Twikila okukulika ohole yoye yokuhola Jehova nosho yo ovanhu vakweni

1. Oshili ilipi we lihonga, eshi opo wa hovele okukonakona Ombiibeli?

MBELA oto dimbuluka, eshi opo wa hovele okukonakona Ombiibeli? Otashi dulika sha li she ku kumwifa okushiiva kutya Kalunga oku na edina. Otashi dulika wa li wa pepelelwa, eshi wa shiiva kutya Kalunga iha hepeke ovanhu momundilo woheli. Otashi dulika yo wa li wa tunhukwa omolweteelelo lenyumuko loku ka mona vali ovaholike voye ovo fya noku ka kala vali pamwe navo moparadisa kombada yedu.

2. Kakele kokulihonga oshili yOmbiibeli, exumokomesho la wedwa po lilipi wa ninga? (Ovaefeso 5:1, 2)

² Ohole yoye yokuhola Jehova oya enda tai kulu, eshi wa kala to konakona Eendjovo daKalunga. Ohole ya tya ngaho, oye ku linyengifa u tule moilonga osho we lihonga. Owa ninga omatokolo e li pandunge a kanghamena komafinamhango Ombiibeli. Owa lundulula oikala nosho yo elihumbato loye, molwaashi owa hala okuhafifa Kalunga. Ngaashi ashike okaana haka hopaenene omudali wako omunahole, oto twikile okuhopaenena Xo womeulu. — Lesha Ovaefeso 5:1, 2.

3. Omapulo elipi tashi dulika tu lipule?

³ Otashi dulika tu lipule kutya: ‘Mbela ohole yange yokuhola Jehova oya pamenena paife shi dulife eshi opo nda ningi Omukriste? Okudja peninginifo lange, mbela onghedi yange yokudiladila neenghatu dange oda kala ngoo metwokumwe nonghedi yaJehova yokudiladila, unene tuu ngeenge tashi uya pokuulikila ovamwatate novamwameme ohole?’ Ngeenge “ohole yoye yotete” oya talala monghedi yonhumba, ile yongadi, ino teka omukumo. Osho osha li yo sha ningilwa Ovakriste vopefimbo lovayapostoli. Jesus ka li e ve liteeka po, noite ke tu liteeka po yo. (Eh. 2:4, 7) Oku shii kutya ohatu dulu natango okuxwameka ohole yetu, oyo twa li tu na tete, eshi twe lihonga oshili.

4. Oshike hatu ka kundafana moshitukulwa eshi?

⁴ Moshitukulwa eshi, ohatu ka kundafana nghee hatu dulu okutwikila okukulika ohole yetu yokuhola Jehova nosho yo ovanhu vakwetu. Opo nee ohatu ka tala komanangeko noupuna oo hatu mono nosho yo vamwe, ngeenge otwa kulike ohole yetu yokuhola Jehova novanhu vakwetu.

KULIKA OHOLE YOKUHOLA JEHOVA

5-6. Omashongo elipi omuyapostoli Paulus a li a taalela pefimbo loukalele waye, ndele oshike she mu linyengifa a twikile okulongela Jehova?

⁵ Omuyapostoli Paulus okwa hafela onghalamwenyo moilonga yaJehova, ashike okwa li e na okulididimikila omashongo mahapu. Paulus okwa kala ha i momalweendo male, nomalweendo a tya ngaho kaa li a pu pefimbo lavo. Omafimbo amwe, Paulus okwa li a shakeneka momalweendo aye ‘eenghalo didjuu, ngaashi momilonga’ nosho yo “okudja kovanyeki.” Peemhito dimwe, okwa li yo a dengwa kovatondi vaye. (2 Kor. 11:23-27) Ovamwaxe vaPaulus haalushe va li hava ulike olupandu li na sha neenghendabala daye da mana mo doku va kwafela. — 2 Kor. 10:10; Fil. 4:15.

⁶ Oshike sha kwafela Paulus a twikile okulongela Jehova? Paulus okwe lihonga shihapu kombinga yomaukwatya aJehova mOmishangwa nosho yo koimoniwa yaye mwene. Okwa li a tomhwa kutya Jehova Kalunga oku mu hole. (Rom. 8:38, 39; Ef. 2:4, 5) Okwa li a hovela okukala e hole Jehova neenghono. Paulus okwa ulika ohole yaye yokuhola Jehova ‘mokuyakula nokutwikila okuyakula ovayapuki.’ — Heb. 6:10.

