oya ningwa moshilongo. 31 Ovaxunganeki otava xunganeke oipupulu, ovapristeli ohava pangele pahalo laavenya; novanhu vange osho ve hole osho. Ndelenee hauxuuninwa otamu ka ninga ngahelipi?
6 MuJerusalem djeni onhapo, onye Ovakwabenjamin! Shikeni enghuma muTekoa, nye mu dikile muBet-Hakerem edidiliko lomundilo, osheshi koumbangalanhu otaku di oshiponga nehanauno lidjuu! 2 Omona okakadona kaSion muwa, ye a yakulwa unene, ohandi mu hanauna po. 3 Otapa ka dja ovafita noimuna yavo tave uya kuye, ndele tava ongo eenhanda, tava lifa keshe tuu umwe ponhele yaye. 4 Lilongekideni, va kuwileni onghuwo, fikameni tu ka fike ko pokati komutenya! Woo, osheshi etango otali toka nokuli. Omididimbe donguloshi tadi i kokule. 5 Fikameni, tu ka fike ko oufiku, tu ka xwike po eengulu daye doupuna.
20-26 MARSA
OMAMONA OMEENDJOVO DAKALUNGA | JEREMIA 8-11
“Ovanhu otava dulu ashike okupondola ngeenge tava shikula ewiliko laJehova”
(Jeremia 10:2-5) Omwene ota ti ngaha: “Inamu liikifa eenghedi dovapaani, nye inamu tila omadidiliko okeulu, osheshi ovapaani have a tila. 3 Osheshi oiwana hai shikula oikalunga yongaho; omuti womofuka wa kewa, ndele wa hongwa komake omunongo e u hongifa ekuva laye, 4 vo otave u wapaleke noshisiliveli noshingoldo note u pangelifa eendungu nohamala uha tengauke po. 5 Oyo i li ngaashi ekumbeti moshikunino shomatanga, lihe shii kupopya; yo oi nokuhumbatwa, osheshi ihai shiiva okweenda. Inamu i tila, osheshi itai dulu okulonga owii, ndelenee kai neenghono okuninga ouwa yo.”
(Jeremia 10:14, 15) Omunhu keshe ehe neendunge, ke neshiivo, keshe omuhambwidi woshingoldo ta fifwa ohoni koshihambulwa shaye, osheshi oshifolomwafano shaye osho oipupulu yongaho, nokashi nomhepo musho vene. 15 Yo oinima yongaho, oshilonga shoiyolifa, nefimbo lokuhandukilwa kwavo ngeenge tali uya, otai nyonauka po.
it-1 555
Omatanga
Eepala neengudi nosho yo oinima imwe vali oya li hai dikwa mepya i li ngaashi “ekumbeti moshikunino shomatanga, opo oimuna iha dule okuya mo,”onghee hano omuprofeti Jeremia okwa li a faafanifa oihongwafano oyo ya li hai longelwa koiwana imwe nekumbeti olo. — Jer 10:5.
(Jeremia 10:6, 7) Kape na ou e ku fa, Omwene, Oove omunene, edina loye linene, li neenghono. 7 Olyelye ehe ku tile ngeno, Oove ohamba yoiwana? Heeno, Ove u neshushu, osheshi movanongondunge aveshe vomoiwana nomomauhamba avo kamu na nande umwe e ku fa.
(Jeremia 10:10-13) Ndelenee Omwene Oye Kalunga kashili, Oye Kalunga omunamwenyo, ohamba yaalushe. Edu ohali kakama kehandu laye, noiwana itai dulu oupyuhandu waye. 11 Hano nye omu noku va lombwela mu tye: Oikalunga oyo inai shita nande eulu ile edu, tai pepuka po kombada yedu nokoshi yeulu. 12 Oye tuu ou a shita edu neenghono daye mwene, nounyuni e u pameka nounongo waye. Neulu okwe li valela komayele aye. 13 Ondaka yaye nge tai ndunduma, oshihomo shodula tashi udika meulu, noilemo ote i menifa kominghulo dedu note i yelula pombada. Ye ota shelifa omaluvadi nokuninga odula ndele ta pendula omhepo momalimba aye.
