NGHEE HATU DULU OKWEEFA PO OUTONDWE

2 | Ino Kwata Onghone

Osho Ombiibeli tai ti:

“Inamu alulila omunhu owii. . . . Ningeni ngaashi tamu dulu opo mu kale nombili novanhu aveshe. Inamu alulila omunhu owii, . . . osheshi opa shangwa: ‘“Ehandu olange, aame handi handukile ou ta nyono,” Jehova osho ta ti.’” — OVAROMA 12:17-19.

Osho osha hala okutya:

Nonande oshi li paushitwe okuuda nai ngeenge umwe e tu ninga nai, Kalunga ina hala tu kwatele omunhu onghone. Ponhele yaasho, okwa hala tu teelele nelididimiko, molwaashi okwa udaneka kutya mafiku ota ka kufa po okuhena ouyuki. — Epsalme 37:7, 10.

Osho to dulu okuninga po:

Ngeenge omunhu ina wanenena okwa kwata onghone, ohashi etifa outondwe muhapu. Onghee hano, ngeenge umwe okwe ku udifa nai, ile e ku yahameka ino mu alulila owii. Kendabala oku mu nyamukula nombili. Peemhito dimwe, oshi li xwepo u dimbwe osho sha ningwa po. (Omayeletumbulo 19:11) Ashike ngeenge pamwe oupyakadi owa kwata moiti, oto dulu oku shi lopota. Pashihopaenenwa, ngeenge ou li oshihakanwa shokuningilwa omunyonena, oto dulu oku shi lopota kopolifi, ile kuvamwe ovo ve na eenghonopangelo.

Okwaalulilafana owii ohaku naipike ashike onghalo

Ongahelipi ngeenge ou wete itashi shiiva okupongolola po oupyakadi monghedi yombili? Ile ongahelipi ngeenge owa ninga ngaashi to dulu, opo u pongolole po oupyakadi monghedi yombili? Ino alula owii. Osho otashi dulu okunaipika onghalo. Ponhele yaasho, finda outondwe. Oto dulu okweefela oinima momake aJehova. ‘Mu lineekela; Oye note shi ningi.’ — Epsalme 37:3-5.

Oshimoniwa shoshili—ADRIÁN

A efa po oukwatya wonghone

Eshi Adrián a li e na omido omulongo nasha, okwa li e na ekuni nokwa li ha lu momapandavanda omolwonghone. Okwa ti: “Luhapu onda li handi kwatelwa momalwoodi hatu longifa eendjebo, noikando ihapu onda li handi kala nda nangala handi shisha ohonde, novanhu ova li hava diladila kutya onda fya.”

Adrián okwa li a hovela okukonakona Ombiibeli eshi a li e na omido 16. Okwa weda ko a ti: “Eshi nda twikila okukonakona Ombiibeli, onda li nda mona kutya onda pumbwa okulundulula omaukwatya ange.” Okwa li e na okufinda outondwe nokweefa po elongifo leenghono. Okwa li a kwafelwa komushangwa oo u li mOvaroma 12:17-19 tau popi kombinga yokwaalulila ovanhu owii. Okwa ti: “Onda dimina kutya Jehova ota ka xulifa po okuhenouyuki ye mwene pefimbo la wapala. Mokweendela ko kwefimbo, onda li nda efa po elongifo leenghono.”

Onguloshi imwe, Adrián okwa li a ponokelwa kongudu imwe oyo a li ha lwifa nale. Omuwiliki wongudu oyo okwa ti: “Lipopila!” Adrián okwa ti: “Onda li nda halelela oku mu alulila owii.” Ashike ponhele yoku va alulila owii, okwa li a ilikana pauxupi kuJehova, ndele ta di po puvo.

Adrián okwa twikila ko a ti: “Ngomongula, onda li nda shakena nomuwiliki wongudu oyo. Onda li nda handuka nonda hala oku mu alulila owii, ashike onda li nda ilikana vali momutima kuJehova a kwafele nge ndi lipangele. Opo nee onda li nda kumwa eshi omunyasha oo e uya kwaame, ndele ta ti: ‘Dimine nge po omolwoshinima osho sha ningwa po onguloshi. Onda hala okukala nde ku fa. Onda hala okukonakona Ombiibeli.’ Onda li nda hafa eshi nda dula okupangela ehandu lange. Kakele kaasho, otwa hovela okukonakona Ombiibeli pamwe.”