7. Omonghedi imwe ilipi hatu dulu okukulika ohole yetu yokuhola Jehova?

⁷ Ohatu dulu okukulika ohole yetu yokuhola Kalunga mokukonakona noukeka Eendjovo daye. Eshi to lesha Ombiibeli, kendabala okumona osho ovelishe keshe tai holola kombinga yaJehova. Lipula kutya: ‘Ongahelipi ehokololo eli tali ulike kutya Jehova oku hole nge? Otali pe nge omatomheno elipi okukala ndi hole Jehova?’

8. Ongahelipi eilikano tali dulu oku tu kwafela tu kulike ohole yokuhola Kalunga?

⁸ Onghedi imwe omo hatu dulu okukulika ohole yokuhola Jehova omokukala hatu mu ilikana pandjikilile noku mu mbubulila omitima detu. (Eps. 25:4, 5) Opo nee Jehova ota ka nyamukula omailikano etu. (1 Joh. 3:21, 22) Omumwameme Khanh wokoAsia, okwa ti: “Ohole yange yokuhola Jehova pehovelo oya li ye likolelela keshiivo, ashike ohole ya tya ngaho oya ka kala yomoule, eshi nda ka mona nghee Jehova ta nyamukula omailikano ange. Osho osha li she linyengifa nge ndi kale nda hala okuninga osho tashi mu hafifa.”b

KULIKA OHOLE YOKUHOLA OVANHU VAKWENI

9. Ongahelipi Timoteus a li a ulika kutya ota ningi exumokomesho mokuulikila ovamwaxe ohole?

⁹ Konima yomido donhumba, eshi Paulus a ninga Omukriste, okwa li a shakeneka omunyasha e na omaukwatya mawa wedina Timoteus. Timoteus okwa li e hole Jehova nosho yo ovanhu. Paulus okwa li a lombwela Ovafilippi, a ti: “Nghi wete pe na vali umwe e na omaukwatya a fa [aTimoteus] ou ta dulu oku mu fila oshisho.” (Fil. 2:20) Paulus ka li ta pandula Timoteus, molwaashi ha dulu okuunganeka oinima, ile molwaashi e li omupopi womoipafi, ndele okwa li a kuminwa ohole yaTimoteus yokuhola ovamwaxe. Nopehe na omalimbililo, omaongalo oo Timoteus a li ha talele po okwa li haa kala a teelela nodjuulufi omatalelepo aye. — 1 Kor. 4:17.

10. Ongahelipi Anna nomushamane waye va ulikila ovamwaxe ohole?

¹⁰ Nafye ohatu dulu yo okukonga eenghedi tu kwafele Ovakriste vakwetu. (Heb. 13:16) Natu ka taleni koshimoniwa shaAnna, oo a popiwa moshitukulwa sha tetekela. Konima yoshikungulu shinene, ye nomushamane waye ova li va talela po oukwaneumbo umwe wEendombwedi nova li va didilika kutya oipeleki yeumbo loukwaneumbo oo oya nyonaunwa koshikungulu. Oshidjemo, oukwaneumbo oo kawa li u na oikutu i yela. Anna okwa ti: “Otwa li twa kufa oikutu yavo, hatu i kosho, ndele hatu i alula ya kangulwa noya tonywa nawa. Osho osha li oshinima shanafangwa kufye, ashike osha pameka oukaume wetu, oo wa kala wa kola fiyo okunena.” Ohole yaAnna nosho yo yomushamane waye yokuhola ovamwaxe, oya li ye ve linyengifa va yandje ekwafo tali longo. — 1 Joh. 3:17, 18.

11. (a) Eenghendabala detu dokuulikila vamwe ohole ohadi va kumu ngahelipi? (b) Metwokumwe nOmayeletumbulo 19:17, Jehova ohe linyenge ngahelipi, ngeenge hatu ulike ohole?