Oolyelye tava fimaneke Kalunga kunena?
10 Kutya nee oto tale keulu ile oto tale nawa keshito oku kombada yedu, oumbangi u na sha nOmushiti owa yela. (Jeremia 10:12) Otu na okudimina pamwe noishitwa yomeulu oyo tai ingida tai ti: “Omwene wetu naKalunga ketu, Ove wa wana okutambula efimano nefimaneko nepangelo, osheshi Ove wa shita oinima aishe.” (Ehololo 4:11) Ndele ovanongononi vahapu ova dopa okumona oumbangi oo ‘nomesho avo omomutima,’ nonande otashi dulika nokuli va kumwifwa komudutilo woinima oyo ve wete nomesho okomutwe. (Ovaefeso 1:18) Ohatu dulu oku shi faneka monghedi ei: Okupanda ewapalo nomudutilo woinima yomoushitwe ndele hatu anye okukala po kwOmushiti Munene kashi li pandunge, ongaashi ashike okupanda efano liwaliwa ndele hatu anye okudimina okukala po kwomufaneki oo a faneka efano la denga mbada koshiyata sha li inashi fanekwa sha. Hano itashi kumwifa eshi ovo tava anye okwiitavela Kalunga taku tiwa kutya ‘kave na elipopilo.’
(Jeremia 10:21-23) Osheshi ovafita ova li va laipikwa nongaashi inava konga Omwene, onghee ova li vehe nelao, noshiwana shavo ashishe osha li she lihana. 22 Pwilikina! Oshihomo tashi uya, eweelelo linene tali di koshilongo sha ama koumbangalanhu li hanaune po oilando yaJuda i ninge onhele yeembadje. 23 Akutu, Omwene, ondi shi shii nokutya, ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.
w15 11/1 okat. 15
Mbela ou udite wa nyematekwa kuKalunga?
Eenghalo dii odo di li kombada yedu kunena otadi yandje oumbangi kutya omapangelo opanhu okwa dopa filufilu. Inaa dopa ashike okweeta ombili, eameno, ehafo ndele ohaa nyono yo edu. Oushili oo ou liwetikile nawa mOmbibeli eshi ya ti: ‘Ondjila yomunhu ihai kala mepangelo laye mwene, nhumbi ta ende, nhumbi ta yukifa eenghatu daye.’ (Jeremia 10:23) Onghedi yaKalunga yokupangela oyo ashike tai dulu okweeta ombili tai kalelele, ehafo nokweetela ovanhu ouwa molwaashi oshi li metwokumwe nelalakano laye. — Jesaja 45:18.
Konakona moule omamona opamhepo
(Jeremia 9:24) Ndelenee ou te litangele, ne litangele ondunge yokushiiva nge kutya, Aame Omwene, handi wanifa onghenda nouyuki nouwa kombada yedu, osheshi oinima ei onde i hokwa, Omwene ta ti.
Ehena alushe popepi naJehova
16 Inashi puka okukala tu udite etumba ile ounhwa omolwoinima iwa. Pashihopaenenwa, otu udite ounhwa ile etumba eshi tu li Eendombwedi daJehova. (Jer. 9:24) Ndele otu na okulungama tuha kale hatu diladila kutya otu shii shihapu tu dule Jehova, molwaashi osho otashi ke tu ehenifa kokule naye. — Eps. 138:6; Rom. 12:3.
(Jeremia 11:10) Vo ova shunina momanyonauno ooxekulu votete, venya va li va anya okudulika keendjovo dange, ndele va shikula oikalunga noku i longela. Eumbo laIsrael neumbo laJuda okwa teya po ehangano nde li ningilile nooxekulu vavo.
Omanenediladilo okudja membo laJeremia
3:11-22; 11:10-12, 17 — Omolwashike Jeremia a li a kwatela momatumwalaka aye ouhamba womapata omulongo aIsrael, nonande Samaria osha li sha hanaunwa po nale mo 740 K.O.P.? Etomheno molwaashi Jerusalem sha li sha hanaunwa po mo 607 K.O.P. ola li okuhandukila oshiwana shOvaisrael ashishe, ndele haVaisrael ashike vomouhamba waJuda. (Hesekiel 9:9, 10) Kakele kaasho, Ovaisrael vomouhamba womapata omulongo novakalimo vomuJuda naJerusalem ova li ve na etimaumbwile limwe li na sha netungululo. Nomolwaasho ovaprofeti vaKalunga ova li va twikila okukwatela mo Israel momatumwalaka avo.
