Nghee hatu dulu okukaleka ohole yetu yokuholafana ya xwama

1-2. (a) Omolwashike omuyapostoli Paulus a ti kutya ohole oi li oukwatya wa “fimanenena”? (b) Omapulo elipi hatu ka kundafana?

ESHI omuyapostoli Paulus a li ta kundafana kombinga yeitavelo, eteelelo nosho yo ohole, okwa ti kutya ‘ohole oyo ya fimanenena i dule [omaukwatya] makwao.’ (1 Kor. 13:13) Omolwashike Paulus a ti ngaho? Monakwiiwa itatu ka pumbwa vali okukala neitavelo momaudaneko aKalunga e na sha nounyuni waye mupe, ile eteelelo kutya omaudaneko oo otaa ka wanifwa, molwaashi otaa ka kala nale a wanifwa. Ashike ohatu ka kala alushe twa pumbwa ohole yokuhola Jehova nosho yo ovanhu vakwetu. Ohole yetu yoku va hola otai ka pumbwa okutwikila okukula fiyo alushe.

² Molwaashi ohatu ka pumbwa alushe okukala tu na ohole, ohatu ka kundafana omapulo avali. Lotete, omolwashike twa pumbwa okukala tu holafane? Etivali, ongahelipi hatu dulu okuulika kutya otu holafane? Etitatu, ongahelipi hatu dulu okukaleka ohole yetu yokuholafana ya xwama?

OMOLWASHIKE TU NA OKUKALA TU HOLAFANE?

3. Otu na omatomheno elipi okuholafana?

³ Omolwashike sha fimana okukala tu holafane? Ngeenge hatu ulikile ovamwatate ohole, kungaho, ohatu ulike kutya otu li Ovakriste vashili. Jesus okwa lombwela ovayapostoli vaye, a ti: “Kungaho, ovanhu aveshe otava ka shiiva kutya nye ovahongwa vange ngeenge omu holafane.” (Joh. 13:35) Shikwao vali, okukala tu holafane ohashi tu kwafele tu kale twa hangana. Paulus okwa ti kutya ohole ‘ohai hanganifa ovanhu filufilu.’ (Kol. 3:14) Ashike ope na etomheno vali likwao la fimana kutya omolwashike tu na okukala tu holafane. Omuyapostoli Johannes okwa shangela ovaitaveli vakwao, a ti: “Keshe oo e hole Kalunga oku na yo okukala e hole omumwaxe.” (1 Joh. 4:21) Ngeenge hatu ulikilafana ohole, ohatu ulike kutya otu hole Kalunga.

4-5. Ulika nghee ohole yetu yokuhola Kalunga ya pambafana nohole yetu yokuholafana.

⁴ Omonghedi ilipi ohole yetu yokuhola Kalunga ya pambafana filufilu nohole yetu yokuhola ovamwatate novamwameme? Oku shi faneka, natu ka taleni kekwatafano olo li li pokati komutima wetu nosho yo oitukulwa ikwao yolutu letu. Ndokotola oha pupu edengo lomutima wetu poshikesho, opo a mone kutya ou na eenghono, ile owa nghundipala. Kungaho, ota dulu okumona ouyelele wonhumba u na sha nonghalo yomutima wetu. Oshilihongomwa shilipi hatu lihongo moshihopaenenwa eshi shi na sha nohole?

⁵ Ndokotola oha dulu okumona ouyelele wonhumba u na sha noukolele womutima wetu, ngeenge ta konakona edengo lao. Nafye ngeenge ohatu konakona exwamo lohole yetu yokuhola ovanhu, ohatu ka mona kutya otu hole Kalunga shi fike peni. Ngeenge otwa didilike kutya ohole yetu yokuhola ovaitaveli vakwetu oya nghundipala, otashi ulike kutya ohole yetu yokuhola Kalunga nayo otai ende tai nghundipala. Ashike ngeenge otwa kala hatu ulikile ovaitaveli vakwetu ohole, osho otashi ulike kutya ohole yetu yokuhola Kalunga oya xwama.

6. Ngeenge ohole yetu yokuhola ovamwatate novamwameme otai nghundipala, omolwashike shi li oupyakadi wa kwata moiti? (1 Johannes 4:​7-9, 11)

⁶ Ngeenge otwa mono kutya ohole yetu yokuhola ovamwatate novamwameme otai ende tai nghundipala, osho oshi li oupyakadi wa kwata moiti. Omolwashike? Omolwaashi otashi ulike kutya ekwatafano letu naJehova oli li monghuwo i na onghambe. Omuyapostoli Johannes okwe shi popya sha yela, eshi e tu dimbulukifa, a ti: “Ou ehe hole omumwaxe oo e wete, ita dulu okukala e hole Kalunga oo ehe wete.” (1 Joh. 4:20) Oshilihongomwa kufye? Jehova ota ka kala ashike a hafa, ngeenge otu “holafane.” — Lesha 1 Johannes 4:​7-9, 11.