¹¹ Ngeenge hatu ungaunga navamwe pahole nosho yo nolukeno, luhapu ohava didilike kutya ohatu hopaenene onghedi omo Jehova ha diladila noha katuka. Otashi dulika nokuli va pandule unene olukeno letu shi dulife pwaasho hatu diladila. Khanh, oo a popiwa metetekelo, ota dimbuluka nawa ovo va li ve mu kwafela. Okwa ti: “Onda pandula neenghono ovamwameme aveshe ovanahole ovo va li hava i naame moukalele. Ova li hava pitula nge, hava shivi nge tu kale lye pamwe navo omusha nohava alulile nge keumbo nombili. Paife onda mona kutya osho osha li hashi pula eenghendabala da mana mo. Nova li ve shi ninga pahole.” Oshoshili kutya hakeshe umwe te ke tu pandula omolwaashishe osho twe mu ningila. Khanh okwa popya shi na sha naavo ve mu kwafela, a ti: “Ohandi kala nda hala oku va shunifila osho va ningila nge, ndele aveshe nghi shii apa hava di. Ashike Jehova oku shi shii, nohandi ilikana, opo e va shunifile ponhele yange.” Khanh oku li mondjila. Jehova oha didilike nokuli noilonga inini yolukeno oyo hatu ningile vamwe. Ohe i tale ko i li eyambo li na ondilo nosho yo omukuli oo ta ka shunifa. — Lesha Omayeletumbulo 19:17.

12. Ongahelipi ovamwatate tava dulu okuulika ohole meongalo? (Tala yo omafano.)

¹² Ngeenge ou li omumwatate, ongahelipi to dulu okuulikila vamwe ohole nokuninga oinima yonhumba, opo u va kwafele? Omumwatate omunyasha wedina Jordan okwa li a pula omukulunhuongalo umwe nghee ta dulu okuninga shihapu, opo a kwafele meongalo. Omukulunhuongalo oo okwa li e mu pandula omolwexumokomesho olo a li a ninga nale nokwe mu pa omayele anghee ta dulu okuninga shihapu. Pashihopaenenwa, okwa pa Jordan eetepo a kale ha fiki kuyele kOlupale lOuhamba nokupopifa ovanhu, a kufe ombinga mokwoongala nokukala ha udifa pandjikilile pamwe nongudu yavo yoilonga yomomapya nokukonga eenghedi dokondadalunde a kwafele vamwe. Eshi Jordan a tula moilonga omayele oo, ka li ashike e lihonga ounghulungu mupe, ndele okwa li yo e lihonga okukulika ohole yokuhola ovamwaxe. Jordan okwe lihonga kutya ngeenge omumwatate okwa ningi omuyakuliongalo, iha hovele okukwafela ovanhu vakwao, ndele oha twikile oku va kwafela. — 1 Tim. 3:8-10, 13.

13. Ongahelipi ohole ye linyengifa omumwatate wedina Christian a kale a wana vali okuninga omukulunhuongalo?

¹³ Ongahelipi ngeenge owa li nale omuyakuliongalo, ile omukulunhuongalo? Jehova oha dimbuluka oilonga oyo wa li we mu longela monakudiwa nosho yo ohole oyo ye ku linyengifa, opo u i longe. (1 Kor. 15:58) Oha didilike yo ohole oyo to twikile okuulika. Omumwatate wedina Christian okwa li a uda nai, eshi a li a kufwa oufembanghenda wokukala omukulunhuongalo. Okwa popya, a ti: “Onda li nda tokola, opo ndi longele Jehova omolwohole, kashi na nee mbudi kutya ondi na omaufembanghenda onhumba, ile hasho.” Mokweendela ko kwefimbo, okwa li a nangekwa po vali e li omukulunhuongalo. Christian okwa ti: “Onda li nda tila kanini okulonga vali ndi li omukulunhuongalo. Ashike onda li nda tokola kutya ngeenge Jehova okwa pitika nge natango ndi kale omukulunhuongalo, ohandi ke shi ninga, molwaashi ondi mu hole nondi hole ovamwatate novamwameme.”