Elesho lOmbiibeli
(Jeremia 11:6-16) Ndele Omwene okwa lombwela nge: “Eendjovo odo adishe di udifila moilando yaJuda nomomapandavanda aJerusalem u tye: Udeni eendjovo dehangano eli nye mu di wanife! 7 Osheshi onda pukulula shili ooxokulu, eshi nde va tembula medu laEgipiti, nofiyo onena onde va pukulula nonda tya: Pwilikineni ondaka yange. 8 Ndelenee vo inava pwilikina nongaashi inava ameka okutwi kwavo kwaame, ndelenee vo, keshe umwe, ova kala nokweenda moukukutu womitima davo dii. Onghee nda eta kombada yavo eendjovo adishe dehangano eli nde li va pele ve di wanife, ndelenee vo inave di wanifa.” 9 Ndele Omwene okwa lombwela nge, ndele ta ti: “Mokati kovalumenhu vaJuda nomokati koonakukala muJerusalem omu nehangakeno. 10 Vo ova shunina momanyonauno ooxekulu votete, venya va li va anya okudulika keendjovo dange, ndele va shikula oikalunga noku i longela. Eumbo laIsrael neumbo laJuda okwa teya po ehangano nde li ningilile nooxekulu vavo. 11 Onghee hano Omwene ota ti ngaha: ‘Tala, Ame ohandi va etele oshiponga tashi va nyenge okulixupifa mo. Nongeenge tava ifana nge, itandi va udu. 12 Ndele oilando yaJuda noonakukalamo muJerusalem, ngeenge tava i ko va ka ifane oikalunga oyo ve i xwikila omayambo, yo itai va xupifa mo mefimbo loshiponga shavo. 13 Akutu oove, Juda! Osheshi omuvalu woikalunga yoye, Juda u fike poilando yoye nongaashi omapandavanda omuJerusalem mahapu osho mwa dikila oshikalunga shohoni eealtari, mu xwikile Baal omayambo.’ 14 Ndele ove ino ilikanena ovanhu ava, u twale ondaka yoye pombada oku va popila nomailikaneno, osheshi Ame itandi va udu, ngeenge tava kuwile nge ekwafo omolwoshiponga shavo. 15 Omuholike wange ota kongo mo shike motembeli yange? A wanife omakoto ngeno? Omaudaneko mayapuki nombelela yeyambo otai kufa po tuu mwoove owii woye? Ngeno ngaha, ngeno to kala nokunyakukwa! 16 Omwene okwe ku luka edina loye: ‘Olumono litalala la wapala li neemono da kola nawa,’ ndelenee mokupepa kwomhepo inene okwe li temena omundilo, oitai yalo oya nyonauka po.
27 MARSA–2 APRILI
OMAMONA OMEENDJOVO DAKALUNGA | JEREMIA 12-16
“Ovaisrael ova li va dimbwa Jehova”
(Jeremia 13:1-5) Omwene okwa lombwela nge ngaha: “Inda u ke lilandele ekwamo loshiyata, ove u li djale moshiya, ndelenee ino li efa li ye momeva.” 2 Ndele ame onde lilandela ekwamo, ngaashi Omwene a lombwela nge nonde li djala moshiya shange. 3 Opo nee ondjovo yOmwene oya hanga nge lutivali tai ti: 4 “Kufa ekwamo we li lilandela, we li djala moshiya shoye, fikama u ye komulonga waEufrat, ove u ke li holeke kwinya mokakololo kemanya.” 5 Ndele ame onda ya ko, nonde li holeka puEufrat, ngaashi Omwene a lombwela nge ndi ninge.