ONGAHELIPI HATU DULU OKUULIKA KUTYA OTU HOLAFANE?

7-8. Omeenghedi dimwe dilipi hatu dulu okuulika kutya otu holafane?

⁷ Ohatu lesha lwoikando mEendjovo daKalunga oshipango osho tashi ti kutya “kaleni mu holafane.” (Joh. 15:​12, 17; Rom. 13:8; 1 Tes. 4:9; 1 Pet. 1:22; 1 Joh. 4:11) Ashike ohole eliudo li li momutima wetu, ile ounhu wetu womeni, nokape na oo ta dulu okumona momutima wetu. Ongahelipi vamwe tava ka mona kutya otu va hole? Okupitila meendjovo nosho yo meenghatu detu.

⁸ Ope na eenghedi dihapu omo hatu dulu okuulikila ovamwatate novamwameme kutya otu va hole. Apa otapa shikula oihopaenenwa imwe: “Mokukalafana kweni popyeni oshili.” (Sak. 8:16) ‘Kaleni mu na ombili mokati keni.’ (Mark. 9:50) Kaleni hamu katuka eenghatu mu “ulike kutya omwa fimaneka vamwe.” (Rom. 12:10) “Tambulafaneni.” (Rom. 15:7) ‘Twikileni okudiminafana po.’ (Kol. 3:13) “Kaleni hamu yakulafana momaudjuu.” (Gal. 6:2) “Kaleni nokuhekelekafana.” (1 Tes. 4:18) ‘Twikileni okutungafana.’ (1 Tes. 5:11) ‘Ilikanenafaneni.’ — Jak. 5:16.

9. Omolwashike okuhekeleka vamwe shi li onghedi ya fimana yokuulika kutya otu va hole? (Tala yo efano.)

⁹ Natu ka konakoneni onghedi imwe omo hatu dulu okuulikila vamwe ohole. Ohatu ka konakona ekumaido laPaulus olo tali ti: “Kaleni nokuhekelekafana.” Omolwashike okuhekeleka vamwe ku li onghedi ya fimana yokuulikila vamwe kutya otu va hole? Embo limwe lomauyelele Ombiibeli ola ti kutya oshitya osho Paulus a longifa ‘okuhekelekafana’ otashi ti “okukala popepi naumwe hatu mu tu omukumo, ngeenge a taalela omashongo a kwata moiti.” Ngeenge hatu hekeleke omwiitaveli mukwetu, oo ta mono oixuna, kungaho ohatu mu kwafele a twikile okulongela Jehova noudiinini. Efimbo keshe hatu hekeleke omumwatate, ile omumwameme, ohatu ulike kutya otu mu hole. — 2 Kor. 7:​6, 7, 13.

10. Ekwatafano lilipi li li pokati kolukeno nosho yo okuhekeleka?

¹⁰ Olukeno nokuhekeleka oitya ya pambafana filufilu. Omonghedi ilipi mbela? Ngeenge umwe e uditile olukeno omunhu oo ta mono oixuna, oha kala a hala oku mu hekeleka nokuninga po sha, opo e mu kwafele. Onghee ngeenge tu uditile vamwe olukeno, ohashi tu linyengifa tu va hekeleke. Didilika nghee Paulus a kwatakanifa olukeno laJehova nehekeleko olo Jehova he tu pe. Paulus okwa popya Jehova e li “Xe yefilonghenda naKalunga kehekeleko alishe.” (2 Kor. 1:3) Apa Paulus okwa longifa outumbulilo ‘efilonghenda,’ opo a yelife omaliudo okukala u uditile vamwe olukeno. Onghee hano, Kalunga okwa ifanwa Xe, ile Odjo yefilonghenda, molwaashi oha kala e uditile ovanhu olukeno neenghono. Olukeno olo ohali mu linyengifa e tu hekeleke “momaudjuu etu aeshe.” (2 Kor. 1:4) Ngaashi ashike omeva a yela taa di mofifiya haa talaleke ovo va fya enota, Jehova naye oha talaleke nokuhekeleka ovo va wililwa po. Ongahelipi hatu dulu okuhopaenena Jehova mokukala tu uditile vamwe olukeno noku va hekeleka? Onghedi imwe omo hatu dulu okuninga ngaho, omokukulika omaukwatya oo tae tu kwafele tu kale tu na olukeno nokuhekeleka vamwe. Omaukwatya amwe oo oelipi?

