Kalunga ta yeleke eitavelo laAbraham

MBELA ou wete osho Abraham ta ningi mefano olo? Oku kwete omukonda meke laye, a hala okudipaa omonamati waye. Omolwashike a hala okudipaa omona waye? Tete, natu ka tale kutya osha li sha enda ngahelipi opo Abraham naSara va dale okaana okamati.

Dimbulukwa kutya Kalunga okwa li a udanekela Abraham naSara kutya otava ka dala okaana okamati. Ndele osho osha li tashi monika sha fa itashi shiiva, molwaashi Abraham naSara ova li va kulupa. Ndelenee Abraham okwa li a itavela kutya Kalunga ota dulu okuninga keshe osho tashi monika sha fa itashi shiiva. Oshike nee sha ka ningwa po?

Eshi Abraham a li e na omido 100, ofimbo Sara a li e na omido 90, ova dala okamonamati kavo ndele tave ka luku Isak. Isak okwa ka dalwa pa pita oule wodula okudja eshi Kalunga a li a udanekela Abraham naSara oludalo. Osho otashi ulike kutya Kalunga oha wanifa po omaudaneko aye.

Eshi Isak a kula, Jehova Kalunga okwa li a yeleka eitavelo laAbraham. Kalunga okwa ifana Abraham a ti: ‘Abraham!’ Abraham okwa nyamukula a ti: ‘Aame ou!’ Opo nee Kalunga okwe mu lombwela a ti: ‘Kufa Isak, omona woye ewifa ndele tamu i komhunda oyo handi ke ku ulikila. Ngeenge omwa fiki oko, kufa omona woye u mu dipae u mu ninge exwikiloyambo.’

Abraham ka li tuu a nyika oluhodi eshi a uda eendjovo odo! Osha yela kutya okwa li a nyika oluhodi, molwaashi okwa li e hole omonamati waye neenghono. Natango, dimbulukwa kutya Kalunga okwa li a udanekela Abraham kutya ovana vaye otava ka kala medu laKanaan. Mbela osho osha li ngoo tashi ka shiiva vali ngeenge Isak okwa dipawa? Nonande Abraham ka li e shi shii kutya omolwashike Kalunga e mu lombwela a yambe po Isak, okwa li e lilongekida oku shi ninga, molwaashi okwa li ha dulika kuKalunga.

Eshi Abraham va fika komhunda oyo Kalunga e va ulikila, okwa tunga oaltari ndele ta mange Isak komaoko. Opo nee okwa tula Isak koaltari ndele ta kufa mo omukonda waye e mu dipae ngeno. Ohaluka omweengeli waKalunga okwe mu ingida a ti: ‘Abraham, Abraham!’ Ndele Abraham okwa nyamukula a ti: ‘Aame ou!’

Kalunga okwa lombwela Abraham okupitila momweengeli oo a ti: ‘Ino dipaa omona woye, ile u mu yahameke. Paife ondi shi shii kutya ou na eitavelo, molwaashi ino anya okuyambela nge omona woye ewifa.’

Abraham ka li tuu e na eitavelo la kola muKalunga! Okwa li a itavela kutya Jehova Kalunga iha nyengwa kusha. Onghee hano, okwa li a itavela kutya Jehova ota dulu okunyumuna Isak koufi. Ashike Kalunga ka li a hala shili Abraham a dipae Isak. Okwa li ashike a hala okuyeleka eitavelo laAbraham. Nomolwaasho Kalunga okwa li a ningifa odi i patekene moshixwa osho sha li popepi ndele ta lombwele Abraham a ka tale ko odi oyo, opo e i yambe po ponhele yaIsak.