jr 51 okat. 17
Pashukila omutima molwaashi ou na omakoto
17 Oshinakuwanifwa shaJeremia osha li sha kwatela mo okudulika komalombwelo aJehova. Ngeno oove wa li Jeremia, mbela ngeno owa dulika ngoo komalombwelo oo wa li wa pewa? Pomhito imwe, Jehova okwa li a lombwela Jeremia e lilandele ekwamo lomoshiya noku li djala. Opo nee Kalunga okwe mu lombwela a ye kuEufrat. Jeremia okwa li e na okweenda eekilometa 500 lwaapo ngeenge owa tale mokaalita. Okwa li e na okufudika ekwamo mekololo lemanya kuEufrat nokushuna kuJerusalem. Opo nee pomhito imwe vali, Kalunga okwa li e mu lombwela a ka tale ko ekwamo olo. (Lesha Jeremia 13:1-9.) Sha hala kutya Jeremia okwa li e na okweenda oshinano sheekilometa 1 900 okuya nokwaaluka. Ovakembauli vOmbibeli inava itavela kutya Jeremia okwa li a enda oshinano osho shile, opo hapa endwa oule weemwedi. (Esra 7:9) Ashike osho osho Kalunga a li a lombwela Jeremia a ninge, naasho osho naanaa a li a ninga.
(Jeremiah 13:6, 7) Eshi pa pita omafiku mahapu, Omwene okwa lombwela nge: Fikama, inda ko kuEufrat, ove u ka tale ekwamo nde ku lombwela u li holeke ko. 7 Opo nee ame onda ya ko kuEufrat, nonda fudula mo nonda kufa ekwamo konhele inya nde li holekele, ndele tala, ekwamo ola nyonauka kali na vali oshilonga.
jr 52 okat. 18
Pashukila omutima molwaashi ou na omakoto
18 Kala nee ngeno wa fa u wete omuprofeti oo ta tavakana eemhunda daJudea noku li melila a finda mombuwa langhele kuEufrat. Ndele okwa li ashike ta ka fudika ekwamo. Efimbo lile olo a kala ehe po otashi dulika la pendula omalipulo movashiinda shaye. Ashike eshi a ka aluka, ka li e na ekwamo. Opo nee Kalunga okwa li e mu lombwela vali a shune molweendo olo lile a ka tale ko ekwamo olo, ashike okwa hanga la ola ‘nokali na vali oshilonga.’ Otashi dulika sha li shipu okudiladila kutya: ‘Onde lihepeka. Kandi udite ko etomheno lokuninga ngaha.’ Molwaashi okwa li a mewa kuKalunga, ka li nande e li nyenga monghedi ya tya ngaho. Ponhele yokungongota, okwa li a ninga naanaa ngaashi a lombwelwa.
(Jeremia 13:8-11) Ondjovo ei yOmwene oya hanga nge tai ti: 9 Omwene ota ti ngaha: Osho ngaha ohandi ka shundula elinenepeko linene laJuda nolaJerusalem. 10 Oshiwana eshi shii tashi anye okupwilikina eendjovo dange, ndele tashi kala nokweenda moukukutu womutima washo, tashi shikula oikalunga noku i longela nokulinyongamena kuyo, tashi ka kala ngaashi ekwamo eli, kali na vali oshilonga. 11 Osheshi ngaashi ekwamo lomulumenhu hali kwata oshiya, osho yo ame handi ka kwatakanifila mwaame mwene eumbo alishe laIsrael neumbo alishe laJuda, Omwene osho ta ti, opo vo va ninge oshiwana shange nefimano lange nehambelelo lange noshinge shange. Ndelenee vo inava dulika.
jr 52 okat. 19-20
Pashukila omutima molwaashi ou na omakoto
19 Kalunga okwa ka yelifila ashike Jeremia osho tashi ka ningwa po konima yolweendo olutivali. Jeremia okwa li a katuka eenghatu opo a yandje etumwalaka la kwata moiti ta ti: “Oshiwana eshi shii tashi anye okupwilikina eendjovo dange, ndele tashi kala nokweenda moukukutu womutima washo, tashi shikula oikalunga noku i longela nokulinyongamena kuyo, tashi ka kala ngaashi ekwamo eli, kali na vali oshilonga.” (Jer. 13:10) Kai fi tuu onghedi ya denga mbada omo Jehova ha hongo ovapiya vaye! Jeremia okwa li a dula okuhanga omitima dovanhu molwaashi okwa li a dulika kuJehova tashi di komutima nomoinima oyo tai monika ya fa ya nafangwa. — Jer. 13:11.