14. Oshike to lihongo kwaasho omumwameme wokoGeorgia a popya?

¹⁴ Ovapiya vaJehova ohava ulikile yo ovanhu vakwao ohole. (Mat. 22:37-39) Pashihopaenenwa, Elena, omumwameme wokoGeorgia, okwa ti: “Potete, oshinima osho sha li she linyengifa nge ndi udife, ohole yokuhola Jehova. Ndele eshi ohole yange yokuhola Tate yetu womeulu ya enda tai kulu, ohole yange yokuhola ovanhu vakwetu nayo oya enda tai kulu. Onda kendabala okudiladila komaupyakadi oo va li va taalela nosho yo oshikundafanwa osho tashi dulu okukuma omitima davo. Eshi nda kala handi diladila kombinga yavo monghedi ya tya ngaho, oshe linyengifa nge ndi kale nda halelela oku va kwafela.” — Rom. 10:13-15.

OMANANGEKO NOUPUNA OO HAA DI MOKUULIKILA VAMWE OHOLE

15-16. Ngaashi sha ulikwa momafano, omanangeko noupuna elipi haa di mokuulikila vamwe ohole?

¹⁵ Ngeenge hatu ulikile ovamwatate ohole, havo aveke hava mono ouwa. Konima eshi omukifi wekomba wo-COVID-19 wa tukuka, omumwatate wedina Paolo nanekulu laye ova li va kwafela ovamwameme ovanamido vahapu ve lihonge nghee ve na okulongifa oikwaelektronika yavo, opo va dule okuudifa. Omumwameme umwe, oo potete a li e wete shidjuu okulongifa oshikwaelektronika shaye, lwanima okwa li a pondola. Okwa li a dula oku shi longifa, opo a shive ovapambele vaye kEdimbuluko. Omilongo hamano vomuvo ova li va dula okukala po okupitila pavidio. Omumwameme nosho yo ovapambele vaye aveshe ova li va mona ouwa omolweenghendabala daPaolo nomukulukadi waye. Lwanima, omumwameme okwa ka shangela Paolo, a ti: “Tangi eshi to tu hongo tu li ovanamido. Nghi na fiku ndi dimbwe efiloshisho laJehova nosho yo oilonga yoye youdiinini.”

¹⁶ Oimoniwa ya tya ngaho, oya honga Paolo oshilihongomwa sha fimana. Okwa li a dimbulukifwa kutya ohole oya fimanenena i dule eshiivo, ile okudula kwopaushitwe. Okwa popya, a ti: “Onda li handi longo ndi li omupashukilishikandjo. Kunena, onda mona kutya nonande ovaudifi otashi dulika va dimbwa oipopiwa yange, otava dimbuluka natango ekwafo tali longo olo nda li nde va pa.”

17. Olyelye vali ta ka mona ouwa, ngeenge hatu ulike ohole?

¹⁷ Ngeenge hatu ulikile vamwe ohole, ohatu mono ouwa meenghedi odo inatu teelela. Jonathan, oo ha di moNew Zealand, ota tu kumwe nasho. Olomakaya limwe moshanga shomutenya, okwa li a mona omukokolindjila ta udifa oye aeke a lamba opate. Jonathan okwa li a tokola okukala ha longo pamwe nomukokolindjila oo mOmalomakaya omutenya. Ka li a didilika pefimbo opo nghee eenghatu daye dolukeno tadi mu etele ouwa. Jonathan okwa ti: “Pomhito oyo kanda li handi hafele oukalele. Ashike eshi nda li nda pwilikina konghedi yokuhonga yomukokolindjila oo, nonda mona nghee ta pondola moukalele waye, osha li she linyengifa nge ndi kale ndi hole oukalele. Onda li yo nda mona eume lokoikuni nomeva lokeenhwa keendima olo la li la kwafela nge ndi kule pamhepo, ndi kale ndi hole oukalele nondi ehene popepi elela naJehova.”

18. Jehova okwa hala tu ninge shike?

¹⁸ Jehova okwa hala atusheni tu kulikeni ohole yetu yoku mu hola nosho yo ovanhu vakwetu. Ngaashi twe lihonga, ohatu dulu okukulika ohole yokuhola Jehova mokulesha Eendjovo daye, okudilonga kudo nokupopya naye pandjikilile okupitila meilikano. Ohatu dulu okukulika ohole yetu yokuhola ovamwatate novamwameme moku va kwafela meenghedi tadi longo. Eshi ohole yetu tai ende tai kulu, ohatu ka ehena popepi elela naJehova nosho yo novamwatate novamwameme. Ohatu ka hafela oukaume wa tya ngaho fiyo alushe.