11. Metwokumwe nOvakolossi 3:12 nosho yo 1 Petrus 3:​8, omaukwatya vali elipi tae ke tu kwafela tu kale tu hole vakwetu noku va hekeleka?

¹¹ Oshike tashi ke tu kwafela tu kaleke po ohole oyo twa pumbwa, opo tu ‘kale nokuhekelekafana’ efiku keshe? Otwa pumbwa okukulika omaukwatya ngaashi, oukwao wananghali, ohole youmwainafana nosho yo olukeno. (Lesha Ovakolossi 3:12; 1 Petrus 3:8.) Ongahelipi omaukwatya oo tae ke tu kwafela? Ngeenge otwa kala tu uditile ovamwatate olukeno nokukala tu na ko nasha navo filufilu, ohatu ka kala twa halelela oku va hekeleka, ngeenge ve li moudjuu. Ngaashi Jesus a popya, “osho shi yadi momutima okanya osho taka popi. Omunhu muwa oha pitifa mo oinima iwa memona laye liwa.” (Mat. 12:​34, 35) Okuhekeleka ovamwatate novamwameme, ovo ve li moudjuu, oshi li onghedi ya fimana omo hatu ulike kutya otu va hole.

ONGAHELIPI HATU DULU OKUKALEKA OHOLE YETU YOKUHOLAFANA YA XWAMA?

12. (a) Omolwashike twa pumbwa okukala twa lungama, opo ohole yetu yokuholafana iha talale? (b) Epulo lilipi hatu ka kundafana paife?

¹² Atusheni otwa hala tu ‘kale tu holafane.’ (1 Joh. 4:7) Ashike osha fimana kufye okudimbuluka kutya Jesus okwa londwela a ti kutya ‘ohole yavahapu otai ka talala.’ (Mat. 24:12) Jesus ka li ta popi kutya ovahongwa vaye vahapu otava ka efa po okuulikilafana ohole. Ndele otu na okukala twa lungama, opo tuha nwefwe mo koikala yovanhu vomounyuni ovo vehe na ohole. Tu na osho momadiladilo, natu ka taleni kepulo eli la fimana: Oshike tashi ke tu kwafela tu mone ngeenge ohole yetu yokuhola ovamwatate novamwameme oya xwama ngoo?

13. Oshike tashi dulu oku tu kwafela tu shiive, ngeenge ohole yetu yokuhola ovamwatate oya xwama?

¹³ Onghedi imwe omo hatu dulu okumona kutya ohole yetu oya xwama, omokukonakona nghee hatu ungaunga neenghalo donhumba monghalamwenyo. (2 Kor. 8:8) Onghalo imwe oya popiwa komuyapostoli Petrus, a ti: “Komesho yaaishe, kaleni mu holafane nohole yomoule, molwaashi ohole ohai tuvikile onduba yomatimba.” (1 Pet. 4:8) Onghee omaunghundi nokuhawanenena kwavamwe otaku dulu okuyeleka ohole yetu.

14. Metwokumwe na 1 Petrus 4:​8, ohole yoludi lilipi twa pumbwa okukala tu na? Shi faneka.

¹⁴ Natu ka konakoneni noukeka eendjovo daPetrus. Oshitukulwa shotete shovelishe 8 osha popya oludi lohole oyo tu na okukala tu na, ‘ohole yomoule.’ Oshitya osho sha longifwa kuPetrus “yomoule” paulelalela otashi ti kutya “okutamunuka mo.” Oshitukulwa oshitivali shovelishe oyo osha popya osho hatu ka ninga, ngeenge otu na ohole yomoule yokuhola vamwe. Ohole yomoule otai ke tu kwafela tu tuvike omatimba ovamwatate. Ohatu dulu oku shi faneka ngaha: Faneka momadiladilo oshitaafula sha kunyuka. Oto dulu okukufa elapi, ndele to li tamununa mo nokutuvikila apeshe opo pa kunyuka. Monghedi ya faafana, ngeenge otu na ohole yomoule yokuhola ovamwatate, ohatu ka ‘tuvika’ pafaneko, ile tu va dimine po, kashi fi ashike oshikando shimwe, ile ivali, ndele “onduba yomatimba.”