20 Kunena Ovakriste ihava pulwa va ende oshinano sheekilometa opo va dule okuudifa. Mbela onghalamwenyo oyo wa hoolola u li Omukriste oya ningifa ovashiinda ile ovo ho endafana navo va kale tave lipula naasho ile ve ku kembaule? Otashi dulika shi kale onghedi yoye yokudjala, ehoololo loye li na sha nehongo, oilonga oyo to dulu okutambula ko ile onghedi omo ho tale ko oikunwa yoalkoholi. Mbela oto ka kala ngoo wa tokola toko okukala metwokumwe nomilandu daKalunga ngaashi Jeremia a li a ninga? Otashi dulika u ka mone oidjemo iwa mokuudifa molwaashi owa efa omutima woye u mewe kuKalunga. Ohatu ka mona ouwa tau kalelele ngeenge otwa kala hatu dulika komilandu daJehova odo tadi hangwa mEendjovo daye nokutambula ko omalombwelo oo ha yandje okupitila momupiya omudiinini nomunaendunge. Oto dulu okukala wa fa Jeremia oo ina efa a nwefwe mo komutima oo u na omakoto. Kala wa tokola toko okweefa Kalunga e ku me noku ku lundululila moshiyuma osho ta dulu okulongifa fiyo alushe.
it-1 1121 okat. 2
Oiya
Jehova okwa faafanifa oshiwana shaIsrael noshaJuda shi li ngaashi ekwamo moshiya shaye, osho tashi ulike kutya ova li tava dulu okukala nekwatafano lopofingo naYe opo shi dule oku mu longela noku kale e shi hokwa. (Jer 13:11) Jesus Kristus okwa fanekwa mexunganeko olo ta pangele pauyuki onga ekwamo moshiya noudiinini ngaashi omwiya meenho daye. Osho otashi dulika tashi ulike keenghono daJesus Kristus douyuki noudiinini odo ihadi lunduluka. Ngaashi ashike ekwamo hali yambidida oshiya, oukwatya wouyuki ohau kwafele Jesus a kale a pama eshi ta longo e li Omutokoli oo a hoololwa kuJehova. — Jes 11:1, 5.
Konakona moule omamona opamhepo
(Jeremia 12:1, 2) Omwene, Oove omuyuki, ame ohandi dulu tuu mbela oku ku twifa eemhata? Ndele onda hala ndi ku pule oshili i li peni moinima ei: omolwashike mondjila yovalunde omu nelao? Nomolwashike ovaliteeki aveshe ve li nombili? 2 Ove oto va twike, ndele vo otava twama. Ohava kulu ndele tava imike oiimati. Ove ho kala popepi momakanya avo, ndelenee kokule meemwenyo davo.
(Jeremia 12:14) Omwene osho ota ti mokupopya ovashiinda vange aveshe vai, ava hava kumu efyuululo lovanhu vange Israel nde li va tukulila: Tala, Ame ohandi va duda mo medu lavo vene, neumbo laJuda ohandi ke li duda mo mokati kavo.
jr 118 okat. 11
Mbela oho lipula efiku keshe kutya, “Jehova oku li peni?”
11 Jeremia okwa li e na omapulo okanaku e shi a mona ovakolokoshi tava pondola. (Lesha Jeremia 12:1, 3.) Nonande omuprofeti Jeremia okwa li a pula Jehova omapulo, ka li a limbililwa ouyuki waye noku mu “twifa eemhata.” Ouyuki owe mu ningifa a kale e na ekwatafano la kola naKalunga ngaashi ashike okaana oko ke hole xe. Jeremia okwa li a pula ngaho molwaashi ka li e udite kutya omolwashike Ovajuda vahapu tava pondola nonande ohava longo owii. Mbela Jeremia okwa li a mona omanyamukulo taa mbilipaleke? Jehova okwa li e mu shilipaleka kutya ota ka duda mo ovanhu ovo. (Jer. 12:14) Eshi Jeremia a mona nghee oinima tai ende, okwa li a ilikana kuKalunga naasho oshe mu kwafela a kale e na elineekelo kutya omunashili. Oshidjemo, Jeremia okwa ilikana kuXe Jehova Kalunga ndele tamu lombwele omaliudo aye aeshe.
