NGHEE HATU DULU OKWEEFA PO OUTONDWE

4 | Oto Dulu Okufinda Outondwe Kekwafo Lakalunga

Osho Ombiibeli tai ti:

“Oiimati yomhepo oyo ei, ohole, ehafo, ombili, onheni, olune, ouwa, eitavelo, omwenyo muwa nelipangelo.” — OVAGALATI 5:22, 23.

Osho osha hala okutya:

Ohatu dulu okufinda outondwe kekwafo laKalunga. Omhepo yaye iyapuki otai dulu oku tu kwafela tu kulike omaukwatya oo tashi dulika itatu dulu okukulika kufye vene. Ponhele yokukendabala okufinda outondwe kufye vene, otwa pumbwa okulineekela muKalunga, opo e tu kwafele. Ngeenge otwa kala twe lineekela muKalunga, ohatu ka kala tu udite ngaashi omuyapostoli Paulus, oo a ti: “Ohandi dulu okufinda onghalo keshe omolwaau ta pe nge eenghono.” (Ovafilippi 4:13) Ohatu ka dula okupopya hatu ti: “Ekwafo lange otali di kOmwene.” — Epsalme 121:2.

Osho to dulu okuninga:

“Jehova okwa lundulula nge; nda li omulumenhu welongifo leenghono, ndele ta ningi nge omunambili.” — WALDO

Ilikana kuJehova, to mu pula e ku pe omhepo yaye iyapuki. (Lukas 11:13) Mu pula e ku kwafele u dule okukulika omaukwatya mawa. Konakona osho Ombiibeli tai ti kombinga yomaukwatya oo haa kufa po outondwe, ngaashi ohole, ombili, onheni nelipangelo. Tala kutya ongahelipi to dulu okuulika omaukwatya oo monghalamwenyo yoye. Panga oukaume naavo hava kendabala okukulika omaukwatya oo. Ookaume va tya ngaho otave ke tu ‘linyengifa tu kale tu holafane nohatu longo oilonga iwa.’ — Ovaheberi 10:24.

Oshimoniwa shoshili—WALDO

Okwa efa po elongifo leenghono

Waldo okwa kulila momudingonoko oo u na enwefemo lii. Okwa ti: “Onda li handi kufa ombinga momalwoodi oo haa luwa mepandavanda kovalandifi voingangamifi. . . Pomhito imwe, ongudu yovakondjifi vange oya li ya shiva omulumenhu umwe wepulangunga a dipae nge, ndele onda li nda dula okuya onhapo noshipute nda tuwa nombele.”

Waldo ka li a hafa eshi omukulukadi waye a hovela okukonakona Ombiibeli nEendombwedi daJehova. Okwa ti: “Onda li ndi tonde Eendombwedi, nomafimbo amwe onda li handi di tuku noku di ula omalaka mai. Ndele alushe oda li hadi popi naame nombili.”

Mokweendelako kwefimbo, Waldo naye okwa li a hovela okukonakona Ombiibeli. Okwa ti: “Kasha li shipu okutula moilonga osho nda li handi lihongo. Onda li nda tomhwa kutya nghi na fiku ndi dule okupangela ehandu lange.” Ashike osho e lihonga mOmbiibeli oshe mu kwafela a ninge omalunduluko monghalamwenyo yaye.

Waldo okwa ti: “Efiku limwe, Alejandro, omumwatate oo a konakona naame Ombibeli, okwa li a lombwela nge ndi leshe Ovagalati 5:22. . . . Alejandro okwa popya kutya itandi dulu okukulika omaukwatya oo keenghono dange, ndele ponhele yaasho, okekwafo lomhepo iyapuki yaKalunga. Oshili ya tya ngaho oya li ya lundulula filufilu etaleko lange.”

Molwaashi Waldo okwa li e na elineekelo kutya Jehova ote mu kwafele, okwa li a dula okweefa po outondwe monghalamwenyo yaye. Okwa ti: “Ovapambele vange nosho yo ookaume kange vonale ova kumwa eshi nda ninga omalunduluko e fike opo.” Okwa weda ko a ti: “Jehova okwa lundulula nge; nda li omulumenhu welongifo leenghono, ndele ta ningi nge omunambili.”