15. Ngeenge ohole yetu yokuhola ovamwatate novamwameme oya xwama, ohatu ka dula okuninga shike? (Ovakolossi 3:13)

¹⁵ Ohole yetu yokuhola vamwe oya pumbwa okukala ya xwama, opo tu dule oku va dimina po omolwokuhawanenena kwavo, nokuli nonande oshidjuu omafimbo amwe. (Lesha Ovakolossi 3:13.) Ngeenge otwa dimine po vamwe, ohatu ka ulika kutya ohole yetu oya xwama notwa hala okuhafifa Jehova. Oshike vali tashi dulu oku tu kwafela, opo tu dimine po vamwe omolwomapuko avo nokuhahanduka diva omolwomaukwatya avo mai?

16-17. Oshike vali tashi ke tu kwafela, opo tuha konenene omapuko avakwetu? Shi faneka. (Tala yo efano.)

¹⁶ Otwa pumbwa okuyandja elitulemo komaukwatya mawa ovamwatate novamwameme, ndele hakwaao mai. Natu ka taleni keyelekanifo eli. Diladila nee ngeno u li pokavilo novamwatate novamwameme, ndele konima yokavilo, omwe lifaneka. Omwe lifaneka omafano atatu mwa ningila ngeenge eli lotete inali dja mo nawa makwao oku li nawa. Paife ou na omafano atatu. Ashike mulimwe lomuo owa didilika kutya omumwatate umwe ite limemesha. Oto ka ninga po shike shi na sha nefano olo? Oto ke li dima mo, molwaashi ou na natango omafano makwao avali, omo mu na ovamwatate aveshe tave limemesha, mwa kwatelwa omumwatate oo.

¹⁷ Natu faafanifeni omafano oo twa tuvikila naasho tu na momadiladilo. Luhapu ohatu diladila komafimbo mawa oo twa hafela pamwe novamwatate novamwameme. Ndele natu tye nee pomhito imwe yomeemhito odo, omumwatate, ile omumwameme okwa popya sha, ile a ninga sha osho shihe li pahole. Ohatu ka ninga po shike, ngeenge otwa dimbuluka osho a popya, ile a ninga? Otu na okudimbwa, ile okudima mo ediladilo la tya ngaho. (Omayel. 19:11; Ef. 4:32) Ohatu dulu okudimina po ovamwatate novamwameme omolwoupuko ovo, molwaashi ohatu dimbuluka omafimbo mawa mahapu oo twa hafela pamwe navo. Omadiladilo a tya ngaho oo twa hala okutuvikila nokukala twe a lenga.

OMOLWASHIKE OHOLE YA PUMBIWA, UNENE TUU KUNENA?

18. Oitwa ya fimana i na sha nohole ilipi twa kundafana moshitukulwa eshi?

¹⁸ Omolwashike twa hala okukaleka ohole yetu yokuholafana ya xwama? Ngaashi twa kundafana, ngeenge hatu ulikile ovamwatate novamwameme ohole, ohatu ulike kutya otu hole Jehova. Ongahelipi hatu dulu okuulika kutya otu hole ovaitaveli vakwetu? Onghedi imwe omo hatu dulu okuninga ngaho omokukala hatu va hekeleke. Olukeno otali ke tu linyengifa tu dule ‘okuhekelekafana.’ Ongahelipi hatu dulu okukaleka ohole yetu yokuholafana ya xwama? Ohatu dulu okuninga ngaho mokudimina po ovamwatate omolwomapuko oo va ninga, nonande omafimbo amwe ihashi kala shipu.

19. Omolwashike sha fimana, unene tuu kunena, okuulika kutya otu holafane?

¹⁹ Omolwashike sha fimana, unene tuu kunena, okuulikilafana ohole? Didilika etomheno olo Petrus a yandja, a ti: ‘Exulilo loinima aishe ola ehena popepi. Onghee hano, kaleni mu holafane nohole yomoule.’ (1 Pet. 4:​7, 8) Eshi exulilo lounyuni ou woukolokoshi tali ehene popepi elela, oshike twa teelela? Jesus okwa li ta popi kombinga yovahongwa vaye, eshi a ti: ‘Otamu ka tondwa koiwana aishe omolwedina lange.’ (Mat. 24:9) Opo tu kale ovadiinini kuJehova, nonande ope na outondwe wa tya ngaho, otwa pumbwa okukala twa hangana. Ngeenge otu hole ovamwatate novamwameme, Satana ita ka dula oku tu tukaula, molwaashi ohole ‘ohai hanganifa ovanhu filufilu.’ — Kol. 3:14; Fil. 2:​1, 2.