(Jeremia 15:17) Ame inandi kala omutumba mokati kovadini. Omolweke loye ame nda kala aame andike, osheshi Ove owa yadifa nge noupyuhandu woye.
Kala wa yombama ngaashi Jeremia
Natu lungamene eendafano letu
16.Jeremia okwa popya yo shi na sha naasho she mu kwafela a kale neyombamo. Okwa ti: “Ame inandi kala omutumba mokati kovadini. Omolweke loye ame nda kala ame andike, osheshi Ove owa yadifa nge noupyuhandu woye.” (Jeremia 15:17) Jeremia okwa li a hoolola okulikalela ponhele yokunyonwa po kookaume vai. Nafye kunena ohatu tale ko oinima monghedi ya faafana. Ihatu dimbwa nande elondwelo lomuyapostoli Paulus kutya “ookaume [vai] otava nyono po eenghedi diwa,” nokuli neenghedi diwa odo twa kala nado omido dihapu. — 1 Ovakorinto 15:33.
Elesho lOmbiibeli
(Jeremia 13:15-27) Pwilikineni hano nye mu didilike, inamu kala nokulinenepeka, osheshi Omwene okwa popya. 16 Fimanekeni Omwene, Kalunga keni fimbo inaku laula nofimbo eemhadi deni inadi koyauka keemhunda momilaulu. Opo nee nye otamu kala nokuteelela ouyelele, ndelenee Ye ote u lundulula tau ningi omudidimbe wefyo, note u ningi omilaulu fokofoko. 17 Ndelenee ngeenge itamu di udu odo, ope nee omwenyo wange otau kala nokulila meholeko molwelinenepeko li fike opo, tau lili shili nomahodi otaa tondoka momesho ange, osheshi oshiwana shOmwene otashi ka twalwa moupika. 18 Tya kohamba nokomumbada: Kaleni omutumba poshi, poshielela, osheshi oshishani shetumbalo leni osha wa ko komitwe deni. 19 Oilando yokoumbuwanhu oya idilwa po nokape na ou te i yeulula vali. Juda ashishe osha twalwa moupika, aveshe ngaashi ve li. 20 Lyaameneni ko, mu tale, nhumbi tava di koumbangalanhu. Oshiwana we shi pelwe oshi li peni, eedi odo doye, etumbalo loye? 21 Oto ti ngahelipi, ye eshi ta ningi ovapangeli voye ovo we liikililifa oku va tala ovo ookaume koye? Ito hangika kefeto ngaashi omwalikadi omudali ta fetwa? 22 Ndele ngeenge ho lipopile momwenyo woye to ti: oinima i fike apa oya hangela nge shike? Molwomanyonauno oye eenyemba doshikutu shoye oda xumwa noififinwa yeemhadi doye oya monika. 23 Omuetiopia ota dulu tuu okushitukifa oshipa shaye ile ongwe omavala ayo? Ngeno tashi dulika, ngeno nanye yo otamu dulu okuwanifa ouwa, onye ava mwa ikilila owii. 24 Onghee hano Ame ohandi ke mu halakanifa ngaashi olungu tali i omhepo yokombuwa. 25 Oshipewa shoye noshitukulwa shoye nde shi ku tukulila, osho eshi, Omwene ta ti, shaashi ove owa dimbwa nge nowe lineekela oipupulu. 26 Onghee hano naame yo handi yelula omudjalo woye komesho opo u monike epenge. 27 Okuteya kwoye kwehombo nohole yoye yoipala noixuna yoye yoluhaelo loye kombada yoikulundudu yomoixwa, onde i mona. Woo oove Jerusalem! Ku na apa to koshoka. Tapa piti efimbo li fike peni natango, to ka koshoka?